Génesis 15
15
Diósï aiákuspti uáp'ani ma, Abramini
1Enka na úkorhekia inte ampe, ACHA, Abramamini jánhaskua ma jimpo arhispti:
Ásï jama chéni Abrami, jikini kuách'akuaka ka chéti antakua káneati.
2Abrami arhispti: Jucheti ACHA Diósï, imani enkari t'u íntskuaka ji ampe úraa, notcharini no konteski uáp'ani ma, jucheti játspiri pakataati jatsikorhekua Eliéseri Damasku anapu.
3Nórini íntskuska jucheti sïrukuani, jucheti játspiri enka juchenio antap'enuka pakataati ampe.
4ACHA arhispti:
No játspiri pakataati jatsikorhekua, chéti uá'pa pakataati jatsikorhekua.
5ACHA jini petaspti ka arhispti:
Eranche ka miiua jóskuechani enkari úska miiuani. ¡Xáni uáneati chéti sïrukua!
6Abrami jakak'uspti ampe enka ACHA arhipka, jimposï antekorhepka janhanharhikua. 7ACHA arhispti: Ji ACHAeska. Jikini Uri p'ímutantaaka jima enkaksï kaldeuecha irekaka, ka íni echerikini íntskuaka.
8Abrami arhintaspti: Jucheti ACHA ¿Ji néna mítaa eska i echeri juchetiuaka?
9ACHA arhispti:
Juácherini uákasï kutsïti sapichuni, karichi sapichuni ma, ka karichi enka uákasï k'éri jukaaka, enkaksï tanimu uéxurhini jatiriuaka, ka tsimani jipunhe ka kutsïtini ka máteru tarheni ma.
10Abrami jirinhaaspti manakorherichani ka teruk'ani arhukuaspti, ka teruk'ani urhepani péraaspti, jipunhechani no arhukuaspti. 11Káraticha enkaksï k'uiripeta uarhiri arhak'a antarherasïemptiksï k'uiripeta akuekani ka Abrami chérasïrempti, 12enka na chúrepkia Abrami k'uikua antaspti, ka kánekua p'ap'akantuspti ka ima kánekua chónharhispti. 13ACHA arhispti Abramini: Mítetini ja eska chéti sïrukua, máteru echeri jatsïpeati ka jima jupikata jauati ma irepeta (400) uéxurhini.
14Imani iretani enka jupikata jatsiaka chéti sïrukuani, ji arhinharhikuaka, uékuauatiksï ka jatsikorhekua pakataati. 15Ka t'úri chéti nánte ka táte jinkuni jantaaka enkari na kánekua k'ériuakia. 16Ka ióni jimpo, enka t'amu xanhari chéti sïrukua antap'enuakia k'uanhatseatiksï ixu, jimpoka jiáni jamperi Amorreo chúkata jauakia imeri no kurhantirakua jimpo.
17Enka na chúrepkia ka pap'akanteni, jorna ma enka sïraani jápka xarharaspti, ka k'ueramu erák'utakueni jasï, parhiakuaspti manakorherichani enkaksï arhukukata jápka. 18Ima jurhiatekua ACHA pakatperakua ma ústi Abrami jinkuni, ka arhispti: Chéti sïrukuani íni echeri íntskuaka, Ejiptu anapu iurhekuarhu uératini ka Éufretesi iurhekuarhu jamperi.
19Kenitecheri ka Kenisitaecheri ka Kardonita echeri jamperi. 20Jititecheri, Fereseo ka Refaiticheri echeri jamperi. 21Amorreo, Kananeo, Gergeseo ka Jebuseo echeri jamperi.
Currently Selected:
Génesis 15: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
