Génesis 50
50
1Jose táte jempani kamanharispti ka erateparini uéraspti ka putinharikuspti. 2Tátsekua Jose imechani uantap'aspti enkaksï uarhirichani sési ják'uantka uánekua ampe atarheani ka p'itakuani ampe enka terek'a, eskaksï sési ják'untapirinka Israeli imeri táteni ísï eska jima na p'intekuepka. 3Tsimani ekuatse jurhiatekuaksï ánchekorhespti uarhirini kasïperantani, ka xáni jurhiaksï mítakuspti uarhirini, Ejiptu anapuechaksï tanimu ekuatse ka témpeni jurhiatekuaksï míntakuspti uarhirini.
4Enkaksï k'amarapkia míntani enka xáni k'uanimka uarhirini, Jose irechao anapuechani uantaxekuaspti ka arhiaspti: Enkani sésikua jatsika kurhak'orheni ampe, arhije sáni irechani eskarini íntskuaka sésikua.
5Eskari jiáretaaka nirani jucheti úni ampe enka jucheti táte kurhak'orheka eskani úaka, ima uantasti: Uarhiakia ka ji uékasïnka eskarini Kanaa echeri jatsintaaka jima enkani jarhanharhitakia. Ísï jimpo íntskuts'ïni sésikua eskani niuaka ji jucheti táteni jatsintani, ka tátsekua k'uanhatsentaaka.
6Ka irecha arhispti:
Ni ka jatsintsï chéti táteni eskakini ima na kurhacheka.
7Jose niraspti táte jempani jatsintani ka nirasptiksï pámpetani irecheri jarhoajp'ericha ka irecheri tátecha Ejiptu anapuecha. 8Enka xáni Joseo irenhapka imát'uksï niraspti jatsintani, ka imaksï enkaksï táte jempo irekapka. Goseni sapicha ka karichicha ka uákasïchak'uksï pakarapka. 9P'urhek'uticha tekechu jataricha ka uánekua k'uiripu niraspti uarhirini tsïnkuntani. 10Enkaksï Goreni Jaatadi niárapka jima enka Jordani parhikutini jaka, jimaksï míntakuspti imu tsimani kurhiatekua uarhirini ísï eska na p'intekuepka.
11Enkaksï exepka Kananicha enkaksi jima anapuecha, na enka xáni uémempka imaksï arhip'eraspti: Kánekuaksï no sési p'ikuarhexati uarhirini jimpo Ejiptu anapuecha ka jiáni uératiniksï Abeli jakunkurhitaspti jima. Ima Jordanirhu ját'akutini jarhasti.
12Israeli uáp'echaksï iámentu ampe ísï úspti eska ima na juramukuapka: 13Kanaaniksï páspti ka Makpela porhonharitarhuksï jatsintaspti jima enka Abraami, Efroni jititani piákupka enka Mamre jurhiata antarakuarhu ísï jaka. 14Enkaksï na táte jempani jatsintapkia, Jose Ejiptu k'uanhatsentaspti imeri erachichani jinkuni ka iámentu imechani jinkuni enkaksï xáni pámpetani nípka.
Enka Joseri uarhikua niarani jápkia
15Enkaksï Joseri erachi jempecha exepka eska táte jempa uarhispkia, arhip'erasptiksï: Josets'ïni ikiacheni jati ka uékatits'ïni no sési úchentani mák'ueni eskachi jucha na no sési úkuka. 16Joseniksï uantakua axakuspti: Chéti táte enka nótki uarhimpka juramusti, 17eskaksïni arhipirinka: Tekakuantsï chéri eracheri k'amanharhintskuechani, inteksïni no sési kámasti. Ísï jimpo arhixakaksïni eskari puakuantauaka íni Diósïri jántspirichani. Imaksï útasï uantaxapti enka Jose ch'kepatapka uerani.
18Erachi jémpechaksï tinkuikuatsespti imani japantiru ka arhisptiksï: Ixuchi jarhaska jucha chéti jántspiriuaka.
19Jose arhiaspti: Ásï jama je chéni jarhani, ¿Anti ji Diósïski?
20Cháts'ï eratseska jinteni no sési úcheni, k'óru Diósïrini mót'akuchesti no sési ampe, sési ampe jinkuni, eskani úpirinka enkats'ï iásï na exeni jaka, jarhoatani k'uiripuni eska no uarhiaka. 21Ásï jama je chéni. Jíksïni íntskuaka t'irekua ka chári sapichini t'irerauka.
Sési arhiauantaspti ka sési uantaxekuaspti.
Joseri uarhikua
22Jose Ejiptu irekaspti imeri táteri márkuechani jinkuni, ka iumu ekuatse ka tempeni uéxurhini jatiri uarhispti. 23Jose exeaspti Efraimi nimakuechani enka nótki uarhini jápka, ka Makiri uáp'echani ka Manasesi uáp'echani, Joseri jurhintskuarhuksï t'arhexespti.
24Ma jurhia Jose arhispti erachi jempechani: No ióntani uarhiakia, Diósïksïni juati p'urhempeni ka jarhuatatiksï íni echerirhu petatani, ka jimaksï páati enka Abrahami, Isaaki ka Jakobini aiákuka. 25Jose arhiaspti eskaksï úpirinka enka ima kurhakuapka, ka arhiaspti eskaksï uantapirinka: Diósïksïni juati p'urhempeni, na enka jatini juaka, cháts'ï pauka jucheti unichani.
26Jose iumu ekuatse ka tempeni uéxurhini jatiri uarhispti, ka imeri anhanhatakuaniksï sési ják'uspti eska na p'intekuepka jima anapu, uarhiri jatsirakuarhuksï jatsirantasti Ejiptu.
Currently Selected:
Génesis 50: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
