Tioni 7

Iesua mulai Ielusalemo no voxo so lavilelusou tatani ale'alelaxu

1Ioxe, voxovoxo mulai xo xe ili'i la Iesua muxixao no xale lia ne Xalili. Anu umasaxau uxixao no xale lia ne Iutea uasi xo Taiuta ne mikakamulinu vote'i so ivau usoli. 2La voxosou lavilelu vile noxi'a Taiuta e ilemolu lexe lavilelu so Tatani Ale'alelaxu a mune'e alai. 3Laso ane'i tavimovimou mivikalanu lexe, “Ai, nini masi naxexe lai 'o mo nalai ne Iutea mo so tatisaipelimeni isaxisou mimi toe nalavusou naxaxalixu. 4Xo loxo itema vile umasaxau lexe upala'a no ie'i tamitema latala la anu utalumeu mi ma'ia u'oxonu uasi. Laso naxoxolu 'o uasi, mi ma'ia so na'oxonu la nalai napala'anixene no ie'i tatemanu lialia mo na'oxonusi.” 5Ane'i milemolu vaikala axone xo manina, ane'i tavimovimou ia ane'i kalumo ilopala noxou uasi.

6La Iesua mulivuxa'a lexe, “Uasi, eni voxosilo a uxali uao, ia anu voxo mukalusi ne laixe noxingesi. 7Loxo ngingi la tatemanu lialia imatapiangengi uasi ia eni la imatapialeli xo alalanu vaikala so upala'anixu ilixone'i lexe masuasi. 8Ngingi ngalailai no anu lavilelu ne Ielusalemo, eni alai ne uasi xo voxosilo uxali avile uao.” 9Anu muvikalane'i axone mukalu la muxoxolu ne Xalilisi.

10Ia ili'i loxo tavimovimou milai no anu lavilelu mukalui laso Iesua kalumo mulai. Mulai la upala'anixu no ie'i latala uasi, mulai se'isisi so itongonu uasi. 11Ioxe, no anu voxo so lavilelu muxalii la tatiatila noxi'a Taiuta mikakamulinu mo mivikala lexe, “Ai anu avaio?” 12Xe tamitema tavu'alo musuku e mixoxolu mipita ne la mivivikala piena mo mimunumunusou. Se'i lexe, “Anu ne itema laixe ane.” Xe leviani lexe, “Uasi to, anu ukalavoine'i tamitemamo.” 13Minumunusi axone xo mi'ume'a tatiatila noxi'a Taiuta laso vile noxi'a uvikalasou lamana uasi.

14Ioxe, misoko'u lavilelu xe voxosou se'i mupolo mo muxali nonixii la Iesua mulai no tasou Mosinge mo musoko'u so uvotovoto. 15Xe Taiuta milomusou vaikalaou la tane'ililiou mo mi'oxo lexe, “Itema vile upela'u aliku 'o no anu mimi ulemolu 'o uasi, laso muno'u lavulavu axovae?” 16Laso Iesua mulivuxa'a lexe, “Vaivaikala avotongengixu 'o ne eni na'a xelimo uasi, anu noxou anu ane mupalusilo ene'e 'o. 17Loxo itema vile oponu u'osa so umulinu masaxa noxou Mosinge ne laso ane, utongonu votovoto noxilo 'o lexe anu mi noxou Mosinge o eni melo exalixusi. 18Anu ena'ei loxo ulanu vaikala ane molu muxalixusi, la anene anu molu umasaxau u'itinumo ane. Ia ena'ei ane umasaxau u'itinu ualasou anu ane mupalusou mune'e, la anu ne anu maninasi mo mi vile ukilikalu uxolu noxou uasisi.

19Xo axova, tatei Mosisi mupilixinu lo noxinge, ia vile noxinge umomomosou uasisi. Laso axova so ngingi ngamolo soli noxilo 'oe 'o?” 20La tamotu e latala ne mikolinu lexe, “Uo, angelo masua masi ukasine ane. Ena'ei to umolo soli noxine?” 21La Iesua mulivuxa'a lexe, “Eni e'oxonu xaixai soxu vilesisi olele la ngekuluke kena. 22Ia ngaxavutalanu, Mosisi mulosinge lavuloto so sosovo no anu vasimenge laso loxo voxosou uxali no anu Voxo so Ma'ila la ngingi ngaxotosou vasime'a ta'ilinge tamulu no anusi. Ia sosovo anene molu noxou Mosisi tei uasi, ane'i ta'ilusungengi mi'oxonu tatei e tateimo. 23Ngingi ngalavusou ngaxotosou vasime'a ta'ilinge no anu Voxo so Ma'ila kalumo axone xo opongengi ututulu lexe mamu so ngaxola'u lo noxou Mosisi. Ioxe, laso loxova so la'iangenge'ilo so epaipounu itema olele laixenu avile no anu Voxo so Ma'ila? 24Mamu so ngasaxisou mi vile no iengi kaio ngatilovosou vitanisi. Ngatilovosou mimi mukalusi no anu vote'i mulapusi.”

Tamotu mimasaxau ilavu lexe Iesua anu ena'ei manina

25Ane'i tamitema mose'i so taoni Ielusalemo ne mi'avuti mivikala lexe, “Axova, ano'o itema e ikamulinu vote'i so ivau usoli, ne? 26Ia ngamalei, anu a ulanu vaikala no ie'i latala la ivikala mi vile noxoula uae. Ane'i tatiatila masi ilavu lexe anu ano'o e so Kalaisiti a, ne? 27Io aliku 'o nenge talavusou lexe anu so tuala ne'ei, ia no voxo loxo anu ane so Kalaisiti uxalii la itema vile so ulavu lexe anu molu ne'ei uasi.”

28La Iesua a muxolu no tasou Mosinge mo ulanu vaikala noxi'a tamitema. Xe mu'ava tatila lexe, “Ngingi nga'oxo lexe ngelavusilo mo ngelavu lexe eni so tuala ne'ei, ne? Ia eni melo ene'e no anu masaxa na'a xelimo uasi. Anu ane mupalusilo ene'e 'o, xoluxoluxu no anu maninasi. Anene ngalavusou to uasi. 29Eni, la elavusou ane. Xo eni exolu noxou mo anu molu a mupalusilo ene'e 'o.”

30Muvikala axone laso ane'i mi'oxo lexe itetelisou avile ia mipune'isi, vile noxi'a umomomo so ukasi noxou uasi xo voxosou uxali u'isalili uao. 31Ia tavu'alo noxi'a tamitema latala ne milopala noxou xo mivikala lexe, “Xo vile so Kalaisiti uxalila ka u'oxonu sosovo so xavi uua'ulixu ane aliku 'o u'oxonu 'o? Uasi manina.”

Tatiatila mipalusi'a tamitema so latolo lexe itetelisou Iesua

32Ioxe, tavu'alo noxi'a tamitema latala ne mimunumunu so ivalaxu Iesua axone xo laso Tapalisi milomusou. Milomusoui laso oli'a tatiatila noxi'a tapilisiti mipalusi'a tamitema so latolo no anu tasou Mosinge lexe ilai itetelisou. 33La Iesua muvikalane'i tamitema latala lexe, “Voxo ataxu sesi so axolu noxinge, xe ili'i la alivu alai noxou anu ane mupalusilo ene'e 'o. 34Alai la ngingi ngakakamulileli ia ngaxalisilola uae. Tanixu ane axolu no anu ne vote'i so ngaxali no anu uasi.” 35Laso ane'i Taiuta mivikalane'i ngato'o lexe, “Itema ano'o u'oxo lexe ulai ne'ei e so taxalisou uasio? Masi ulai noxi'a laili noxinge e ixoxolu no taine'i Takiliki so uvotone'i, ne? 36Anu muvikala lexe ulai la nenge takakamulinu ia taxalisou uasi. Xe mu'oxo lexe vote'i uasi so taxali no anu apu e uxolu no anu. Vaikala noxou ne laxu to axovaio?”

Iesua mulemolu lexa so mauli

37Ioxe, mune'e xe muxali no anu voxo kaluxusou e mutiatila so lavilelu ne. La Iesua mutulu ka mu'ava lexe, “Loxo itema vile usoliou lexa, la anu une'e noxilo mo uiesi. 38Xo loxo uie noxilo la uxali loxo vaikala no anu lavukuou Mosinge ulemolu lexe, 'Loxo itema ulopala noxilo la lexa so mauli luxu u'opu'opu no tanu ka usiasiali ula.'” 39No anu anene la mulemolu Ulenu Laixe e so uxali noxi'a ane'i ane ilopala noxousi. Xo no voxo ne Iesua ulivu so uxolu no anu tanixu u'uli'uli uao laso maixene Ulenu u'italo noxi'a uao.

Tamotu mikalipala xo se'i mivalaxu Iesua xe se'i mixililiou

40Ioxe, leviani noxi'a tamitema latala milomusou vaikalaou Iesua axone laso mivikala lexe, “Ani manina, ano'o Polopeti olelesi ane.” 41Xe leviani la mi'oxo lexe, “Anu ano'o ane so Kalaisiti.” Ia levianila la mi'oxo lexe, “Xo axova, loxo anu ane so Kalaisiti uxali la umomomo so anu Xalili vile aloxo anu ano'o? Uasi manina. 42Xo vaikala no anu lavukou Mosinge muvikala lexe anu ane so Kalaisiti loxo uxali la anu ilusunu Teviti mo anu itema so tuala Peteliemu e nunisou Teviti.” 43Laso se'i mivalaxu xe se'i mixililou sila mikalipala mole mixali loxo laili tamei. 44Mo leviani mimasaxau so itetelisou ia vile umulaxu avolu noxou uasi.

Ane'i tatiatila noxi'a Taiuta ilopalanu Iesua uasisi

45Laso ili'i la tamitema so latolo milivu mixali noxi'a tatiatilasi'a. La tatiatila noxi'a tapilisiti xe Tapalasi ne mitali'isi'a lexe, “Axova so ngane'enu ua'?” 46Ia tamitema so latolo mikoline'i lexe, “Itema vile vaikalaou aloxo aliku 'o uasi, anu iou vilemo manina.” 47La Tapalisi milivuxa'a lexe, “Axova, masi mu'oxo lolongenge kalumo, ne? 48Xo ngamalei, vile noxixe tatiatila o Tapalisi milopalanu? Uasi to. 49Ia ane'i tamitema latala ane ilolomuxu axone, ane'i ilamana no anu lo noxou Mosinge to uasi. Ane'i laili so ixalisou mamulosi ane.”

50La Nikotimasi anu vile noxi'a e mulai noxou Iesua mala'o muvikalane'i aloxo 'o, 51“Axova, lo na'a nenge uvikala lexe tasakinu vaikalaxu itema no lakoti vitanisi? Uasi manina. Talomusou vaikalaou mo so tatongonu lexe ilixou axova teio, ne?” 52La ane'i milivuxu lexe, “Uo, nini to masi kalumo so Xalili, ne? Nalai nakakamuli laixe no anu lavukuou Mosinge mo na'itisou so upalasi noxine lexe polopeti vile so uxali ne Xalili uasisi.”

53Xe mukalu la mipaxelele milailai no tasi'a vilevilesi.

Currently Selected:

Tioni 7: ATA

Highlight

Copy