San Marcos 13

Jesusi aiangpesti eska tiósïo xerenhantapiringa

(Mt 24.1-2; Lc 21.5-6)

1Enga Jesusi tiósïo uéntapka, jurhengorheri ma arhispti:

–¡Jurhentpiri, exea xáni k'érati tsakapuechani ka xáni k'érati k'umanchekuechani!

2Ka Jesusi arhispti:

–¿K'érastiksï ano k'umanchekuecha? Ka iámenduksï xerendurhinhantaati, méntku nóma erhakua tsakapu máterurhu píjtsïkutini pakaraati.#13.2 Lc 19.43-44.

Parhakpeni k'amakurhikua

(Mt 24.3-28; Lc 21.7-24; 17.22-24)

3Tátsekuaksï Olibusï juátarhu niraspti, enga tiósïo erangurhini jaka. Ka Jesusi uaxakaspti, ka Pédru ka Santiagu ka Juánu ka Andresï sïpatekuarhkuksï kurhamarhespti:

4–Aiangujtsïni. ¿Andi i ambe na jatini ísï úkorhea? Ka ¿Ambe jimbochi jánhaskaa eska ísï úkorheni jámaakia?

5Ka Jesusi arhiaspti: “Xéparinijtsï jámaaka ásïksïni nema tandojche. 6Jimbokaksï uánekua juuaka jucheti jakangurhikua uandaparini ka arhiatiksïni: ‘Jíska’ arhini#13.6 Diósï ísï jakangurhikurhispti. (Ebreu uandakua jimbo, YHWH): Eks 3.14; Jn 8.58. ka uánekuaksï tandojchpeati.

7Ásï che je engajtsï míteska eska iápuru k'érati uarhiperata úkorhexaka. Ísï jatsisti eska úkorheaka, k'óru nótki k'amakurhixamti. 8Jimboka uarhiperanhaaka ka ístuksï jupiperaati k'éri ireta, máteru k'éri iretani jinguni; ka uápuru isï jencheati, ka kánekua k'arhimakua japoati. Indeni jimbo xarharaati eska uénaskia p'amekua, eska uarhiti na uénajka k'uparhata p'amerani.”#13.8 Is 19.2; Xa 6.3-8,12-17; Mt 24.8.

9“Cha jinguntku ja je k'óru: Jimbokajtsï tángorhentskuarhu, ka ístu k'umanchekua tángorhentskuarhu pánhaaka ka nósesijtsï kánhaaka atanhani. Ka jucheti jimbojtsï juramuti sapirhati ka juramuti k'ératichani jinguni pánhaaka, ka jimajtsï imechani jucheti ambe aianguauaka.#13.9-11 Mt 10.17-20; Lc 12.11-12; 21.12-15; Uk 4.1-8. 10Jimboka k'uanisïnga eska urheta iámendu iretecharhu uandanhantaaka ambakiti aiangperakua.#13.10 Mt 28.19; Kol 1.23; 1 Ts 1.8. 11Engajtsï jupinhaaka, ásï uandanhea je ambejtsïsï uandaa juramutichani japarini. Jimajtsï jánhastanhaaka ambe engajtsï uandaaka, jimbokajtsï no chásï uandani jauaka, Espiritu Sántusï uandaati. 12Uarhikuarhu pájperanhaati erachicha ka tátjembajtu uájpani uarhikuarhu péraati; ka sapichaksï tátjembani ka amambani anhaxurhikuauati ka atauatiksï uándikuani. 13Jucheti jimboksïni iápuru ikimchaati, k'óru ima enga no kuatantaaka jakajkuni jarhani, p'ímutanhantaati.”#13.12-13 Mt 10.21-22; Jn 15.18-25.

14“Engajtsï exeaka nósesi jásï kéjtsïtakua jima kéjtsïtanhani janhani enga no kéjtsïtakueka, cha engajtsï arhintani jaka kurhandira je,#13.14 Dn 9.27; 11.31; 12.11; Mt 24.15. ekajtsï Judea jauaka, sóntku sïpakorhe je, juátecharhu karhanharhiku je sïpakorheni; 15engajtsï k'umanchekuarhu karhakua jámani jauaka, ásï kétsentsï je inchantani ambe petakorheni; 16ka ima enga tarheni jauaka, ásï jamberi k'uanhatsente chereparhakua p'íntani.#13.15-16 Lc 17.31; Mt 24.17. 17¡Kánekuaksï nósesi nitamanchaati uarhiticha engaksï sapini erokorheni jauaka, o engaksï charhakuni etsukua íntskuni jauaka!#13.17 Lc 23.29. 18Kómarhi je Diósïni eska i ambe no jiájkani úkorheaka enga iéstani jarhajka, 19jimboka kánekua nósesi jánhaskorheaka, enga kueraajperakuarhu uératintki nómeni jánhaskorheka, ka enga nóteru méni ísï jánhaskorheaka.#13.19 Dn 12.1; Jl 2.1-2; Uk 7.14. 20Enga Acha no sóntku nitamatarapiringa xásï ambe, iámendu uarhinhapirindi; enga úka, no ióni xanhaskorheati jimboka Diósï kuájchakuauaka imechani enga erakuatini jakaia.”

21“Ka engaksïni nema arhiska: ‘Exe je, ixu jarhasti Krístu’ o ‘Exe je, jimini jarhasti’, ásï jáma je jakajkukuni. 22Jimbokaksï juuaka Krístu eratakorhecha ka Diósïri uandari eratakorhecha;#13.21-22 Mt 7.15; 1 Jn 2.18; Dt 13.1-3 [2-4]. ka mámaru ambeksï xarhataparini tandojchpeati ka milagruechanksï jimbojtu tandojchpeati, ka jámaatiksï Diósïri erakukatechani jamberi tandojchaani. 23¡Xéparini jáma je! Aianguskaksïnia ambe enga jurhani jaka.”

Acheti Uájpa junguaati

(Mt 24.29-35,42,44; Lc 21.25-36)

24“Enga na nitamaakia nósesi jásï ambe, tata jurhiata pájpapakanharhiati, ka nana kutsï nóteru t'íntskaati, 25auandarhu uératinksï jóskuecha uekorheati, ka auandarhu anapu uinhapekuechaksï xamatakorheati. 26Jiájkantsï exeaka eska Acha Uájpa#13.26 Exe 2.10. kánekua uinhapekua ka t'íntskua jinguni xúmurhu kétseaka.#13.26 Dn 7.13; Mt 16.27; 1 Ts 4.13-18; Uk 1.7. 27Ka imeri ánjelichani axauati t'ápuru isï eraparini anapu erakukatechani tánantaani, náni enga jamberi parhakpeni k'amarhujka ka nani enga auanda k'amarhujka.”#13.27 Dt 30.3-4.

28“Jurhengorhe je enga igusï jámka: Enga tsikixkurhintani jarhajkia, imani jimbochi jánhaskasïnga eska emenda janonguaxakaia. 29Ka chájtu engajtsï exeaka eska inde ambe úkorheni jauakia, indeni jimbo míte je eska Acha Uájpa chéni anhamukuskia. 30Jíksïni sési jimbo arhisïnga, eskaksï iásï anapuecha irekani jauaka útasï, enga inde ambe úkorheaka. 31Auanda ka echeri k'ámakurhiati, k'óru jucheti uandakuechaksï méntkisïuati.”

32“Enga úka, nónema mítesti káni, ka na jatini, níksï ánjelicha auandarhu míte, níjtu Diósï Uájpa míte, Tátejkusï míteti.”#13.32 Mt 24.36; Uk 1.6-7.

33“Cha, ísï jimbo tsínharhitini ja je, jimbokajtsï no míteska na jatini ísï jánhaskorhea. 34Cha májkueni jáma je eska nema enga iauani iretarhu nirani jámani jéndajka imeri jántspirichani, eskaksï k'umanchekua patsakuaka, ka táchani úkua jurajkukuasïndi, ka mítatini juramukusïndi eska kuáni jauaka.#13.34 Mt 25.14. 35Chájtu ísï tsínharhitini ja je, jimbokajtsï no míteska káni jungua k'umanchekuarhu anapu tata, inchatiru isï, terujkani chúrekua isï, sïuajpentku isï o xárhentku isï; 36ásï ima andajpatante ka cha k'uíni jarhani. 37Ka indeni ambe engaksïni chánksïni arhini jaka, iámenduechanisïni arhiani jaka: ¡Tsínharhitini ja je!”

Currently Selected:

San Marcos 13: BI-PURHE

Highlight

Copy