San Juan 21
21
Jesusi iúmu tsimani jurhengorherichani xarhakuantaasti
1Tátsekua enga na ísï ambe úkorhepkia, Jesusi ménderu jurhengorherichani xarhakuaspti Tiberiasï anapu k'éri japundarhu uanamukuni. Arisï úkorhespti: 2Simoni Pédru ka Tomasi ima engaksï kuáti arhimpka, ka Nataneli enga Kana Galilea anapuepka ka Sebedeo uájpecha ka máteruksï tsimani jurhengorherichaksï márku jarhaspti. 3Simoni Pédru arhiaspti:
–Nipa ji kurucha p'itamani.
Imaksï arhispti:
–Juchajtuni niuaka t'u jinguni.
Nirasptiksï ka icharhuta k'érirhu máksï jataspti, ka imani chúrekuaksï nóma kurucha úspti p'ímani. 4Enga na erandepkia, Jesusi uanamukuni jarhaspti; ka jurhengorherichaksï no jánhaskaspti eska Jesusispka. 5Jesusi arhiaspti:
–Tumbicha, ¿Kámaxakijtsï kurucha?
Imaksï arhispti:
–Nómbe.
6Jesusi arhiaspti:
–Cheremakua jimini icharhuteri t'irerkandani k'uanima je, jimini jatamesti.
Kuanimasptiksï ka nóterksï jámberi úsïremptia antsimantani xáni uanekua kurucha jatarhuni. 7Ima jurhengorheri enga Jesusi xáni xénhchempka Pédruni arhispti:
–¡Achesti!
Pédru Jukantapaspti xukuparhakua, jimboka patsikjasï jámaxapka, ka k'éri japundarhu k'uanimespti. 8Máteruechaksï icharhutani jatapunguaspti cheremakuani kurucha jinguni antsimaparini, jimbokaksï no iauani inchametini jámaxapka, ma ambokuta ísïjkuksï inchametini jámaxapti. 9Uémentatinksï, kurhikakata ma exespti enga kurucha jatajpetini jápka ka kurhinda. 10Jesusi arhiaspti:
–Jua je máru indeni kuruchechani engajtsï p'itamaka.
11Simoni Pédru icharhutarhu karharaspti ka itsïrhu uanamukuni jamberi cheremakuani antsimaspti enga xáni k'érati kuruchecha jukarhuatini jápka, ka iúmu tsimani ekuatse ka témbeni tanimu kuruchesptiksï. Ka náuejki xáni uánepka, cheremakua no karukurhispti. 12Jesusi arhiaspti:
–Juia je t'ireni.
Nóma jurhengorheri tékaasïrempti kurhamarheni ima néspki, jimbokaksï mítespkia eska Achespka. 13Tátsekua Jesusi andaparhakueraspti, kurhindani p'íkuspti ka imechani íntsaaspti; ka kuruchantu májkueni kámaspti.
14Tanindarhuesptia enga Jesusi jurhengorherichani tsíntatini xarhakuantapkia.
Néna enga Jesusi Simoni Pédruni arhipka
15Engaksï na k'amarapkia t'ireni, Jesusi Simoni Pédruni arhispti:
–Simoni, Juánu Uájpa, ¿T'úrini sánderu xénhchasïnki eskaksï inde máteruecha?
Pédru arhispti:
–Jo, Acha, míteskari eskakini xénhchasïnga.
Jesusi arhispti:
–Sánirini eranguchea karichichani.
16Ménderu uéntaspti kurhamarheni:
–Simoni, Juánu uájpa, ¿T'úrini xénhchasïnki?
Pédru arhispti:
–Jo, Acha, mítetixakari eskakini xénhchasïnga.
Jesusi arhispti:
–Sánirini eranguchea karichichani.
17Tánimu úni jámani kurhamarhespti:
–Simoni, Juánu uájpa, ¿T'úrini xénhchasïnki? Ka jimboka Jesusi tanimu xanhari kurhamarhespkia Pédru, mískorheparini arhispti:
–Acha, t'úri iámu mítetixaka; míteskari eskakini xénhchasïnga,
Jesusi arhispti:
–Sánirini eranguchea karichichani. 18Sési jimbokinisï arhini jaka eskari t'u tumbiparini jóangorhekorhentasïrempka, ka nirasïrempkari nani engari t'u uékempka nirani; k'óru engari na t'arhepeakia, iójkurhantaakari ka máteru nemakini jóangorhetantantaati ka nani engari no ninhejchani jauaka jiniksïni páati.
19Enga ísï arhini jápka, Jesusi jánhastpexapti néna enga Pédru uarhipiringa ka eska Diósïni imeri uarhikua jimbo k'érikuarhu pérapiringa. Ka arhisptiteru:
–¡Chúxapurini!
Jurhengorheri enga Jesusi xáni xénhchempka
20Enga eraparhapka, Pédru exespti eska tátsepuxapka ima jurhengorheri enga Jesusi xáni xénhchempka, ima enga chúrekua t'irekuarhu ma akandani jakupka ka sánderu kánekua andanharhikuerapka ka enga kurhamarhepka: “Acha, ¿Nékinisï intsïnharhitpea?” 21Enga Pédru exepka, Jesusini kurhamarhespti:
–Acha, ka inde ¿Ambe úkorhenchaia?
22Jesusi arhispti.
–Ekani ji uékaska eska inde jauaka engani jamberi k'uanhatseska, ¿T'u ambeia? T'úrini chúxapa ka xántku.
23Jimbosï jakajkuticha jinguni ísï mítekorheni jápti eska ima jurhengorheri no uarhipiringa. Enga úpka Jesusi no arhispti Pédruni eska no uarhipiringa. Sánderu sáni arhispti: “Ekani ji uékaska eska inde jauaka engani jamberini k'uanhatseska, ¿T'u ambeia?”
24Indesï jurhengorheri indeni ambe uandantani jati ka enga karantaka, ka jucha míteska eska ísïska.
25Jesusi uánekua ambeteru úspti. Enga iámendu ambe karanhantapiringa, eranhaskasïnga eska iámu parhakpeni no jatanhepiringa xáni uáni karakatecha.
Currently Selected:
San Juan 21: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
