Génesis 43

Joseri erachichaksï k'uanhatsentaspti Benjamini jinkuni

1Kánekua japospti k'arhimakua Kanaani. 2Enkaksï na iámu k'amachapkia tríjuni enkaksï Ejiptu uératini pápka, táte jempa arhiaspti:

Ni je ménteru Ejiptu sánteru t'irekua piáni.

3Juda uantaspti: Ima juramutits'ïni méntku arhisti: Enkats'ï no juaska chari erachini, nóteruksïni jiókaaka.

4Jucha niuaka t'irekua piáni, enkari t'u axaska juchari eracheni jucha jinkuni. 5K'óru enkari no jucha jinkuni axaska, jucha no niuaka, jimpokats'ïni ima achati arhiska: Enkats'ï no juaska chari eracheni, ásteruts'ïni méni juje exeni.

6Israeli uantaspti:

¿Antits'ïnisï nósesi úche, enkats'ï imani juramutini aiánkuntaka eskats'ï jatsiska máteru erachini?

7Imaksï uantaspti: Ima juramutits'ïni uánekua ampe kurhamarhesti juchari ka juchari márkuecheri ampe, kurhamarhestits'ïni:

¿Chári táte jarhaski irekani? ¿Kámasïnkitsï máteru irechani? Jucha mókukuska imani, jucha nena mítepirini eskats'ïni ima juchari erachini kurhachepirinka.

8Juda táte jempani Israelini arhispti: Jurak'u jinteni jinkuni nirani sapi, ji uénakia ampe jatsirakorheni enkachi ampe paaka, ka ísïchi no uarhiaka, ni t'u, ni jucha, ni juchari sapicha.

9Ji exeaka inteni, ampe enka inte úkorhenchaaka jintenirini arhiaaka, enkakini no uankucheaka, ji jukunharhiaka méntku ísï. 10Enkachi no xani ióntani japirinka nirani, t'uinichi tsimani xanharni junkuapirinkia.

11Israeli táte jempa arhispti: Enka ísï k'uanik'a, ¡Páje! Ka íntsïmperata ampakiti páku je, p'untsumekua ka tékua, tioxunhanta, nuesiri ka almentreri. 12Tumina sánteru pa je, ka imani enkaksïni jatsirachentapka sutupurhu, k'uanhaskukuntsï, ima no sési miiupti. 13Ka páje chári erachini, jatsirakorhe je ampe ka ni je exeni ménteru imani achamasïni. 14Eska Diósï iámu uinhapiri úaka eskaksï p'amok'uaka ka eskaksïni erachicheni íntskuntaaka, ka ístu Benjaminini. Ka enkani jatsiaka eskani uáp'echani tsïtauaka, jurak'uni tsïtaani.

15Erachi jempechaksï, jatsiraspti sutupurhu íntsïmperata ka sáneru tumina ka Benjaminini, ka uérasptiksï Ejiptu nirani, enkaksï niárapka nirasptiksï Jose jinkuni. 16Enka Jose exepka eska Benjamini imecha jínkuni niraspka, k'umanchekuarhu anapu urhets'ïkurini juramukuspti: Jucheni páa íni achamasïchani ka ata uántikuni k'arhini anhantsïni ma, íksï iásï teruxutini jinteni jinkuni t'ireati.

17K'umanchekuarhu anapu urhets'ïkuri ísï úspti eska Jose na juramukupka, ka erachi jempechani páasti imecho. 18Imaksï chéspti enkaksï Joseo pánhani jápka, ka uantasptiksï: Juchachi iásï jupikata pánhaxaka tumina jimpo enkats'ï sutupurhu jatsirachentapka, jakutsechestits'ïni. Jupinhaskachi ka iásïchi intecheri jupikateuaka ka ánchetanhaakachi juchari ch'ánchakicha jinkuni.

19K'umanchikuarhu anapu urhets'ïkurini antarheraspti ka imani jinkuniksï uantontskorhepsti. 20Arhisptiksï: Juchari acha, jucha t'irekuak'usïni júpka piáni urhetku.

21Enkani jucha niárapka jima enkachi mintsikorhepirinka, jimachi exespka eska tuminu tuminarhu japaspka, iámentuecheri sutupurhu jatarixapti, xáni enkachi na xáni maiámpepka, iásïchi juankuskakia imani tuminani. 22Ka sánteruchi juáska tumina jimpokachi sánteru t'irekua piaka. Nóchi míteska néts'ïni sutupurhu jatsirachespti tumina.

23Juramuti arhiaspti: Ásï chéje. Ji p'iraspka chári tumuninani. Chári ka chári táteri Diósïksïni jatsiracheti jatsikorhekua sutupurhu. Ka Simeonini petantaspti.

24Juramuti Joseo páaspti erachi jempechani. Ka jima itsï íntsaaspti, ka imaksï jupantuspti ka ima ch'anch'akichani t'ireraspti. 25Imaksï p'itaspti intsïmperata enkaksï pápka enka jamperi teruxuti Jose niántapirinka, jimpoksï kurhaspka eska jima t'irekua japirinka.

26Enka Jose k'umanchekuarhu niántapka, jimaksï íntskuspti íntsïmperata enkaksï pákupka, ka tátsekuaksï tsérhukua antaskueraspti imani japantiru. 27Jose kurhamarheaspti: ¿Na jarhaski, chári táte, ima enkats'ïni kántikski uantontskorhechepka na jarhaski?

¿Sési jamaxaki?

28Ka imaksï arhispti: Jo, juchari táte sési jarhasti, jamaxati. Ka tserukuaksï antaskueraspti ménteru.

29Jose exepti Bejaminini enka imeri erachi jempepka, nánte jimpo, ka uantaspti: ¿Isï jinte chári erachi sapichueni, enkats'ïni kantiski uantaxechepka? Ka ménteru uantaspti:

Jucheti uátsïti Diósïkini úch'akure.

30Jose kánekua k'unk'umanchantaspti xáni sési p'ikuarherani, ka uirip'aspti ják'orhekuarhu inchantani ka jima enka no nema exepirinka jima ueraspti. 31Enka na k'amarapkia uerani, uéntaspti ka uantaspti: T'irekua jatsirakua je.

32Joseniksï tamu peraskuspti t'irekua, ka erachi jempechani tamu perakuaspti t'irekua, ka Ejiptu anapuechani imantuksï tamu perakuaaspti t'irekua, jimpo Ejiptu anapu p'intekua, no sésisti uéraku anapuecha jinkuni t'ireni. 33Jose erachi jempechani imeri urhepatini uaxakaspti, sapichu urhetani ka tátsekua ísï eskaksï na k'éripapka, imaksï ísï eratperasïrempti. 34Jose imani jatsirakuaspti sánteru t'irekua enka ima jatsiramenhapka, ka Benjamini iumu xanhanari sánteru t'irekua jatsiraskuspti. Imakksï márku kauispti.

Currently Selected:

Génesis 43: BI-PURHE

Highlight

Copy