Sáni Mateo 15

Ampe enka ikichakua jáp'ek'a

(Mk 7.1-23)

1Máruksï juramukua jurhentpiricha ka fariseuecha enkaksï Jerusaleni uératini niárapka, Jesusinksï antarheraspti ka arhisptiksï: 2“¿Antiksïsï chéti jurhenkorhericha p'intekuechani no janhanharhik'i enkats'ïni tua anapuecha jurak'ucheka? Nóksï jupak'usïnti t'ireni jámani.” 3Ka Jesusi arhiantaaspti: “¿Chát'u antisï chári p'intekuechani jimpo no janhanharhik'i Diósïri juramukuani? 4Enka Diósï arhistatspek'a: ‘Janhanharhiakari táteni ka nánteni’ ka ‘Ima enka tátjempani o amampani útakuaka uántikunhaati.’ 5Ka cháts'ï uantasïnka: ‘Ima enka tátjempani o amampani arhiaka; nókini úaka jarhuatani jimpokani Diósïni míntakorhetixaka, 6tátjempani ka amampani nóteru jarhuataatia.’ Ísïts'ï chári p'intekuechani jimpo, Diósïri juramukuantsï támu péraxaka. 7Ískuts'ï ísï uantasïnka, sési jimposï chári ampe Isaiasi Diósïri uantari ísï uantapti:

8‘I iretarini uantakua jimpok'usï k'éri ampe arhit'i,

mintsitarhu máteru ampe eratsexati,

9ískuts'ïnisï k'éri ampe arhini jati,

k'uiripueri juramukuechani arhits'ïkpeaparini.’ ”

10Tátsekua Jesusi ióarhip'espti ka uantaspti: “Kurha je ka kurhankuntsï je: 11Akua ampe no ikichakueni jáp'esïnti, k'óru ampe enka uénhenhak'a inte ampesï ikichakueni ják'pet'i.”

12Ka jurhenkorheri jémpechaksï Jesusini antarhentaspti ka arhisptiksï: “¿Exeskiri eskaksï fariseuecha ikiaska inteni jimpo enkari uantaka?” 13Ka Jesusi arhiantaaspti: “Anhatapu enka no jucheti Táte auantarhu anapu tsikirika, muruskunhaati. 14Jurak'u je; nóksï exesïnti ka pátenharhichanksï urhekupaasïnti, ka enka pátenharhi ma máteru pátenharhini urhekupaaka, tsimarhenksï nani uekanheati.”

15Ka Pédru arhintaspti: “Jánhastats'ïni íni uantantskuani.” 16Ka Jesusi arhiaspti: “¿Anti chát'u nótki úsïnki kurhankuni?

17¿Nóts'ï kurhankusïnki eska akua ampe sïturhirhu niárasïnka ka eska tátsekua ísku únhantasïnka? 18Ka ampe enka uémuskorhenhak'a mintsitarhu uénhenhasïnti, ka inte ampe ikichakueni jáp'esïnti, 19jimpoka nósesi járhati eratsekuecha, uántikperakua ampe, mintsitarhu uénhenhasïnka, ka ísku jántikua ka no k'uratsekua jukakua, ka sïpak'urhakua, ka chkuántirakua, ka arhinhchpenhchakua ampe. 20Inte ampeksïsï ikichakueni jáp'et'i, ka no enkats'ï no jupak'utini t'ireaka.”

Uarhiti Kananea anapu ma Jesusini mintsikasti

(Mk 7.24-30)

21Jima uératini Jesusi Tíro ka Sidoni isï niraspti. 22Ka uarhiti Kananea isï anapu ma, uinhachaparini antarheraspti ka Jesusini arhispti: “¡Tata, Dabidi Uáp'a, p'amok'urini! Jucheti uátsïtini nóampakiti ma kánekua nósesi kántaxati.”

23Ka Jesusi nómpe ma arhintaspti. Ka jurhenkorhe jémpechaksï Jesusi arhisïrempti: “Chúntsï, méntkuts'ïni uinhachachepaxati.” 24Ka Jesusi uarhitini arhispti: “Ji Israeli anapu karichi tsînchekatecha jinkuntkusïni axanhaka.” 25Ka ima uarhiti tinkuikuatsekuspti arhiparini: “¡Tata, jimpoetaku, jarhuatarini sáni!” 26Ka Jesusi arhintaspti: “Nósesi jarhasti sapicheri t'irekua uíchuechani íntsaani.” 27Ka uarhiti uantaspti: “Jo Tata, ísïsti, k'óruksï uíchuecha jamperi ántskantasïnti ampe enkaksï achecha uék'uk'a.” 28Ka Jesusi arhintaspti: “¡Nana, Diósïnti kánekua mintsikasïnka! Úkorhencheri eskamenturi na uékani jaka.” Ka uáp'a sóntku ampakentaspti.

Jesusi uánekua p'amenchatichani ampakerantaasti

29Jima uératini, Jesusi Galilea anapu japuntarhu uanamukutini niraspti, ka juátarhu ma karhamaspti ka jima uaxakaspti. 30Jimaksï uánekua antarheraspti enkaksï renhet'echani ka pátenharhichani ka nunuxichani ka k'urhuk'urhechani, ka máteru uánekua p'amenchatichani pákuauempka, ka Jesusi iámentuechani ampakerantaaspti. 31Ka ísï exenhatini ísku pakareranhasïrempti enkaksï nunuxicha uantempka, ka k'urhuk'urhechaksï ampak'urhantani, ka renhet'echaksï sési xanharani, ka pátenharhichaksï exeni. Ka Israeli anapu Diósïnksï k'éri ampe arhisïrempti.

Jesusi uánekuechani t'ireraasti

(Mk 8.1-10)

32Jesusi jurhenkorheri jémpechani uantap'aaspti ka arhiaspti: “P'amok'pexaka jimpoka tanimu jurhiatekueskia enkaksï jínteni jinkuni jámani jaka, ka t'irekua nómperanhasti, ka no uékasïnka nóma atini axap'entani, jimpokaksï xanhari jimpo mirikurhiaka.” 33Ka Jesusiri jurhenkorherichaksï arhispti: “¿Jucha nani p'iua xáni káni t'irekua ixu enka no irenhaka?” 34Ka Jesusi kurhamarheaspti: “¿Namuntsï kurhinta káaxaki?” Ka imaksï uantaspti: “Iúmu tsimani ka namuntku kuruchechani.” 35Ka juramuspti eska uaxantenhapirinka. 36P'íkuaspti iúmu tsimani kurhintechani ka kuruchechani ka Diósïni diósïmaiamu arhintatini arhukuaspti, ka jurhenkorherichani íntsapaaspti ka imaksï etsakuspti. 37Uiniarhanhantaspti t'irenhani, ka kurhinta ka kurucha pakarataksï iúmu tsimani tsïkiata uiniri tánantaspti. 38Ima enkaksï t'irepka t'ámu míli ísïsptiksï ka no miiuaparini uarhitichani ka sapichani. 39Ka axap'entatini, Jesusi icharhutarhu jatant'a'spti ka Magadani isï niraspti.

Currently Selected:

Sáni Mateo 15: BI-PURHE

Highlight

Copy