San Mateo 4

Nóambakiti Jesusini ts'éjkusti

(Mc 1.12-13; Lc 4.1-13)

1Tátsekua Espiritu Jesusini jimesï páspti enga nónema irekaka, eska nóambakiti ts'éjkupiringa.

2Ka tsimani ekuatse jurhia k'arhinda jatinia, k'arhimaspti. 3Ka nóambakiti andarheraspti ka arhini:

–Ekari sési jimbo Diósï uájpeka arhia arini tsakapuechani eskaksï kurhinda úkorhentaaka.

4Ka Jesusi mókukuntaspti:

–Karakata jarhasti: “No k'urhinda jimbojkusï irenhaati, uandakuechani jimbojtu irenhaati enga Diósï uandauajka.”

5Tátsekua nóambakiti ireta újchakurakatarhu páspti ka k'éri tiósïo iótakuarhu péraspti 6ka arhispti:

–Ekari Diósï Uájpeka, ixu uératini k'uanikurhi, nóchka karakata jarhaski andi:

Diósï ánjeli jémbechani axauati

eskaksïni kuájchakuaka.

Ka imaksïni no jurajkuati eskari andatseraaka,

ka eskari tsakapurhu ma no téksarhutaaka.

7Ka Jesusi mókukuntaspti:

Ka ístu karakata jarhasti: “Ásï jáma chéti Acha Diósïni ts'éjkuni.”

8Ka k'amarani jámania, nóambakiti k'éri juátarhu ma páspti ka iámendu parhakpeni anapu juramukuechani exeraaspti ka na engaksï xáni sési jápka, 9ka arhispti:

–Iámendu íni ambekini íntskuaka, engarini t'inguixurhichetini k'éri ambe arhiska.

10Ka Jesusi arhispti:

–Kéndiku nóambakiti, jimboka karakata arhisïnga: “Chéti Acha Diósïndi k'éri ambe arhiaka ka imantkurisï marhuakuaka.”

11Jiájkani nóambakiti Jesusini jurajkuspti ka ánjelichaksï jurhaspti ka marhuakuxaptiksï.

Jesusi Galilea uénasti jurhentpeni

(Mc 1.14-15; Lc 4.14-15)

12Enga Jesusi mítepka eska Juánu ónhakata jarhaspka, Galilea kuanhatsentaspti. 13Tátsekua Nasareti uéakuspti ka Kafarnaumi niraspti irekani, k'éri iretarhu enga japundarhu uanamukutini jaka, jimesï engaksï Sabuloni uájpecha ka Néftali uájpecha irekapka. 14I ambe ísï úkorhesti, ísï eska Diósïri uandari Isaiasi uandaka:

15“Sabuloniri ka Néftaliri echeri,

enga Jordanirhu parhikutini jaka,

enga japundarhu uanamukutini jaka,

Galilea engaksï no jakajkuticha irekaka.

16Ireta enga pájpakandu irekani jápka

k'éri eramarhandekua exesti,

ka engaksï uarhikueri k'umandarhu irekapka,

eramarhandekua kánekua t'íntskakuaspti.”

17Jiájkani uénaspti Jesusi arhijtsïkpeni ka uandani: “Diósïni andarhentsï je, jimboka auandarhu anapu irechekua janoskia.”

Jesusi t'ámu kurucha p'itamatichani ióarhiasti

(Mc 1.16-20; Lc 5.1-11)

18Jesusi Galilea anapu japundarhu uanamukuni nitamaxapti ka Simonini exespti, imani engajtuksï Pédru arhimpka ka erachi jémba Andresïni, uarhorakuechanksï k'uanimaani jarhani jimbokaksï kurucha p'itamatispka. 19Ka Jesusi arhiaspti:

–Chúxapujtsïni je, ka jíksïni k'uiripu uarhori úaka.

20Ka imaksï jurarkuaspti uarhorakuechani ka chúxapasptiksï.

21Sántku urhepatini tsimani erachichantu exeaspti, Jakobuni ka Juánuni, Sebedeo uájpechani engaksï tátjemba jinguni uarhorakuechani sïriantani jápka, ka ióarhiaspti. 22Ka imaksï jurarkuspti icharhutani ka tátjembani ka chúxapasptiksï.

Jesusi uánekuechani jurhendaasti

(Lc 6.17-19)

23Tátsekua Jesusi iápuru Galilea ísï jámasïrempti, iretarhu anapu tángorhentskuecharhu, jimbanhe aiangperakua ka irechekueri ambe uandantaparini, ka mámaru jásï p'amenchakua ambakerpentasïrempti ka iámendu jásï uandanheatechantu ísï. 24Iámu Síria Jesusiri ambe mítekorhespti ka pákuasptiksï iámendu imechani engaksï mámaru ambe jimbo nósesi p'ikuarherempka: Engaksï kómu p'ikuarherempka ka iámendu jásï p'amenchatichani, ka engaksï nóambakitichani incharhekorheatini jápka, ka engaksï p'íntani jámempka ka engaksï no úempka xanharani ka Jesusi iámenduechani ambakerantaaspti.

25Ka uánekuaksï Galilea anapuecha ka Dekapolisi anapuecha ka Jerusaleni ka Judea ka iurhekua Jordanirhu parhikutini anapuechaksï Jesusini chúxapaspti.

Currently Selected:

San Mateo 4: BI-PURHE

Highlight

Copy