मत्ती 24
24
येशूगी यरूशलेमकी छ्योखाङ तोङगेन्गी तेहन्दाला सुङ नाङग्यो
(मर्क १३:१-१३; लूक २१:५-१९)
1येशू छ्योखाङले थेन्दी फेप्नाङगेमु स्याहप्च्यीया़ येशूला छ्योखाङगी खाङबाया़ तेन्ज्ये म़ेदी येशू पोहला ओहङसीन। 2ओहले येशूगी सुङ नाङसीन, “ख्याया़गी दि थाम्ज्यी थोङदी येहबा, मिहम्बा ले? तेहम्बाराङ ङाह ख्याया़ला माएँ, दि खाङबाया़गी तोह च्यी़ थो़ला लेहमेन तोह लिहच्ये म़ेह, थाम्ज्यीराङ रोम्ज्ये येह।”
3ओहले येशू जैतून काहङला ज़्य़ू नाङगेमु स्याहप्च्यीया़गी खाजुम्बा ओहङदी येशूला स्युहसीन, “लोबेन ङ्यिहला सुङ नाङदोङ ला़ह, ओ़ह केच्या नाहम तेहन्दा डुप्च्ये येहबा? ओहले लोबेन लो़हदी फेप्केन दाङ जाम्बुलीङ तोङगे ङ्यिहमा लेप्च्ये पेहसीन म़ेदी ङ्यिहगी काहन्डुमु पेहती ह्अ कोहज्ये?”
4ओहले येशूगी सुङ नाङसीन, “जेम्बु पेहतोङ, सुज्यीगीॱआङ ख्याया़ला फिर्च्या लाहम ङो़ले ॱठि माहङ्युहङज्यु, 5च्यिबेमाना मिह माहङबुराङ ‘थार्पा नाङगेन मास्यीका ङाहराङ यिहम्बा’ म़ेदी ङाहगी मिहनला ओहङज्ये येह ओहले मिह माहङबुलाराङ फिर्च्या लाहम ङो़ले ठिच्ये येह।”
6 ओहले ख्याया़गी मा़ क्याहप्के दाङ मा़ क्याहप्केन्गी केच्याया़ थे़ज्ये येह। यिहॱनाङ ओहजेला ख्याया़ मा़हन्ज्यी। दि ल़ेहमु केच्यानी ओहङॱराङ कोहएँ, यिहॱनाङ ओहजेलाराङनी जाम्बुलीङ मेहतोङगे। 7क्यिहपा-क्यिहपागी पाहरक्यीला मा़ क्याहप्च्ये येह। ओहले क्याहल-खाप च्यी़गी लेहमेन क्याहल-खाप थो़ला च्योम्ज्ये येह। ओहले काहने थेतेराङ मुहयी लाहङज्ये येह ओहले साङगुल डोज्ये येह। 8दि केच्याया़नी तुहक्पु छ़ूगेन्गी ती़हजी च्यी़राङ यिहम्बा।
9 “ओहजेला मिहया़गी ख्याया़ला ज़ुङज्ये येह ओहले ङ्य़ेहबा काल्ज्येला ख्येर्च्ये येह, ख्याया़ला सेच्ये येह। ङाहगी पेहती थाम्ज्यी क्यिहपागी मिहया़गी ख्याया़ला ङेन्ज्येन पेहच्ये येह।” #
मत्ती १०:२२
10 “ओहजे काहङला मिह माहङबुराङ नार्तो क्याहप्च्ये येह, च्यी़गी च्यी़ला सा़ क्याहप्च्ये येह, च्यी़गी च्यी़ला ङेन्ज्येन पेहच्ये येह। 11चिहन क्याहप्केन्गी लुहङतेम्बाया़ माहङबुराङ थेन्ज्ये येह ओहले मिह माहङबुलाराङ गो़ कोर्च्ये येह।”
12 “काहने थेतेराङ ङ्येहम्बाया़ फेल्ग्यो सोङबे मिह माहङबुदीराङ चेवा लोप्से-लोप्से पेहती तोर्ती डोज्ये येह। 13यिहॱनाङ तिङ थु थिर पेहती तेहकेनया़दी थार्च्ये येह।#मत्ती १०:२२ 14थाम्ज्यी क्यिहपागी मिहया़ला पाङबु ओहङज्यु म़ेदी तोहङले किन्ज्योकी क्याहल्सीकी या़हबु लेहङगु जाम्बुलीङ काहङग्यालाराङ स्येच्ये येह। ओ़ह तिङले जाम्बुलीङ तोङज्ये येह।”
ज्यी़ज्ये ल़ेहमु तुहक्पुगी ती़हजी
(मर्क १३:१४-२३; लूक २१:२०-२४)
15 “लुहङतेम्बा दानिएलगी ‘छ्योखाङगी नाम्पार-ताहक्पा ग्या़ला नाम्दो लाहङज्ये ल़ेहमु से़हया़ ज़्या़क्यो ओहङज्ये येह’ म़ेदी माक्यो ख्याया़गी थोङज्ये येह। #
दान ९:२७; ११:३१; १२:११ (टा़हगेन मिहगी दि केच्यागी तेहन्दा च्यि यिहम्बा दु म़ेदी या़हबु पेहती ह्अ कोहज्यु!) 16ओहजेला यहूदीयाला येहकेन मिहया़ लाह ङो़ले प्रे़हज्यु। 17खाङबा थो़ला येहकेन मिहया़ राहङगी पेला लेहन्ज्येला खाङबा नाहङला मा़हस्युहज्यु।#लूक १७:३१ 18स्यिहङला ल़ेह पेहकेन मिहया़ काप्च्या लेहन्ज्येला खाङबाला लो़ह माहन्डोज्यु। 19ओहजे काहङला ज़ुबु ङ्यिहपा येहकेन दाङ ओहमा थुङगेन्गी पेहजा आमाया़ला ज्यिबुराङ खेन्दा-का़हबु ओहङज्ये येह। 20ख्या़बु दावा दाङ थाङ सोएँ ङ्यिहमाला प्रे़ह माहकोहज्यु म़ेदी ख्याया़गी किन्ज्यो ङ्याम्बु सोल्वाङ ताप्तोङ। 21च्यिबेमाना ओ़ह ङ्यिहमाया़ला ज्यिबुराङ छ्यिम्बु तुहक्पुया़ बाप ओहङज्ये येह। ओ़ह ल़ेहमु तुहक्पुनी जाम्बुलीङ छ्या़ले यिहन्ज्यु ताहन्दा थु बाप्क्यो म़ेह, ओहले तिङलेॱआङ बाप्च्ये म़ेह।#दान १२:१; ज्याल ७:१४ 22ओ़ह ङ्यिहमाया़ला सुॱआङ थार ख़ूज्ये म़ेह यिहॱनाङ किन्ज्योगी दाम नाङग्योया़गी तेहन्दाला ओ़ह ङ्यिहमा ङ्युहङा ज़ो नाङज्ये येह।”
23 “ख्याया़ला सुज्यीगी ‘त़ेदोङ, थार्पा नाङगेन मास्यीकानी देला येहबा, ओ़हला येहबा’ म़ेदी मासीमाना ख्याया़गी खुङगी तामला यिह मा़हछ्ये। 24च्यिबेमाना दि ल़ेहमु चिहन क्याहप्केन्गी मास्यीका दाङ लुहङतेम्बाया़ ओहङज्ये येह। खुङया़गी छ्यिम्बु-छ्यिम्बु ताक्छेनया़ दाङ याहम्जेम्बागी ल़ेहया़ तेन्दी ला़ खाजेबा किन्ज्योगी दाम्ग्यो मिहया़ॱलाङ गो़ कोर च्य़ूज्ये येह।”
25 “टेहम्बा साल्दी ज़्यो़, ङाहगी ख्याया़ला दि केच्या तोहङलेराङ मा सिहन्दी येह। 26मिहया़गी ख्याया़ला ‘मिहरोनी यिह-तोङे ग्या़ला ज़्य़ू नाङदी येहबा’ म़ेदी माॱनाङ ओ़हला माहन्डो। खुङया़गी ‘त़ेदोङ, मिहरोनी खाङबा नाहङला ज़्य़ू नाङदी येहबा’ म़ेदी माॱनाङ खुङगी तामला यिह मा़हछ्ये।#लूक १७:२३,२४ 27च्यिबेमाना काहन्डुमु पेहती नामला चिलाम क्याहप्केमु स्यार यिहन्ज्यु नुहप थु क्या-साङे डोएँ ओ़ह ल़ेहमुराङ पेहती मिहगी स़ेबु फेप नाङज्ये येह।#२४:२७ दिगी तेहन्दाती चो़वो छ्येवा येशू फेप नाङगेन्दी थाम्ज्यीराङ मिहया़गी थोङज्ये येह म़ेदी माक्यो यिहम्बा। लूक १७:३ 28का़हला खाराल येहबा, ओ़हला च्याहर्कोया़ जोम्गे!”
मिहगी स़ेबु फेप नाङगेन्गी ङ्यिहमा
(मर्क १३:२४-२७; लूक २१:२५-२८)
29 “लाहम्साङराङ ओ़ह तुहक्पुगी ङ्यिहमाया़ बाप सिहन फान्ज्यो ङ्यिहमा ना़-जुबे डोज्ये येह, दायुमगी राहङगी येहसेर तेर्च्ये म़ेह, कार्माया़ नामलेगी ताहप्च्ये येह ओहले नामगी ओङया़ युङज्ये येह।” #
यशै १३:१०; योए २:१०,३१; ३:१५; ज्याल ६:१२; यशै १३:१०; इज ३२:७; योए २:१०; ३:१५; यशै ३४:४; ज्याल ६:१३
30 “ओ़ह तिङले नामला मिहगी स़ेबु फेप नाङगेन्गी ताक्छेन थोङज्ये येह। मिहगी स़ेबुला ओङ छ्यिम्बु दाङ ज़िज्यिद ङ्याम्बु नामगी मुक्पाला फेप्केनॱराङ जेक्यो थोङदी जाम्बुलीङगी क्यिहपा थाम्ज्यीगी मिहया़ ङुहप्रा तिहङरा पेहच्ये येह। #
दान ७:१३; जक १२:१०-१४; ज्याल १:७ 31येशूगी स्यिहङगामगी स्याहप्च्यीया़ला रोहवा-लीङगी क़े छ्यिम्बु ङ्याम्बुराङ ताङ नाङज्ये येह ओहले खुङया़गी नामगी छ्यो़ च्यी़ यिहन्ज्यु लेहमेन छ्यो़ थु छ्यो़ ज़्यिगालाॱराङ किन्ज्योगी दाम नाङग्योया़ला रूदी ख्योङज्ये येह।”
को़स्यीङ तोहङबोला पे ज़्या़दी सुङदेन नाङग्यो
(मर्क १३:२८-३१; लूक २१:२९-३३)
32 “को़स्यीङ तोहङबोला त़ेदी च्यिरा ताम लोप्तोङ। को़स्यीङ तोहङबोगी याहल्गाया़ला लाहप्ती बी़ फान्ज्यो टे़ह बार्सीन दु म़ेदी क्यी़ह ज्योर्के।”
33 “ओ़ह ल़ेहमुराङ पेहती दि केच्याया़ तेहन्दा डुप्केन थोङगेमु ङाह ओहङगे ती़हजी लेप्च्येराङ पेहसीन दु म़ेदी ख्याया़गी क्यी़ह ज्योर्च्ये येह। 34तेहम्बाराङ ङाह ख्याया़ला माएँ, दि केच्या थाम्ज्यीराङ तेहन्दा माहन्डुप थु दि क्यिहपा (इस्राएली) तोङज्ये म़ेह। 35नाम दाङ जाम्बुलीङ तोङदी डोज्ये येह, यिहॱनाङ ङाहगी माक्योगी केच्याया़ नाहमॱआङ तोङदी डोज्ये म़ेह।”
टिहम्बु ओहङ कोहकेन्गी तेहन्दाला सुङदेन
(मर्क १३:३२-३७; लूक १७:२६-३०,३४-३६)
36 “ओ़ह ङ्यिहमा दाङ ती़हजी नाहम लेप्कें यिहम्बा म़ेदी ठीक-ठीक ङ्या़ह-ङ्या़ह पेहती सुॱलाङ क्यी़ह म़ेह, ओ़हनी स्यिहङगामगी स्याहप्च्यीया़ दाङ स़ेबुॱलाङ थुयी़ म़ेह, ओ़ह केच्यानी याहप्च्येन आबा च्यी़ला थुयी़ येहबा। 37मिहगी स़ेबु फेप नाङगे ङ्यिहमाया़ला नोआगी ती़हजीला काहल्ग्यो ल़ेहमुराङ ओहङज्ये येह।#उत ६:५-८ 38ओ़ह ती़हजीला नोआ छ्यु-टुहला स्य़ूहगे थु मिहया़ से़हदी, थुङदी, पा़हमा पेहती तेहक्यो येहकें। 39नाम छ्याटागी स्योलो ओहङदी खुङला ख्येर्च्ये पेहकें थु च्यि डोज्ये पेहक्यो माएँदी खुङगी ह्अ के़हदी म़ेहबा येहकें। मिहगी स़ेबु फेप्केमुॱआङ ओ़ह ल़ेहमुराङ ओहङज्ये येह।#उत ७:६-२४ 40ओहजे काहङला स्यिहङला ल़ेह पेह तेहकेन्गी मिह ङ्यी़ नाहङला, च्यी़ला ख्येर्च्ये येह, च्यी़ला क्युर ज़्या़ज्ये येह। 41ला़हवोर था़दी तेहक्यो पी़हमी ङ्यी़ पाहरक्यीले, च्यी़ला ख्येर्च्ये येह, च्यी़ला क्युर ज़्या़ज्ये येह।”
42 “ओ़ह सोङबे ख्याया़ टिहम्बु पेहती तेहतोङ च्यिबेमाना ख्याया़गी चो़वो का़हन्दी ङ्यिहमाला फेप नाङगे यिहम्बा म़ेदी ख्याया़ला क्यी़ह मेहयोहङगे। 43यिहॱनाङ दि केच्या टेहम्बा साल्दी ज़्यो़, कुमेन ओहङगे म़ेदी क्यी़ह ज्योर्पा येहनानी खाङबा ताहक्पुगी सुङदी तेहच्ये येहकें ओहले कुमेनला खाङबा नाहङला स्य़ूह च्य़ूज्ये म़ेहबा येहकें।#लूक १२:३९,४० 44ओ़ह सोङबे ख्याया़ॱआङ टिहम्बु पेहती तेह! मिहगी स़ेबु ख्याया़गी सेमगी यिहला म़ेहबा ती़हजीला फेप्च्ये येह।”
यिह-छ्य़े पेह ख़ूएँ दाङ टिहम्दाङ योक्पु
(लूक १२:४१-४८)
45 “रिहक्स्यी येहकें दाङ यिह-छ्य़ेबु योक्पु काहन्डुमु मिह यिहम्बा यिहन्डो? पे यिहॱना़: ताहक्पुगी राहङगी खाङबागी थाम्ज्यीराङ ल़ेहया़ चि क्याहप फान्ज्यो रिहक्स्यी येहकें दाङ यिह-छ्य़ेबु योक्पुगीदी लेहमेन योक्पुया़ला ठाबे ती़हजीला तोप्च्याया़ तेर्के। 46ओहले ताहक्पु लो़ह ओहङगेमु ओ़ह योक्पुला ओ़ह ल़ेहमुराङ ल़ेह पेह तेहक्यो च्य़ेह सिहन्गेमु खो काहजे सोनाम-साक्पु ओहङज्ये येह। 47तेहम्बाराङ ङाह ख्याया़ला माएँ, ताहक्पुगी ओ़ह योक्पुला राहङगी थाम्ज्यीराङ क्युहया़ चि क्याहप्च्ये येह। 48का़हलेॱआङ ओ़ह योक्पुगी सेम ङ्येहम्बा च्याङदी, ‘ङाहगी ताहक्पु ग्यो़बाराङ लो़ह मेहयोहङगे’ म़ेदी 49छ्याङसीवाया़ ङ्याम्बु थुङदी ज़ी़दी लेहमेन योक्पुया़ला तुहङज्ये छू़सीमाना, 50ओ़ह योक्पुया़गी ताहक्पु खोगी सेमगी मा़हनेबा ती़हजी दाङ ङ्यिहमाला लेप्च्ये येह। 51ओहले खोला ज्यिबुराङ ङ्य़ेहबा छ्यिम्बु काल्ज्ये येह ओहले खोला यिहन्दो तेन्गेनया़गी पाहरक्यीला क्युर चाहङज्ये येह। ओ़हला खो सो मुहर्ती ङी़हदी तेहच्ये येह!” म़ेदी येशूगी सुङ नाङसीन।
Currently Selected:
मत्ती 24: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
