Luku 16

Latilovo so vosivoi muxilisi noxi'a tamitema so tina'u

1Ioxe, mune'e la Iesua mu'oxonu latilovo noxi'a tatisaipeliou aloxo 'o, “Itema vile so lamoli muxoxolu la tamitema se'i mine'e mia'aloxu vosivoiou noxou. Mi'oxo lexe, 'Ai, vosivoimeni ne mupapunu lamoli noxine vitanisi a.' 2Laso itema so lamoli mu'avalou vosivoiou mune'e la muvikalanu lexe, 'Axova no anu vaikala so ilixomeni elomusou 'o? Nakaukavunu lipoti no anu mimixeli mukalusi ane nexaxaisou xo nini so naxolu vosivoila uasi.'

3Sila vosivoi molu muvikala no oponu lexe, 'Iu tatilasilo a so ukusailo no anu vosivoi 'oe, laso eni anava io? Xo eni xavileli so xaixai loxo a'asi'asi so amamulonu liasou xai to uasi. Mo amaila so axixao alingalingau lamoli noxi'a tamitema. 4E elavusou. Exavutalanu vote'i so loxo ukusailo no anu vosivoi 'o la ane'i tamitema masi i'osasilo mo i'avalilo so a'una'una no tasi'a.' 5Laso mu'oxo aloxo 'o. Anu mu'avali'a tamitema e tina'uxa'a muai noxou tilasou. Mukalu la mutali'isou anu ane mune'e tei lexe, 'Tina'uxene ta'eimo a uai noxou tilasilo?' 6La anu mukolinu lexe, 'A latalamu ueli 100.' La vosivoi muvikalanu lexe, 'Nano'u lapepa so tina'uxene ne mo napalea naxiunu navasou mo nakaukavu lexe 50-si.' 7Xe itema vile muxalila la vosivoi mutali'isou lexe, 'Tina'uxene ta'eimo?' La anu mu'oxo lexe, 'A laveki so uiti 100.' La vosivoi muvikalanu lexe, 'Nano'u lapepe so tina'uxene mo naxiunu navasou mo nakaukavunu lexe 80-si.'

8Ioxe, ili'i loxo tilasou mulavusou ilixo mukilikalu noxou vosivoiou e mu'oxonu ne la muvikalasou laixe aloxo 'o, 'Ai itema ne lavulavuou kena.'” Xe Iesua musolonu lexe, “Laso avikalangengi aloxo 'o. Tamitema so lialia 'o ne lavulavui'a no anu vote'i so ipamuxanu xoluxoluxa'a ulavusou uua'ulixu lavulavu noxi'a tamitema so lamana. 9Mo manina, lamoli so lialia anu loxo nuni'u ia laixe loxo ngapamuxanu so uxalixu vote'i so tamitema i'osasinge. Mo so axone loxo ili'i voxo so lamoli ukalui la tamitema ngelapune'i ne i'avalinge nga'unalai no anu tatani ane uxolu kaluxu uasi.

10Mo loxo talopalanu itema no anu mi isusu'a se xe usaxila'u laixe la umomomo so talopalanu no anu mi mutiatila kalumo. Ia itema ane upolo va'axu no anu mi isusu'a se la talavu lexe upolo va'axu no anu mi mutiatila kalumo. 11Laso loxo ilopalangengi no anu lamoli nuni'u so lialia 'o xe ngasaxila'u laixe uasi la ena'ei so ulopalangengi no anu mimi lailaixe maninasou? 12Mo loxo itema vilemo ulopalangengixu mixumixu ia ngalaxa'inu uasi, la ena'ei ulosinge mimimengi mu'isalili?

13Uokuvoi umomomo so uxaxai noxi'a tatilasou tamei uasisi. Xo anu oponu masi tu'umaxuou vile mo ulomuanu xe u'osasou vile la ulomuxu. Anu umomomo so opongengi ututuluou mi tamei ukei loxo xaixai noxou Mosinge xe masaxa so lamoli uasi.”

Iesua muvikala lamana si'a Tapalisi lexe i'osasou lamolisi

14Ioxe, ane'i Tapalisi ne ane'i tamitema so i'osasou lamoli misevile. Laso loxo milomusou Iesua muvikala axone la ane'i mimolo sukusou. 15Ia anu muvikalane'i lexe, “Ngingi ngalemolu vaikala so utalumeu mi ane no opongengi xo ngamasaxau lexe tamitema ikalavoi lexe ngingi talapusi, ia Mosinge ulavusou opongengi to. Mi ane tamitema i'itinu no taine'i lexe laixe manina la anu mi nuni'u manina no iou Mosinge.

16Vaikala so lo xe vaikalai'a tapolopeti tamitema milanu mune'e muxali noxou Tioni. Xe musoko'u noxou la votovoto no anu vaikala laixe so voxo loxo Mosinge molu u'uli laxune'i tamitemaou, a uxolu upalasi. La tamitema mukalusi xavine'iou so lexe i'unalai no anu. 17Ia avikalangengi lexe loxotolo ilou lialia tasiauxu ane, io vaikala sevile kitua no anu lo noxou Mosinge ulapau vitanisi uasisi manina.”

Iesua muvikalasou ilixo so taula'i uxoto

18La anu muvikalane'i lexe, “Loxo itema vile uxotonu taula'i mo ukusaie semau xe utaula'ixe sema vilela la ane semau manina uasi, uxolu noxie vitanisisi. Xe loxo sema vile itaula'i xe ili'i uxoto kaio itema vilela itaula'ixe la anene taula'i manina uasi, ixolu ipita vitanisi ane.

Iesua mua'aloxa'a itema so lamoli ilou Lasalusu

19 Xe Iesua musolonu vaikala aloxo 'ola, “Itema vile lamoliou mo mimiou tavu'alo muxoxolu. La utotomu anu mumulaxu lavuluti lauoinu mo musakinu mimi lailaixe xe ani'anixu iouiou misevile voxovoxo utotomu. Xoluxolu noxou ne se'isisi mo laixe manina. 20-21Xe no aitengaxu vimelusou tasou la itema vile oloxola ualasou lexe Lasalusu utotomu muai. Anu la'ilalixu uasi mole loxo tanu umulinu la'ilali utuxu se ulaplapau no latevoluxu itema so lamoli ne. Xe anu vasimolu xalexalevinusi mo evile so u'uinu uasi, ta'a'asi mine'e so milamixu.

22Ili'i xe itema oloxola ne musoli la ta'angelo talaixe milaixu noxou Apala'amu so ilou mixolu. Xe itema so lamoli musoli kalumo la tamitema mi'asixu. 23Musoli xe muxolu no tanixu soli la mutavulenu navunavu toxoxu. Xe iou mutelai loxo 'o la mumaisou Apala'amu xe Lasalusu a ilou mixolu nopaxa. 24Laso mu'ava lexe, 'Mamilo Apala'amuo, nini tanenixo mo napalusou Lasalusu une'enu lexa sevile. Une'enu so ukelenixu avolu simisou no lexa ne mo umulaxu no levexo so lelemesou se uaio xo eni atatavule navunavu toxoxu no navu 'o.'

25Ia Apala'amu mukolinu lexe, 'Alixeli, taneniu mi vile aloxo 'o. No voxo ane nemaulisio la nexolu no anu mimi latanusi. Xe Lasalusu xoluxoluxu masuasi. Ia vaimomo 'o no tuala ano'o anu umamatola laixe xe nini la natavulenu tu'umaxusi. 26Xe mi vilela aloxo 'o. No tainenge la Mosinge mumulaxu vanunu toxoxu. Laso umomomo so tamitema 'o ialasou mo ilai noxinge uasi. Mo ngingi ne ngamomo so ngaalasou mo ngane'e noxixe uasi.'

27Xe itema ane muxolu no navu muvikala lexe, 'Ioxe, eni alinga noxine aloxo 'ola. Napalusou ulivu ulai no anu tasou mamilo. 28Xo eni tavivilo ta'uve a ixolu nesio. Laso anu ulai uvikalane'i lamana xo loxo 'o io ane'i kalumo ine'e no tuala so navunavu 'o.' 29Ia Apala'amu mukolinu lexe, 'Vaikalai'a Mosisi oli'a tapolopeti a uai noxi'a. Vaikala anenesi so tavivine ilomuxu.' 30La anu itema ne muvikala lexe, 'Uasi, mamilo Apala'amuo, ane'i ilomuxu anene uasi. Ia loxo itema vile ane musoli umaulila xe ulai noxi'a, laso ane'i ixiunu opone'i mo i'isalinoxu ane. 31Ia Apala'amu mukolinu aloxo 'o, 'Uasi manina. Loxo ane'i ilomuxu vaikalai'a Mosisi oli'a tapolopeti uasi, la umomomo so ilomuxu itema loxo umaulila uasi kalumo.'”

Currently Selected:

Luku 16: ATA

Highlight

Copy