San Marcos 15

Jesusi Pilatuni japarini

(Mt 27.1-2,11-14; Lc 23.1-5; Jn 18.28-38)

1Ka táta k'ératichaksï xarhentku tánperantaspti achamasïcheri urhejtsïkuricha ka juramukua jurhentpiricheri urhejtsïkuricha jinguni, ka iámendu k'éri tángorhentskuarhu anapuecha. Ka Jesusiniksï jójkutini Pilatuni#15.1 Pilatu enga Roma jimbo Juda juramuempka. pérakuspti. 2Ka Pilatu kurhamarhespti:

–¿Jeteru t'u judiouecheri irecheski?

Ka Jesusi arhispti:

–T'úri ísï uandaska.

3Ka tátecheri juramutichaksï uánekua ambe arhiparhataspti, 4Ka Pilatu ménderu kurhamarhespti:

–¿Kurhaxakiri engaksïni xáni ambe arhinharhiparhatani jaka? ¿Nóri ambema uandakorhea?

5Ka Pilatu ísku pakareraspti enga Jesusi nómbema mókukorhempka,#15.5 Is 53.7; Mk 14.60-61; Lc 23.9..

Jesusiri uarhikua kurhajkorhekua

(Mt 27.15-31; Lc 23.13-25; Jn 18.38—19.16)

6K'uínchekuarhu p'indekua jarhaspti eska Pilatu k'atakatani ma petantapiringa, imani enga k'uíripu kurajkorhentapiringa. 7Ka Barrabasi máteru uándikpiticha jinguni jupikata jarhaspti, imecha jinguni engaksï márku jámempka uarhipeni. 8Uáni niáranhaspti jima enga Barrabasi jápka ka arhisptiksï eska jurajkupiringa ma, eska p'indekuani no jurajkupiringa. 9Ka Pilatu kurhamarhpespti:

–¿Uéksïntsï eskaksïni judiouecheri irechani jurajkucheaka?

10Jimboka mítespka eskaksï táteri juramuticha ipuperakua jimbojkusï pérakupka. 11Ka tátecheri juramutichaksï sóntku manatpespti eskaksï Barrabasini kurhajkorhentapiringa. 12Ka Pilatu ménderu kurhamarhpespti:

–¿Ka ambe úkua indeni, engajtsï arhijka judiouecheri irecha?

13Ka uinhachapariniksï arhispti:

–¡Krúsirhu cháparhata! ¡Krúsirhu cháparhata!

14Ka Pilatu kurhamarheaspti:

–¿Andi ambechka nósesi úski?

Ka imaksï sánderu uinhachaspti uandani:

–¡Krúsirhu cháparhata! Arhani.

15Ka Pilatu sési pakaratspeni uékani, Barrabasini intsantaaspti, ka Jesusini urheta k'uikirhetarkorhespti, ka tátsekua jurajkukuaspti eskaksï pápiringia krúsirhu cháparhatani.

16Ka p'urhejkutichaksï Jesusini imecheri ekuarhu péraspti, ka iámenduksï p'urhejkuticha jima tángorhentaspti. 17Ka irecherini jásïksï xukuparhatantaspti, ka kanakuaksï tsurhumueri úkata ma inchajtsïtaspti. 18Ka teresmarhunksï ka uinhachakunksï uénaspti, arhiparini:

–¡K'éri ambe arhinhe judiouecheri irecha!

19Ka p'atamu jimboksï uájtsïskasïrempti atani, ka t'uánharikuniksï ka tinguixurhikusïremptiksï. 20Engaksï na k'ámarapkia teresmarhuni, irecheri xukuparhakuaksï p'ikuntaspti, ka ménderuksï imeri takusïni jatsikuntaspti, ka pásptiksïa krúsirhu cháparhatani.

Jesusi néna enga cháparhatanhapka

(Mt 27.32-44; Lc 23.26-43; Jn 19.17-27)

21Ka juátarhu junguani jámani jimesï nitamantaxapti Simoni, Sirene anapu, enga Alejandrueri ka Rúfueri tátjembepka, ka p'urhejkutichaksï uinhapetarhu páraspti Jesusiri krúsini.

22Ka Jesusiniksï Gólgota arhikatarhu péraspti (enga: “Uarhiriri únicha” arhikuekajka). 23Ka kauikuaksï uékaspti íntskuni, kauikua mirra jinguni jeuetakata, k'óru Jesusi no arhaspti. 24Engaksï na krúsirhu cháparhatapkia, p'urhejkutichaksï arhungurhispti, ch'anakua jimbo, Jesusiri xukuparhakuani#15.24 Pir 22.18 (19)..

25Ióndakuarhuesptia#15.25 Tsípa nitamatini, enga nótki teruxujka (9:00 am). engaksï krúsirhu cháparhatapka. 26Ka krúsirhuksï chájtsïtaspti karakata ma enga arhimpka: “Judiouecheri irecha” arhini. 27Ka máteruksï tsimani kuárhukujpiticha Jesusi jinguni cháparhatanhaspti, ma jurhijkandani ka máteru uikixkandani. 28[Ísï jámani úkorhespti eska na karakata jaka: “Ka nósesi járhaticha jinguni miiunhantaspti.”]#15.28 Exe karandukatarhu 1.1 jimbo. Lc 22.37; Is 53.12.

29Ka k'uiripu enga jimesï nitamempka, manajtsïsïreptkiksï ka mámaruksï arhimasïrempti nitamani jámani:

–¡Exekorhea! ¡T'u engari tiósïoni xerentapiringa, ka enga uandempka eskari tanimu jurhia jimbori úntapiringa!#15.29 Mk 14.58; Jn 2.19; Uk 6.14. 30¡Kuájpekorhechkia, ka kétsekorhentsïchu!

31Ka tátecheri juramutichaksï ka juramukua jurhentpirichajtuksï teresmarhusïrempti, ka arhijperasïremptiksï:

–Máteruechani kuájpeasti, ka inde k'óru no úsïndia kuájpekorheni. 32¡Eka Krístueka, ka israelicheri irecheni, kétsekorhentechka, eka kétsekorhentaska, jakajkukuakachi!

Ka imajtuksï májkueni arhisïrempti engaksï márku cháparhatakorhetini jápka.

Jesusiri uarhikua

(Mt 27.45-56; Lc 23.44-49; Jn 19.28-30)

33Tátsekua pájpakandespti, teruxutini uénani ka téjkamatiru jamberi. 34Ka téjkamatiru Jesusi uinhachaspti: “Eloi, Eloi, ¿Lama sabaktani?” (Enga arhikuekajka: “Jucheti Diósï, jucheti Diósï, ¿Andirinisï jurajkia?”)

35Máru enga jima janhapka, ísïksï kurhajchatini, arhijperasïrempti:

–Kurha je, Eliasïni ióarhixati.

36Jarhaspti ma enga uiriapka takusïni binagre jimbo kuakarhutani, ka p'atamurhu ma jórhukuspti ka Jesusini íntskuspti,#15.36 Pir 69.21 (22). arhiparini:

–Eroki je, ju je exeni, nándika Eliasï juuaka késkuntani.

37Jimajkani Jesusi mátirku uinhamu mintsiraspti, ka uarhinia. 38Ka takusï k'uék'uetsasï enga tiósïo arhunhempka, terujkani karupakurhispti. 39Ka p'urhejkuticheri urhejtsïkuri, Roma anapu, enga jima jápka, exespti na enga Jesusi uarhipka, ka uandaspti:

–Sési jimbo, i acheti Diósï Uájpespti.

40Ka jima no iauanksï eraaxapti Maria Magdalena#15.40 Magdala anapu., ka Salome, ka Maria, Joseri amamba ka Santiagu sapichueri amamba, máteru uarhiticha jinguni, 41engaksï Galilea uératintki pámbetapuni ka jarhuatapuni jápka Jesusini.#15.41 Lc 8.2-3. Ka ístu máteru uarhiticha engaksï Jerusaleni kúngorhepka.

Jesusiri jatsintskua

(Mt 27.57-61; Lc 23.50-56; Jn 19.38-42)

42Xatinisptia ka t'irekua tánakuespti jimboka pauandekua sábadu jurhiatekuespka, enga judiouecha mintsikorhejka, 43Jose Arimatea anapu ts'iuentaspti ka niraspti andarherani Pilatuni ka sésikua kurhakuspti késkuntani Jesusini. Josejtu k'éri tángorhentskuarhu jámasïrempti, ka Diósïri irekuani erokorhexapti. 44Ka Pilatu, no jakajkusïrempti eska Jesusi uarhispkia, jimbosï p'urhejkuti urhejtsïkurini ióarhipti ka kurhamarhespti, na jatini uarhispi. 45Enga p'urhejkuti urhejtsïkuri aiangupkia, Pilatu íntspespti sésikua eska intsïnhantapiringa Jesusini. 46Ka Jose késkuntasptia Jesusini, ka takusï pitsïpiti ma jimbo irhispti, enga piápka, ka p'orhotarhu ma jatsintaspti, jima enga jarhanharhitarkorhepka, ka tsakapu jimbo ómutaspti. 47Maria Magdalena, ka Maria Joseri amambaksï, exexapti nani engaksï jatsintani jápka Jesusini.

Currently Selected:

San Marcos 15: BI-PURHE

Highlight

Copy