Génesis 6
6
K'uiripueri no kurhantirakua
1Enka tatakecha uánenhani jápkia parhakpeni, nanakechat'uksï uánexapti, 2Diósï uáp'echaksï xénchaaspti nanakechani k'uiripu uáp'echani, erakukorheasptiksï ka tempa úasptiksï. 3ACHA uantaspti: Jucheti espiritu no métku isï k'uiripu jinkuni jauati uarhipeni, ka no jurak'uaka eska ióni ireka, jimpoka k'uiripu k'uiripeteriska, kuimu ekuatse uéxurhini (120) irekaati.
4Imani jurhiatekua ísï, k'uiripu iót'arhechaksï jarhaspti parhakpenirhu, enkaksï tatakecha Diósï uáp'echa kúrheaspka nanakechani k'uiripu uáp'echani, ka iót'arhechaniksï uáp'echani kaaspti, imaksï p'urhek'utispti ka uánekua uarhipeta antaspti ka iápuruksï mítekatespti.
5ACHA exespti eska k'uiripu kánekua k'amanharhintaxapka parhakpenirhu, ka eskaksï méntu isï no sési eratseni jarhasïrempka úni. 6ACHA no sési p'ikuarheraspti ka mintsita ataspti enka isï k'uiripuni kueraapka parhakpenirhu. 7ACHA uantaspti: K'amantskaaka k'uiripuni enkani kueraaka, ka k'amantskaaka manakorherichani, káratichani ka antsikorheticha. ¡No sési p'ikuarheraska isï k'uerarini!
8ACHA kánekua jaiapanhentaspti Noéri kaxumpekuani.
Nóe k'éri icharhuta úspti
9Noé kaxumpitispti ka méntu ísï irekaspti, ka méntu ísï Diósïni janhanharhiparini irekaspti, íksï jintespti Noéri sïrukuecha:
10Noé tanimu tata sapichani kóntenhaspti: Semi, Kami ka Jafeti.
11Diósï exespti eska parhakpenirhu kánekua no sési irenhaspka, jukari uantikperanhani. 12Diósï exespti eska k'uiripu parhakpenirhu kánekua no kurhantirasïrempka, k'uiripuecha kánekua no sési irekaspka. 13Diósï arhispti Noéni: Eratseskia k'uiripuni k'amantskarani, jimpoka imechani jimpo parhakpenirhu kánekua atap'eranhasïnka. ¡Ji echeri jinkuni k'amak'uauaka! 14Úkorhe k'éri icharhuta ma iarhiniri, ka xunhanta atanha ka ataparhakuni. 15Arisï jáxeati: Kuímu ekuatse ka témpeni iúmu (135) ióxurhakua ióskaati, ka ma ekuatse ka tsimani ka teruk'ani (22.5) ióxurhakua kóskaati, ka témpeni tanimu ka teruk'ani (13.5) ióxurhakua iót'arhaati. 16Tanimu xanhari kúts'ïtakateuati, ka kámukua ma jukaati ját'akutini ka ma ióxurhakua sánterku no antancheraani eratamakua ma jukaati. 17Iámu parhakpeni iurhentpeaka, iámentu ampe k'amak'uaka enka xáni echerirhu jaka, iámentu ampe uántikuaka enka xáni tsípiti jaka. 18Ka t'únkeni jinkuni pakatperaakachi, k'éri icharhutanits'ï jataaka, chéti tatakecha, chéti uarhiti ka chéti tarhaskuecha. 19K'éri icharhutarhuri mántani jarhati tsípitichani jatsirauaka, ma kutsï ka ma t'arhe, ka nóksï uarhiati. 20Iámentu jasï manakorhericha jatsiraakakari mántani járhati, apepensticha, káraticha, uákasïcha, ka imani enkaksï antsikorhek'a, tsimantani, ma kutsï ka ma t'arhe, t'únkeni jinkuni jataatiksï ka isï jamaniksï no uarhiati. 21Iámentu jásï jatsirakorhe t'irekua ka patsakorhe jimpokats'ï ióni jamperi uétarhenchaaka t'irekua.
22Noé isï úspti eska Diósï na arhipka.
Currently Selected:
Génesis 6: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
