Tioni 2

Iesua mulai no anu taula'i noxou itema vile ne Kana

1Ioxe, mixolu xo xe voxo tatalusoui, la tamitema mipita no taoni ne Kana no xale lia ne Xalili so isosovosou taula'i vile. La Iesua nenu milai kalumo. 2La tamitema miali'a Iesua oli'a tatisaipeliou so milai no anu lavilelu so taula'i ne kalumo. 3Xe tamotu mixolu misosovosou taula'i xo xe uaini mukalui la Iesua nenu mivikalanu lexe, “Ane'i uaini so iieixula uae.” 4La Iesua mukoline lexe, “Atie, nalemolu noxilo xo ma'ia, anu mi na'a xeli to uasi. Noxilo voxo a uao.” 5Ia nenu mivikalane'i tamitema so xaixai no anu tani lexe, “Loxo uvikalangengixu mi ma'ia la nga'oxonusi.”

6La no tani anene lexa vexasou e toxoxu 6 e mi'oxonu no anu lavo'o a muta'olu ne. Anu vilevilesi ne umomomo no anu lexa litasou loxo 100. A muta'olu mulalaxi so tamitema i'uini vasime'a uxali malemalenga aloxo lavuloto noxi'a Taiuta ulemolu. 7Laso Iesua muvikalane'i tamitema so xaixai ne lexe, “Ngatatau lexa une'e so nga'ana'anixu lexa vexasou 6 'o.” Laso ane'i mitatau xo mole muana'ana mumomomo avile. 8Mukalu la Iesua muvikalane'ila lexe, “Io', ngatau se'i ngalaixu noxou itema so uvosinu la'ilali.” Laso ane'i milaixu noxou olele. 9Milaixu, ia anu lexa la uasi, anu muxiu muxali uaini mukalu. Xe itema so uvosinu la'ilali olele muiexu sevile so utovonu ia ulavu lexe mino'u a ne'ei uasi. Ane'i tamitema so xaixai e mitau nesi a milavusou. Mutovonu uaini ne xe mukalu sila mu'avalou itema mutaula'i alavua ne. 10La muvikalanu lexe, “Ai, tamitema ilavusou ivelunu uaini lailaixe tei mo tamitema iiexu xo xe isoliou malaxo uae, laso ane, ivelunu ane lailaixe malaxo uasi. Ia loxo nini la ne'apisou uaini lailaixe 'o ia mune'e alala'e se'osi a so navelunu to 'oe.”

11La mi e Iesua mu'oxonu ne Kana no xale lia ne Xalili ne anene soko'u no anu sosovo so xavi e mu'oxo'oxonu. Anu mu'oxonu so umaxa'u lavulavu ilou xavi mu'uli'uli noxou. La ane'i tatisaipeliou milopala noxou.

12Mukalu la Iesua oli'a nenu xe tavimovimou xe tatisapeliou milutu milu'elai ne Kapeniamu. Milai xo xe mixali la mixolu ne voxo se'i.

Iesua mukusai'a tamitema ane mimaketi no tasou Mosinge

13Ioxe, voxo so Taiuta i'oxonu lavilelu so Mosinge Mualasi'a a so uxali. Laso Iesua mulutu mulai ne Ielusalemo. 14Muxali lai ne xe mu'unalai no vimelusou tasou Mosinge la mumaisi'a tamitema imaketi noxi'a takau xe tasipisipi xe tangiala e utu. Xe se'i la mitatalupexa so isenisimunu lamoli. 15Ioxe, Iesua mu'avuti la mu'oxonu puate no anu lamolamota. Mukalu la mumuamuainu so ukusai'a tamitema oli'a takau xe tasipisipii'a ne mukalusi no anu tasou Mosinge. Mo munixinixi'u lamoli siliva noxi'a tamosou senisi olele ka mutitalenu latevolo noxi'a. 16Xe noxi'a tamitema e misalimune'i tangiala la muvikalane'i lexe, “Ngataxusi'a tangiala mo ngalailai. Mamu so nga'oxonu tasou Mamilo uxali tasou maketi.” 17Xe tatisaipeliou mimaisou mi e mu'oxonu ne la mixavutalanu vaikala vile muxolu mukaukavu no anu Mosinge vaikalaou lexe, “Opoleli u'oxoxu tasine so uxolu laixesi mo masaxa anene ukasilosi.”

18Ia loxo Taiuta la mivikalanu lexe, “Ioxe, namaxa'u sosovo so xavi axova so nalosoiexi lexe anu tanixene so ne'oxonu mi to ne.” 19La Iesua mukoline'i lexe, “Aloxo 'o. Ngingi ngamamulonu tasou Mosinge ano'o laso no anu voxo tatalusousi la eni atulusoula.” 20Xe Taiuta mikolinu lexe, “Uo ane'i tamitema mixaxai tau ie 46 so mitulusou tani ano'o, ia nini natulusou no anu voxo tatalusi, ne?”

21Ia tasou Mosinge ane Iesua mulemolu ne a vasimolusi. 22Laso no voxo ili'i loxo Mosinge mutulusou no anu soli so mumaulila, la tatisaipeliou mixavutalanu vaikalaou ne. Mixavutalanu la milopalanu vaikala ane uxolu no anu lavukuou Mosinge xe milopalanu vaikala e Iesua mulemolu kalumo.

Iesua ulavusou opone'i tamitema mukalusi

23No anu voxo so lavilelusou Mualasi'a la Iesua muxolu ne Ielusalemo. Muxolu la tamitema tavu'alo mimaisou sosovo so xavi ane mu'oxo'oxonu laso milopala noxousi. 24Ia loxo noxou Iesua la anu ulopalane'i tamitema ne lexe opone'i ulapu no anu anene uasi xo mulavusou ilixone'i tamitema mukalusi. 25Laso tava'u so evile upela'u no anu ilixone'i uasi xo anu mulavusou xavutala ma'ia muxolu no opone'i mukalusi.

Currently Selected:

Tioni 2: ATA

Highlight

Copy