मरकुस 2

लकवै गै रोगी नै ठीक करणो

(मत्ती 9:1-8; लूका 5:17-26)

1केई दिना गै बाद में यीसू पाछा कफरनहूम परदेस में आया अर लोगां नै लागग्यो कै बे किंगैई घरे आयेड़ा है। 2फेर इता लोग भेळा हो'ग्या कै बारनै कनै पग रखण नै ई जिग्यां कोनी बची अर यीसू बानै बचन सुणाण लागरया। 3बिं टेम चार आदमी एक लकवै गै रोगी नै चक'गे बांगै कनै ल्याया। 4पण जद बे बोळी भीड़ गै कारण बांगै कनै कोनी जा सक्या तो झिकै मकान में यीसू बेठया बिं मकान गी छत नै अधेड़ गे सणै माची बिं आदमी नै बांगै सामै उतार दियो। 5यीसू बां लोगां गो बिस्वास देख गे बिं लकवै गै रोगी नै केयो, “बेटा तेरा पाप माफ होग्या।”

6बिं टेम बठै केई सासतरी बेठया हा। बे आप आपगै मन में सोचण लाग्या कै, 7ओ आदमी इयां क्यामी केण लागरयो है परमेसर गै अलावा दूसरो कोई पाप माफ कर ई कोनी सकै ओ तो परमेसर गी निंदा करण लागरयो है।

8यीसू जद ई आत्मा में जाणग्या कै ऐ आपगै मन में इंया सोचण लागरया है जद बां बानै केयो, “के थे थारै मन में हिस्यो क्यूं सोचण लागरया हो?” 9थे जाणो हो कै ईं आदमी ऊं ओ केणो सोरो है कै, “जा तेरा पाप माफ होग्या,” पण ओ केणो सोरो कोनी कै, “उठ, खड़यो हो अर आपगी मांची चक'गे उड़ज्या।” 10पण अब थे जाणल्यो कै मिनख गै बेटै नै धरती पर पाप माफ करण गो अधिकार है बां बिं लकवै गै रोगी नै केयो कै, 11मैं तनै केऊं, “तेरी मांची चकले अर आपगै घरे उड़ज्या।”

12जद बो खड़यो होयो अर सारा गै सामणै आपगी मांची चक'गे घरे उड़ग्यो। ओ देख गे सारा हेरान हो'ग्या अर परमेसर गी बडाई करण लागग्या कै इयां पेलां कदी कोनी देख्यो।

लेवी नै बुलाणो

(मत्ती 9:9-13; लूका 5:27-32)

13एकर यीसू कफरनहूम ऊं चाल गे गलील गै झील गै किनारै पर गेया। बठै लोगां गी भीड़ भेळी होण लागगी अर यीसू बानै बचन सुणाण लागग्या। 14इंगै बाद में यीसू बठूं जाण लागरया तो बां रा में हलफई गै बेटै लेवी नै चुंगी गी चोकी पर चुंगी लेंतो देख्यो। यीसू बिनै केयो, “मेरै लारै आ'ज्या।” लेवी दबादब उठगे बांगै लारै चाल पड़यो।

15एक दिन यीसू आपगै चेला गै सागै लेवी गै घरे रोटी जीमण लागरया अर बांगै सागै केई ओर चुंगी लेण आळा रोटी जीमण लागरया झिका नै यहुदी धर्म गा नेता पापी मानता हिस्या केई लोग यीसू गै लारै चालता। 16बठै फरीसी गुट गा केई लोग हा झिका यहुदी नेम सिखाणता। यीसू नै बांगै सागै रोटी जीमता देख्या झिका नै बे पापी लोग मानता। जद बे यीसू गै चेला नै पूछण लाग्या, “थारो गुरू चुंगी लेण आळा अर पापी लोगां सागै खाणो पीणो क्यामी करै?”

17यीसू ओ सुण गे बानै समझायो कै, “चंगा भला लोगां नै डाक्टर गी लोड़ कोनी पडै़ पण बीमार लोगां नै पडै़। मैं धरमी लोगां नै कोनी पण पापी लोगां नै सुधारण आयो हूं।”

बरत गो सवाल

(मत्ती 9:14-17; लूका 5:33-39)

18एकर यूहना गै चेला अर फरीसी गुट गै लोगां बरत राख्यो। केई लोग यीसू नै आ'गे पूछयो कै यूहना गा चेला अर फरीसी गुट गा लोग बरत राखै पण थारा चेला क्यूं कोनी राखै?

19यीसू बानै केयो, “जद तांई बीन बरातीयां गै सागै होवै बे बरत कोनी राख सकै।” 20पण बो दिन आवैगो जद बीन आऊं न्यारो होज्यै'गो बिं टेम ऐ बरत राखैगा।

21कोई आदमी पुराणै कपडै़ पर नुअ कपडै़ गी कारी कोनी लगावै। इयां करैगो तो बा कारी भेळी होगे पुराणै कपडै़ नै पाड़ दैयगी। 22इंयाई कोई आदमी नूंअ दाखरस नै पुराणै चमडै़ गै झोलै में कोनी भरै। क्यूंकै इंया करण ऊं नुओ दाखरस फूल गे चमडै़ गै झोलै नै पाड़ दैयगो। नूंअ दाखरस नै तो नूंअ झोलै में ई भरै।

सबत गो प्रभु

(मत्ती 12:1-8; लूका 6:1-5)

23एकर सबत गै दिन यीसू अर बिंगा चेला खेता माखर जाण लागरया तो चालता चालता बे चेला कणक गी बालां नै तोड़गे भोर भोरगे खाण लागग्या। 24फरीसी गुट गा केई लोग ओ देखगे यीसू नै पूछयो, “तेरा चेला आज गै दिन हिस्यो काम क्यामी करण लागरया?”

25यीसू बानै केयो, “थे पढयो कोनी कै जद दाऊद अर बिंगा चेला नै भूख लागी तो बां के करयो? 26बां सारा ऊं मोटै याजक अबियातार गै दिना में परमेसर गै भवन जा'गे चढाएड़ी रोटी खाई झिकी नै याजक गै सिवाय ओर कोई कोनी खा सकै हो। क्यूंकै ओ नेम रखेड़ो हो।”

27जद यीसू बानै केयो, “परमेसर सबत गो दिन आदमी खातर बणायो है आदमी नै ईं दिन खातर कोनी बणायो।” 28परमेसर गै कानी ऊं आयेड़ो मिनख गो बेटो ईं दिन गो मालिक है।

Currently Selected:

मरकुस 2: BGQ

Highlight

Copy