San Mateo 18
18
ARHIJTSÏKPERATA MÁRKU IREKUERI
¿Ne sánderu k'ériski?
1Imani jurhiatekua jimbojtu jurhengorherichaksï Jesusini andarheraspti ka kurhamarhesptiksï: “¿Ne sánderu k'ériski auandarhu anapu irechekuarhu?” 2Ka Jesusi sapini ma uandajpaspti ka terujkani péraspti, 3ka uandaspti: “Sési jimboksïni arhixaka, ekajtsï cha no sapini jáxentaska, nójtsï inchaaka auandarhu anapu irechekuarhu. 4Ima enga kétsekua uérka ka ísï jámani eska i sapi na jámka. Imasï auandarhu anapu irechekuarhu sánderu k'ériti. 5Ka ima enga jucheti jakangurhikua jimbo sapini ma sési erokaaka, jíndenirini sési erokaxati.”
Na enga xáni nósesika k'amanharhintani
(Mc 9.42-48; Lc 17.1-2)
6“Ne uéjki enga sapini ma terungutaaka engarini jíndeni mintsikani jaka, sánderu sésiuati eska japundarhu k'uinimanhaaka tsakapu urhuratarakua ma jójchakukata. 7¡Áke, parhakpeni anapu terungutpekua ambe! Japusti, k'óru. ¡Jarhonheni, ne enga máteruni terungutaaka! 8Ísï jimbo, ekakini jájki o jantsiri terungutaraska, kachujku o kachundu ka k'uaniku, sánderu sésiuati eskari tsípekuarhu tokojtatini o tokojkutini inchaaka, ka nóri chpírirhu k'uanipanhani jima enga nómeni pójpejka. 9Ka ekakini éskua terungutaraska, p'itanharhi, sánderu sésiuati eskari tsípekuarhu ma éskua jinguntku inchaaka, ka nóri tsimani jukarini chpírirhu k'uanijpanhani.”
Karichi kuátakateri uandantskua
(Lc 15.3-7)
10“Exe je, ásï jáma je sapirhatichani támu péraani, jimbokaksïni sési jimbo arhixaka eskaksï ánjeli jémbecha, jucheti Táteni auandarhu anapuni erateni jarhasïnga. 11[Jimboka Acheti Uájpa tsînchetichanisï juka p'ímutantaani.]”
12“¿Nájtsï exesïnki? Eka nema iúmu ekuatse karichichani káajka ka ma ísï kuátani, ¿Andi no juátarhu jurajkuasïnki t'ámu ekuatse ka témbeni iúmu t'ámu karichichani? ¿Andi no nirasïnki imani jirinhanti enga kuátaka? 13Ka enga exentajka, sési jimboksïni arhixaka eska kánekua tsípeaka imani karichini jimbo, eska máteru karichichani jimbo enga no kuátaaka. 14Májkuentu, chári Táte enga auandarhu jaka, no uékasïndi eska i sapi ma tsîncheaka.”
K'uanisïndi erachini púakuntani
(Lc 17.3)
15“Ekakini chéti erachi ma nósesi ambe úcheska, uandaxeku engajtsï jandiochani jámani jauaka, ekakini kurhajchaska májkujtsï úkorhentaskia. 16Ka ekakini no kurhajchaska, pájta nemani o pájtaa máru, ka imaksïni kurhajchakorheati ambe engajtsï cha xáni uandaaka. 17Ka eka imechantu no kurhajchaaska, tángorhekuarhu uandantsï, ka enga tángorhekuani no kurhajchaska, ísïri exeaka eska no jakajkutiska o eskaksï ima engaksï Róma anapu tumina tánajka.”
18“Sési jimboksïni arhixaka eska ambe engajtsï parhakpeni k'ataaka, auandarhujtu k'atakata pakaraati, ka engajtsï xáni parhakpeni kuerantaaka; auandarhujtu kuerantskata pakaraati.”
19“Sési jimboksïni arhixaka, ekajtsï nema jinguni íni parhakpeni terukutaaka uandamukukorheparini ambe kurhajkorheni, jucheti Táteksïni íntskuati enga auandarhu jaka. 20Jimboka jima engaksï tsimani o tanimu tángorhentatini jauaka jucheti jakangurhikua jimbo, jíjtu jima jauaka.”
21Ka Pédru andarheraspti Jesusini ka arhispti: “Tata, ¿Namuni xanhari púakunta jucheti erachini engarini nósesi ambe úcheaka? ¿Iúmu tsimani xanhari jamberi?” 22Ka Jesusi arhispti: “Nókini arhixaka iúmu tsimani xanharku, tanimu ekuatse témbeni uéntani iúmu tsimani xanharirisï púakuntaaka.”
Jántspiri ma enga no úekaka tekaantani
23“Ísï jimbo, auandarhu anapu irechekua xáxesti, eska irecha enga imeri jántspirichani kántsperata miiukuantaapka. 24Eka uénapka miiuntani, pásptiksï ma enga témbeni milloni kánguempka. 25Ka jimboka ima jántspiri no játsispka néna maiamuntani, irecha juramuspti eskaksï jántspirini atarantapiringa temba ka uájpecha jinguni ka imani ambe enga xáni kángorhempka, ka ísï kántsperatani k'uerajchatarani. 26Ka jántspiri irechani tinguixurhikutini kómarhisïrempti: ‘Tata, tekaachentsïrini sánderku, jíkini maiamuntaaka.’ 27Ka irecha p'amojkuspti, jurajkuspti ka nómbe ma euantaspti.
28Ka jántspiri irecho uéntatini, exentaspti pámpiri jémbani ma enga iúmu ekuatse taiakata kánguempka, ka mápchakuspti arhini: ‘Juángia tuminani.’ 29Pámpiri jémba tinguindukutini kómarhisïrempti: ‘Tekaachentsïrini sánderkia, jíkini maiamuntaaka.’ 30K'óru ima méntku no uékaspti ka ónhatarkorhespti, ka no petarkorheni eka no urheta iámu maiamuntapiringa. 31Máteru pámpirichaksï exerini ambe enga xáni úkorhepka, kánekuaksï kómu p'ikuarheraspti, ka irechanksï iámu ambe niraspti aianguntani. 32Ka irecha jántspirini p'itajkorhespti ka arhispti: ‘Xáni engari nóambakeka, nókini euantaska eskarini xáni káncheni jápka jimbokarini t'u kómarhintaspka. 33T'újturi chéti pámpirini p'amojkupiringa ísï eskani ji na p'amojkuka.’ 34Ka irecha ikiatintku juramuspti eskaksï no jurajkuntapiringa k'uikirheni, eka jamberi iámu maiampentapiringa.” 35Ka Jesusi útasï uandasptiteru: “Májkuenksïni kántaati mándani arhini jucheti Táte enga auandarhu jaka, ekajtsï cha mintsita jinguni chári erachini no púakuantaska.”
Currently Selected:
San Mateo 18: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
