लूका 4

यीसू गी परख

(मत्ती 4:1-11; मरकुस 1:12,13)

1फेर यीसू पवितर आत्मा ऊं पूर्ण होगे अर यरदन नदी गै माऊं बतिस्मो लेगे पाछो आयो। आत्मा बिनै चाळिस दिन तांई बन उजाड़ में लेगे गेयो अर सैतान बिनै परखतो रेयो। 2जद बरत गा दिन पूरा हो'ग्या तो बिनै भूख लागी। 3जद सैतान बिनै केयो, “जे तूं परमेसर गो बेटो है तो ईं पथर नै केओ कै रोटी बणज्यै?” 4यीसू बिनै जबाब दियो, “सासतर में लिखेड़ो है आदमी सिरफ रोटी ऊं जींवंतो कोनी रेवै।” 5फेर सैतान बिनै भोत ऊंची जिग्यां पर लिजागे पलक में जगत गो सारो राज-पाट दिखायो। 6अर बिनै केयो कै “ओ राज-पाट अर आंगो अधिकार तनै दे दैयूंगा क्यूंकै ओ मनै सूंपेड़ो है, अर मैं चाऊं बिनै ई दे सकूं। 7ईंखातर तूं मनै नीवण करैगो तो ओ सारो कीं तेरो होज्यै'गो।” 8यीसू बिनै उतर दियो, “सासतर में लिखेड़ो है कै, ‘तूं प्रभु आपगै परमेसर नै नीवण कर अर सिरफ बिंगी ई भगती कर।’” 9जद बो बिनै यरुसलेम में ले जा'गे मिन्दर गै गुमट पर खड़यो करयो अर बिनै केयो, “जे तूं परमेसर गो बेटो है तो अठुं छाळ मारज्या।” 10क्यूंकै सासतर में लिखेड़ो है कै, “परमेसर तेरै खातर आपगै सुरगदूतां नै आग्या देसी कै बे तनै बचाल्यै। 11अर बे तनै हातो हात साम लेसी, तेरै पगां में पथरां ऊं चोट कोनी लागणदैय।” 12यीसू उतर दियो, “सासतर में इंया बी लिखेड़ो है कै, ‘तूं प्रभु आपगै परमेसर नै अजमाई ना।’” 13जद सैतान बिंगी सारी तरियां ऊं परख कर ली तो बिंगै कनूं हार गे दूसरो मोको ढूंढण खातर उड़ग्यो।

यीसू गी सेवा करण गी सरुआत

(मत्ती 4:12-17; मरकुस 1:14,15)

14फेर यीसू आत्मा गी सामरथ ऊं पूर्ण होगे गलील में आयो अर बिंगी बातां पूरै देस में फेलगी। 15बो यहुदियां गै सतसंग घर में परबचन देंतो हो अर सारा लोग बिंगी बडाई करता हा।

नासरत गाम में यीसू गी बेजती

(मत्ती 13:53-58; मरकुस 6:1-6)

16फेर बो नासरत गाम आयो जठै बिंगो पालण पोसण होयो। अर आपगी रीति रिवाज गै हिसाब ऊं सब्त गै दिन सतसंग घर में जा'गे सासतर पढण खातर खड़यो होयो। 17जद बिनै यसयाह परमेसर गी बात बताण आळै गी किताब पढण खातर दी जद बो बिं किताब में बो पद निकाळयो जठै इंया लिखेड़ो हो:

18“प्रभु गी आत्मा मेरै उपर है,

ईंखातर कै बण कंगालां नै सुब समाचार सुणाण खातर मनै चुण्यो है।

अर इंया सुणाण खातर मनै भेज्यो है कै लोगां नै गुलामी ऊं मुकती मिलैगी

अर आंधा देखैगा अर दबेड़ा लोग छुटैगा।

19अर परमेसर गी दया आपणै उपर होणै गो टेम आ'ग्यो है।”

20फेर बण किताब बंद कर'गे सेवक गै हात में पाछी दे दी अर नीचै बेठग्यो अर सतसंग-घर में सगळा गी निगा बिं पर ई टिकेड़ी ही। 21जद यीसू बानै केयो, “आज'ई ओ लेख थारै सांमै पूरो होयो है।”

22बठै हर कोई बिनै सरावै हो, झिका सुहावणा बचन बण बोल्या बांऊं सगळा हेरान होगे केण लाग्या, “ओ युसुफ गो बेटो कोनी के?” 23फेर बण बानै केयो, “थे जरूर ई मनै आ क्हावत केस्यो, ‘अरै बेद, तूं पेलां आपगो तो ईलाज कर, सागै म्हे कफरनहूम में तेरै कामां गै बारै में जिकर सुण्यो है, बां कामां नै अठै आपगै गामै बी कर।’”

24मैं थानै साची केऊं कै आपगै गामै किसैई परमेसर गी बात बताण आळै गो आदर मान कोनी होवै। 25फेर मैं थानै साची केऊं कै इसराएल देस में एलियाह परमेसर गी बात बताण आळै गै टेम में साढे तीन सालां तांई मेह कोनी बरस्यो अर पूरै देस में एक भोत मोटो अकाळ पड़ग्यो हो। बिं देस में केई विधवा लुगाईयां ही। 26पण सेदा परदेस गै सारपत नगर गी एक विधवा नै छोड़गे ओर किंगै कनै एलियाह नै मदद करण खातर घाल्यो कोनी। 27दूसरी मिसाल आ है कै परमेसर गी बात बोलण आळै एलीसा गै टेम में इसराएल में भोत सारा कोढी हा, पण बामूं सीरिया में रेण आळै नामान कोढी नै छोड़गे अर किसैई कोढी नै ठीक कोनी करयो। 28जद ऐ बातां सुणतांई जिता लोग सतसंग घर में हा बानै रीस आ'गी। 29बे सगळा लोग खड़या हो'ग्या अर बिनै गाम ऊं बारै काड दियो अर बिनै नीचै गिराण खातर आपगै नगर गै प्हाड़ गी चोटी पर लेग्या। 30पण बो बांगै बिचाळूं निकळगे दूसरै पासै उड़ग्यो।

ओपरी बड़ेड़ै आदमी नै ठीक करणो

(मरकुस 1:21-28)

31फेर यीसू गलील परदेस गै कफरनहूम गाम में आ'गे सब्त गै दिन लोगां नै परबचन देण लागरयो। 32लोग बिंगै अधिकार पूर्ण बचन नै सुण गे हेरान हा। 33बठै बिं संतसंग घर में एक ओपरी बड़ेड़ो आदमी जोर ऊं किरळायो, 34“हे नासरत आळा यीसू, तूं म्हारूं के चावै है? तूं म्हानै नास करण आयो है के? मैं तनै जाणूं तूं परमेसर गो पवितर जन है।” 35यीसू बिनै ललकारयो, “चुप रे, अर इमूं बारै निकळज्या।” जद ओपरी बिं आदमी नै पटक गे अर बिना कीं नुकसान करे बारै निकळगी। 36ओ देख गे सारा लोग हेरान होगे आपसरी में केण लाग्या कै ओ किस्यो बचन है? झिकै गै अधिकार अर सकती ऊं ओपरी बी केणो मान गे निकळज्यै। 37ईं तरियां च्यारूंमेर बिंगी बातां आग दाईं फेलगी।

पतरस गी सासू नै ठीक करणी

(मत्ती 8:14-17; मरकुस 1:29-34)

38जद यीसू सतसंग घर ऊं समौन गै घरे गेयो तो बठै समौन गी सासू नै तकड़ी बुखार चढरी तो बां यीसू गै आ'गै बिनै ठीक करण गी बिनती करी। 39जद यीसू बिंगै कनै खड़'गे आदेस दियो कै बुखार उतर जावै अर बा दबादब खड़ी होगे बिंगी सेवा करण लागगी। 40आथण पोर गै झिकै झिकै घरां में लोग न्यारी न्यारी बीमारी ऊं बीमार हा, बां सारा नै यीसू गै कनै ल्याया। बण सारा लोगां नै हात लगा गे ठीक करया। 41भोत सारै बां लोगां मू ओपरियां करळावंती बारै कडी अर बोली कै “तूं परमेसर गो बेटो है,” पण यीसू बानै बोलण कोनी दी क्यूंकै बे जाणै ई कै ओ मसी है।

सतसंग घर में परचार

(मरकुस 1:35-39)

42यीसू दिन गै ई बठूं सुनसान जिग्यां में उड़ग्यो अर लोगां गी मोटी भीड़ बिनै ढूंढती-ढूंढती बिंगै कनै आई अर केण लागी कै “थे म्हानै छोड़गे ना जावो।” 43पण बण बानै केयो, “मनै दूसरै गामां में जा'गे बी परमेसर गै राज गो परचार करणो है, क्यूंकै ईंखातर ई मनै घाल्यो है।” 44ईं तरियां बो गलील परदेस गै सतसंग-घरा में जा'गे परचार करतो रेयो।

Currently Selected:

लूका 4: BGQ

Highlight

Copy