Génesis 29

Enka Jakobi Jarani jápka

1Jakobi niraspti ka niáraspti echerirhu enka jurhiata antaratirhu ísï jaka.

2Porhota ma exespi, ka jimaksï tanimu karichichani jarhaspti, jimaksï uákasïcha jima itsïmasïrempti ka jima tsakapu k'énharhi ma omutixapti. 3Enkaksï iámentu manakorhericha tananhempka, tsakapu enka ómutanhempka kéntitanhasïrempti ka itsïmatasïremtiksï ka ménteruksï ómutantasïrempti. 4Jakobi kurhamarheaspti karichi erankutichani:

Erachicha, ¿Nanits'ï anapueski?

Ka imaksï mókukorhespti: Jucha Jarhani anapueska.

5¿Cha míteski Labani, Najori uáp'ani? Ka imaksï mókuntaspti: Míteskachi.

6¿Ima jámaxaki sési?

Ka imaksï uantaspti: Sési jámaxati, a exe Rakelienka uáp'eka jurhaxati karichi itsïmataani.

7Ima uantaspti:

Nótki xáni iontakuarhuesti, itsïmataa je karichichani ka paa je ménteru eskaksï uitsakua akuataaka.

8Imaksï uantaspti:

Nompe jatsiskachi iámentu karichichani tánantaani ka tsakapu enka omutini jaka kéntitani ka tátsekuachi karichichani itsïmatauaka.

9Útasï uantaxexapti enka Rakelijima niárapka táte jemperi karichichani jinkuni, jimpoka Rakelikarichi erankutispka. 10Rakeli, Labani uáp'espti, Jakobiri nánte jemperi mími, karichichaksï Labanirispti. Enka Jakobi exepka Rakelini antarheraspti ka tsakapu kéntitaspti enka ómutini jápka ka karichichani itsïmataaspti. 11Jakobi, Rakelini putinharhikuspti ka uéraspti xáni tsípeni. 12Jakobi aiankuspti Rakelini eska ima Rebeka uáp'espka ima enka táte jemperi pirenchika. Ima uiripaaspti táte jempani aiankuntani.

13Enka Labani kurhapka eska Jakobi jima jarhaspti pirempa uáp'a, uiripaspti kúmani erokani, kamanharispti ka putinharhikuspti ka chéni jémpo páspti. Jakobi jima iámu ampe aiankuspti enka xani úkorhepka. 14Labani arhispti: Juchachi márku jasï iurhiri jataska Ka Jakobi ma kutsï ima jinkuni pakaraspti.

Jakobi, Rakeli ka Lía jimpo ánchekorhesïnti

15Labani, Jakobini arhispti:

¿Náxaniri antaa chéti ánchekorhe jimpo? Ori ¿Isku ánchekorhea jimpokari jucheti márkueska?

16Labani tsimani uáp'a nanakechani kaasïrempti, k'éri Lia jakankurhispti ka sapichu Rakeli. 17Lia kánekua sési jarhati eskuechani jukaaspti, ka Rakelikánekua sési jáxespti. 18Jakobi, Rakelini mintsitarhu xénhchaspti, ka ísï uantaspti:

Rakelijimpo enka chéti uáp'a nana sapichueka, iumu tsimani uéxurhinkini ánchekorhecheaka.

19Labani uantaspti:

Sánteru sésisti t'unheni íntskuni eska máteru nemani pakorheaka, sési jarhasti.

20Jakobi iumu tsimani uéxurhini Rakelijimpo ánchekorhespti, ka no jamperi p'ikuarheramaspti jimpoka Rakelini mintsitarhu uékasïrempka. 21Ma jurhiani Jakobi arhispi Labanini:

Niárasti jurhia eskarini íntskuaka cheti uáp'a Rakelini, jimpokani ji témpa úakia.

22Labani iámentu k'uiripu jima anapuechani p'ímarheaspti, ka tempuchakua úspti. 23Enka na pápjantepkia, Labani, Liani, Jakobini pákuspti ka ima, imani jinkuni k'uispti. 24Labani, Liani enka uáp'epka Silpa íntskuspti eska imeri jántspiripirinka. 25Pauantekuarhu enka na t'ikajantepkia, Jakobi exespti eska no Rakelispka, ka ikiatinku Labani uinhamarhekuspti kurhamarheni:

¿Amperinisï úche? Jikini Rakelijimposï ánchekorhecheka, ¿Antirinisï t'u erakucha?

26Labani arhispti: Ixu no janhasïnti sapichuni urheta uampuchatani, k'érisïnti úrheta.

27Antankuta iumu tsimani jurhia tempuchatini, ka íntsïnhakari sapichuni enkarini máteru iumu tsimani uéxurhini ánchekorhecheska.

28Jakobi ísï úspti, antankutaspti iumu tsimani jurhia tempuchatini, ka Labani, Rakelini íntskuspti eska témpa úpirinka. 29Labani, Bilani, Rakelini íntskuspti eska jántspiri jempepirinka. 30Jakobi, Rakelini mintsita jinkuni uékasïrempti sánteru eska Líani, enka tempuchapkia Labanini máteru iumu tsimani uéxurhini ánchekorhekuspti.

Jakobi uáp'echa

31ACHA exespti eska Lía no xénchakatespka, jimposï sapichani konteapsti, ka Rakelini charhaku jatakua míkakuspti. 32Lía tataka sapichu ma kóntenhaspti ka Rubeni jakankurhispti, ka uantaspti: ACHArini exechesti jucheti uantanheata, iásïrini jucheti acheti sánteru xenchaati.

33Ka máteru tataka sapichuni ma erokorhexapti, ka uantaspti: ACHA kurhaasti eskarini jucheti tatachi no xenchanhasïrempka jimposïni máteru charhakuni kóntenhaka. Ka imani Simeoni jakankurhitaspti.

34Máteru tataka sapichuni ma kóntenhaspti ka uantaspti: Iasï kóru jucheti acheti jinteni jinkuni uékati sánteru jarhani, jimpokani tanimu tataka sapichani íntsaaska. Ka imani Lebi jakankurhitaspti.

35Máteru tataka sapichuni ma kóntenhaspti, ka uantaspti: Iásï k'oruni k'éri arhiaka ACHAni. Jimposï Juda jakankurhitapti, ka nóteru kámaspti charhakuni.

Currently Selected:

Génesis 29: BI-PURHE

Highlight

Copy