मर्कूस 1
1
बप्तिस्मा तेर्के यूहन्नागी येशूगी फेप-लाहम ठाबे पेहक्यो
(मत्ती ३:१-१२; लूक ३:१-१८; यूह १:१९-२८)
1किन्ज्योगी स़ेबु येशू मास्यीकागी तेहन्दाला या़हबु लेहङगुगी केच्या दि ल़ेहमु पेहती छ़ूसीन। 2यशैया लुहङतेम्बागी छ्य़ेला दि ल़ेहमु म़ेदी प्री़हदी येह–
“त़ेदोङ, ख्येगी लाहम ठाबे ज़ोज्येला
ङाहगी लेहङगु ख्येर्केन्दीला ख्येगी तोहङदा-तोहङ ताङज्ये येह।”#मला ३:१
3ङ्यिहन्दोङ, रिह-काम्बुला मेहन्दा च्यी़गी फे़रा तेन्दी दि ल़ेहमु माउ दु,
“चो़वो छ्येवा फेप नाङगेन्गी लाहम ठाबे पेह,
ओहले चो़वो छ्येवागी फेप्लाहमया़ थेका जे़दोङ!”#यशै ४०:३
4ओहले यूहन्नागी रिह-काम्बुला मिहया़ला छ्युगी बप्तिस्मा तेर्केॱराङ, “ख्या फ़ेबेॱया सेमगी स्या़बा पेहती तिहक्पा पाङदी छ्युगी बप्तिस्मा लेहन्दोङ, ओहले किन्ज्योगी ख्यागी पेहक्योगी तिहक्पा ता़ह च्य़ू नाङज्ये येह” म़ेदी लोप्च्युङ तेर्सीन। 5ओहले यहूदीया लुहङबा दाङ यरूशलेम क्याहसागी मिह थाम्ज्यीराङ यूहन्नासाला काहल्सीन। ओहले खुङया़ राहङ-राहङगी पेहक्योगी तिहक्पाया़ पाङदी यूहन्ना लाहमले यर्दन चाङबुला बप्तिस्मा लेहन्सीन। 6यूहन्ना ङाबुङगी पुगी था़क्योगी काप्च्या केहन्गो येहकें, क्येपाला को़बागी कारा च्यिङगो येहकें, ओहले पे़बे दाङ रिहगी तिप-प्राहङ साहउ येहकें।#२ राज १:८ 7ओहले खोगी मिहया़ला दि ल़ेहमु म़ेदी स्येको येहकें, “ङाह म़ेदी तिङले मेहन्दा च्यी़ फेप नाङगेराङ येहबा, मिहरो ङाह म़ेदीॱआङ ओङ छ्यिम्बु येहबा। ङाहनी मिहरोगी स्याहप्चेनगी थाक्पा स्यी़ज्ये च्यिॱआङ सी़हज्ये म़ेह। 8ङाहगी ख्याला छ्युगी बप्तिस्मा तेर्ते येह, यिहॱनाङ मिहरोगी ख्याला नाम्पार-ताहक्पा थुगी बप्तिस्मा नाङज्ये येह” म़ेदी यूहन्नागी मिहया़ला स्य़ेसीन।
येशूगी बप्तिस्मा दाङ छेता
(मत्ती ३:१३; ४:११; लूक ३:२१-२२; ४:१-१३)
9ओहजे काहङला येशू गालीलगी नासरतले फेप नाङसीन, ओहले यूहन्नालेगी यर्दन चाङबुला बप्तिस्मा नोम नाङसीन। 10ओहले छ्युलेगी फिला थेन फेप-लुहङ मे़हबाराङ स्यिहङगाम खा फ़ेसीन ओहले नाम्पार-ताहक्पा थु दुङगुकुर ल़ेहमु जेती राहङ थो़ला फेप नाङगेराङ जेक्यो येशूगी ज़ी़ नाङसीन। 11ओहले स्यिहङगामले माहर दि ल़ेहमु सुङ-क़े च्यी़ थ़ेसीन, “ख्ये ङाहगी च्याहम्बु पेहक्योगी स़ेबु यिहम्बा, ख्ये ङ्याम्बु ङाह ज्यिबुराङ काहसो येह।”#उत २२:२; भज २:७; यशै ४२:१; मत्ती ३:१७; १२:१८; मर्क ९:७; लूक ३:२२
12ओ़ह तिङले नाम्पार-ताहक्पा थुगी येशूला लाहम्साङराङ रिह-काम्बुला नोम फेप्सीन। 13ओ़हला ती़ह गो-छ्येवागी येशूला ङ्यिहमा ज़्यिप्च्यु थु छेता पेहसीन। येशू ओ़हला रिहदाया़ ङ्याम्बुराङ ज़्य़ू नाङसीन, ओहले स्यिहङगामगी स्याहप्च्यीया़ फेप्ती येशूला स्याहप्तो स्युहसीन।
येशूगी स्याहप्च्यीया़ला क़े क्याहप नाङग्यो
(मत्ती ४:१२-२२; लूक ४:१४-१५; ५:१-११)
14यूहन्ना चोन-खाङला छ्यि फान्ज्यो येशूगी गालीलला फेप्ती किन्ज्योगी या़हबु लेहङगुगी केच्याया़ स्येच्ये छ़ू नाङसीन। 15येशूगी सुङ नाङसीन, “ता़ह ती़हजी तेहन्दा डुप सिहन्दी येह, ओहले किन्ज्योगी क्याहल्सी पोहला लेप सिहन्दी येह। स्या़बा पेहतोङ, ओहले या़हबु लेहङगुगी केच्याला यिह छ्य़ेदोङ।” #मत्ती ३:२
16गालील छोगी सुहरला कोरा क्याहप नाङगेमु येशूगी सिमोन दाङ खोगी नो़ह अन्द्रियासला ङ्याहटा क्याहप्ती तेहक्यो ज़ी़ नाङसीन। च्यिबेमाना खुङ ङ्याह ज़ुङगेन्गी ङ्याहबाया़ यिहन्गे। 17ओहले येशूगी खुङया़ला सुङ नाङसीन, “ङाहला ताहदा क्याहप्ती स्यो ख्यागी ङ्याह ज़ुङदी ख्योङग्यो ल़ेहमुराङ, मिहया़ला किन्ज्योगी क्याहल्सीला ख्योङगेन्गी मिहया़ ख्याला ज़ोज्ये येह” म़ेदी सुङ नाङसीन। 18दि थे़-लुहङ मे़हबाराङ खुङगी राहङगी ङ्याहटाया़ ओ़हलाराङ क्युर ज़्या़दी येशूला ताहदा क्याहप्ती काहल्सीन।
19ओहले याहम्बी फाच्चीला फार फेप नाङ फान्ज्यो येशूगी जब्दियागी पुह पिन ङ्यी़ याकूब दाङ यूहन्नाला ज़ी़ नाङसीन। खुङ ङ्यी़ टुह-छ्युङला तेहती ङ्याहटा च्य़े तेहती येहकें।
20ओहले येशूगी खुङया़ला लाहम्साङराङ क़े क्याहप नाङसीन। ओहले खुङ ङ्यी़गी राहङगी आबा जब्दियाला ल़ेहमीया़ ङ्याम्बु क्युर ज़्या़दी येशूला ताहदा क्याहप्ती काहल्सीन।
येशूगी ल्हेन्डी स्य़ूहक्यो मिहला टा़ह च्य़ू नाङग्यो
(लूक ४:३१-३७)
21ओहले खुङ फ़ेबेॱया कफर्नहुम क्याहसाला फेप नाङसीन। ओहले थाङ सोएँ ङ्यिहमाला छो़खाङला फेप्ती येशूगी सुङदेन नाङसीन। 22येशूगी सुङदेन थे़दी मिहया़ ज्यिबुराङ ह्अ ल़ेहसीन। च्यिबे मासीमाना, येशूगी छ्य़े-ठिमकी लोबेनया़गी ल़ेहमु मिहम्बा, ओङ छ्यिम्बु जेती सुङदेन नाङगो येहकें। #मत्ती ७:२८,२९ 23ओ़ह ती़हजीलाराङ छो़खाङ नाहङले मेहचाङा नाम्स्यी स्य़ूहक्यो मिह च्यी़गी क़े तेन्गेॱराङ मासीन, 24“ओ़ नासरतगी येशू, राहङगी ङ्यिहला च्यि जे नाङज्ये जेक्यो? च्यि राहङ ङ्यिहला तोङ च्य़ूज्येला फेप नाङग्यो यिहम्बा? राहङ किन्ज्योगी ताङ नाङग्योगी नाम्पार-ताहक्पागी मिह यिहम्बा म़ेदी ङाहला क्यी़ह येह।” 25यिहॱनाङ येशूगी ओ़ह ल्हेन्डीला काप्क्येन नाङदी सुङ नाङसीन, “खाजुम तेह, ओहले दि मिहलेगी थेन्दी सोङ!” म़ेदी सुङ नाङसीन। 26ओ़हजेलाराङ ओ़ह मेहचाङा नाम्स्यीगी ओ़ह मिहला च्यार-ताप क्याहप्सीन ओहले क़े छ्यिम्बुच्यी तेन्दी थेन्दी काहल्सीन। 27दि थोङदी मिह थाम्ज्यीराङ ह्अ ल़ेहदी मासीन, “मिहम्बा, दि च्यि यिहम्बा? दिनी का साम्बा दुबा, दि मिहगी ओङ छ्यिम्बु जेती मेहचाङा नाम्स्यीया़ला का नाङगु दु, ओहले मिहरोगी नाङग्योगी का ल्हेन्डीया़गीॱआङ ङ्यिहन्गु दु!” म़ेदी मिहया़गी राहङ नाहङदुङ ताम टी़हज्ये छ़ूसीन। 28ओहले याहम्बीज्यीलाराङ येशूगी जे नाङग्योगी छ्या़लेगी केच्याया़ गालील दे-खामगी छ्यो़ ज़्यिलाराङ फेल्सीन।
येशूगी माहङबुराङ नेहपाया़ला टा़ह च्य़ू नाङग्यो
(मत्ती ८:१४-१७; लूक ४:३८-४१)
29ओहले येशू लाहम्साङराङ छो़खाङले थेन्दी सिमोन दाङ अन्द्रियासगी खाङबाला फेप नाङसीन। खुङ फ़ेबेॱया ङ्याम्बुराङ याकूब दाङ यूहन्नाॱआङ काहल्सीन। 30सिमोनगी क्यू़हमु छावा क्ये़दी ङ्याहल्सालाराङ छ्यिती येहकें। येशू लेप-लुहङ मे़हबाराङ खुङया़गी दि केच्या येशूला स्य़ेसीन। 31ओहले येशू पोहला फेप्ती नेहपागी लाहक्पाला ज़ुङदी लाङसीन। ओ़हजेलाराङ मोहला छावागी ताङसीन, ओहले मोह लाहङदी खुङ फे़बेया़ला डोम्बो क्योङसीन।
32ओ़ह कुहङॱसे ङ्यिहमा डुप फान्ज्यो मिहया़गी नेहपाया़ दाङ ल्हेन्डी स्य़ूहक्योगी मिह थाम्ज्यीला येशूसाला ख्योङसीन। 33ओहले क्याहसागी मिह थाम्ज्यी ओहङदी खाङबागी यिल्दोला जोम्सीन। 34ओहले येशूगी यिहन्जे मिहन्जे नाहजाया़गी तुहक्पु तेरक्यो मिह माहङबुलाराङ टा़ह च्य़ू नाङसीन, ओहले मिह माहङबुराङलेगी ल्हेन्डीया़ तेन नाङसीन। येशू सु यिहम्बा म़ेदी ओ़ह ल्हेन्डीया़ला क्यी़ह येहकें ओ़ह सोङबे येशूगी खुङया़ला तामॱराङ मा च्य़ू माहनाङ।
येशूगी सोल्वाङ दाङ सुङदेन
(लूक ४:४२-४४)
35नाहङबार च्युङ नाहम-सेमुराङ क्या-ह्राबा-ह्रिबेला येशू ज़्याङदी यिङबु ग्या़ च्यी़ला फेप्ते सोल्वाङ ताप नाङसीन। 36ओहले सिमोन दाङ खोगी रो़हया़ थुल्दी येशूला छोल काहल्सीन। 37ओहले येशूला च्य़ेह सिहन फान्ज्यो खुङया़गी मासीन, “थाम्ज्यीगी राहङला छोल्गेराङ येह।” 38दि सेन्दी येशूगी सुङ नाङसीन, “डो, ओहराङ फार छुरकी लेहमेन युहलया़ॱलाङ डो। ओ़ह युहलया़ॱलाङ ङाहगी या़हबु लेहङगुगी केच्याया़ स्येॱराङ कोहकें च्यिबेमाना ङाह दि ल़ेहगी तेहन्दालाराङ ओहङग्यो यिहम्बा।” 39ओहले येशू छो़खाङया़ला सुङदेन नाङगेराङ ल्हेन्डीया़ तेन्दी गालील साने़की थाम्ज्यी ग्या़या़ला कोरा क्याहप नाङसीन।#मत्ती ४:२३; ९:३५
येशूगी जे-ने़ह थेन्ग्यो मिहला टा़ह च्य़ू नाङग्यो
(मत्ती ८:१-४; लूक ५:१२-१६)
40ओहले जे-ने़ह थेन्ग्योगी मिह च्यी़ ओहङदी येशूगी दिनला पी़मु च़ूदी, “लोबेनगी थुला ठुङदी येहसीमाना ङाहला टा़ह च्य़ू थुप्कें” म़ेदी स्युहसीन। 41दि सेन्दी येशूगी थुला निङ च्येहसीन ओहले येशूगी राहङगी छ्या़ खो थो़ला ज़्या़दी सुङ नाङसीन, “ङाहगी सेमला ने़क्यो ल़ेहमुराङ ख्ये टा़हज्यु।” 42ओ़ह ती़हजीलाराङ खोगी जे-ने़ह टा़हसीन ओहले खो चाङमा काहल्सीन। 43चाङमा डोलुङ मे़हबाराङ येशूगी खोला दि ल़ेहमु सुङदी ताङ नाङसीन, 44“त़ेदोङ, दि केच्या सुॱलाङ माहस्ये। यिहॱनाङ पूजाहारीसाला काहल्दी राहङला ङ्याम च्ये च्य़ूदोङ। ओहले मोशागी सुङ नाङग्यो ल़ेहमुराङ डेल्बा फुल्दी मिह थाम्ज्यीला ख्ये चाङमा काहल्ग्योगी दास्यी तेर्तोङ।”
45यिहॱनाङ ओ़ह मिह काहल्दी राहङ टा़हक्योगी केच्या मिह थाम्ज्यीलाराङ स्य़ेसीन। ओ़ह केच्यागी पेहती येशू का़हन्दीॱआङ क्याहसाया़ला थाक-ताङदी स्य़ूह मा़हखु। ओ़ह सोङबे येशू यिङबु ग्या़या़ला ज़्य़ूज्येला फेप नाङसीन। यिहॱनाङ ओ़ह ग्या़ॱलाङ मिहया़ छ्यो़ ज़्यिलेराङ येशूसाला ओहङसीन।
Currently Selected:
मर्कूस 1: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
