यूहन्ना 10
10
या़हबु ल़ूह-कोहरोवा दाङ मिहरोकी ल़ूहया़
1 “तेहम्बाराङ ङाह ख्याया़ला माएँ, ल़ूह कोहरेकी कोहलेगी मा़हस्युहबा पेहती कोहरेकी तेङ थो़ले स्य़ूहगेन्दी कुमेन दाङ च्याहक्पा यिहम्बा। 2यिहॱनाङ कोहलेगी नाहङला स्य़ूहगेन्दी ल़ूह-कोहरोवा यिहम्बा। 3कोह सुङगेन मिहगी खोला कोह खा फे़ तेर्कें ओहले ल़ूहया़गी राहङ ताहक्पुगी क़े ङोह स्य़ेएँ, ओहले ल़ूह-कोहरोवागी राहङ ल़ूहया़ला मिहन रे़ह-रे़ह तेन्दी क़े क्याहप्ती फिला ख्येर्ती डोएँ। 4ओहले खोगी राहङगी ल़ूहया़ला फिला तेन सिहन फान्ज्यो खो ल़ूहया़गी तोहङदा-तोहङ डोएँ, ओहले ल़ूहया़गी खोला तिङ ङ्या़गे, च्यिबेमाना ल़ूहया़गी खोगी क़े ङोह स्य़ेगे। 5ताहक्पुगी मिहम्बा, लेहमेन मिहगी क़े क्याहप्सीमानानी ल़ूहया़ खोगी तिङ ङ्यादी मेहन्डोएँ ग्यिले, तोहरोङ खोगी क़े ङोह मा़हस्येबा सोङबे खुङ तोहरोङ छ्योङगे।” म़ेदी येशूगी सुङ नाङसीन।
6येशूगी खुङया़ला दि स्याहल पे ज़्या़दी सुङ नाङसीन, यिहॱनाङ खुङया़गी दि पेगी तेहन्दा ङोह स्य़े मा़हखु।
7ओ़ह सोङबे येशूगी खुङया़ला येहपाराङ सुङ नाङसीन, “तेहम्बाराङ, ङाह ख्याया़ला माएँ, ल़ूहया़गी कोह ङाहराङ यिहम्बा। 8ङाह म़ेदी तोहङले ओहङगेनया़ थाम्ज्यीराङ कुमेन दाङ च्याहक्पा यिहन्गे, यिहॱनाङ ल़ूहया़गी खुङया़गी ताम माहङ्यीहन। 9कोह ङाहराङ यिहम्बा, का़हलेॱआङ सुज्यी ङाह लाहमले पेहती नाहङला स्य़ूहसीन माना खोला थार च्य़ूज्ये येह, ओहले खो फि-नाहङ ओहङगे-डोएँ पेहच्ये येह, ओहले खोगी पाङगाकी चाया़ काहजे मामा साह ङ्युहङज्ये येह। 10कुमेननी कुमेन क्याहप्च्ये, सेच्ये दाङ तोङ च्य़ूज्ये म़ेदी ओहङगे। यिहॱनाङ ङाहनी ख्याया़गी मिहली ज़ाङबु ज्योर ख़ूज्यु ओहले ओ़ह म़ेदीॱआङ माहङबु माहङदे फोएँ थु ज्योर ख़ूज्यु म़ेदी ओहङसीन।
येशू या़हबु कोहरोवा
11 या़हबु कोहरोवा ङाहराङ यिहन। या़हबु कोहरोवागी राहङगी ल़ूहया़ला थार च्य़ूज्येला राहङगी ज़ुबुॱआङ च्यिहम्बा ताङगे। 12यिहॱनाङ ल़ूह ताज्येला ज़्या़क्योगी योक्पुदी फारा ओहङगेन थोङ-लुहङ म़ेहबा ल़ूहया़ला क्युर ज़्या़दी प्रे़हगे, च्यिबेमाना ओ़ह ल़ूहया़ खो राहङदीराङ मिहन। ओहले फारागी ल़ूहया़ला च्योम ओहङगे ओहले फेतोर कोहतोर ताङगे। 13खो ले़गा तेर्ती ज़्या़क्योगी कोहरोवा यिहन्गे सोङगोराङ खोला ल़ूहया़दी च्योल्दो मेहयोहङगे, ओहले खो प्रे़हगे।
14-15 या़हबु कोहरोवा ङाहराङ यिहन। याहपकी ङाहला ओहले ङाहगी याहपला ङोह स्य़ेएँ ल़ेहमुराङ, ङाह राहङगी ल़ूहया़ला ङोह स्य़ेगे ओहले ल़ूहया़गीॱआङ ङाहला ङोह स्य़ेगे। ङाह ल़ूहया़की तेहन्दाला राहङ ज़ुबुराङ तेर्च्येला ठाबे येह। #
मत्ती ११:२७; लूक १०:२२ 16ओहले ङाहती लेहमेन ल़ूहया़ॱआङ येहबा, खुङ दि कोहरेदी मिहन। खुङया़ॱलाङ ङाहगी ख्योङ कोहच्ये येह ओहले खुङया़गी ङाहगी क़े थे़ज्ये येह, ओहले ल़ूह थाम्ज्यी ल़ूह बा़ल च्यी़राङ ओहङज्ये येह। ओहले ङाह खुङया़गी च्यिमे च्यी़राङ कोहरोवा ओहङज्ये येह।
17 ङाहती मिहजी येहपाराङ लो लेहन्गे छ्याप्स्यीगी मार्च्ये ताङग्यो सोङबे याहपगी ङाहला चेवा जे नाङगे। 18सुज्यीगीॱआङ ङाहलेगी ङाहती मिहजी ल़ेहन मी़हखुएँ, यिहॱनाङ ङाहला सेम ने़क्यो सोङबे ङाहती मिहजी चि क्याहप्को येह। ङाहती मिहजी चि क्याहप्केन्गी ओङ ङाह ङ्याम्बु येहबा, ओहले येहपाराङ लो लेहन्गेन्गी ओङॱआङ ङाह ङ्याम्बु येहबा। दि का ङाहती याहप लाहमले ङाहगी ज़्योरक्यो यिहम्बा” म़ेदी येशूगी सुङ नाङसीन। 19दि केच्यागी पेहती येहपाराङ यहूदीया़की पाहरक्यीला ठुक्पा स्योर्सीन। 20खुङया़ नाहङला माहङबुराङगी दि ल़ेहमु माएँराङ येहकें, “दि मिहला ल्हेन्डी स्युहक्यो सोङबे खो ङ्योम्बा काहल्ग्यो दुबा। ख्या दि मिहगी ताम च्यिबे ङ्यिहन्गे?” 21यिहॱनाङ लेहमेनया़गी मासीन, “ल्हेन्डी स्य़ूहक्यो मिहगीनी दि ल़ेहमु ताम मेहमाएँ। च्यि ल्हेन्डी स्युहक्यो मिहगीॱआङ मी़ मेहथोङगेन मिहला थोङ च्य़ू ख़ूएँ ले?”
यहूदी गोबाया़गी येशूला मा-लोक पेहक्यो
22ओहजेला सेर्का दावा येहकें ओहले यरूशलेमला छ्योखाङ राहम्ने फुल्गेन्गी छ्येपा लेप्ते येहकें। 23येशू छ्योखाङ नाहङला सोलोमन माएँगी कोहम्ज्युरला फार छुर फेप नाङगेराङ येहकें। 24ओहले यहूदीया़गी येशूगी कोर ग्यिले जोम्दी मासीन, “ङ्यिहला नाहम थु राहङगी यिहमे-छ्यिमे पेहती ज़्या़ नाङगे? राहङ तेहम्बाराङ मास्यीका यिहन्सीमानानी ङ्यिहला थेका सिरे सुङ नाङदोङ।”
25ओहले येशूगी खुङया़ला सुङ नाङसीन, “ङाहगी तोहङलेराङ ख्याया़ला मा सिहन्दी येह, यिहॱनाङ ख्यागी यिह मे़हछ्ये दु। ङाहगी याहपकी छेनला च्यि च्यि ल़ेहया़ पेहपा, ओ़ह ल़ेहया़गीॱराङ ङाह सु यिहम्बा म़ेदी तेन्गे। 26ख्याया़ ङाहती ल़ूह मिहम्बा सोङबे ख्यागी ङाहला यिह मे़हछ्येगे। 27ङाहती ल़ूहया़गी ङाहगी ताम ङ्यिहन्गे। ङाह खुङया़ला ङोह स्य़ेएँ ओहले खुङया़ ङाहती तिङदा तिङ ओहङगे। 28ङाह खुङया़ला था़ म़ेहबागी मिहली ज़ाङबु तेर्कें। ओहले खुङया़ नाहमॱआङ तोङदी डोज्ये म़ेह, ओहले सुज्यीगीॱआङ खुङया़ला ङाह लाहक्पाले फ्रो़दी ख्येर ख़ूज्ये म़ेह। 29खुङया़ला ङाह लाहक्पाला चि क्याप नाङगेन ङाहगी याहप थाम्ज्यी म़ेदी चा़ छ्यिम्बु ज़्य़ू नाङदी येह ओहले ङाहती याहपकी छ्या़लेनी तोहरोङ खुङया़ला सुज्यीगीॱआङ फ्रो़ ख़ूज्ये म़ेह। 30याहप दाङ ङाह च्यी़राङ यिहन।”
31ओहले येहपाराङ यहूदीया़गी येशूला क्याहप्च्ये म़ेदी तोह तुहसीन। 32यिहॱनाङ येशूगी खुङया़ला सुङ नाङसीन, “याहपगी कुल नाङग्योकी या़हबु ल़ेहया़ माहङबुराङ ङाहगी ख्याया़गी दिनला पेहती तेन्सीन, ओहजे नाहङला का़हन्दी ल़ेहगी तेहन्दाला ख्यागी ङाहला तोहगी क्याहप्च्ये छोल्ग्यो?” 33यहूदीया़गी येशूला मासीन, “या़हबु ल़ेहगी तेहन्दाला ङ्यिह ख्येला तोहगी मेहक्याहप, यिहॱनाङ ख्येगी किन्ज्योला स्ये़हन्डील पेहक्यो सोङबे, च्यिबेमाना ख्ये मिह यिहन्देॱआङ राहङला किन्ज्यो यिहन म़ेदी माउ दु।”#लेवी २४:१६
34ओहले येशूगी खुङया़ला ल़ेहन क्याहप नाङसीन, “च्यि ख्याया़गी छ्य़े-ठिमला दि ल़ेहमु प्री़हदी म़ेहबा, ‘ख्या ल्हाया़ यिहम्बा?’#भज ८२:६ 35किन्ज्योगी देला सु ङ्याम्बु स्याहल सुङ नाङबा, खुङया़ला किन्ज्योगी ल्हाया़ म़ेदी सुङ नाङसीन मासीमाना (सुङरापला प्रुहक्योगी किन्ज्योगी स्याहल नाहम्माॱनाङ तेहम्बा-तेहन्सुमराङ ओहङगे।)
36 याहपगी नाम्पार-ताहक्पा ज़ो नाङदी जाम्बुलीङला ताङ नाङग्यो मिहगी ‘ङाह किन्ज्योगी स़ेबु यिहम्बा’ म़ेदी माएँमु काह-ठि पेहती किन्ज्योला स्ये़हन्डील पेहक्यो काहल्बा ले? 37का़हलेॱआङ ङाहगी ङाहती याहपकी छ्या़लेया़ पेहक्यो मे़हसीमाना ख्यागी ङाहला यिह मा़हछ्ये। 38ङाहनी याहपकी छ्या़लेया़ पेहको येह। ख्याया़गी ङाहला यिह मेहछ्ये़ॱनाङ ङाहगी पेहक्योकी ल़ेहया़ला यिह छ्य़ेदोङ ओहले ख्याया़गी, ‘याहप ङाह ङ्याम्बु ज़्य़ू नाङदी येह ओहले ङाह याहप ङ्याम्बु येह’ माएँ ताम क्यी़ह ज्योर्च्ये येह ओहले ङोह स्ये़ज्ये येह।” 39खुङया़गी येहपाराङ येशूला ज़ुङज्ये छोल्सीन यिहॱनाङ येशू खुङ यिहन्ज्यु क्यो़दी थेन्दी फेप नाङसीन।
40ओहले येशू येहपाराङॱआङ यर्दन चाङबुकी फार्केन देपला यूहन्नागी तोहङले बप्तिस्मा तेर्केन ग्या़ला फेप नाङसीन, ओहले येशू ओ़हलाराङ ज़्य़ू नाङसीन।#यूह १:२८ 41ओहले मिह माहङबुराङ येशूसाला ओहङसीन। ओहले खुङया़गी मासीन, “यूहन्नागीनी च्यिॱआङ ओङ छ्यिम्बुकी छ्या़लेया़ जे माहनाङ, यिहॱनाङ, खोगी येशूगी तेहन्दाला सुङ नाङग्योकी स्याहलया़ थाम्ज्यीराङ तेहन्दा डुप्सीन।” 42ओहले ओ़ह ग्या़गी मिह माहङबुगीराङ येशू थो़ला यिह छ्य़ेसीन।
Currently Selected:
यूहन्ना 10: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
