यूहना 20

खाली कबर

(मत्ती 28:1-8; मरकुस 16:1-8; लूका 24:1-12)

1हफ्तै गै पेलै दिन दीतवार नै दिनगै दिनगै मरियम मगदलीनी कबर पर आई अर बण देख्यो कै कबर पर ऊं पथर हटेड़ो है। 2जद बा भाजगे समौन पतरस अर बिंगै दूसरै चेलै झिकै नै यीसू प्रेम करतो हो बांगै कनै गेई। अर केण लागी, बे प्रभु गी ल्हास नै कबर मू काडगे लेग्या है। अर म्हे कोनी जाणा कै बिनै कठै रख दी है।

3जद पतरस अर बो दूसरो चेलो निकळगे कबर कानी भाज्या। 4बे दोनूं सागै सागै भाज्या जाण लागरया हा पण दूसरो चेलो पतरस ऊं आ'गै निकळग्यो। अर कबर कनै पेलां पूगग्यो। 5बण नीचै झुक गे देख्यो कै बठै कफण गा गाबा पड़या है। पण मा कोनी गेयो। 6जद समौन पतरस बिंगै लारै लारै गेयो, अर कबर गै मा गेयो अर गाबा पड़या देख्या। 7अर बो कपड़ो झिको बिंगै सिर पर बांदेड़ो हो, कपड़ा गै सागै कोनी पड़यो हो, पण न्यारी एक जिग्यां लपेटेड़ो देख्यो। 8फेर दूसरो चेलो बी झिको पेलां कबर पर पोंच्यो हो, मा गेयो अर बण देख गे बिस्वास करयो कै सचमुच यीसू मरगे जी उठयो है। 9अर पवितर सासतर में झिको कीं लिख्यो हो बिनै बे जद तांई समझ कोनी सक्या हा। बो बचन हिसो है कै बिनै मरेड़ा मूं जीवंतो होणो है। 10फेर बे चेला आपगै घरे उड़ग्या।

मरियम मगदलीनी नै दिखणो

(मत्ती 28:9,10; मरकुस 16:9-11)

11पण मगदलीनी मरियम रोवंती होई, कबर गै कनै बारै खड़ी रेई अर रोवंता रोवंता कबर में झुकी। 12जठै यीसू गी ल्हास रखेड़ी ही बठै धोळा गाबा पेरेड़ा दो सुरगदूत एक सिराणै अर दूसरो पगाणै बेठयो देख्यो। 13सुरगदूतां बिनै पूछयो, “हे बाई, तूं क्यूं रोवै है। बण उतर दियो बे मेरै प्रभु नै चक'गे लेग्या है अर मनै ठा कोनी कै बां बिनै कठै रख्यो है।” 14ओ केगे बा लारै मुड़ी अर यीसू नै खड़यो देख्यो, पण पिछाण्यो कोनी कै यीसू है।

15यीसू बिनै केयो, “हे बाई, तूं क्यूं रोण लागरी है। तूं किनै ढूंढै है।” माळी समझगे बिनै केयो, “हे भाई, जे थे बिनै चक लियो है तो मनै बता। बिनै कठै रख्यो है। मैं बिनै ले जाऊंगी।” 16यीसू बिनै केयो, “हे मरियम, बा लारै मुड़ी अर इब्रानी में केयो रब्बूनी मतलब गुरू।”

17यीसू बिनै केयो, “मैं अजे तांई मेरै पिता कनै उपर कोनी गेयो। तूं मेरै हात ना लगा। आ बात मेरै भाईया नै बता। मैं आपगै पिता अर थारै पिता, अर आपगै परमेसर अर थारै परमेसर गै कनै उपर जाऊं हूं।” 18मरियम मगदलीनी चेला नै जा'गे बतायो, “मैं प्रभु नै देख्यो अर बां मनै ऐ बाता कैई।” 19बिं दिन आथण गै झिको हफ्तै गो पेलो दिन हो।

चेला पर प्रकट होणो

(मत्ती 28:16-20; मरकुस 16:14-18; लूका 24:36-49)

यहुदियां गै डर गै कारण बिंगा चेला बारनो बन्द कर'गे मा बेठया हा। जद यीसू बांगै बिचाळै आ'गे खड़यो हो'ग्यो अर बानै केयो, “थानै सांती मिलै।” 20इतो केण गै बाद यीसू आपगो हात अर पांसळी दिखाई। चेला जद यीसू नै देख्यो तो बे भोत राजी होया।

21जद यीसू बानै फेर केयो, “थानै सांती मिलै, जिंया पिता मनै भेज्यो है मैं बी थानै भेजूं।” 22ओ केगे बण बां पर फूंक मारी अर बानै केयो, “पवितर आत्मा लेल्यो।” 23कोई बी आदमी गै पापां नै थे माफ करो हो बानै माफी मिलैगी अर झिकै गा पाप थे माफ कोनी करोगा बिनै माफी कोनी मिलैगी।

थोमा पर प्रकट होणो

24थोमा झिको बारा मू एक हो झिको दिदुमुस कुहावंतो हो जद यीसू आयो हो बांगै सागै कोनी हो। 25जद दूसरा चेला बिनै केण लागग्या, म्हे प्रभु नै देख्यो है, जद बण केयो जद तांई मैं बिंगै हात में मेखा गा निसान ना देखल्यूं अर मेखा गै मोरा में आपगी आंगळी ना घालल्यूं अर बिंगी पांसळी में आपगो हात ना घालल्यूं जद तांई मैं बिस्वास कोनी करूंगा। 26आठ दिन गै बाद बिंगा चेला एकर फेर घर गै मा हा अर थोमा बी बांगै सागै हो। अर बारनै गै ताळो लगाएड़ो हो। जद यीसू आयो अर बांगै बिचाळै खड़यो होगे केयो, “थानै सांती मिलै।” 27जद बण थोमा नै केयो, “आपगी आंगळी अठै मेरै हात में लगागे देख अर आपगो हात मेरी पांसळी में घाल अर सक ना कर पण बिस्वास कर।” 28ओ सुणगे थोमा उतर दियो, “हे मेरा प्रभु, हे मेरा परमेसर।” 29यीसू बिनै केयो, “तूं मनै देखगे बिस्वास करयो है पण धन्य है बे लोग झिका मनै बिना देखे बिस्वास करै है।”

ईं किताब गो सार

30यीसू आपगै चेला नै भोत सारा चमत्कार दिखाया, झिका ईं किताब में कोनी दिया। 31अर झिकी बाता लिखी है बे ईंखातर है कै थे बिस्वास करो कै यीसू ई परमेसर गो बेटो, मसी है। अर इंया बिस्वास करता होया बिंगै नाम में जीवन पाओ।

Currently Selected:

यूहना 20: BGQ

Highlight

Copy