San Juan 14
14
Jesusi xanharisti Táteni jinguni nirani jamani
1“Ásï uandanhea je, Ekajtsï Diósïni mintsikajka jíndentujtsïni mintsika je. 2Jucheti Táteo kánekua ambandesti; enga no ísïpiringa, nóksïni aiangupiringa eskaksïni ambantskaracheni niraxamka. 3Ka engani na niaraaka ka engaksïni na ambantskaracheakia, junguaka ka pákorheakaksïni, eskajtsï chájtu jima jauaka nani engani ji jauaka. 4Ka jima engani ji nirani jámka chájtsï míteskia xanharini.”
5Tomasi arhispti:
–“Tata, nóchi míteska naniri niraxamki, ¿Nénasïni jucha miiuntskaia?”
6Jesusi arhispti:
–Ji xanhariska, ka imeska enga ísïka, ka tsípekueska. Nónema andarhentasïndi táteni enga no jíndeni jimboejka. 7Engajtsïni jíndeni mítepiringa, Tátentujtsï mítepiringa; iásï uératintsï míteskia jimbokajtsï xéxaka.
8Felipe arhispti:
–Tata, Tátentku engajtsïni exeraska, nóteruchi ambe ma uandaaka.
9Ka Jesusi arhispti:
–Felipe, xáni iónistia engani cha jinguni jámaka ka ¿Nótkirini mítesïnki? Jimboka ne engarini jíndeni exerika, Tátentu exeristia; ¿Andirisï útasï uandajki eskaksïni Táteni exeraaka? 10¿Nóri jakajkusïnki eskani ji Táte jinguniska ka eska Táte jíndeni jinguniska? Engani xáni ambe uandajka, no p'itsïkorhesïnga uandani; Táte enga jíndeni jinguni jaka imasï mámaru sési ambe újti. 11Jakajkuchejtsïni eskani ji Táte jinguniska, ka eska Táte jíndeni jinguni jarhaska. Sikera imani jimbo jakajku je engani xáni ambe úka. 12Ísïmenduesti engaksïni arhini jaka: Ne engarini mintsïkaska, imajtu imani ambe úati engani ji újka, ka sánderu k'érati ambeteru úati jimbokani ji tátenisïni andarhentani jámka. 13Ka ji úaka iámendu ambe engajtsï jucheti jimbo kurhajkorheaka, ka eska ísï jámani Uájpani jimbo Táte k'éri ambe arhinhaaka. 14Engajtsïni jucheti jakangurhikua jimbo kurhacheska ambe ma, ji iámu ambe úaka.
Jesusi Espiritu Sántuni aiatspesti.
15“Ekajtsïni xénhchajka, jucheti juramukuantsï kurhandirakuaka; 16ka ji Táteni Espiritu Sántuni kurhakuaka, enga méntkisï cha jinguni jauaka,
17Espiritu engamendu ísïka, imani engaksï parhakpeni anapuecha no újka p'irani jimbokaksï no exesïnga ka nójtuksï mítesti. Ka chájtsï míteska, jimboka cha jinguni irekaxaka.”
18“Nóksïni uerandi jupindi pakataaka: K'uanhatseaka chánksïni jinguni. 19Nóteru ióni jimbojtsïni parhakpeni anapuecha nóteru exeatia, ka chájtsïni k'óru exeaka, jimbokani ji tsípiti jarhaska ka chájtujtsï tsípekua jatsiaka. 20Ima jurhiatekuajtsï jánhaskaaka eskani ji jucheti Táteni jinguni májkueska ka eskajtsï chájtu jíndeni jinguni májkueska ka jíjtuni chánksïni jinguni májkueska. 21Imarinisï xénhchajti enga jucheti juramukuechani míteaka ka kurhandirakuani; ka ne engarini xénhchaska, jucheti tátejtu xénhchaati; ka jíjtuni xénhchaaka ka xarhakuaka.”
22Ka Júdasï (máteru Júdasï, no Iskariote) arhispti:
–¿Andijtsïnisï juchantsïni xárhachea ka nóri máteru nemechani xarhakuani?
23Jesusi arhintaspti: “Ekarini nema xénhchka, kurhandirakuati jucheti uandakuani, ka jucheti Táte xénhchaati ka jucha andarheraaka, ka ima jingunichi irekaaka.
24Ima engarini no xénhchajka no kurhandirakusïndi jucheti undakuechani. Ka íni uadakua engajtsï kurhani jaka no juchetisti, jucheti Táteristi, ima engarini axaka.
25Ísïksïni arhixaka engani útasï chánksïni jinguni jaka. 26K'óru Espiritu Sántu, enga sési arhijpentajka, ka enga Táte, jucheti jimbo axaaka, iámu ambeksïni exeraati ka imani ambeksïni miátantaati engaksïni ji xáni arhikia.
27Sési jakuaksïni jurajkuchexaka; jucheti sési jakuaksïni jurajkuchexaka. Nóksïni xásï sési jakuasï íntskuni jaka eska parhakpeni anapuecha na jásï sési jakua íntspejka. Ásï uandanhea je ka ásï jáma je chénheni. 28Kurhariskajtsï engani ji uandaka: ‘Níntaaka ka junguaaka chánksïni jinguni.’ Ekajtsïni xénhchapiringa, chájtsï tsípepiringa engani Táte jinguni níntapiringa, jimboka Táte jíndeni jinguni sánderu k'ériska. 29Ka ínksïni ambe méntku arhixaka enga nótki úkorheni jaka, ka eskajtsï jakajkuaka enga na ísï úkorheakia.
30Chánksïni jinguni xántkuni uandaxeakia, jimboka íni parhakpeni anapu Irecha janoxakaia. Ima jíndeni jinguni nóma ambe uinhapekua kámsïndi; 31mítenhe k'óru eskani ji Táteni xénhchasïnga ka eskani imani ambe úsïnga eskarini Táte na juramucheka. Jauara je. Juia je ixu kéndikuni.”
Currently Selected:
San Juan 14: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
