Génesis 40
40
Jose kuerakuantaspti tsimani tsánharhikuechani
1Isï ióni jimpo úbasï itsïrhuta jatsirati ka kurhinta úri enkaksï Ejiptu anapu irechani ánchekorhekuempka, ampe máksï no sési úspti enka jimpo Ejiptu anapu irecha ikiapka, 2imani tsimani ánchekorheri jempechani ikiakuaspti, imechani jinkuni enkaksï urhets'ïkuripka ubasï itsïrhuta jatsirati ka kurhinta úri, 3ónhatarkorheaspti, jima k'ataperakuarhu enka Jose k'atakata jápka, ima k'ataperakua Joseri juramutio jarhaspka. 4K'atapeticheri úrhets'ïkuri Joseni míntaspti imani tsimani ka ima exeani jarhasïrempti, imaksï uánekua jurhiatekua ónhakata jarhaspti.
5K'ataperakuarhu ma chúrekua tsimarheniksï tsánharispti táchani ampe, úbasï itsïruta jatsirati ka k'urhinta úri enkaksï Ejiptu anapu irechani marhuakuempka, tsánharhikuechaksï arhikuekaxapti ampe. 6Pauntekuarhu enka Jose nipka eranhaani komu ninharhixaptiksï. 7Kurhamarheaspti irecheri ánchekorherichani, enkaksï k'atakata jápka imeri juramuti jempo:
¿Antits'ïsï komu ninharini jaki?
8Ka imaksï uantaspti: Tsimarhenichi tsánhariska ampe ka no néma jarhasti enkats'ïni aiánkuaka ampe arhikuekasïnki ima tsánharhikuecha. Ka Jose uantaspti:
¿Anti no Diosï íntskusïnti mimixekua nemani enka uaka míteni ampe enka arhikuekak'a tsánharhikua? Aiánkutsïni jínteni.
9Ubasï itsïrhuta jatsirani urhets'ïkuri Joseni aiánkuntaspti ampe enka tsánharipka ka arhispti: Enkani ji tsánharhika, ubasï itsïrhukata kauikua jucheti urhepatini jarhaspti, 10ka ima ubasï itsïrhukata tanimu axat'akua jukaaspti, ka ima tsïparhutixapti ka ubasïri t'impiricha ninixapti. 11Ka ji jupikatixapka irecheri ubasï itsïrhuta jatakua, p'ikusïrempka ubasïchani ka jima tsitarhutasïrempka ka irechani inchak'urhatasïrempka ubasï itsïrhukata jatakua.
12Jose arhispti: Ima enkari t'u tsánharhika, arhikuekasïnti: Tanimu axat'akuecha, tanimu jurhiauesti.
13Tanimu jurhiatekua jimpo, irechakini jima péntaati enkari ánchekorheni jápka, ka t'uri mák'ueni marhuakuaka irechani, ubasï itsïrhukatari inchak'urhataaka, ísï eskari na ínchakurhatempka urhetku. 14Uantapecheakari sáni enkari ménteru jima ánchetanhantaska, uantapecheakari irechani jinkuni, ka jarhoatarini ixu k'atapekuarhu uéntani. 15Jimpokats'ïni jínteni jupikata ixu juáska, íni Ebreo echeri jimpo, ka ji nóma no sési úska, ka ísku jatinits'ïni ónhasti.
16Enka kurhinta úricheri úrhets'ïkuri exepka eska Jose sési kuerantaspka imani tsánharhikuani ima arhispti: Jít'uni tanimu tsïkiata urapitichani tsanharhiaska parhantsïtini jarhani.
17Tsïkiata enka karhakua jápka, irecheri kurhinta kánekua ampakiti jatarixapka, ka káratichaksï tsepurhexapka arhani jima enkani ji parhats'ïtini jápka.
18Jose arhispti: Tanimu tsïkiatecha, arhikuekasïnti tanimu jurhiatekua.
19Tanimu jurhiatekua jimpo irechakini pirachatarkorheati ka káratichaksïni tsepurhtsïkuati k'uiripeta.
20Tanimu jurhiatekua jimpo, enka irecha máteru uéxurhini antakutapka enka antap'enupka, p'imarheaspti jima anapu urhets'ïkurichani ka t'irekua urkorhespti, ka jima peraaspti imani tsimani enkaksï ónhakata jápka, kurhinta úrini ka ubasï itsïrhukata jatsirani. 21Ka ubasï itsïrhukata jatsiratini ánchekorhetarhu péntaspti, ka ima ménteru inchakurhatasïrempti ubasï itsïrhuta jatakua irechani, 22K'óru kurhinta úrini pirachatarkorhespti, ísï eska Jose na arhiapka. 23Ubasï itsïrhuta jatsirati Joseni miripakurhispti.
Currently Selected:
Génesis 40: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
