Sabiduría 15
15
Israeli anapuechaksï no k'éri ampe arhiasïnti diósï eratakatechani
1T'úri juchari Diósï,
sési kámpesïnka
ka nóri jurarkpesïnka
tekaantskuari kámasïnka
ka p'amok'pesïnkari
enkari juramuni jarhak'a.
2Na uék'ini jucha k'amanharhint'ak'a
jucha cháriska ka janhanharhisïnkachi
chéti uinhapekuani,
ka nóchi k'amanharhint'aaka
jimpokachi míteska
eskats'ïni t'u mínkorhentaxaka.
3T'únkini míteni
k'amak'amasï kaxumpekuesti,
ka chéti uinhapekuani míteni
nómeni uarhikuesti.
4Jimpokachi no jiáretakorheska
eskats'ïni tantoch'aaka
imani diósï eratakatecha jimpo
enkaksï nósesi jimpo úk'ukorhenhak'a
ka enkaksï ima úak'a
enkaksï eranhakua p'itak'a
ka ménteruksï jimak'u atarhentani,
5enkaksï imani exerini
no míakua jukaricha tsípestakorhek'a
enkaksï imani jimpo tsípek'a
enka no kámka tsípekua
diósï eratakata enka no tsípekua jukaka.
6Ima enka úak'a
ka ima enka k'éri ampe arhiak'a
imaksï nósesi jásï ampe xénhchasïnti
ka nóksï nitatarhesti
sési ampe erokorheni jarhani.
Méntkueni jásï eska úkata úri
7Úkata úri tsïkantasïnti
ník'untasïnti atsïmuni
ka úsïnti úratakua ampe
enkachi marhuatatarak'a,
ka imani atsïmu jimpo úsïnti
imani úratakua enka sési úrakorhek'a
ka enka máteru ampe úranhak'a
ka imasï uantat'i ampe úrani ma ampe
ka ampe úrani máteru ampe.
8Ka jimak'u úntasïnti
nósesi ampe úni
imani atsïmu jimpo uénasïnti
diósï eratakatani ma úni
ima úsïnti
enka imat'u atsïmueri úkateka
ka enka imat'u no ióntaaka
atsïmu úkorhentani
imani jurhia enka euanhantaaka
tsípekua enka kuánetanhaka.
9No míakorhesïnti eska uarhiaka
ka eska nitamamaaka íni parhakpeni,
imecha jinkuni antaperasïnti
enkaksï tiámu tiripiti
ka tiámu mereari ánchekorhek'a
méntkueni jámasïnti eskaksï ima
enkaksï tiámu charhapiti ánchetak'a
ka k'éri p'ikuarherasïnti
eratakatechani úani jarhani.
10Imeri mintsita ísku turhirini jáxesti
ka imeri mintsikakua ísï eska echeri
nósani xénchakorhesti
ka imeri tsípekua
no jamperi xáni jukaparhasti
eska k'uerekua,
11jimpoka no míteska Diósïni
enka kueraaka
ka enka jiret'akua íntskuka
ka enka álma íntskuka.
12Úkata úri tsípekuani
ch'anakueni xésti
ka irekuani tumina antarakueni exesti
Uantasti: Iámu ampe jimpo
tumina antani uétarhesïnti,
imani ampe jimpo jamperi
enka nósesika.
13Ima acheti sési mítesti
eska nósesi niátaxaka
enka ísï diósï eratakatechani úak'a
enkaksï mák'ueni k'epekurhik'a
eska máteru kakakua ampe.
Ejiptu anapuechaksï diósï eratakatechani k'éri ampe arhiasïnti
14Enka úka,
imaksï sánteru no míakua jukasti,
sánteru jamperi eskaksï sapicha,
ima enkaksï chéti iretani
nósesi kámaka,
15jimpokaksï máteru iretecheri
diósï eratakatechani jiókorheaska,
diósï eratakatecha enkaksï no exek'a,
enkaksï úrhi jukaka
ka nóksï jiret'ani,
enkaksï kutsïkua jukaka
ka nóksï kurhani
enkaksï ják'ichani jukaaka
ka nóksï p'ikuarhkuni
enkaksï jantsiri jukaka
ka nóksï úni xanharani,
16diósï eratakatecha
enkaksï úkorhenhaka
enka ima nema úaka
enka tsípekuani kuánetakata kámka,
jimpoka nónema úaka
diósï eratakatani k'uiripueni ják'uni,
17jimpoka parhakpeni anapueska
ka jimpoka k'amanharhintstiska
imani ampe úsïnti
enka tsípekua no jukaka
ima enka úka,
sánteru jukaparhakuesti
eska ima ampe
enka k'éri ampe arhik'a
jimpoka ima tsípekua jukaska
ka enka ima úak'a imaksï no tsípitisti.
18Ejiptu anapuechaksï
nósesi járhati manakorherichanit'u
k'éri ampe arhiasïnti
ka ikichakueni járhatichani
enkaksï uénani jámani
no jaiapanhenhantapka,
19nóksï sáni sési járhasti
enkaksï jimpo sáni xénhchanhaaka
imani manakorherichani
Diósï no jiókorheaspti
ka no úch'akuraaspti.
Currently Selected:
Sabiduría 15: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.