Génesis 45

Jose erachi jempechani aiankuaspti ima néspki

1Jose nóteru úsptia uékuani p'ínkuni imecha japarini, ka uinhachaspti: ¡Iámentu enkaksï jucheti jántspirika, iámentuecha uéra je! Ka nóma jántspiri jima pakaraspti. Ima erachi jempechani aiankuaspti.

2Ka jurak'utakorhespti uérani. Ejiptu anapuechaksï iámu mítespti, ka irechao iámu mítenhaspti. 3Jose eriche jempechani arhiaspti: Ji Joseska. ¿Jucheti táte útasï jámaxaki? Erachi jémpechaksï no jánhaskeraspti ka nóksï úsïrempti mókukorheni.

4Jose ménteru arhiaspti: Antarherats'ïni je. Ka imaksï antarheraspti ka ima arhiaspti: Ji chári erachi Joseska, ima enka cha Ejiptu anapuecha atarakuantapka.

5Ásï kómu jáje, jimpo ji Diósïsï ísï uékapka eskani jarhoatapirinka k'uiripuni ka eska no uarhipirinka. 6Tsimani uéxurhini k'arhintestia, ka máteru iúmu uéxurhini kuerataxati eska nitamaaka k'arhinta, enka no ma ampe japoaka ampe t'irekua p'ikuntani. 7Diósïrini urheta axasti ixu, ka tátsekua chánksïni axasti, ka ísï no uarhinhaati ka sïrukua jauati. 8Ísï jimpo, nóts'ïni chásï ixu axaka, Diósïrinisï ixu axati, eskani irechani arhistakupirinka ampe úni, ka jarhoatani imeri juramukuarhu, ka na enka Ejiptu juramupirinka. 9Kókuani ni je nintani jima enka jucheti táte jaka, ka arhi je eskani ji ísï uantaska: Diósïrini iámu Ejiptu juramuti ústi. Arhije eskari juaka exeni, eska sóntku juaka. 10Goseri irekaka, ka jínteni jinkuniri jauaka, ka chéti uáp'echa ka nimakuecha, ka chéti karichi ka uákasïcha ka iámentu ampe enkari kánkorhek'a. 11Iámentu ampekini íntskuaka, nómari uétarhenchaaka ni chéti márkuecha, ni chéti manakorhericha ampe uétanchati jimpoka iumu uéxurhini kuérataxaka eska k'arhinta k'amakurhiaka. 12Cháts'ï iámentuecha ka t'u Benjamini exexakats'ï eskani jísïni ísï uantani jaka. 13Aianku je jucheti táteni enka xáni jatsikorhekua jaka ixu Ejiptu, ka iámentu ampe enkats'ï xani exeka, kókuani sóntku nije k'uanhatsentani ka juáchets'ïni jucheti táteni.

14Jose, Benjamini kamapanharhispti ka ueraspti, Benjamini imát'u ueraspti Joseni kamanharhitini. 15Tátsekua iámentu erachi jempechani ueparini putinharikuaspti, tátsekuarhuksï erachi jempecha uantaxekuspti.

16Irecheri k'umanchekuarhu jamperi mítekorhepsti, ka iánkusptiksï: Joseri erachi jémpechaksï jurhasti. Ka irecha tsípesti. 17Irecha, Joseni arhispti: Arhia chéti erachichani eskaksï ch'anch'akichani kuiparhatauaka ka eskaksï Kanaani níntaaka. 18Ka eskaksï uakuaka márku jempechani, jíksïni sési jántu Ejiptu íntskuaka, jima enka kánekua t'irekua jaka, ka sésits'ï t'ireaka. 19Arhia eskaksï páaka mótsetarakuechani Ejiptu anapu, ka eskaksï jima sapicha ka nanakechani ka chári táteni juaraka. 20Ka eskaksï no uantanheaka enkaksï no úska iámentu ampe juáni, ixu Ejiptu kánekua ampe ka ampakiti ampe jatsikorheaka.

21Israeli uáp'echa ísï úspti eska irecha, Jose mótsetarakuechani íntsaaspti ka t'irekua enkaksï xanhari jimpo apapirinka. 22Iámentuechani xukuparhakua jimpanhe íntsaaspti eskaksï mórhekorhepirinka, ka Benjamini ka tempeni ka iumiu ekuatse (300) taiakata íntsaaspti ka iumu xukuparhakua mórhekua. 23Ka táte jempani tempeni ch'anchakichani uánekua ampe ka ampakiti ampe axakuspti Ejiptu anapu, ka tempeni ch'anchaki kutsïchani tríju ka kurhinta ka t'irekua axakuspti eska imák'ani úrapirinka enka nipirinka exeni. 24Tsïnkuaspti erachi jempechani ka imaksï niraspti. Ma ima arhiasti: Ásï xanhari jimpo uarhiperapantsï je.

25Imaksï Ejiptu uékusti ka Kanaaniksï niántaspti jima enka táte jempa Jakobi jápka. 26Ka aiánkuntasptiksï: Jose no uarhisti ima jamaxati, ima Ejiptu juramutisti. Ima kómu p'ikuarherhaspti jimpoka uantaspka enkaksï ch'ánach'anamexapka. 27Imaksï iámentu ampe ísï aiankuspti eska ima na uantapka, ka enka Jakobi exepka mótsetarakuechani enka Jose axakuapka, tsípenharhintaspti ka jakak'uspti. 28Israeli uantaspti: ¡Mítetini eska Jose tsípiti jarhaska!, Tsípexaka, niuaka exeni no ióntani, jimpoka k'ériskia.

Currently Selected:

Génesis 45: BI-PURHE

Highlight

Copy