मत्ती 11
11
बप्तिस्मा तेर्केन यूहन्नागी टी़हदाप
(लूक ७:१८-३५)
1राहङगी स्याहप्च्यी च्यिङ्यी़ला दि स्याहल स्ये छार फान्ज्यो येशू ओ़ह ग्या़लेगी खुङया़गी क्याहसाया़ला लोप्च्ये दाङ या़हबु लेहङगु ख्येप्टा ताङज्येला फेप नाङसीन।
2बप्तिस्मा तेर्केन यूहन्ना चोन-खाङला येहकेंमु मास्यीकागी जे नाङग्योगी छ्या़लेया़गी तेहन्दाला थ़ेसीन। ओहले यूहन्नागी राहङगी स्याहप्च्यीया़ला दि ताम टी़हज्येला येशूसाला ताङसीन। 3खुङया़ ओहङदी येशूला दि ल़ेहमु म़ेदी स्युहसीन, “ङ्यिहगी रेहवा पेहक्योगी थार्पा नाङगेन्गी क्याहल्बु राहङराङ यिहम्बानी ङ्यिहगी लेहमेन सुज्यीगी लाहम ता कोहएँ?” 4ओहले येशूगी खुङया़ला, “ख्याया़गी थे़क्यो दाङ थोङग्योकी केच्याया़ यूहन्नाला स्ये तेर” म़ेदी सुङ नाङसीन। 5“मी़ मेहथोङगेन मिहया़गी मी़ थोङगोराङ येह, काङबा स्योरक्यो मिहया़ लाहङदी डोॱराङ येह, जे-ने़ह थेन्ग्यो मिहया़ टा़हगेॱराङ येह, नाम्ज्यो मे़हथेगे मिहया़गी थे़एँराङ येह, स्यिक्यो मिहया़ सोम्बो लो़हदीॱराङ येह ओहले प्राङबुया़गी या़हबु लेहङगु ङ्यिहन ङ्युहङगेनॱराङ येह।#यशै ३५:५,६; यशै ६१:१ 6ङाहगी तेहन्दाला थेचुम मेहबेगेन मिह तेहम्बाराङ काहजे सोनाम-साक्पु।”
7ओहले यूहन्नागी स्याहप्च्यीया़ काहल सिहन फान्ज्यो येशूगी मिह मिह-माहङला यूहन्नागी तेहन्दाला सुङ नाङसीन, “ख्याया़ रिह-काम्बुला च्यि ता काहल्ग्यो? च्यि ल्हा़बागी युङतेहकेन्गी ङ्युङमाला? 8मिहन्सीमानानी च्यि ता काहल्ग्यो येहकें ले? च्यि या़हबु-या़हबु काप्च्या केहन्ग्योकी मिहया़ ता काहल्ग्यो? या़हबु-या़हबु काप्च्या केहन्गेन्गी मिहया़नी क्याहल्बुगी क्याहल-गाङला गा तेहकें! 9तेहम्बाराङ म़ेदोङ ले, ख्याया़ च्यि ता काहल्ग्यो येहकें? च्यि लुहङतेम्बाला ता काहल्ग्यो? यिहम्बा, तेहम्बाराङ माज्येराङ मानानी ख्याया़गी लुहङतेम्बा म़ेदीॱआङ छ्यिम्बु मिह च्यी़ला थोङग्यो येह। 10च्यिबेमाना सुङरापला किन्ज्योगी यूहन्नागी तेहन्दाला दि ल़ेहमु सुङ नाङदी येह–
‘त़ेदोङ, ङाह राहङगी लेहङगु ख्येर्के मिहला ख्येगी तोहङदा-तोहङ ताङज्ये येह,
ओहले खोगी ख्येगी लाहम ठाबे ज़ोज्ये येह’ #
मला ३:१
11 तेहम्बाराङ ङाह ख्याया़ला माएँ, बप्तिस्मा तेर्केन यूहन्ना म़ेदी छ्यिम्बु मिह क्ये़दी म़ेह। यिहॱनाङ किन्ज्योगी क्याहल्सीला का़हन्दी थाम्ज्यी म़ेदी फेमा येहबा, खो यूहन्ना म़ेदीॱआङ छ्यिम्बु ओहङगे। 12बप्तिस्मा तेर्केन यूहन्नागी ती़हजी यिहन्ज्यु नाहरे थु किन्ज्योगी क्याहल्सी स्युक छ्यिम्बु पेहती तोहङला डोॱराङ येहबा, ओहले टाह पेहकेनया़गीदी ओ़ह थो़ला उर्चु पेहती क्याहल्ज्ये छोल्गेराङ येहबा। #लूक १६:१६ 13बप्तिस्मा तेर्केन यूहन्नागी ती़हजी थु मोशागी छ्य़े-ठिम दाङ लुहङतेम्बाया़गी किन्ज्योगी क्याहल्सीगी तेहन्दाला स्याहल सुङ नाङग्यो येहकें। 14खुङया़गी माक्योगी तामला यिह छ्य़ेगे यिहनानी खुङया़गी ओहङज्ये येह म़ेदी माक्यो एलियादी यूहन्नाराङ यिहम्बा।#मला ४:५; मत्ती १७:१०-१३; मर्क ९:११-१३ 15सुती नाम्ज्यो येहबा, खोगी ङ्यिहन्ज्यु!”
16 “दाङ-तिहरीङगी मिहया़ला ङाह सु ङ्याम्बु तुहर्च्ये? खुङया़नी ठोमला तेहती राहङगी रो़हया़ ङ्याम्बु दि ल़ेहमु पेहती ताम म़े तेहकेन्गी पेहजाया़ ल़ेहमु यिहम्बा–
17 ‘ङ्यिहगी ख्याया़गी तेहन्दाला लेमु फुसीन, यिहॱनाङ ख्याया़ माहछ्याम।
ङ्यिहगी खेलाङगी लु लेहन्सीन, यिहॱनाङ ख्याया़ मा़ह-ङ्यीह’।”
18 “कुहन्डुमगी # ११:१८ कुहन्डुम : ला नेपालीला आङ्गुर म़ेदी माएँ। निङगु मिहथुङगे दाङ ङ्युङने तेहकेन्गी यूहन्ना ओहङसीन, खोला ख्याया़गी ल्हेन्डी स्युहक्यो मिह म़ेदी मासीन। 19मिहगी स़ेबु से़हदी थुङदी ओहङसीन, ओहले खुङया़गी, ‘त़ेदोङ, साहउ, छ्याङसीवा, ठाल तुहएँ दाङ तिहक्च्येम्बाया़गी छ्येटो’ म़ेदी माएँ। किन्ज्योगी रिहक्स्यी ठाबे येह म़ेदी खोगी पेहक्यो ल़ेहगीॱराङ प्रा साल्गे।”
यिह मे़हछ्येएँ क्याहसाकी मिहया़ला ज्यी़-ङोर नाङग्यो
(लूक १०:१३-१५)
20ओहले का़हन्दी-का़हन्दी क्याहसाया़ला येशूगी याहम्जेम्बागी छ्या़लेया़ जे नाङग्यो येहकें, ओ़ह क्याहसाकी मिहया़ला येशूगी काहजे छा़ तुहवा म़ेदी सुङ नाङसीन, च्यिबेमाना खुङया़गी सेमगी स्या़बा पेहती तिहक्पा माहपाङबा येहकें।
21 “ए खोराजीन दाङ बेथसेदागी मिहया़, ख्याया़ काहजे छा़ तुहवा! ख्याया़गी पाहरक्यीला पेहक्योगी याहम्जेन छ्येवागी ल़ेहया़ टुरोस दाङ सीदोन लुहङबाला पेहपा यिहनानी खुङया़गी तोहङलेराङ फाजीगी काप्च्या केहन्दी थाला की़दी सेमगी स्या़बा पेहती तिहक्पा पाङज्ये येहकें। #यशै २३:१-१८; इज २६:१-२१; २६; योए ३:४-८; आमो १:९,१०; जक ९:२-४ 22यिहॱनाङ ङाह ख्याया़ला माएँ, ठिम ताङगे ङ्यिहमाला ख्याया़गी ङ्य़ेहबा म़ेदीनी टुरोस दाङ सीदोन क्याहसाकी मिहया़गी ङ्य़ेहबा गा ना़ खू़-दाङ ओहङज्ये येह।”
23 “ए कफर्नहुमकी मिहया़, च्यि ख्याया़ स्यिहङगामला लेप ख़ूएँ म़ेदी सेमला ने़उ दु? ख्याया़नी ङ्याल्वालाराङ छ्यिच्ये येह च्यिबेमाना सदोम क्याहसाॱलाङ ख्याया़ला ल़ेहमुराङ याहम्जेम्बागी ल़ेहया़ तेन्ग्यो यिहनानी सदोम क्याहसा ताहन्दा थुॱआङ लिहच्ये येहकें। #यशै १४:१३-१५; उत १९:२४-२८ 24ङाह ख्याया़ला माएँ, ठिम ताङगे ङ्यिहमाला ख्याया़गी ङ्य़ेहबा म़ेदीनी सदोम क्याहसाकी मिहया़गी ङ्य़ेहबा गा ना़ खू़-दाङ ओहङज्ये येह।” #मत्ती १०:१५; लूक १०:१२
थाङ छ्येक्योया़ला थाङ सोएँ
(लूक १०:२१-२२)
25ओहजेला येशूगी सुङ नाङसीन, “ओ़ किन्ज्यो याहप स्यिहङगाम दाङ जाम्बुलीङगी ताहक्पु, ङाहगी राहङला थुज्यी-छ्ये़ फुल्गे च्यिबेमाना रिहक्स्यी छ्यिम्बु दाङ टिहम्बु मिहया़ ङो़ले पे़हदी ज़्या़ नाङग्योकी स्याहल राहङगी च्यिॱआङ मे़हस्येएँगी मिहया़ला ङोह स्य़े च्य़ू नाङसीन। 26यिहम्बा किन्ज्यो याहप, च्यिबेमाना राहङला दि ल़ेहमुराङ जे नाङज्येला राहङगी थुला ठुङसीन।
27 ङाहगी किन्ज्यो याहपगी ङाहला थाम्ज्यीराङ से़हया़ चि क्याहप नाङदी येह। किन्ज्यो याहपगी मिहम्बा लेहमेन सुगीॱआङ स़ेबुला ङोह मे़हस्येएँ ओहले स़ेबुगी मिहम्बा लेहमेन सुगीॱआङ किन्ज्यो याहपला ङोह मे़हस्येएँ। यिहॱनाङ स़ेबुगी ङोहस्यी ताङ तेर नाङग्योया़गीदी किन्ज्यो याहपला ङोह स्य़ेएँ। #यूह ३:३५; यूह १:१८; १०:१५
28 ए तुहक्पु दाङ तुहङालगी पेहती थाङ छ्येक्योया़, ङाहसाला स्यो, ङाह ख्याया़ला थाङ सो च्य़ूएँ। 29ङाहगी ङ्यास्यीङ खुर्तोङ ओहले ङाह ङ्याम्बु लोप्तोङ च्यिबेमाना ङाह च्याहम्बु दाङ ङ्येम्ज्युङ येह, ओहले ख्याया़गी राहङगी सेमगी थाङ सो ङ्युहङज्ये येह। #यर ६:१६ 30त़ेदोङ, ङाहगी ङ्यास्यीङ ज्यो़-तेहमु येह ओहले ङाहगी खुर्पु याहङदी येह” म़ेदी येशूगी सुङ नाङसीन।
Currently Selected:
मत्ती 11: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
