ल़ेह-पेन 7
7
स्तिफनासगी छो़बा छ्यिम्बुगी मिहया़ला लोप्क्यो
1ओहले पूजाहारी गो-छ्येवागी, “दि ख्येला क्येन ता़क्यो ताम तेहम्बाराङ यिहम्बा?” म़ेदी टी़हसीन।
2ओहले स्तिफनासगी ल़ेहन क्याहप्ती मासीन, “ए आदा-नो़ह दाङ आबाया़, ङाहगी माक्योगी ताम या़हबु पेहती सेन नाङदोङ! ङ्यिहगी चावा अब्राहाम हारान माएँ ग्या़ला तेहके म़ेदी तोहङले मेसोपोटामिया क्याहल-खापला ज़्य़ू नाङगेमु ज़िज्यिदगी किन्ज्योगी खोला ज्याल्गा नाङदी येहकें।#उत १२:१ 3ओहले अब्राहामला किन्ज्योगी, ‘ख्ये राहङगी क्याहल-खाप दाङ ङ्येहवाया़ क्युर ज़्या़दी ङाहगी तेन्गेन्गी क्याहल-खापला सोङ!’ म़ेदी सुङ नाङग्यो येहकें। 4ओ़ह सोङबे अब्राहाम कल्दीया़गी क्याहल-खापलेगी थेन्दी हारान माएँ ग्या़ला काहल्दी तेहसीन। ओहले अब्राहामगी आबा स्यिदी तिङले किन्ज्योगी खोला ख्या फ़ेबेॱया ताहन्दा ज़्य़ू नाङग्योकी दि क्याहल-खापलाॱराङ नोम फेप नाङसीन।#उत ११:३१; उत १२:४ 5ओ़ह ती़हजीला किन्ज्योगी अब्राहामला ओ़ह क्याहल-खापला राहङगी काङबा पा़सा ग्या़ च्यी़ॱआङ माहनाङ। यिहॱनाङ किन्ज्योगी ‘दि क्याहल-खाप ख्ये दाङ ख्येगी छार्क्यीनया़ला तेर्कें’ सुङदी ताहम्ज्या ज़्या़ नाङसीन। दि ताहम्ज्या ज़्या़ नाङगेमु अब्राहामकी पुह पोहमोराङ म़ेहबा येहकें।#उत १२:७; १३:१५; १५:१८; १७:८ 6ओहले येहपाराङ किन्ज्योगी अब्राहामला दि रोहवा सुङ नाङसीन, ‘ख्येगी छार्क्यीनया़ मिह क्याहल-खापला काहल्दी तेह कोहज्ये येह, ओहले ओ़ह क्याहल-खापगी मिहया़गी खुङला लाबु ज़ोसीम्बाराङ लोह ज्य़िप्क्या थु ज्यिबुराङ तुहक्पु तेर्च्ये येह।#उत १५:१३,१४ 7किन्ज्योगी सुङ नाङसीन यिहॱनाङ खुङला का़हन्दी क्यिहपागी लाबु ज़ोएँ ङाह ओ़ह क्यिहपाला ठिम ताङज्ये येह। ओ़ह तिङले खुङ थेन्दी ओहङदी दि ग्या़लाराङ ङाहला छ्येपा फुल्ज्ये येह।’#प्रस ३:१२
8ओहले किन्ज्योगी अब्राहाम ङ्याम्बु ताहम्ज्या ज़्या़ नाङसीन, ओहले अब्राहाम इसहाककी आबा काहल्सीन ओहले स्याहक्पु क्य़ेहला इसहाकती स्या-ताक पेहसीन। इसहाक याकूबगी आबा काहल्सीन ओहले याकूब, छाङ च्यिङ्यी़गी आबा काहल्सीन।#उत १७:१०-१४; उत २१:२-४; उत २५:२६; उत २९:३१–३५:१८
9याकूबकी पुह योसेफला लेहमेन आदा-नो़हया़गी ठादो पेहती खोला मिश्र क्याहल-खापगी मिहया़गी लाहक्पाला चोङसीन ओहले खुङया़गी खोला लाबु ज़ोसीन। यिहॱनाङ किन्ज्यो खो ङ्याम्बु ज़्य़ू नाङदी येहकें।#उत ३७:११; उत ३७:२८; उत ३९:२,२१ 10किन्ज्योगी खोला तुहक्पु थाम्ज्यीलेगी खा फे़ नाङदी खोला मिश्र क्याहल-खापगी क्याहल्बु फारोगी दिनला थुज्यी ज़ी़ नाङसीन ओहले रिहक्पा छ्यिम्बु नाङसीन। ओहले फारोगी खोला मिश्र क्याहल-खाप दाङ खो खाङबागी स्युहङ-पेन छ्यिम्बु ज़ोसीन।#उत ४१:३९-४१
11ओ़ह तिङला मिश्र क्याहल-खाप दाङ कनान क्याहल-खापला मुहयी क्याहप्ती मिह थाम्ज्यीगी ज्यिबुराङ तुहक्पु ङ्युहङसीन। ङ्यिहगी चावाया़ला डु माहन्ज्योर। #उत ४२:१,२ 12ओहले मिश्र क्याहल-खापला डु येहबा माएँ ताम थे़दी याकूबगी राहङगी पुहया़ला तोहङस्यो पा़लो ओ़ह क्याहल-खापला ताङसीन। 13ओहले खुङ तिङमा पा़लो डु ङ्योह डोएँमु योसेफगी राहङगी आदा-नो़हया़ला ङाह योसेफ यिहम्बा म़ेदी ङोह स्य़े च्य़ूसीन। ओ़ह ती़हजीला फारोगी योसेफकी खाङबा मे़हमेया़गी तेहन्दाला क्यी़ह ज्योर्सीन।#उत ४५:१; उत ४५:१६ 14ओहले योसेफगी राहङगी आबा याकूबला, ‘खाङबा म़ेहमे थाम्ज्यीराङ ख्योङदी मिश्र क्याहल-खापला फेप नाङदोङ’ म़ेदी लेहङगु ताङसीन। ओ़ह सोङबे याकूब राहङगी खाङबा म़ेहमे तिहन-ङा ख्योङदी मिश्र क्याहल-खापला ओहङसीन।#उत ४५:९,१०,१७,१८; उत ४६:२७ 15याकूब मिश्र क्याहल-खापला काहल्सीन, ओहले ओ़हला खो स्यिसीन, ओहले ओहराङगी चावाया़ॱआङ ओ़ह क्याहल-खापलाॱराङ स्यिसीन।#उत ४६:१-७; उत ४९:३३ 16ओहले खुङया़गी फुङबु शकेम माएँ ग्या़ला ख्येर्ती तो़हसीन। ओ़ह स्यिहङदी अब्राहामगी हमोरकी पुहया़ ङ्याम्बु ङ्योहक्यो येहकें।#उत २३:३-१६; ३३:१९; ५०:७-१३; यहो २४:३२
17किन्ज्योगी अब्राहाम ङ्याम्बु ज़्या़ नाङग्योकी ताहम्ज्या तेहन्दा डुप्केन ती़हजी पोहला लेप्च्ये पेहती येहकें। ओहजेला इस्राएली मिहया़गी टाहङजी मिश्र क्याहल-खापला ज्यिबुराङ फेल्दी माहङबु काहल सिहन्ग्यो येहकें।#प्रस १:७,८ 18ओ़ह ती़हजीला मिश्र क्याहल-खापला योसेफगी तेहन्दाला ङोह मे़हस्येएँगी लेहमेन क्याहल्बु च्यी़गी ओङ छ्य़ेज्ये छ़ूसीन। 19खोगी ङ्यिहगी चावाया़ला टा़ह पेहती खुङया़ला ज्यिबुराङ तुहक्पु तेर्सीन। खोगी इस्राएलीया़की पेहजाया़ला स्यिज्यु म़ेदी क्ये-लुहङ मे़हबाराङ ज्यिबुराङ उर्चु पेहती खाङबाले फिला क्युर-च्युउ येहकें।#प्रस १:१०,११; प्रस १:२२
20ओ़ह ती़हजीलाराङ मोशा क्येसीन। ओहले खो किन्ज्योगी ज़ी़लुला ज्यिबुराङ या़हबु येहकें। खोगी आबा-आमागी खोला दावा सुम थु खाङबालाराङ पे़हदी सोसीन।#प्रस २:२ 21यिहॱनाङ तिङले, पे़हदी ज़्या़ मा़हखुबाराङ खाङबा फिला तेन्दी ज़्या़सीन ओहजेला फारोगी पोहमोगी खोला ख्येर्ती राहङगी पुह जे़दे सोसीन।#प्रस २:३-१० 22खोला मिश्रीया़गी येहन्देनगी थाम्ज्यी लोप्च्युङ लोप तेर्को येहकें, ओहले मोशा खो राहङगी ताम मालु दाङ ल़ेहया़ला ख़ेबा काहल्सीन।
23मोशा लोह ज़्यिप-च्यु काहल फान्ज्यो खोगी राहङगी क्यिहपा इस्राएली आदा-नो़हया़ला थू़ज्ये सेम पेहसीन।#प्रस २:११-१५ 24ङ्यिहमा च्यी़ मोशागी मिश्री मिह च्यी़गी इस्राएली मिह च्यी़ला तुहङ तेहक्यो थोङसीन। ओहले खोगी इस्राएली मिहला थार च्य़ूसीन ओहले क्यिम्बा लेहन्दे मिश्रीला सेसीन। 25किन्ज्योगी मोशा लाहमलेॱराङ इस्राएली आदा-नो़हया़ला टोहल च्य़ू नाङज्ये येह म़ेदी राहङगी मिहया़गीराङ ङोह स्य़ेगेनी म़ेदी मोशागी साम्लु ताङदे येहकें। यिहॱनाङ खुङया़गी दि ताम ङोह मा़हस्ये।
26नाहङबार च्युङ मोशागी इस्राएली मिह ङ्यी़ खुङ राहङ नाहङदोङराङ जिङदी तेहक्यो थोङसीन। ओहले खोगी, ‘ख्याया़नी आदा-नो़ह यिहन्देॱआङ च्यिबे ख्या राहङ नाहङदुङ दि ल़ेहमु पेहती ठ़ूस्यी पेह तेहके?’ म़ेदी खुङ ङ्यी़ला थिन च्य़ूज्ये छोल्सीन। 27ओहले राहङगी ख्यिम्जीला ङ्येन्ज्येन पेहकें इस्राएली च्यी़गी मोशाला दि ल़ेहमु म़ेदी फुल्ज्या क्याहप्सीन ‘ङ्यिह थो़ला स्युहङ-पेन पेहच्ये दाङ ठिम ताङज्येला ख्येला सुगी ताङबा? 28दाङ ओ़ह मिश्रीला सेक्यो ल़ेहमुराङ ङाहॱलाङ सेच्ये छोल्गे?’ 29दि ताम थ़े फान्ज्यो मोशा मिश्र क्याहल-खापले प्रे़हदी मिद्यान माएँ क्याहल-खापला काहल्दी तेहसीन।#प्रस १८:३,४
30मिद्यान क्याहल-खापला लेप्ते लोह ज़्यिप-च्यु डोएँमु मोशागी सीनै लाहगी रिह-काम्बुला म़ेह ती़ह तेहक्यो चेहरेप नाहङला स्यिहङगामकी स्याहप्च्यी च्यी़ थोङसीन।#प्रस ३:१-१० 31ओहले मोशा ह्अ ल़ेहदी या़हबु पेहती ता डोएँमु खोगी चो़वो छ्येवागी दि ल़ेहमु सुङ-क़े थ़ेसीन, 32‘ङाह ख्येगी चावा अब्राहाम, इसहाक दाङ याकूबकी किन्ज्यो यिहम्बा।’ ओहजेला मोशा ज्यी़दी ल्होक-ल्होक दार्ती ताॱराङ मा़हखु। 33ओहले चो़वो छ्येवागी सुङ नाङसीन, ‘ख्येगी लेकाम पितोङ, ख्येगी काङबा पा़दे तेहक्योगी ग्या़ ज्यिबुराङ नाम्पार-ताहक्पा येह। 34ओहले मिश्र क्याहल-खापला ङाहगी मिहया़ला ङ्येन्ज्येन पेहती तुहक्पु तेरक्योदी ङाहगी थोङसीन, ओहले खुङया़गी फे़रा तेन्दी ङुहप्रा तिहङरा पेहक्यो ङाहगी थ़ेसीन। ङाह खुङया़ला थार च्य़ूज्येला ओहङग्यो यिहम्बा। ता़ह दि ल़ेह पेहच्येला ङाहगी ख्येला मिश्र क्याहल-खापला लो़ ताङज्ये येह।’
35ओ़ह मोशाराङ यिहन, खोला राहङ क्यिहपागीॱराङ दि ल़ेहमु म़ेदी चा़ माहबेबा येहकें, ‘सुगी ख्येला ङ्यिह थो़ला स्युहङ-पेन पेहच्ये दाङ ठिम ताङज्येला ताङबा?’ म़ेदी माक्यो येहकें, यिहॱनाङ मेह ती़ह तेहक्यो चेहरेप नाहङला खो ङ्याम्बु स्यिहङगामकी स्याहप्च्यी लाहमले किन्ज्योगी स्याहल सुङ नाङसीन ओहले मिहरोगीॱराङ इस्राएलीया़ला थार च्य़ूज्येला ओहले खुङया़गी थो़ला गोबा ज़ोज्येला ताङ नाङसीन।#प्रस २:१४ 36ओहले मोशागीराङ इस्राएलीया़ला मिश्र क्याहल-खापले तेन्सीन ओहले किन्ज्योगी ताहम्ज्या ज़्या़ नाङग्योकी क्याहल-खापला डोएँमु मिश्र क्याहल-खापला, माहर्मु छो-क्याहम्जो दाङ रिह काम्बुया़ला खोगी याहम्जेम्बागी ल़ेह दाङ ताक्छेनया़ तेन्सीन।#प्रस ७:३; प्रस १४:२१; गन्ती १४:३३ 37ओ़ह मोशागीराङ इस्राएलीया़ला, ‘किन्ज्योगी ख्याराङ आदा-नो़हया़गी पाहरक्यीले ङाह ल़ेहमुराङ लुहङतेम्बा च्यी़ ख्याया़साला ताङ नाङज्ये येह’ म़ेदी मासीन।#व्य १८:१५,१८ 38ओहले इस्राएलीया़ सीनै लाहगी चो़ला येहकेन्गी रिह-काम्बुला छो़दी तेहक्यो ती़हजीला मोशा खुङ ङ्याम्बुराङ येहकें। स्यिहङगामकी स्याहप्च्यीगी सीनै लाहला मोशा ङ्याम्बु स्याहल सुङ नाङगो येहकें ओहले स्यिहङगामकी स्याहप्च्यीगी सुङग्योगी स्याहल खोगी इस्राएलीया़ला स्येको येहकें।#प्रस १९:१–२०:१७; व्य ५:१-३३
39यिहॱनाङ ओहराङगी आख्ये मे़हमेया़गी मोशागी माक्योगी तामला ङ्यिहन्दी माहबे। ओहले खुङया़ मोशाला क्युर ज़्या़दी मिश्र क्याहल-खापलाॱराङ लो़ह डोज्ये सेम पेहसीन। 40ओहले खुङया़गी मोशागी आदा हारूनला दि ल़ेहमु मासीन, ‘ता़ह ङ्यिहगी तोहङ-तोहङ डोज्येला ङ्यिहगी तेहन्दाला ल्हाया़ ज़ो नाङदोङ, च्यिबेमाना ङ्यिहला मिश्र क्याहल-खापले तेन्दी ख्योङगे मोशाला च्यि काहल्बा ओ़ह ङ्यिहला क्यी़ह म़ेह।’#प्रस ३२:१
41ओहले खुङया़गी पिहउ पी़हरुगी कु च्यी़ जे़दी ओ़हला मार्च्ये ताङसीन, ओहले खुङगी लाहक्पागी ज़ोक्योगी ल़ेहला क़ेहनाङ पेहसीन।#प्रस ३२:२-६ 42ओ़ह सोङबे किन्ज्योगी खुङया़ला नाम्दो जे नाङसीन, नामगी कार्माया़ला छ्येपा फुल्ज्यु म़ेदी खुङया़ला ल़े ताङसीन। दिगी तेहन्दाला सुङरापला लुहङतेम्बाया़गी दि ल़ेहमु म़ेदी प्री़हदी येहबा–
‘ए इस्राएली क्यिहपागी मिहया़!, ख्यागी रिह-काम्बुला लोह ज़्यिप-च्यु थु
मार्च्ये दाङ छ्येपा फुल्सीन, ओ़हदीनी ङाहला फुल्ग्यो मिहम्बा।#आमो ५:२५-२७
43ख्याया़गी मोलोख माएँ ल्हागी पा़ल दाङ
रेफेन ल्हा माएँ कार्मागी कुला छ्येपा फुल्ज्येला ख्येर्ती काहल्सीन।
ओ़ह कुया़ थाम्ज्यीराङ ख्या राहङगीराङ ज़ोक्यो येहकें।
ओ़ह सोङबे ङाहगी ख्याया़ला ङ्य़ेहबा काल्ज्येला
बेबिलोन क्याहल-खापगी फार्केन देपला ताङ चाहङज्ये येह।’ म़ेदी किन्ज्योगी सुङ नाङसीन।
44ओ़ह रिह-काम्बुला ओहराङगी आख्ये मे़हमेया़ ङ्याम्बु पाङबुगी पा़ल येहकें। मोशागी ओ़ह पा़ल किन्ज्योगी सुङ नाङग्यो ल़ेहमुराङ जे़दे येहकें।#प्रस २५:९,४० 45ओहले किन्ज्योगी ओ़ह रिह-काम्बुला तेहकेन्गी राहङसा क्यिहपागी मिहया़ला ङे चाहङ नाङसीन ओहले यहोशूगी ओ़ह क्याहल-खाप क्याहल्गेमु यहूदीया़गी ओ़ह पा़लॱआङ ङ्याम्बुराङ ख्योङदी ओहङसीन। ओ़ह तिङले क्याहल्बु दाऊदगी पा़लो थु ओ़ह पा़ल खुङया़ ङ्याम्बुराङ येहकें।#यहो ३:१४-१७ 46किन्ज्योगी क्याहल्बु दाऊदला थुज्यी ज़ी़ नाङगो येहकें। ओहले दाऊदगी याकूबकी किन्ज्योला, ‘राहङगी तेहन्दाला ज़्य़ूसा ग्या़ च्यी़ ज़ोज्ये’ म़ेदी स्युहसीन।#२ शमू ७:१-१६; १ लुहक १७:१-१४ 47यिहॱनाङ किन्ज्योगी तेहन्दाला ज़्य़ूसा ग्या़दी सोलोमनगी ज़ोसीन।#१ राज ६:१,३८; २ लुहक ३:१-१७
48यिहॱनाङ, चा़ छ्यिम्बु किन्ज्यो मिहगी ज़ोक्योगी छ्योखाङला ज़्य़ू मेहनाङगे। दिगी तेहन्दाला लुहङतेम्बागी दि ल़ेहमु सुङ नाङदी येह,
49‘स्यिहङगाम ङाहगी ॱठि यिहम्बा,
जाम्बुलीङ ङाहगी काङबा ज़्या़सा ग्या़ यिहम्बा।
ख्यागी ङाहगी तेहन्दाला काहन्डुमु छ्योखाङ ज़ोएँ यिहम्बा?
ङाहगी थाङ सोएँ ग्या़ का़हला येहबा?#यशै ६६:१,२
50च्यि दि थाम्ज्यीराङ ङाहगी ज़ोक्यो मिहम्बा ले?’
51राहङ फे़बेया़गी सेम राहङसा क्यिहपाया़दी ल़ेहमुराङ सेम सान्दी काहल्सीन दु, राहङ फ़ेबेॱया किन्ज्योगी सुङदेन ङ्यिहन्ज्येला सेम जे मेहनाङ दु। राहङगी आख्ये मे़हमेया़गी ल़ेहमुराङ राहङ फे़बेया़गीॱआङ नाम्पार-ताहक्पा थुगी तेन नाङग्योकी स्याहलला नाहमॱआङ ची़ मेहनाङ दु।#यशै ६३:१० 52च्यि राहङ फे़बेया़गी आख्ये मे़हमेया़गी तुहक्पु माहतेर्पा सुज्यीॱआङ लुहङतेम्बा येहबा ले? किन्ज्योगी नाम्पार-ताहक्पा स्याहप्च्यी फेप्केराङ येह म़ेदी लेहङगु स्येकें लुहङतेम्बाया़ॱलाङ खुङया़गी सेसीन। राहङ फ़ेबेॱयागीदी फेप नाङग्योकी नाम्पार-ताहक्पा स्याहप्च्यीॱलाङ क्येन ता़दी से नाङसीन। 53स्यिहङगामकी स्याहप्च्यीया़गी नाङग्योकी छ्य़े-ठिम राहङ फे़बेया़गी ज्योर्सीन, यिहॱनाङ ओ़ह छ्य़े-ठिम राहङ फे़बेया़गी ची़ माहनाङ!”
स्तिफनासला तोह क्याहप्ती सेक्यो
54स्तिफनासकी ताम थे़दी छो़बा छ्यिम्बुला तेहक्योगी मिहया़ ज्यिबुराङ स्यिहताङ लाहङसीन ओहले स्यिहताङगी सो मुहर्सीन। 55यिहॱनाङ स्तिफनास नाम्पार-ताहक्पा थुगी काहङदे स्यिहङगाम ङो़ले त़ेदी तेहसीन। ओहजेला स्तिफनासगी किन्ज्योगी ज़िज्यिद दाङ येशूला किन्ज्योगी योबा ङो़ले ज़्याङदी ज़्य़ूक्यो थोङसीन। 56ओहले खोगी मासीन, “त़ेदोङ, ङाहगी स्यिहङगाम खा फे़क्यो थोङसीन, ओहले मिहगी स़ेबुला किन्ज्योगी योबा ङो़ले ज़्याङदी ज़्य़ूक्यो थोङसीन।” 57ओहजेला खुङया़गी क़े छ्यिम्बु तेन्दी राहङ-राहङगी नाम्ज्यो का़सीन ओहले खुङ थाम्ज्यीराङ स्तिफनास थो़ला च्योम काहल्सीन। 58खुङया़गी स्तिफनासला तोहगी क्याहप्ती सेच्येला क्याहसा यिहन्ज्यु टिहते फिला ख्येर्ती। ओहले पाङबु तेहकेया़गी राहङगी चुङगा पित्ते शाऊल मिहन थो़क्यो स्यारा च्यी़गी काङबा पोहला ज़्या़सीन। 59खुङया़गी तोह क्याहप्केनराङ येहकें, ओहजेला स्तिफनासगी चो़वो छ्येवा ङ्याम्बु दि ल़ेहमु म़ेदी सोल्वाङ ताप्सीन, “ओ़ चो़वो छ्येवा येशू, ङाहगी यिहला ल़ेहन नाङदोङ।” 60ओ़ह तिङले खोगी पी़मु च़ूदी क़े छ्यिम्बु च्यी़ तेन्दी मासीन, “ओ़ह चो़वो छ्येवा, दि तिहक्पागी ङ्य़ेहबा खुङया़ला माह फो़ज्यु!” देजे म़ेदी खो स्यिसीन।
Currently Selected:
ल़ेह-पेन 7: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
