लूका 8

यीसू गी दासियां

1बिंगै बाद में बे गाम गाम में परमेसर गै राज गी खुस खबरी सुणावंता फिरण लागग्या। 2बिंगै सागै बारा चेला अर केई लुगाईयां ही झिकिंयां नै ओपरी अर बीमारियां ऊं ठीक करी। बामै एक गो नाम मरियम हो झिकी मगद गाम गी ही बिनै मगदळीनी बी केंता, बिमुं यीसू सात ओपरियां काडी। 3अर हेरोदेस राजा गै अन्न गो भण्डारी खोजै गी बहु योअन्ना, सुसन्नाह अर केई लुगाईयां ओर बी बांगै सागै ही झिकी आपगै धन ऊं यीसू अर बिंगै चेला गी सेवा करती।

बीज गी मिसाल

(मत्ती 13:1-9; मरकुस 4:1-9)

4जद गाम-गाम ऊं लोगां गी भीड़ बिंगै कनै आण लागरी जद बण बानै एक मिसाल बताई: 5“एक किसान आपगै खेत में बीज बीजण गेयो। बीजता टेम कीं बीज रा गै किनारै पड़ग्या झिका लोगां गै पगां ऊं दबग्या, अर जिनावरां चुग लिया। 6केई बीज पक्की जमीन में पड़ग्या अर बे उग्या तो हा पण पाणी ना लागण गै कारण सूकग्या। 7केई बीज झाड़कां में पड़ग्या अर बे उग्या अर मोटा होया पण झाड़कां बानै दबा लिया। 8केई बीज आच्छी जिग्यां पर पड़या झिका उगगे सो गुणा फळ ल्याया।” इतो केगे बो जोर ऊं बोल्यो, “झिका गै कान है बे सुणल्यो।”

मिसाल गो मकसद

(मत्ती 13:10-17; मरकुस 4:13-20)

9बांगै चेला पूछयो, “गुरूजी ईं मिसाल गो मतलब के है?” 10बण केयो, “थानै परमेसर गै राज गै भेद गी समझ दी है पण दूसरा नै इंगी समझ मिसाल ऊं देईजै कै बे देखता थकां बी कोनी देख सकै अर सुंणतां थकां बी कोनी समझ सकै।”#यसयाह 6:9

बीज गी मिसाल गो मतलब

(मत्ती 13:18-23; मरकुस 4:13-20)

11ईं मिसाल गो मतलब है बीज परमेसर गा बचन है। 12रा गै किनारै गा बे लोग है झिका बचन नै सुण्यो पण सैतान आ'गे बांगै मन ऊं चुग लेग्यो, क्यूंकै सैतान कोनी चावै कै लोग बचन पर बिस्वास कर'गे मुकती पाल्यै। 13पक्की जिग्यां बे लोग है झिका खुसी ऊं बचन सुणै है पण डूंगी जड़ ना होण गै कारण थोड़ी देर तांईं बिस्वास राखै पण समस्या आण ऊं बे बिस्वास नै छोड़ देवै है। 14झाड़का बे लोग है झिका बचन सुणै पण आ'गै जा'गे जीणै गी चिंता अर सुख आराम अर धन में दबज्यै है। अर आ'गै कोनी बढ सकै है 15पण आच्छी जिग्यां बे लोग है झिका सच्चै अर आच्छै दिल ऊं बचन सुणगे अर बिंगै उपर अमल कर'गे धीरज ऊं आच्छो फळ ल्यावै है।

दीयै गी मिसाल

(मरकुस 4:21-25)

16कोई दीयै नै जगागे ढकै कोनी अर ना'ई बिनै मांची नीचै मेलै, पण बिनै सांमै आळै में मेलै कै मा आण आळै नै चानणो रेवै। 17ईंखातर सारी लुकेड़ी बातां सांमणै ल्याई जावैगी अर सारी गुप्त बातां सांमणै आवैगी। 18ईंखातर झिकी बात थे सुणो बिं पर चोकसी ऊं ध्यान लगाओ झिका मेरी सीख नै मानण खातर तैयार है बानै ओर जादा समझाईजैगो पण झिका सुणणो कोनी चावै है पण थोड़ा भोत झिका समझै है बांगी समझ बी खत्म हो जावैगी।

यीसू गी मां अर भाई

(मत्ती 12:46-50; मरकुस 3:31-35)

19बिंगी मां अर भाई बठै आया पण बोळी भीड़ गै कारण बिंगै कनै कोनी पूगसक्या। 20कणैई आ'गे केयो कै, “थारी मां अर भाई बारै खड़या है अर थारूं मिलणो चावै।” 21ओ सुणगे बण केयो, “मेरी मां अर भाई ऐ लोग है झिका परमेसर गो बचन सुणगे मानै।”

आंधी नै थामी

(मत्ती 8:23-27; मरकुस 4:35-41)

22फेर एक दिन यीसू अर बिंगा चेला किस्ती पर चढ़या अर बण चेला नै केयो, “चालो झील गै परली पार चालां जद बे चाल पड़या।” 23पण जद किस्ती चालण लागरी तो यीसू नै नींद आ'गी। बिं टेम झील में तूफान आ'ग्यो अर किस्ती में पाणी भरीजण लागग्यो अर बे डूबण लागग्या। 24जद चेला यीसू नै जगा गे केयो, “हे स्वामी, हे स्वामी, म्हे डूबण लागरयां।” जद यीसू खड़यो होगे आन्धी अर पाणी गी लेहरां नै ललकारी, तो बे ठमगी अर सारा गो जी में जी आ'ग्यो। 25जद बण चेला नै केयो, “थारो भरोसो किनै गेयो?” बे सारा डरग्या अर हेरान होगे केण लागग्या कै, “ओ किसो आदमी है? झिकै गो हुक्म आन्धी अर पाणी मानै।”

ओपरी बडे़ड़ै आदमी नै ठीक करणो

(मत्ती 8:28-34; मरकुस 5:1-20)

26फेर बे झील गै परली पार गिरासेनिया इलाका में आया झिको गलील झील गै सांमै हो। 27-31जद बो किनारै पर उतरयो तो बानै ओपरी बड़ेड़ो आदमी मिल्यो झिको ऊघाड़ो अर मूसाणा में रेंतो अर लोग बिनै सांकळां ऊं बांदता पण बो सांकळां तोड़ देंतो अर ओपरी गी कसर बिनै बीयाबान में भजाऐ फिरती। यीसू ओपरी नै बिमुं निकळ जाण गो केयो जद बो यीसू नै देखगे जोर ऊं करळावण लागग्यो अर पगां में पड़'गे केण लागग्यो, “हे परम प्रधान परमेसर गा बेटा मेरूं तनै के काम, मनै तंग ना कर?” यीसू बिनै पूछयो, “तेरो नाम के है?” बण केयो, “पळटण, मैं एक कोनी भोत हां।” ओपरियां यीसू नै केण लागी, “म्हानै नरक में ना घाल।” 32बठै प्हाड़ पर सूअरां गो मोटो रेवड़ चरै हो, ईंखातर बां यीसू नै बिनती करी, “म्हानै बामै बाड़ दे” तो यीसू बानै हुकम दे दियो। 33अर सारी ओपरियां केंतांई सूअरां में बड़गी अर एकैदमई सारा सूअर झील में जा पड़या अर मरग्या। 34बांगा गुआळिया, ओ देखगे गाम कानी भाज्या अर गामै जा'गे सारी बात बताई। 35गाम गा लोग भेळा होगे देखण आया अर यीसू गै कनै ओपरी बड़ेड़ै आदमी नै कपड़ा पेरेड़ा अर आराम ऊं बेठयो देख्यो तो बे डरग्या। 36अर गुआळिया बानै सारो कीं बतायो कै किंया बो ठीक होयो। 37जद गिरासेनिया नगर गा लोग यीसू ऊं बिनती करण लागग्या कै अठुं उड़ज्या। जद बो बठूं आपगी किस्ती में चढगे जाण लाग्यो। 38बिं टेम झिको आदमी ओपरिया ऊं ठीक होयो, बो यीसू ऊं बिनती करण लागग्यो, “मनै थारै सागै ले चालो,” पण यीसू बिनै केयो कै, 39“आपगै घरे उड़ज्या अर जा'गे लोगां नै बता कै परमेसर मेरै पर भोत मोटो चमत्कार करयो है अर बो जा'गे गामै परचार करण लागग्यो, यीसू मेरै पर चमत्कार करयो है।” 40जद यीसू बठूं पाछो आ'ग्यो अर लोग बड़ै कोडां ऊं बिनै मिल्या क्यूंकै सारा लोग बिनै अडिकै हा।

याईर गी मरेड़ी बेटी अर एक रोगण लुगाई

(मत्ती 9:18-26; मरकुस 5:21-43)

41जद याईर नाम गो एक आदमी झिको यहुदी सतसंग घर गो मुखिया हो यीसू गै पगां में पड़'गे केण लागग्यो, “मेरै घरे चालो।” 42क्यूंकै बिंगी बारा साल गी बेटी मरण आळी ही जद बो अर यीसू जाण लाग्या तो एक मोटी भीड़ बिंगै सागै चाल पड़ी। 43बिं भीड़ में एक लुगाई हिसी ही झिकी गै बारा साला ऊं कळ गी बीमारी ही अर बण सारो धन ईलाज खातर डाक्टरां नै दे दियो पण बीमारी ठीक कोनी होई। 44बण होळै सी लारूं आ'गे यीसू गै कूड़तिय गै पलै गै हात लगायो अर हातो हात बिंगी कळ गी बीमारी जांती रे'ई। 45यीसू लारै मुड़या अर केयो, “मेरै हात कण लगायो है” पण सारा नटग्या। पतरस केयो, “हे स्वामी, भीड़ थानै च्यारूंमेर ऊं घेर राख्यो है, अर थारै उपर गिरण लागरी है।” 46पण यीसू केयो, “मैं जाणग्यो मेरै माऊं बीमारी ठीक करण गी सता निकळी है।” 47जद बण लुगाई सोच्यो मैं लुक कोनी सकूं ईंखातर बा डरती कांपती यीसू कनै आई अर पगां पड़'गे सारी क्हाणी बता दी कै मैं किंया ठीक होई। 48यीसू बिनै केयो, “जा बेटी, तेरै बिस्वास तनै ठीक करी है। चेन ऊं जा” 49जद बो बिनै ओ केण लागरयो तो सतसंग घर गै मुखियै गै घर ऊं कणैई आ'गे केयो, “गुरूजी नै फोड़ा ना घाल, तेरी बेटी मरगी।” 50ओ सुणगे यीसू मुखिया नै केयो “डर ना बिस्वास राख, बा ठीक हो'ज्यैगी।” 51यीसू बिंगै घरे आयो अर घर में पतरस, यूहना, याकूब अर छोरी गै मां बाप गै सिवा किनैई मा कोनी आण दिया। 52सारा घर में रोण लागरया। यीसू बानै केयो, “रोवो ना, आ मरी कोनी सुती है।” 53लोग छोरी नै मरेड़ी सोचगे यीसू गी मजाक करण लागग्या। 54जद बण छोरी गो हात पकड़गे केयो, “हे बेटी, खड़ी होज्या।” 55-56जद बा बिं टेम ई जींवंती हो'गी अर खड़ी हो'गी, बिंगा मां बाप हेरान हो'ग्या। जद यीसू बानै केयो, “इनै खाण खातर कीं देवों पण आ बात किनैई बताईयो ना।”

Currently Selected:

लूका 8: BGQ

Highlight

Copy