Génesis 48
48
Jakobi, Efrainini ka Manasesi úch'akurasïnti
1Ísï no ióni jimpo, Joseniksï aiánkuspti enka táte jempa p'amenchaxapka. Jose niraspti exeni táte jempani ka pát'aspti uáp'echani Manasesi ka Efraini. 2Enkaksï aíankupka Jakobini eska Jose niraxapka exeni, Israeli jánkorhentaspti uaxakani jimpoka apontetixapka. 3Jakobi, Joseni arhispti: Diósï iámu uinhapitirini xarhachesti eska t'intskua Kanaani ka úch'akurastirini.
4Arini uantakuechani jinkuni: Ji úaka eska chéti sïrukua káneaka, Ji uáka eskari k'érati uapatsekuechani uaxastauaka, ka íni echerichani chéti sïrukuechani íntsauaka. 5Chéti tsimani uáp'echani, Efraini ka Manasesi enkari ixu káaka Ejiptu enkani ji nótkini jurhempka exenikini, ínteksï ísïsti eska jucheticha, mák'ueni eska jucheti uáp'echa Rubeni ka Simeoni. 6Enkari máteru tátsekua káaska sapichani, imaksï jima p'iuati echeri nani enkaksï erachi jempecha anapueka. 7Enkani ji ixu Padani jurhani jamani jápka, Raqueli xanhari jimpo uarhispti Kanani echeri jimpo, Efrata no iáuani, ka Efrateka enka Benelika jima jatsintaska. 8Israel jima erapataspti Jose uáp'echani ka uantaspti: Ka íksï ¿Néski? 9Ka Jose táte jempani arhispti: Íksï tsimani sapicha juchetisti enkari Diósï intsaaka ixu. Israeli arhiaspti: Antarherats'ïni jíksïni uékasïnka úch'akurani.
10Israeli nóteru úsïemptia sési exeni jimpoka kánekua k'érispia. Jimposï Israeli arhiapti eskari antarherapirinka, putinharhikuaspti ka kamanharhiaspti. 11Israeli, Joseni arhispti: Nóteru mintsikasïrempkia eskakini exentapirinka, ka iásï Diósï uékasti eskani jamperi chéti sïrukuechani exeapirinka.
12Jose imeri uáp'echani kéntitaspti jima uératini enkaksï imani uaxatakutini jápka, ka tátsekua ima tinkuixurhispti ka tsérhukua antaskueraspti. 13Jose imeri uáp'echani antarhetaaspti táte jempani. Efraini t'irek'antani enka Israeliri uikixkantanipka, ka Manasesini uikixu akantani enka Israeliri t'irek'antanipka. 14Israeli ják'i tirek'antani ióxurhantasti, ka na uék'i Manasesi úrhetipka ima Efrainini páts'ïkuspti enka sapichuepka, ka ják'i uikixu akantani Manasesini páts'ïkuspti. 15Joseini úch'akuraspti arini uantakuechani jinkuni: Diósï enka Abraami, Isaaki ka jucheti táte janhanharhika, ima Diósï enkarini kuách'akuka jiáni uératini enkani antap'ekuka.
16Ima Ánjeli enkari méntu ísï kuách'akuka eska ima úch'akurauaka íni sapichani, ka eska jucheti jakankurhikua miánhantaaka intechani jimpo, ka ístu jucheti tátecheri jakankurhikua Abraani ka Isaaki. Ka eskaksï uánekua echerirhu.
17Enka Jose exepka eska táte jempa Efrainini jupits'ïkupka ják'i t'irek'antani jimpo, no jaiapanhentaspti ka uékaspti mót'akukuni eska Manasesini jupits'ïkupirinka, 18Ima arhispti imeri táteni, No ísï táte, inte no urhetisti, arisï urhetiti, ixu péra ják'i t'irek'antani.
19Táte jempa no uékaspti ísï úni, ka uantaspti: Mítetixaka, jucheti uátsïti, intet'u kériuati ka uaxastaati iretani ma, K'óru erachi sapichu sánteru k'ériuati, sánteru sïrukuechani jatsiauati ka k'érati iretechani uaxastauati.
20Imani jurhiatekua Israeli úch'akuraaspti uantaparini: Enka úch'akurhani jamaka eska uantanhaaka: Eska Diósï ísï úaka eska na úka Efraini ka Manasesi jinkuni. Ka Efraini urhepani péraspti ka tátsekua Manasesini péraspti.
21Tátsekua Israeli, Joseni arhispti: Eskari na exeni jakia, uarhixakaia, Diósï cha jinkuni jauati ka pantatiksï jima enka chári tátecheri echerika.
22Jikini sánteru kánekua echeri íntskuxaka eska chéti erachichani, echeri enkani tiámu uarhiperakua ka pitoki jimpo amorreo anapuechani euakorheaka.
Currently Selected:
Génesis 48: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
