मत्ती 15
15
पे-ठिम ची़गेन्गी तेहन्दाला लोप्च्युङ
(मर्क ७:१-१३)
1ओहले लाहला फरिसी दाङ छ्य़े-ठिमकी लोबेनया़ यरूशलेम क्याहसाले ओहङदी येशूला टी़हसीन, 2“राहङगी स्याहप्च्यीया़गी ताहङबो आख्ये मे़हमेया़ यिहन्ज्यु ची़नाङ डुप्ती ओहङग्योगी पे-ठिमया़ च्यिबे मी़हचीएँ? खुङया़गी तो साहएँ म़ेदी तोहङले लाहक्पा ठुएँगी ठिम आङ मी़हचीएँ।” 3येशूगी खुङया़ला सुङ नाङसीन, “ओहले ख्याया़गीदी च्यिबे किन्ज्योगी नाङग्यो काया़ मा़हचीबा पेहती राहङदीराङ पे-ठिमया़ ची़ तेहकें? 4च्यिबेमाना किन्ज्योगी सुङ नाङदी येह, ‘राहङगी आबा-आमाला चा़ पेहतोङ ओहले राहङगी आबा-आमाला मे़मु क्याहप्केनया़लादी सेॱराङ कोहएँ।’#प्रस २०:१२; ५:१६; प्रस २१:१७; लेवी २०:९ 5यिहॱनाङ ख्याया़गी माएँ सुज्यीगी राहङगी आबा-आमाला ‘ज़ी़-नाङदोङ राहङया़ला फुल कोहकेन्गी से़हया़ ङाहगी किन्ज्योला फुल सिहन्सीन’ म़ेदी मासीमानानी 6खोगीदी राहङगी आबा-आमाला स्याहप्तो स्युह मेहकोएँ। दि ल़ेहमु पेहती ख्याया़ राहङदीराङ पे-ठिम ङो़ले ग्युर्ती ख्याया़गी किन्ज्योगी काला फेन मे़हथोएँ ज़ोसीन। 7ए यिहन्दो तेन्गेनया़! यशैया लुहङतेम्बागी सुङ नाङग्योकी दि स्याहल ख्याया़ ङ्याम्बु ठाबे डी़गे–
8 ‘दि क्यिहपागी ङाहला खागी च्यी़राङ चा़ पेहकें,
यिहॱनाङ खुङया़गी सेम ङाह ङो़ले था़-रिहङबु येह। #
यशै २९:१३
9 खुङया़गी ङाहला छ्येपा फुल्ग्योदीनी स्यिती काम्बुलाराङ यिहन
च्यिबेमाना खुङया़गी मिहगी ज़ोक्योगी ठिमया़ च्यी़राङ लोप्कें’।”
मिहया़ला मेहचाङा ज़ोएँगी से़हया़
(मर्क ७:१४-२३)
10ओ़ह तिङले येशूगी मिह मिह-माहङला क़े क्याहप्ती सुङ नाङसीन, “ङाहगी ताम या़हबु पेहती ङ्यिहन्दी ह्अ के़हदोङ, 11खाले नाहङला स्य़ूहएँ से़हगी मिहला मेहचाङा ज़ोएँ मिहम्बा, खोगी खालेगी फिला थेन्गे से़हगी गा खोला मेहचाङा ज़ोएँ।”
12ओ़ह तिङले स्याहप्च्यीया़ ओहङदी येशूला मासीन, “च्यि राहङगी ङोह ख्येन्बा? राहङगी सुङ नाङग्योकी स्याहलगी पेहती फरिसीया़ स्यिहताङ पेहसीन।” 13येशूगी सुङ नाङसीन, “स्यिहङगामला ज़्य़ू नाङगेन ङाहगी याहपगी च़ू माहनाङबादी थाम्ज्यीराङ तोहङबो रिङ यिहन्ज्युराङ पो नाङज्ये येह। 14खुङया़ला च्योल्दो माहतेन, खुङया़नी मी़ मेहथोङगेन गोबाया़ यिहम्बा। मी़ मेहथोङगेन मिहगी राहङसा मी़ मेहथोङगेन मिहला ठिसीमानानी, ङ्यिकाराङ ओमला छ्यिकें।”#लूक ६:३९
15पत्रुसकी येशूला मासीन, “ङ्यिहला दि पेगी तेहन्दा स्ये नाङदोङ।” 16येशूगी सुङ नाङसीन, “च्यि ख्याया़गी तोहरोङॱआङ ङोह मा़हस्ये? 17ख्याया़ला क्यी़ह म़ेहबा ले? मिहगी खालेगी नाहङला स्य़ूहक्योकी से़हनी खोगी टेहपा नाहङला लेप्कें ओहले तिङले ज़ुबुलेगी थेन्दी डोएँ। 18यिहॱनाङ मिहगी खालेगी थेन्गे स़ेह खोगी सेमलेगी ओहङग्यो ओहङगे। दि से़हया़गीॱराङ खोला मेहचाङा ज़ोएँ#मत्ती १२:३४ 19च्यिबेमाना मिहगी सेम नाहङलेॱराङ ङ्येहम्बा नाम्स्यीया़ थेन्गे। दि ङ्येहम्बा नाम्स्यीया़गी पेहती खोगी मिह सेकें, छ्येउ-छ्येंमु पेहकें, कुमेन क्याहप्कें, स्योप क्याहप्ती पाङबु तेर्के ओहले किन्ज्योला स्ये़हन्डील पेहकें ल़ेहमु ल़ेह चोक्पाया़ पेहकें। 20मिहया़ला मेहचाङा ज़ोएँगी से़हया़ दिया़राङ यिहम्बा। यिहॱनाङ लाहक्पा मा़हठी़बा पेहती साहज्ये से़हदी मिह मेहचाङा मेहन्डोएँ!”
पी़हमी-पेहजा च्यी़गी यिह-छ्य़े
(मर्क ७:२४-३०)
21येशूगी ओ़ह ग्या़ क्युर ज़्या़दी टुरोस दाङ सीदोनती दे-खामला फेप नाङसीन। 22ओ़ह ग्या़गी पी़हमी च्यी़ ओहङदी क़े तेन्दी मासीन, “ओ़ चो़वो, दाऊदकी स़ेबु ङाहला निङज्यी जे नाङदोङ! ङाहगी पोहमोला ल्हेन्डीगी ज्यिबुराङ तुहक्पु तेर्ते येह।” 23यिहॱनाङ येशूगी मोहला च्यिॱआङ ल़ेहन क्याहप माहनाङ ओहले येशूगी स्याहप्च्यीया़ ओहङदी येशूला, “दि पी़हमी-पेहजाला ताङ नाङदोङ लाह। मोहनी ओहराङगी तिङदा तिङ ङी़हदी क़े तेन्दी ओहङगु दु!” म़ेदी स्युहसीन। 24यिहॱनाङ येशूगी सुङ नाङसीन, “ङाहनी इस्राएल क्यिहपागी तोरक्यो ल़ूहया़गी तेहन्दाला च्यी़राङ ताङग्यो यिहम्बा!” 25दि थे़दी ओ़ह पी़हमी-पेहजागी येशूकी स्याहपला खेप्चु क्याहप्ती मासीन, “ओ़ चो़वो, ङाहला रो़हराम जे नाङदोङ।” 26यिहॱनाङ येशूगी सुङ नाङसीन, “राहङगी पेहजागी साह से़हया़ फ्रो़दी क्यिबुया़ला#१५:२६क्यिबुया़ : देला “पेहजाया़” म़ेदी माक्योदी यहूदी क्यिहपाला माक्यो यिहम्बा। ओहले यहूदी म़ेदी राहङसाराङ क्यिहपाकी मिहया़लादी यहूदीया़की ङ्येन्ज्येन पेहती “क्यिबुया़” म़ेदी माएँ। तेर्च्ये ठाबे मेहयोहङगे!” 27ओहले मोहगी मासीन, “यिहम्बा चो़वो, ओ़हनी ठाबेराङ यिहम्बा! यिहॱनाङ क्यिबुया़गीॱआङ राहङगी ताहक्पुया़गी छ्येकेमु ताहप्क्योगी तोया़ साहएँ!” 28ओहले येशूगी मोहला सुङ नाङसीन, “ए पोहमो, ख्येगी तेहपा छ्यिम्बु दु। ख्येगी माक्यो ल़ेहमुराङ तेहन्दा डुप्च्यु।” ओहजे ती़हजीलाराङ मोहगी पोहमो टा़हसीन।
येशूगी मिह तोङरा ज़्यिला साहज्ये नाङग्यो
(मर्क ८:१-१०)
29येशू ओ़ह ग्या़ क्युर ज़्या़दी गालील छो-क्याहम्जोगी सुहरता सुहर जेती काहङदो च्यी़ला फेप्ते ज़्य़ू नाङसीन। 30येहपाराङ मिह मिह-माहङ जोम्दी येशूसाला ओहङसीन। खुङया़गी काङबा स्योरक्यो, मी़ मेहथोङगे, लेम्बा दाङ लेहमेन माहङबुराङ नेहपाया़ला ख्योङदी ओहङसीन। खुङया़गी ओ़ह नेहपाया़ला येशूगी कुम्देनला ज़्या़ तेर्सीन ओहले येशूगी खुङया़ला टा़ह च्य़ू नाङसीन। 31लेम्बाया़ ताम माज्ये छ़ूसीन, ओङबु छाङबु म़ेहबा मिहया़ टा़हसीन, काङबा स्योर्क्योया़ डोज्ये छ़ूसीन ओहले मी़ मेहथोङगेनया़ मी़ थोङ ख़ूएँ काहल्सीन। दि थोङदी मिहया़ ज्यिबुराङ ह्अ ल़ेहसीन ओहले खुङया़गी इस्राएलकी किन्ज्योला त़ेरा तेच्या फुल्सीन।
32ओ़ह तिङले येशूगी राहङगी स्याहप्च्यीया़ला क़े क्याहप्ती सुङ नाङसीन, “दि मिहया़ला थोङदी ङाहला ज्यिबुराङ निङ च्येहसीन। दि मिहया़ ङाह ङ्याम्बुराङ तेहक्यो तिहरीङ स्याहक्पु सुम काहल सिहन्सीन। ता़ह दि मिहया़दी साहएँ से़हया़ॱआङ चो़हसीन। ङाह दि मिहया़ला साहज्ये से़हया़ च्यिॱआङ माहतेर्पा पेहती लो़ मेहताङ, मिहन्सीमानानी खुङया़ खाङबाला डोएँ डोएँॱराङ लुङला डोवा।”
33स्याहप्च्यीया़गी येशूला मासीन, “ए! देजे माहङा मिहया़ला दि च्यिॱआङ म़ेहबा ग्या़ला का़हलेगी साहज्ये से़हया़ ख्योङदी तेर्च्ये ले?” 34येशूगी खुङया़ला टी़ह नाङसीन, “ख्याया़ ङ्याम्बु काहजे खुरा येहबा?” ओहले खुङया़गी, “खुरा तिहन दाङ ङ्याह फेमाया़ सिपाज्यीराङ येहबा!” म़ेदी स्युहसीन।
35ओहले येशूगी मिहया़ला पाङगाला तेहतोङ म़ेदी का नाङसीन। 36ओ़ह तिङले येशूगी ओ़ह खुरा दाङ ङ्याहया़ नोम्दे किन्ज्योला थुज्यी-छ्ये़ फुल नाङसीन। खुराया़ फेमा-फेमा च्येती स्याहप्च्यीया़ला नाङदी के़हदी तेर्तोङ म़ेदी सुङ नाङसीन ओहले स्याहप्च्यीया़गी मिहया़ला के़हदी तेर्सीन। 37मिह थाम्ज्यीगी साहखुदाङ साहसीन ओहले स्याहप्च्यीया़गी ल्हा़स्युलया़ तुहएँमु डा़लो तिहन काहङसीन। 38ओ़हला साहएँ पी़हमी-पेहजा दाङ पेहजाया़ माहटाहङबा पेहती क्येप-ख्योवाया़ च्यी़राङ तोङरा ज़्यि येहकें। 39ओ़ह तिङले येशूगी ओ़ह मिहया़ला कोहङबा नाङसीन, ओहले येशूदी टुह-छ्युङला जा़दे मगादान माएँ लुहङबाला फेप नाङसीन।
Currently Selected:
मत्ती 15: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
