यूहन्ना 6
6
येशूगी मिह तोङरा ङाला साहज्ये नाङग्यो
(मत्ती १४:१३-२१; मर्क ६:३०-४४; लूक ९:१०-१७)
1ओ़ह तिङले येशू गालील छो पे यिहॱना़: तिबेरियास छो च्येती फार्केन देपला फेप नाङसीन। 2ओहले मिहया़ बुङजी क्याहप्ती येशूगी तिङ ङ्यादी ओहङसीन च्यिबेमाना येशूगी नेहपाया़ला याहम्जेन छ्येवा जेती टा़ह च्य़ू नाङगेन खुङया़गी थोङदी येहकें। 3ओहले येशू काहङ च्यी़ला फेप्ते स्याहप्च्यीया़ ङ्याम्बुराङ साला ज़्य़ू नाङसीन। 4ओहजे काहङला यहूदीया़की थार्पा छ्येपा लेप्च्ये पेहती येहकें। 5येशूगी मिह मिह-माहङ छ्यिम्बुच्यी राहङ ङो़ले ओहङ तेहक्यो ज़ी़दी फिलिपला टी़ह नाङसीन, “दि मिहया़ला साहज्ये तेर्च्येला ओहराङगी का़हलेगी खुरा ङ्ये़हदी ख्योङज्ये ता़ह?” 6दि स्याहल येशूगी फिलिपकी खोक्पा ज़ी़ज्येला सुङ नाङग्यो येहकें, च्यिबेमाना येशूगी च्यि जे नाङज्ये जेक्यो येहकें, ओ़ह स्याहल मिहरोला थुयी़ येहकें। 7ओहले फिलिपगी येशूला स्युहसीन, “ओहराङगी ङुल-टाङ ङ्यिहक्यागी#६:७ ङुल-टाङ ङ्यिहक्या : ओ़ह ती़हजीला मिहगी दावा क्ये़ह ल़ेह पेहकेमु ङुलगी डापाल ङ्यिहक्या ज्योर्को येहकें। खुरा ङ्योहॱनाङ दि मिहया़ला सिपी रे़ह-रे़हॱआङ ख्येप च्य़ू मी़हखुएँ।” 8येशूकी लेहमेन स्याहप्च्यी सिमोन-पत्रुसकी नो़ह अन्द्रियासगी मासीन, 9“येहच्येनी, देला पेहजा च्यी़ ङ्याम्बु जौगी खुरा ङा दाङ ङ्याह ङ्यी़ दु, यिहॱनाङ ओहजे माहङा मिहया़ला च्यि दाङवा ले?”
10येशूगी स्याहप्च्यीया़ला सुङ नाङसीन, “मिहया़ला साला तेह च्य़ूदोङ!” ओ़ह ग्या़ला चा़ माहङबु क्येक्योगी थाङगा च्यी़ येहकें, ओहले मिहया़ ओ़हलाराङ तेहसीन। ओ़ह मिह मिह-माहङ नाहङला क्येप-ख्योवाया़ज्यीॱराङ तोङरा ङाजे येहकें। 11ओहले येशूगी ओ़ह खुरा नोम्दी किन्ज्योला थुज्यी-छ्ये़ फुल फान्ज्यो ओ़हला तेहक्योगी मिहया़ला के़हदी नाङसीन ओहले ओ़हठीॱराङ जेती येशूगी ङ्याहॱआङ नोम्दे किन्ज्योला थुज्यी-छ्ये़ फुल्दी के़हदी नाङसीन। खुङया़गी ओ़ह साह ख़ूएँ थु साहसीन 12ओहले खुङगी साह सिहन फान्ज्यो येशूगी स्याहप्च्यीया़ला सुङ नाङसीन, “ल्हा़स्युलया़ ती़हदी ज़्यो़, च्यिॱआङ थोरो डो मा़हच्यु।” 13ओहजे मिहया़गी दाङस्यी से़हदेॱआङ ओ़ह जौगी खुरा ङागी ल्हा़स्युलया़ तुहएँमुनी डा़लो च्यिङ्यी़ काहङसीन। 14येशूगी जे नाङग्योकी दि रोहवा याहम्जेन छ्येवागी छ्या़ले थोङदी मिहया़गी मासीन, “जाम्बुलीङला फेप्च्ये येह म़ेदी ओहराङगी रेहवा पेहक्योकी#व्य १८:१५ लुहङतेम्बानी तेहम्बा-तेहन्सुमॱराङ मिह-रो़हराङ गा यिहन्गे दुबा!” 15मिहया़ ओहङदी राहङला ज्यिबुराङ उर्चु पेहती क्याहल्बु ज़ोज्ये छोल्गेराङ येह माएँ ताम येशूगी थु ङ्ये फान्ज्यो येशू येहपाराङ राहङ च्यी़राङ काहङ ङो़ले फेप नाङसीन।
येशू छ्यु खा-खादा फेप नाङग्यो
(मत्ती १४:२२-३३; मर्क ६:४५-५२)
16कुहङॱसे काहल फान्ज्यो येशूगी स्याहप्च्यीया़ छो-क्याहम्जोला काहल्सीन। 17ओहले खुङ छ्यु-टुहला स्य़ूहदी छो-क्याहम्जोगी फार्केन देप कफर्नहुम क्याहसाला डोज्ये पेहसीन। ओहजेला नाहम स़े सिहन्दी येहकें, यिहॱनाङ येशू तोहरोङॱआङ फेप माहनाङबा येहकें। 18ओहले ल्हा़बा लुङजी छ्यिम्बु ओहङग्यो सोङबे, छो-क्याहम्जोकी छ्युया़ फार छुर याप्च्ये छ़ूसीन। 19छ्यु-टुहला स्य़ूहदी नेसा ङाजे टू़हचेगी लाहम काहल सिहन फान्ज्यो खुङगी येशूला छो-क्याहम्जो खा-खादा स्याहपकी छ्यु-टुह ङो़ले फेप्केराङ जेक्यो थोङदी खुङ ज्यिबुराङ ज्यी़सीन। 20यिहॱनाङ येशूगी खुङया़ला सुङ नाङसीन, “ङाहराङ यिहन, मा़हन्ज्यी।” 21दि थे़दी स्याहप्च्यीगी ज्यिबुराङ क़ेहनाङ पेहती येशूला छ्यु-टुहला फेप स्युहसीन ओहले खुङ फ़ेबेॱया लाहम्साङराङ छो-क्याहम्जो सुहरला खुङ डो कोहएँगी ग्या़लाराङ लेप्सीन।
22छो-क्याहम्जोगी सुहरला छ्यु-टुह च्यी़राङ येहकें ओहले स्याहप्च्यीया़ ङ्याम्बु येशू ओ़ह छ्यु-टुहला स्य़ूह माहनाङबा येहकें यिहॱनाङ स्याहप्च्यीया़ च्यी़राङ जा़क्यो येहकें माएँ ताम छो-क्याहम्जो फार्केन देप ङो़ले येहकेन्गी मिह मिह-माहङया़गी नाहङबार च्युङ टेहम्बा साल्सीन। 23चो़वोगी थुज्यी-छ्ये़ फुल फान्ज्यो मिहया़गी खुरा साहक्योगी ग्या़ला तिबेरियास लुहङबाले लेहमेन छ्यु-टुहया़ॱआङ लेप्सीन। 24ओहले येशू दाङ मिहरोगी स्याहप्च्यीया़ला का़हॱलाङ माहथोङ फान्ज्यो ओ़ह मिहया़ छ्यु-टुहया़ला स्य़ूहदी येशूला कफर्नहुम क्याहसा ङो़ले छोल काहल्सीन।
येशू मिहली नाङगेन्गी खुरा यिहम्बा
25ओहले मिहया़गी येशूला छो-क्याहम्जोगी फार्केन देपला ज्याल्दी टी़हसीन, “लोबेन लाह, राहङ देला नाहम फेप नाङग्यो लेह लाह?”
26ओहले येशूगी खुङया़ला सुङ नाङसीन, “तेहम्बाराङ ङाह ख्याया़ला माएँ, ख्यागी ताक्छेनया़ थोङग्यो सोङबे मिहम्बा, यिहॱनाङ साह ख़ूएँ थु खुरा साहक्यो सोङबे गा ख्यागी ङाहला छोल्ग्यो यिहन। 27तोङदी डोएँगी खुराकी तेहन्दाला तुहक्पु माहबे, यिहॱनाङ था़ म़ेहबा मिहली ज़ाङबु तेर्केन खुराकी तेहन्दाला तुहक्पु पेहतोङ, ओ़ह ख्याया़ला मिहगी स़ेबुगी नाङज्ये येह। च्यिबेमाना किन्ज्यो याहपगी स़ेबु थो़ला राहङदी पार क्याहप नाङदी येह।”
28ओहले खुङया़गी येशूला स्युहसीन, “ओ़हठी यिहन्सीमानानी किन्ज्योगी थु-सेम जे नाङग्योकी छ्या़ले पेहच्येला ङ्यिहगी च्यि पेह कोहएँ लेह लाह?”
29ओहले येशूगी खुङया़ला सुङ नाङसीन, “किन्ज्योगी थु-सेम जे नाङगेन्दी दिराङ यिहम्बा: किन्ज्योगी ताङ नाङग्योकी स़ेबुला ख्याया़गी यिह छ्य़ेदोङ।”
30ओ़ह सोङबे खुङया़गी येशूला स्युहसीन, “ङ्यिहगी राहङला यिह-छ्य़े पेहच्येला राहङगी ङ्यिहला काहन्डुमु ताक्छेनया़ तेन नाङगे ले? केरे तेन नाङदोङ ले? 31ङ्यिह आख्ये मे़हमेया़गीनी रिह-काम्बुला मन्न#६:३१ मन्न : माक्योदी किन्ज्योगी स्यिहङगामलेगी माहर नाङग्योगी खुरा यिहम्बा। प्रस १६:४,१५; भज ७८:२४ छ्ये नाङसीन। ओ़ह ल़ेहमुराङ सुङरापला प्री़हदी येहबा, ‘मिहरोगी खुङया़ला स्यिहङगामकी खुरा साहज्येला नाङसीन’।”
32ओहले येशूगी खुङया़ला सुङ नाङसीन, “तेहम्बाराङ, ङाह ख्याया़ला माएँ, ख्याया़ला स्यिहङगामलेगी खुरा तेर्केन्दी मोशागी मिहन, यिहॱनाङ स्यिहङगामलेगी ख्याया़ला तेहन्दामगी खुरा नाङगेन्दी ङाहगी याहप यिहम्बा। 33च्यिबेमाना किन्ज्योगी नाङगे खुरानी ओ़हदीॱराङ यिहन का़हन्दीगी स्यिहङगामले माहर फेप्ती जाम्बुलीङला मिहली नाङगे।”
34ओहले खुङया़गी येशूला स्युहसीन, “चो़वो ला़ह, ओ़ह खुरा ङ्यिहला नाहम-माना नाङदोङ।”
35ओहले येशूगी खुङया़ला सुङ नाङसीन, “मिहली ज़ाङबु तेर्केन्गी खुरा ङाहराङ यिहन। ङाहसाला ओहङगेनया़ नाहमॱआङ तो़ज्ये म़ेह, ओहले ङाहला यिह-छ्य़े पेहकेनया़ नाहमॱआङ कोम्ज्ये म़ेह। 36यिहॱनाङ ङाहगी ख्याया़ला मा सिहन्दी येह, ख्याया़गी ङाहला थोङ सिहन्दी येह यिहॱनाङ यिह मे़हछ्येएँ। 37याहपगी नाङगे थाम्ज्यी ङाहसाला ओहङज्ये येह, ओहले ङाहसाला ओहङगेनया़ला ङाहगी नाहमॱआङ लो़ ताङज्ये म़ेह। 38च्यिबेमाना ङाह राहङगी सेमला ऩेक्योगी तामया़ छाङबु पेहच्येला स्यिहङगामले माहर ओहङग्यो मिहन, यिहॱनाङ ङाहला ताङ नाङगेन्दीती थु-सेम छाङबु पेहच्येला ङाह ओहङग्यो यिहम्बा। 39ङाहला ताङ नाङगे याहपकी थु-सेम दिराङ यिहम्बा: मिहरोगी ङाहला नाङग्योया़ नाहङला सुज्यीॱआङ तोङदी माहन्डोज्यु, यिहॱनाङ तिङस्यो ती़हजीला खुङया़ला सोम्बो ज़ो ख़ूज्यु। 40च्यिबेमाना ङाहती याहपकी थु-सेम दिराङ यिहन: स़ेबुला ताएँ दाङ खोला यिह छ्य़ेगे थाम्ज्यीगी था़ म़ेहबा मिहली ज़ाङबु ज्योर ख़ूज्यु, ओहले ङाहगी खोला तिङस्यो ती़हजीला सोम्बो ज़ोज्ये येह।”
41ओ़ह सोङबे यहूदीया़गी येशूला टा़ह पेहती राहङ नाहङदोङ ताम माज्ये छ़ूसीन, च्यिबेमाना येशूगी सुङ नाङसीन, “स्यिहङगामले ओहङग्योगी खुरा ङाहराङ यिहन।” 42खुङया़गी मासीन, “च्यि दि योसेफकी पुह, येशू मिहन ले? च्यि खोगी आबा, आमाला ओहराङगी ङोह मे़हस्येएँ ले? ताहन्दा दि खोगी काह-ठि पेहती ‘ङाह स्यिहङगामले ओहङग्यो यिहम्बा’ म़ेदी मा ख़ूएँ?”
43येशूगी खुङया़ला सुङ नाङसीन, “ख्या राहङ नाहङदुङ ङाहला टा़ह पेहती ताम मा मेहकोहएँ। 44ङाहला ताङ नाङगेन याहपगी ङाहसाला ओहङज्ये सेम मेहनाङसीनमाना सुॱआङ ङाहसाला ओहङ मी़हखुएँ, ङाहसाला ओहङगेया़ला ङाह जाम्बुलीङकी तिङस्यो ती़हजीला सोम्बो ज़ोज्ये येह। 45सुङरापला लुहङतेम्बाया़गी दि ल़ेहमु प्री़हदी येहबा, ‘किन्ज्योगीॱराङ खुङया़ला लोप नाङज्ये येह’। दि ल़ेहमु पेहती याहपगी सुङदेन ङ्यिहन्गे दाङ लोप्केया़ थाम्ज्यीराङ ङाहसाला ओहङज्ये येह।#यशै ५४:१३ 46किन्ज्योला सु मिह च्यी़गीॱआङ थोङदी म़ेह, किन्ज्यो याहप लाहमले फेप नाङगेन्दीगी च्यी़राङ मिहरोला थोङदी येहबा।
47 तेहम्बाराङ ङाह ख्याया़ला माएँ, का़हन्दीगी ङाहला यिह छ्य़ेगे खो ङ्याम्बु था़ म़ेहबा मिहली ज़ाङबु येह। 48मिहली ज़ाङबु तेर्केन्गी खुरा ङाहराङ यिहन। 49ख्यागी आख्ये मे़हमेया़गी रिह-काम्बुला मन्न साहसीन यिहॱनाङ स्यिदी काहल्सीन। 50यिहॱनाङ का़हन्दीगी स्यिहङगामले ओहङग्योगी खुरा साहएँ खो नाहमॱआङ स्यिज्ये म़ेह। 51स्यिहङगामले माहर ओहङग्योगी सोम्बो खुरा ङाहराङ यिहन। का़हन्दीगी दि खुरा साहएँ खो नाहमॱआङ स्यिज्ये म़ेह। ङाहगी जाम्बुलीङकी मिहया़गी मिहली ज्योर्च्यु म़ेदी तेर्च्ये पेहक्योकी खुराती ओ़ह ङाहती ज़ुबु यिहम्बा।”
52दि केच्या थे़दे यहूदीया़ राहङ नाहङदोङराङ ठाक-ठाक ठुक-ठुक काहल्सीन। खुङया़गी मासीन, “दि मिहगी ओहराङला काह-ठि पेहती राहङगी ज़ुबु साहज्येला तेर ख़ूएँ ले?” 53येशूगी खुङया़ला सुङ नाङसीन, “तेहम्बाराङ, ङाह ख्याया़ला माएँ, ख्यागी मिहगी स़ेबुदी ज़ुबु मेहसाहसीमाना ओहले खोगी ठा़ मिहथुङसीन माना, ख्याया़ ङ्याम्बु मिहली मेहयोहङगे। 54ङाहगी ज़ुबु साहएँ दाङ ठा़ थुङगेन ङ्याम्बु था़ म़ेहबा मिहली ओहङगे, ओहले तिङस्यो ती़हजीला ङाहगी खोला सोम्बो ज़ोज्ये येह। 55च्यिबेमाना ङाहगी ज़ुबु तेहम्बाराङ साहएँ स़ेह यिहम्बा ओहले ङाहती ठा़ तेहम्बाराङ थुङगे स़ेह यिहम्बा। 56ङाहगी ज़ुबु साहएँ, दाङ ङाहती ठा़ थुङगेन मिहती ङाह ङ्याम्बु ओहङगे, ओहले ङाह खो ङ्याम्बु ओहङगे। 57सोम्बो ज़्य़ू नाङगेन याहपगी ङाहला ताङ नाङसीन ओहले ङाह मिहरो लाहमलेॱराङ सोम्बो येह, ओ़हठीॱराङ पेहती ङाहला साहएँदीॱआङ ङाह लाहमलेॱराङ सोम्बो ओहङज्ये येह। 58स्यिहङगामले ओहङग्योगी खुरानी ख्यागी आख्ये मे़हमेया़गी साहक्योगी खुरा ल़ेहमु मिहम्बा। ओ़ह खुरा ख्यागी आख्ये मे़हमेया़गी साहसीन ओहले स्यिसीन। यिहॱनाङ दि खुरा साहएँया़दी नाहमॱआङ स्यिज्ये म़ेह।”
59दि स्याहलया़ येशूगी कफर्नहुम क्याहसाकी छो़खाङला सुङदेन नाङगेमु सुङ नाङग्यो येहकें।
था़ म़ेहबा मिहली ज़ाङबुगी सुङदेन
60दि केच्या थे़दी येशूगी स्याहप्च्यीया़ नाहङला माहङबुगीराङ मासीन, “दि सुङनी ज्यिबुराङ का़हबु दु, दि सुगी ङ्यिहन ख़ूज्ये ले?”
61यिहॱनाङ स्याहप्च्यीया़गी राहङ नाहङदोङ दिगी तेहन्दाला ताम मामा चाएँॱराङ येह माएँ ताम येशूगी थु ङ्येती खुङया़ला सुङ नाङसीन, “च्यि दि तामगी ख्याया़ला सेमला फो़बा? 62ओ़ह ल़ेहमु यिहन्सीमाना मिहगी स़ेबुला खो तोहङले का़हला येहकें ओ़ह ग्या़लाराङ लो़हदी डोएँ ख्याया़गी थोङसीमानानी च्यि पेहकें? 63मिहली नाङगेन्दीनी थुराङ यिहन, ज़ुबु लाहमलेनी च्यिॱआङ खेप्साङ मेहयोहङगे। ङाहगी ख्याया़ला माक्योगी ताम थु दाङ मिहली यिहन। 64यिहॱनाङ ख्याया़ नाहङला लाहलागी ङाहला यिह मे़हछ्येएँ।” च्यिबेमाना यिह मेहछ्य़ेएँया़ सु सु यिहम्बा, ओहले मिहरोला गो़ कोर च्य़ूगेन्दी सु यिहम्बा म़ेदी येशूला तोहङ यिहन्ज्यु थुयी़ येहकें। 65ओहले येशूगी सुङ नाङसीन, “ओ़ह सोङबे ङाहगी ख्याया़ला माक्यो यिहम्बा, ङाहगी याहपगी ङाहसाला ओहङज्ये सेम माहनाङ थु सुॱआङ ङाहसाला ओहङ मी़हखुएँ।” 66ओ़ह ती़हजी यिहन्ज्यु येशूगी स्याहप्च्यीया़ नाहङगी माहङबुराङ स्याहप्च्यीया़ क्याहप लो़हसीन ओहले येशूला तिङ ङ्या़ज्ये क्युर्सीन।
67येशूगी स्याहप्च्यी च्यिङ्यी़ला टी़ह नाङसीन, “च्यि ख्याॱआङ ङाहला क्युर ज़्या़दी डोएँ?” 68ओहजेला सिमोन-पत्रुसकी मासीन, “ओ़ चो़वो ला़ह, ङ्यिह सु साला डोज्ये? था़ म़ेहबागी मिहली ज़ाङबु नाङगेन्गी सुङनी राहङ ङ्याम्बुराङ येहबा।#मत्ती १६:१६; मर्क ८:२९; लूक ९:२० 69ओहले ङ्यिहगी यिह छ्य़ेदी येह ओहले ङोह स्य़ेदी येह, राहङ किन्ज्योगी नाम्पार-ताहक्पा मिह यिहन।” 70येशूगी खुङया़ला सुङ नाङसीन, “च्यि ङाह राहङगीराङ ख्या मेहन्दा च्यिङ्यी़ला दाम्ग्यो मिहम्बा ले? यिहॱनाङ ख्या नाहङला मेहन्दा च्यी़दी (ती़ह गो-छ्येवा) दियाबलस यिहम्बा।” 71दि स्याहल येशूगी सिमोन इस्करियोतकी पुह यहूदागी तेहन्दाला सुङ नाङग्यो येहकें, च्यिबेमाना खो स्याहप्च्यी च्यिङ्यी़ नाहङगी मेहन्दा च्यी़ यिहन्गे ओहले खोगीराङ येशूला गो़ कोर च्य़ूज्ये पेहक्यो येहकें।
Currently Selected:
यूहन्ना 6: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
