San Lucas 1

Ichajpetarakua#1.1-4 Ima enga íni karantaka aiangpepasïndi nani arhintaski jimboka no exekorheska: Iontki anapu karakata, engaksï xáni ima aianguka engaksï jurhenguani p'íka ka engaksï exekorheka. Cf. Hch 1.1.

1Uánekuaksï jángorhentasti karantani imani ambe enga Acha Diósï juchantsïni jinguni úka, 2ísï eskajtsïni na aianguka ima engaksï exekorheka uénani jámani, ka engaksï tátsekua uandakuani aiangpentani ánchekorheni p'ika. 3Acha Teófilu,#1.3 Teófilu: Lukasï indeni aiákuntasïndi karakata (cf. Hch 1.1rhujtu jatasti), ka nóchi míteska sánderu inderi ambe. Íni karakatechani uánekua ima íntsantaapirindi. jíjtuni sésimenduni iámendu ambe iatsitakuarhu kurhangorheska néna uénakorhespi, ka sési péntaska ka exeska eska marhuauaka iámendu íni ambe karachentanikini, 4eskari sésimendu míteaka eska ísïskamendu ima ambe engari xáni aiangunhakia.

Ánjeli ma Juanu itsï atajtsïkpiriri kóntperakua uandantasti

5Jimajkani isï enga Erodesi#1.5 Erodesi: Erodesi k'éri (Mt 2.1 nota b). Judea irecheni jápka, jarhaspti táta ma enga Sakariasï arhinhempka, enga Abiásïcha#1.5 Abiasï: Táta mésti (1 Cr 24.10). Mándani arhisïremptiksï Jerusaleni arhijtsïkpeni, tsimani xanhari uéntani ma uéxurhini jimbo ka iúmu tsimani jurhi chúnguramani. jingunipka. Imeri uarhiti Aaroniri#1.5 Néna jimbo Aaroniri sïrukuespki: Arhikukaxati eskaksï imao iámendu tátespka. sïrukuespti ka Isabeli arhinhasïrempti. 6Ka tsimarhenksï nóma ambe arhikua jukaspti Diósïni japarini, ka Acheri uandakuani ka juramukuechanksï kurhandirakusïrempti ka nómbemaksï nósesi jásï ambe exemenhantasïrempti. 7Ka nóksï ma sapini kóndenhaspti, jimboka Isabeli no úsïrempka sapi káani; ka jimbokajtuksï tsimarheni kánekua k'érispkia.#1.7 Cf. Gn 11.30; 17.15-21; 1 S 1.

8Ma xanhari, jimajkani engaksï Sakariasïri tátecha p'itarapka k'éri tiósïo marhuani, 9ka ísï eskaksï tátecha na p'indekua jatsipka, Sakariasïni niárakueraspti k'éri tiósïo xunhanda jatsikuni.#1.9 El Xunhanda jatsikuni Santisimurhu kurhiranhasïrempti (Ex 30.1-8; 1 R 7.48-50). Mándani Xarhentku ka xatini jatsikunhasïrempti; jarhasïrempti; enga arhijka eskaiámu ireta jima jarhasïrempka (v. 10) arhikuekasïndi eska xatinisïrepka (cf. Hch. 1). Tátechaksï xanispti (18,000 ísï) jimboksïsï máxanharku o xanimendu tsimani xanhari niranchempti xunhanda jatsikuni engaksï jamberi uarhimpka. 10Ka eka na xunhanda kurhiranhani jápka, iámu jima anapuecha uérakua janhaspti uandamukukorhenhani. 11Ka enga ísï úkorheni jápka, Sakariasïni ánjeli ma xarhakuspti, xunhanda kurhiratarakuarhu t'irerkandani anhaxurhitini jarhani. 12Ka ánjelini exerini, Sakariasï kánekua ísku pakareraspti ka kánekua chérakorhespti. 13Ka ánjeli arhispti:

–Sakariasï, ásï jáma chéni, jimboka Diósï kurhaskia chéti uandamukukorhekua, ka chéti uarhiti Isabeli sapini ma kángorheatia; ka Juánuri arhiratarkorheaka, 14t'úri kánekua tsípeaka, ka uánekua tsípenhaati enga ima andajpenuaka, 15jimboka chéti uátsï Achani jinguni k'éri ambeuaka. Nóma jásï ka nómeni kauikua ts'émuati,#1.15 Luk 7.33. Juanu itsï atajtsïkpiri no kánekua jatsikorherini irekasïrempti; (Nm 6.1-5; Jue 13.4,7-14); rekabicherijtu exe je (Jer 35). ka nótki jamberi kángorhenhani janhaati enga t'uíni Espiritu Sántuni#1.15 Luk Espiritu Santuni kánekua sési eranguntapani jarhasïndi (Lc 1.35,41,67; 2.25-27; 3.16,22; 4.1,14,18; 10.21; 11.13; 12.12; cf. Xétkiru je Inchajpetarakua ka Hch). iámu incharhekorhetini jauakia. 16Ka uánekua Israeli anapuecha Acha Diósïni jinguni péntauati. 17Inde Juánu Eliasïri uinhapekua ka espiritu jinguni Achani urhekupaati, ka tátjembechani uájpechani#1.17 Mal 4.5-6 (3.23-24); Eclo 48.4,10; Exe je Mt 17.12-13 n. jinguni sési arhijpetarantauati, ka no kurhandirechani jurhendauati eskaksï míakua jukaaka. Ka ísï jámaparini iretani miátaati eskaksï Achani sési erokaaka.

18Ka Sakariasï ánjelini kurhamarhespti:

–¿Ka andi ji néna sésimenduni míteaia eskarini no ískusï ísï arhini jaka? Jimbokani jucha kánekua k'ératiskia.

19Ka ánjeli arhispti:

Ji Gabrieliska#1.19 Gabrieli: Cf. Dn 8.16; 9.21. ka Diósïni marhuakusïnga, ka imarini axasti t'úngeni jinguni uandontskorheni, ka íni ambakiti aiangperakuakini juácheni. 20Ka engarini ísï no jakajkucheka indeni ambe engakini ji arhika, nunuxiri úkorheaka; nóri úaka uandani imani jurhiatekua jamberi, enga jamberi iámu ambe ísï úkorheaka.

21Ka enga incharini ísï úkorheni jápka, Sakariasï uérakua eronhantaxapti ka iámenduechaksï kurhamarhekorhesïrempti andisï xáni ióndani jápi k'éri tiósïo uéntani. 22Ka enga na ióni jimbo uéntapkia, no úsïrempti uandaxetspeni; ka sóntku jánhaskanheraspti eska k'éri tiósïo incharini ambe ma xarhakuspka, jimboka no úsïrempka uandani ka jimboka manajkurhaparinderku aiangpexapkia; ka nunuxi pakaraspti.

23Ka enga na k'amarapkia k'éri tiósïo marhuani, Sakariasï chénjembo níntaspti.#1.23 Sakariasï umbaakukuarhu ma irekaspti enga Judea anapu juátarhu ma jaka (vv. 39-40). 24Ka tátsekua enga na i ambe úkorhepkia, imeri uarhiti Isabeli sapini ma erokorhexaptia, ka iúmu kutsï no uéraspti, ísï eratseparini: 25“Acharini kóndentastia, ka ísï jámani nóteruni arhinhchanhaakia.”#1.25 Judiouechaksï uandasïrempti eska Diósï no jiápanheantasïrempka imechani engaksï no úempka sapi káani, ka ísï jimboksïnhasï no xénhchakatarhueoti (Gn 30.23; 1 S 1.1-18).

Ánjeli ma Jesusiri andajpenukua aiangpesti

26Kuímu kutsï nitamatini,#1.26 Kuímu kutsï nitamatini: Enga Isabeli kuimu kutsi sapi jinguni jámani jápkia (v. 24). Diósï axaspti ánjeli Gabrielini Galilea anapu iretarhu ma enga Nasareti#1.26 Nasareti: Jiájkani ísï umbakukua sapichuespti Galilea, anapu juátarhu enga Palestina karhamani jaka. arhinhajka, 27jima irekaspti uátsï ma enga Maria arhinhempka; no p'árhekatespti, k'óru kurhajkorhekata jarhasptia#1.27 kurhajkorhekata jarhasptia: Uandaxenhasptia ka karakorhetixaptiksïa k'óruksï nótki márku irekaxati; exe je Mt 1.18 kétsekua karakata i. eska tataka ma jinguni uambuchapiringa enga Jose arhinhempka, enga irecha Dabiri sïrukuepka. 28Ánjeli jima inchaspti enga uátsï jápka, ka arhispti:

–¡Tsípe t'u, kánekuamenduri xénhchakateska! Acha t'úngeni jingunisti.

29Ka Maria ísku pakareraspti ísï kurharini, ka kurhamarhekorhesirempti, ¿Ambe arhikuekempki enga ísï uandajpapka? 30Ka ánjeli arhispti:

–Maria ásï jáma chéni, jimboka Diósï t'úngenimendu jinguniska. 31Iásïri uératini sapini erokorheni jauaka: Sapiniri ma kángorheaka, ka Jesusi arhiratarkorheakari. 32Ka ima k'éri ambeuati, ka arhiatiksï eska ima uájpeska enga K'érika, ka Acha Diósï k'érikuarhu péraati, májkueni eska tátjemba Dabini na pérapka, 33ka eska méntku ísï Jakobueri sïrukuechani juramuakuauaka. Ka imeri juramukua nómeni k'amakurhiati.

34Ka Maria ánjelini arhispti:

–¿Ka inde ambe néna ísï úkorhea? Engarini nótki ma tataka píreni jaka.

35Ka ánjeli mókuntani arhispti:

–Espiritu Sántukini andarheraati, ka Diósïri uinhapekuakini t'úngeni andajtsïkueraati, ísï jimbo, sapi enga andajpenuaka Sántuesti ka Diósï Uájpesti. 36Isabelijtu sapini ma kámaati, ima enga t'úngeni jinguni márkueka, nájkiruka k'érikia, ka engaksï arhimpka eska no úsïrempka sapi káani, kuímu kutsïstia enga sapi jinguni jámani jakaia. 37Jimboka Diósï nómbema no úsïnga úni.

38Jimajkani Maria arhispti:

“Ji Acheri jántspiriska; Diósïrini káme eskamendurini t'u na arhika.”

Enga na ísï úkorhepka, ánjeli níntaspti.

Maria Isabelini p'urhembesti

39Ka ima jurhiatekuechani jimbo Maria sóntku iretarhu ma karhamaspti enga Judea jaka, 40ka enga Sakariasïo inchapka, Isabelini uandajpaspti. 41Ka enga Isabeli kurhapka eska Maria uandajpaspka, sapi Isabelini uinhamu manaakuspti, ka Espiritu Sántuni iámu incharhekorhespti. 42Ka jimajkani Isabeli uinhachaparini uandaspti:

–¡Diósïkini újchakurasti, sánderu eska iámendu nanechani ka chéti uátsïni újchakurasti! 43¿Andi ji ambe xániski engarini ísï juka jucheti Acheri amamba jíndeni exeni? 44Engachkakini ji kurhaka janoni, jucheti uátsïtirini manaakusti xáni tsípeni. 45¡T'u k'ória engari jakajkuka eska iámendu ambe engakini Acha arhijka úkorheaka!

46Jimajkani Maria uénhekorhespti:

“Jucheti mintsita k'éri ambe arhisïndi Acheri k'érikuani.

47Jucheti mintsita tsípexati Diósï jinguni,

enga jucheti p'ímutantspirika.

48Jimbokarini Diósï jíndeni erakuska,

engani imeri jántsipiri sapichu méka,

ka iásï uératini méntkisïjtsïni arhiati eskani újchakurakateska,

49jimboka ima enga iámu uinhapekua jatsika,

jíndenirini kánekua sési ambe úcheska.

¡Pímbinhaxetisti imeri jakangurhikua!

50Ka méntku ísï p'amojkuasïndi

imechani engaksï chénharhijka.

51Ka imeri uinhapxurhakua jimbo

k'éramakorherichani eratsekua xerekuantasti.

52Ka jarhamekua jinguni uandarichani juramukua euantaasti,

ka k'érikuarhu pérasti imechani engaksï kétsekua uérajka.

53Kánekua jatsikorhekua íntsaasti engaksï t'irekua no jatsijka,

ka jatsikorherichani ísku petantaasti.

54Imeri jántspiri Israelini jurhasti jarhuatani,

p'amojkperakua míaparini.

55Eska méntkisï juchari ióntki anapuechani,

Abranini ka imeri sïrukuani na aiakuapka.”#1.55 Gn 17.7; 26.3; Sal 105.8-9; Miq 7.20.

56Maria Isabelio tanimu kutsï jatsïpespti, ka tátsekua níntasptia.

Juánu itsï atajtsïkpiriri kóntperata

57Enga niárapka jurhiata enga Isabeli sapini kángorhepiringia, tataka sapichuni ma kángorhespti. 58Imeri irenguticha ka márkuechaksï niraspti exentani, ka sési ambe uandakuaksï pákuni engaksï mítepka eska Acha kánekua kóndespka, 59ka enga sapi na iúmu tanimu jurhia andangutapkia, imaksï niáraspti ts'iuerakuani pasïri p'ikujtsïkukuni. Ka uéksïremptiksï imantu Sakariasï jakangurhitarani, eska tátjemba na arhinhempka. 60Enga úpka, amamba ísï uandaspti:

–Nómbe, Juánu arhinhaati.

61Uánekuntasptiksï arhini:

–¿Andi? Chéni nónema ísï arhinhasïndi.

62Ka jimajkanksï tataka sapichueri tátjembani manajkurhaparini kurhamarhespti, néna uéksïrempki eska arhinhapiringa. 63Tátjemba k'ereri ma kurhajkorhespti jimboka jima karanharhikuni uéksïrempka; ka ísï karaspti: “Juánuesti.” Ka iámenduechaksï ísku pakareraspti. 64Ka enga na karapka, Sakariasï nunuxikua jupinapaspti, ka uandakua junguakuspti, ka Diósïni k'éri ambe arhispti. 65Ka iámendu jimajku ísï anapuecha ísku pakareranhasïrempti, ka iápuru iretecharhu, engaksï Judea juátechani jimbo jaka, uandanhantasïrempti ambe enga úkorhepka. 66Iámendu engaksï kurhajchapka mintsitarhuksï patsakorhesïrempti, ka uandasïremptiksï: “¿I sapi náxani k'éri ambeua?” Jimboka sési jimbo Acha Diósïri uinhapekua sapi jinguni xarharasïrempka.

Sakariasïri uandamukukorhekua.

67Ka Sakariasï tataka sapichueri tátjemba Espiritu Sántuni incharhekorhetini, ísï uénhekorhespti eska Diósïri uandari ma:

68“¡Acha, Israeliri Diósï k'éri ambesti

jimboka imeri iretani p'ímutantani jurhaska!

69P'ímutantspirini májtsïni axachesti enga iámu juramukua kámka,

enga imeri jántspiri Dabiri sïrukueka,

70ínisï ióntki aiatspepti,

engaksï Diósïri uandari erakukatecha uandempka:

71Eskajtsïni kuájpentapiringa imechani jinguni engajtsïni kurhunhejka,

ka iámendu imechani jinguni engajtsïni ikiachejka,

72eska juchari ióntki anapuechani kóndeantapiringa

ka eska imeri ambakiti aiatspekuani no mirikurhipiringa.

73Ka aristi uandakua aiatspekata

enga juchari Táte Abranini aiakupka:

Eskajtsïni sésekua íntskupiringa

74no chéta jinguni irekani jarhani,

eskajtsïni nóteru nema ikiacheaka.

75Ka ísïchi kaxumbekua ka pímpinhaxekua jinguni marhuakuni,

ka ima jingunchi jarhani enga jamberi xáni juchari tsípekueuaka.

76Ka t'u, jucheti uátsï, arhinhaakari

eskari Diósï k'ériri uandariska,

jimbokari Achani imeri xanharichani urhekupaaka

ambantskakupaani.

77Eskari imeri iretani p'ímutantskua mítetaraaka,

ka eskaksï k'amanharhintskuechani púamenhantaaka.

78Jimbokajtsïni juchari Diósï, enga xáni p'amojpejka

iótakuarhu uératini t'íntskua jimbanhejtsïni juácheska,

79enga imechani erajkutauaka

engaksï kánekua pájpakandu irekani jaka,

ka jupijtapantsïni eskachi jucha sési pájperaaka.”#1.79 Is 9.2 (1).

80Ka tataka sapichu k'uiripexapti ka imeri espiritu uinhapexapti. Ka jima irekaspti enga nónema irekaka, jimajkani jamberi enga Israelichani xarhakuantaapka.

Currently Selected:

San Lucas 1: BI-PURHE

Highlight

Copy