San Marcos 7

Ambe enga nósesi útspejka

(Mt 15.1-20)

1Máruksï Jerusaleni juticha, fariseuecha ka juramukua jurhentpiricha, Jesusiniksï andarheraspti. 2Ka engaksï na exepka eskaksï máru Jesusiri jurhengorhericha no jupajkutini t'irexapka, arhinhchaasïremptiksï.#7.2 Lc 11.38. 3(Jimbokaksï fariseuecha –ka iámendu judiouecha p'indekua kámsïnga engaksï tua anapuecha jurajkukuapka: No t'ireni eka urheta no jupajkunhapiringa. 4Ka engaksï kópekuarhu nitini niántka, no t'irenhasïndi, urhetaksï jupajkuntasïndi ka tátsekuaksï t'iresïndia. Ka tsúntsuechantuksï ka purhechichani ka tiámueri p'ámatarakuechani, ka k'uírakua jamberiksï jupantasïrempti.)#7.4 Mt 23.25; Lc 11.39. 5Ka Jesusiniksï arhispti:

–¿Andiksïsï chéti jurhengorhericha no janhanharhijki p'indekuechani engajtsïni ióntki#7.5 Tua anapuecha. anapuecha jurajkucheaka? Exea, nóksï jupajkutini t'irexati.

6Ka Jesusi mókukuaspti:

–Isaiasï, Diósïri uandari, chánksïni jimbo uandaspti enga ísï karapka:

Iauanirini jarharetixati ireteri mintsita.

Nájkirukajtsïni penchumekua jimbo k'éri ambe arhini jarhajka.

7No ma ambe marhuasïndi engajtsïni k'éri ambe arhijka:

Jimbokaksï chári jurhentpekuecha parhakpeni anapu p'indekueska.#7.6-7 Is 29.13 (gr.).

8Ísïjtsï jámani p'indekuechani chúxapaani, Diósïri juramukuantsï jurarkusïnga.

9Ka arhiasptiteru:

–Chári p'indekuechantsï chúxapaarini, Diósïri juramukuechantsï miripakurhiasïnga. 10Eka Moisesi uandapka: Chéti táteni ka chéti nándeniri janhanharhiauaka,#7.10 Eks 20.12; Dt 5.16. ka uándikunhaati ne enga útakuska tátjembani o amambani.#7.10 Eks 21.17; Lb 20.9. 11Chájtsï mójtakuntaska ekajtsï arhijpejka eska ma nema úaka arhini tátjembani o amambani: Nókini úaka jarhuatani, jimbokani Diósïni míndakorhentatixaka;#7.11 Korbani: Uandakua ebreo jimbo. Nm 30.2 (3). 12ka ístujtsï uinhajtsïtasïnga eska enga nema ísï uandaaka, nóteru uétarheakia eska tátjembani o amambani jarhuataaka. 13Ísï jimbojtsï, indeni p'idekuechani jimbo k'amatakusïnga Diósïri uandakuani, enga mójkutperapanhajka. Ka uánekua xárhati ambeterujtsï úsïnga.

14Jimajkani Jesusi ióarhijpespti, ka arhiani:

–Kurhajtsïni je iámenduecha: 15No nósesi útspesïndi ambe enga xáni anhajka.#7.15 Mk 7.18-23; Mt 15.11,17-20. Ambe enga jini uénhenhajka, imasï nósesi útspejti. 16[Ekajtsï jurhenaka kurhani, sési kurhangu je.]#7.16 I arhustakua karakatecharhu griegurhu nóksï iápuru xarhantasïndi.

17Enga Jesusi jarharpentapka ka k'umanchekuarhu inchani,#7.17 Mk 9.28,33; 10.10. imeri jurhengorherichaksï kurhamarhespti ima uandantskua ambe arhikuekasïrempki. 18Ka ima arhiaspti:

–¿Chájtu no kurhangusïnki? ¿Nójtsï jánhaskasïnki eska no nósesi útspesïnga ambe enga anhajka? 19Jimboka no mintsitarhu niáratspesïnga, sïturhirhujku niárasïndi ka tátsekua ísku uéntasïndi.

Arhiakuekaxapti eska iámendu t'irekua ambakitiska. 20Ka uandasptijtu:

–Jatanhetsperakuasï nósesi útspejti. 21Jimboka mintsitarhu uénhenhasïnga nósesi járhati eratsekuecha ka ísku ambe niátakua ka sïpajkurhakua ka uándikperakua 22ka ísku jandikua ambe ka jatsikorhekua káneranhchakua ka ikikurhikua ka k'arhajpenhchakua ka nósesi járhati p'indekuecha ka ipuperakua ka uandatsetspenhchakua ka teparakorhekua, ka sési xékorhekua.#7.21-22 Ro 1.31. 23Iámendu i nósesi járhati ambe, jini uénhenhasïndi ka nósesi jájkpesïndi.

Jakajkukua uarhitiri enga no judiouepka

(Mt 15.21-28)

24Tátsekua Jesusi Tiro#7.24 Mk 3.8. uanondani isï niraspti. Ka k'umanchekuarhu ma niáraspti ka no uékasïrempti eska mítekorhepiringa nani jarhaspki, ka no úspti jirikorheni. 25Ka uátsïri amamba ma sóntku mítespti ka niraspti Jesusini tinguixurhikuni, jimboka imeri uájpani nósesi jásï incharhetixapka. 26Ima uarhiti Sirofenisia#7.26 K'éri japundarhu uanamukutini isï. anapuespti, ka enga na Jesusini xéntapka, kómarhispti eska imeri uátsïni petarhetantapiringa nósesi jásïni. 27Ka Jesusi arhispti:

–Jurakuksï urheta sapicha t'ireni, jimboka nósesiska sapichani t'irekua euamukuantani ka uíchuechani#7.27 Judiouechaksï “Uichu” arhiasïrempti imechani engaksï no judiouepka. íntsaani.

28Ka uarhiti arhispti:

–Tata, uíchuecha jamberiksï ántskantasïndi imani ambe engaksï sapicha uéjkujka.

29Ka Jesusi arhispti:

–Ásteru uandanheapantsï, chéti uandakua jimbo, nósesi jásï uérhentastia chéti uátsïni.

30Eka uarhiti chénjembo niántapka, uájpa t'uíni apojtsïkusptia, jimboka nóambakiti t'uíni uérhentaspkia.

Jesusi nunuxini ma ambakerantaspti

31Tátsekua Jesusi uéakuspti Tiro,#7.31 Mk 3.8. ka Sidoni#7.31 Mk 3.8. niraspti, jima uératini Galilea anapu japundarhu parhikutini isï niraspti ka témbeni iretecharhu niáraspti. 32Ka jimaksï achetini ma pérakuspti enga kándipka ka nunuxini. Ka kómarhisptiksï eska p'ájtsïkupiringa ambakerantani. 33Jesusi támu péraspti ka tsimapuru p'ándikuspti ka kuechenda atachakuspti,#7.33 Mk 8.23; Jn 9.6. Jimajkani isï kuechenda ménichani sïpiatini úranhasïrempti, ka ístu arhikuexapti eska Diósï andarheraspkia. 34ka auandarhu erancheparini k'arhanguntaspti ka uandaspti: “¡Éfata!” (Enga arhikuekajka: “¡Mítakorhe!”)

35Ka acheti ambajpandirantaspti, ka kuatapchantani, ka úspti sési uandani. 36Jesusi arhiaspti eskaksï nónemani jámapiringa aianguni;#7.36 Exe Mk 1.34. ka imaksï sánderu sóntku uandantasïrempti. 37Ka imani ambe ísï exeparini, ísï uandanhasïrempti: “¡Iámendu ambe sési úsïndi! ¡Kándichani kurhataraasïndi ka nunuxichani uandaraasïndi!”#7.37 Is 35.5-6.

Currently Selected:

San Marcos 7: BI-PURHE

Highlight

Copy