Kueraakua 20

Abraami ka Abimeleki

1Abraami, Neguebi niraspti ka Kadesi ka Xuri iretecha jima teruk'ani pakaraspti irekani ka Gerari ísï ják'orhexapti jimpoka no jima anapuespka. 2Abraami jima ísï arhiasïrempti eska Sara enka témpepka, eska ima pirenchi jémpespka. Abimeleki, Gerari anapu irecha Sarani p'itak'orhespti. 3Chúrekua ma, Diósï, Abimelekini tsánharhitaspti ka arhispti: Sési jimpori uarhiaka jimpoka imani enkari p'itak'orheka ima uampuchatistia.

4Abimeleki, nótki méni imani jinkuni k'uíxapti ka uantaspti: ACHA, ¿K'uiripu enka no nósesi úrika, imanturi uántikuasïnki? 5Abraami ísï uantasti ima jucheti pirenchisti. Ka nanachit'u uantasti: Inte jucheti erachisti. Ji nóma nósesi úska. 6Diósï tsánharhikuarhu arhispti: Jít'uni mítetixaka eskari no nósesi úska. Jimpokinisï p'ínkupka eskari no k'amanharhint'apirinka, jimpokinisï p'ínkuka eskari no imani jinkuni k'uipirinka. 7Imani achetini témpani k'uanhaskukuntsï, jimpoka ima Diósïri uantariska ka t'únkeni jimpo uantamukukorheati. Ka enkari no k'uanhaskukunt'aska, mítetini ja eska t'u ka chénio anapuecha uarhiaka.

8Pauantekua xarhentku Abimeleki jauaraspti ka iámentu jántspiri jémpechani tánant'aaspti ka aiankuani néna enka úkorhepka. Imaksï kánekua chéspti. 9Tátsekua Abimeleki, Abraamini uantap'aspti ka arhispti: ¿Antits'ïnisï íni ampe úche? ¿Ampekini nósesi úcheski? ¿Antirinisï xáni k'éri k'amanharhintskua juáche jucheti irechekuarhu? ¡No ísï janhasïnti! 10¿Amperi eratsexapi enkari ísï úka?, Abimeleki ísï arhispti Abraamini, 11ka Abraami arhintaspti: Ji uantaspka, ixu Diósïni no janhanharhinhasïnti, ka eskats'ïni jucheti uarhitini euakorhekuekani jínteni uántikupirinka. 12Ka sési jimpo jucheti p'irenchisti. Jimpoka jucheti táte uáp'eska k'óru no jucheti nánte uáp'esti, jimposïni úpka témpa úni. 13Enkari Diósï arhipka eskani jucheti táteo uérapirinka, ji jucheti uarhitini arhispka eska nani enkachi xáni niárapirinka eska uantapirinka: Inte jucheti erachisti.

14Abimeleki karichichani ka uákasïchani ka jántspirichani tataka ka nanakechani erakuaaspti ka Abraamini íntsaspti ka Sarani enka témpepka kuanhaskukunt'aspti. 15Ka Abimeleki arhispti:

Exe i jucheti echeristi, úakari irekani nani enkari uékaka, erakukorhe.

16Ka Sarani arhispti: Chéti eracheni tsimani irepeta ka témpeni ekuatse (1,000) taiakatechani tumina íntskuska. Ka imani maiamperata jinkuni, eska nóma ampe uantanhaaka enkaksï t'unheni jinkuni jaka, nóri tsîtaska kaxumpekua.

17Abraami, Diósïni uantamukukorhespti, ka Diósï, Abimelekini ka témpa jémpani ka imeri jántspiri nanakechani ampakerant'aaspti ka úsptiksï charhaku káani. 18ACHA iámentu nanakechani k'úparhata míkakuaspti enkaksï Abimelekio irekapka Sarani jimpo enka Abraami témpepka.

Currently Selected:

Kueraakua 20: BI-PURHE

Highlight

Copy

Compare