ल़ेह-पेन 10
10
कर्नेलियसगी पत्रुसला क़े क्याहप्क्यो
1कैसरिया क्याहसाला कर्नेलियस मिहन थो़क्यो मेहन्दा च्यी़ तेहको येहकें। खो रोमी माक्मीया़गी इटालियान माएँ पल्टनगी माक्पेन यिहन्गे। 2खो दाङ खोगी म़ेहमे थाम्ज्यीगीराङ किन्ज्योला म़ेहबा पेहती किन्ज्योगी ज्यिक्पाला तेहको येहकें। कर्नेलियसगी प्राङबु मिहया़ला सेम काहसो पेहती रो़हराम पेहको येहकें ओहले खो नाहम-माना किन्ज्योला सोल्वाङ ताप्को येहकें।
3ङ्यिहमा च्यी़ कुहङॱसे छ्युजी सुमजेला स्यिहङगामकी स्याहप्च्यी च्यी़गी कर्नेलियसला ज्याल्गा नाङसीन। च्यि काहल दु माना, कर्नेलियसगी स्यिहङगामकी स्याहप्च्यी च्यी़ राहङ तेहक्यो ग्या़ला फेप्कें थोङसीन, ओहले स्यिहङगामकी स्याहप्च्यीगी, “ए कर्नेलियस!” म़ेदी सुङ नाङसीन। 4ओहले खो ज्यिबुराङ ज्यी़दी स्यिहङगामकी स्याहप्च्यीला या़हबु पेहती त़ेदी मासीन, “चो़वो छ्येवा सुङ नाङदोङ।” ओहले स्यिहङगामकी स्याहप्च्यीगी सुङ नाङसीन, “ख्येगी ताप्क्योगी सोल्वाङ दाङ प्राङबु मिहया़ला राहङगी सेम काहसो पेहती रो़हराम पेहक्योदी किन्ज्योगी ज़ी़ नाङदी येह। 5ता़ह ख्येगी मिहया़ला योप्पा क्याहसाला ओहङग्योगी सिमोन-पत्रुसला क़े क्याहप्च्येला ताङदोङ। 6खो को़बाकी ल़ेह पेहकें सिमोनगी खाङबाला तेहती येहबा, ओ़ह खाङबा छो-क्याहम्जोकी सुहरला येहबा” म़ेदी स्यिहङगामकी स्याहप्च्यीगी सुङ नाङसीन। 7स्यिहङगामकी स्याहप्च्यी फेप फान्ज्यो कर्नेलियसगी राहङसाला ल़ेह पेहकेन्गी योक्पु ङ्यी़ दाङ माक्मी च्यी़ला क़े क्याहप्सीन। ओ़ह माक्मीगी नाहम-माना कर्नेलियसला स्याहप्तो स्युहउ येहकें, ओहले खोॱआङ छ्य़ेसेम पेहकेन्गी मिह यिहन्गे। 8ओहले कर्नेलियसगी राहङगी थोङग्योकी ताम थाम्ज्यीराङ स्येसीम्बाराङ खुङ सुमला योप्पा क्याहसाला ताङसीन।
9तिङमा ङ्यिहमु तोसाले फार खुङ योप्पा क्याहसाकी पोहला लेप्सीन। ओहजे काहङला पत्रुस सोल्वाङ ताप्च्ये म़ेदी खाङबा तेङ थो़ला#१०:९ खाङबा तेङ थो़ला : ओहजे ती़हजीला इस्राएलीया़दी खाङबाकी छतदी थोकी परला तेन्ग्यो ल़ेहमु ओहङगो येहकें। काहल्सीन। 10सोल्वाङ ताप-ताप्पा काहङला खो टेहपा तो़सीन, ओहले खोगी च्यि रोहवा साहज्ये से़हया़ साहज्ये सेम पेहसीन। मिहया़गी साहज्ये से़हया़ ठाबे पेहकेनॱराङ येहकें ओहजेला पत्रुस थिनला तेहसीन। 11ओहले खोगी स्यिहङगाम खा फ़ेदी स्यिहङगामले माहर सुहर ज़्यिला ताहम्ग्योगी गार्क्याङ छ्यिम्बु च्यी़ जाम्बुलीङ ङो़ले चाहर तेहक्यो थोङसीन। 12ओ़ह गार्क्याङला जाम्बुलीङगी नामे-नाजो रिहदाया़, साला स्युहर्ती डोएँगी सेम्ज्येनया़ दाङ च्याह-च्यिहवाया़ थोङसीन। 13ओहले खोगी दि ल़ेहमु क़े च्यी़ थ़ेसीन, “ए पत्रुस ख्ये लाहङदोङ, ओहले ओ़हया़ला सेत्ती सोह।” 14ओहले पत्रुसगी मासीन, “मिहम्बा चो़वो छ्येवा, च्यिबेमाना ङाहगी नाहमॱआङ टाहङबु म़ेहबा दाङ मेहचाङा से़हया़ से़दी म़ेह!” 15ओहले येहपाराङ पत्रुसगी दि रोहवा क़े च्यी़ थ़ेसीन, “किन्ज्योगी चाङमा ज़ो नाङग्योकी से़हया़ला ख्येगी चाङमा म़ेह म़ेदी साम्लु माहताङ।” 16लेहमा सुम थु ओ़हठीॱराङ काहल्सीन, ओ़ह तिङले ओ़ह गार्क्याङ स्यिहङगाम ङो़लेराङ लो़ह काहल्सीन।
17पत्रुस राहङगी थोङग्यो से़हगी तेहन्दा ङोह मा़हस्येबा सोङबे खो थामा थोमे काहल्सीन। ओ़हजेलाराङ कर्नेलियसगी ताङग्योगी मिहया़ सिमोनगी खाङबा छोल्गेराङ कोह दिनला लेप्सीन। 18ओहले खुङया़गी क़े क्याहप्ती “देला सिमोन माएँ पत्रुस मिह स्युह नाङदी येहबा?” म़ेदी टी़हसीन। 19ओहजेला पत्रुस राहङगी थोङग्योकी ज्याल्गा साम्लु ताङगेराङ येहकें, ओहले नाम्पार-ताहक्पा थुगी खोला सुङ नाङसीन, “त़ेदोङ, मिह सुमगी ख्येला छोल्गेराङ येहबा। 20लाहङदोङ ओहले ख्ये माहर चो़ला सोङ, ओहले सेमला यिहन्जे मिहन्जे मा़हनेबा पेहती ख्ये खुङ ङ्याम्बुराङ सोङ च्यिबेमाना खुङला ङाहगी ताङग्यो यिहम्बा।” 21ओहले पत्रुस माहर चो़ला फाप्ते ओ़ह मिहया़ला मासीन, “राहङ फे़बेया़गी छोल नाङग्योकी मिह ङाहराङ यिहम्बा। च्यिबे राहङ फ़ेबेॱया देला फेप नाङग्यो यिहम्बा?” 22ओहले खुङगी मासीन, “माक्पेन कर्नेलियसगी ङ्यिहला ताङ नाङग्यो यिहम्बा। खो टाहङबु पेहकेन दाङ किन्ज्योगी ज्यिक्पा खुर्केन्गी मिह यिहम्बा, ओहले यहूदी क्यिहपागी मिहया़गीॱआङ खोला ची़नाङ पेहकें। नाम्पार-ताहक्पा स्यिहङगामकी स्याहप्च्यी च्यी़ खोसाला लेप्सीम्बाराङ ‘पत्रुसला राहङगी खाङबाला क़े क्याहप्ती खोगी ताम ङ्यिहन्दोङ’ म़ेदी म़े ज़्या़सीन दुबा। ओ़ह सोङगोराङ ङ्यिहगी क़े क्याहप ओहङग्यो” म़ेदी कर्नेलियसगी ताङग्यो मिहया़गी मासीन।
23दि ताम थे़दी पत्रुसगी खुङया़ला नाहङला क़े क्याहप्ती डोम्बो क्योङसीन। ओहले नाहङबार च्युङ पत्रुस लाहङदी खुङ फ़ेबेॱया ङ्याम्बुराङ काहल्सीन। ओहजेला योप्पा लुहङबाला चो़वो छ्येवाला यिह-छ्य़े पेहक्यो लाहला आदा नो़हया़ॱआङ खुङ फ़ेबेॱया ङ्याम्बुराङ काहल्सीन।
24तिङमा ङ्यिहमा खुङ फ़ेबेॱया कैसरिया क्याहसाला लेप्सीन। कर्नेलियसगी राहङगी ङ्येन्जेन-ङ्येहवाया़ दाङ रो़हया़ला क़े क्याहप्ती पत्रुस ओहङगेन्गी लाहम ते़ तेहसीन। 25ओहले पत्रुस कर्नेलियसगी खाङबाला लेप्ते नाहङला स्य़ूहसीन ओहजेला कर्नेलियसगी पत्रुसगी स्याहपला ज्याल्दी त़ेरा फुल्सीन। 26ओहले पत्रुसगी, “लाहङदोङ, ङाहॱआङ मिहराङ यिहम्बा!” म़ेदी कर्नेलियसला लाङसीन। 27ओहले कर्नेलियस ङ्याम्बु ताम म़ेदी नाहङला स्य़ूहगेमु पत्रुसगी खाङबा नाहङला मिह माहङबुराङ जोम्दी तेहक्यो थोङसीन। 28ओहले पत्रुसगी खुङया़ला मासीन, “लेहमेन क्यिहपागी मिहया़ ङ्याम्बु च्याम्दे खुङया़ ङ्याम्बु छो़दी तेहच्येला ङ्यिह यहूदीया़ला ङ्यिहगी छ्य़े-ठिमगी मेहतेर्कें माएँ ताम राहङ फे़बेया़ला थुयी़राङ येहबा, यिहॱनाङ किन्ज्योगी ङाहला सु मिहॱलाङ ख्ये मेहचाङा म़ेदी माज्ये मेहयोहङगे माएँ स्याहल सुङ नाङदी येह। 29ओहले ख्या फे़बेया़गी ङाहला क़े क्याहप ओहङगेमु ङाहगी यिहन्जे मिहन्जे च्यिॱआङ मा़हनेबा पेहती ङाह ख्या फे़बेया़साला ओहङसीन। ता़ह सुङ नाङदोङ, ङाहला च्यिबे क़े क्याहप नाङग्यो?” म़ेदी मासीन।
30ओहले कर्नेलियसगी मासीन, “ङ्यिहमा च्यी़ तोहङगी ताम यिहम्बा। ङ्यिहमा छ्युजी सुमजेला ङाह दि खाङबालाराङ सोल्वाङ ताप तेहती येहकें। ओहजेला याहङमे-याहङराङ येहपा छ्याएँ नाहम्सा कार्पु नोम्ग्यो मेहन्दा च्यी़ ङाहगी दिनला ज़्याङदी 31सुङ नाङसीन, ‘ए कर्नेलियस, किन्ज्योगी ख्येगी सोल्वाङ सेन नाङदी येह ओहले ख्येगी प्राङबुया़ला पेहक्योगी रो़हराम ज़ी़ नाङदी येह। 32ओ़ह सोङबे योप्पा क्याहसाला मिहया़ ताङदे पत्रुस माएँ सिमोनला क़े क्याहप्च्येला ताङदोङ। खो छो-क्याहम्जोकी सुहरला को़बाकी ल़ेह पेहकें सिमोनगी खाङबाला तेहती येहबा।’ 33ओहले ङाहगी लाहम्साङराङ राहङसाला मिहया़ ताङसीन, ओहले राहङ ओहप्क्याल जेती फेप नाङसीन। ता़ह चो़वो छ्येवागी राहङला का नाङग्योकी थाम्ज्यीराङ स्याहलया़ ङ्यिहन्ज्येला ङ्यिह किन्ज्योगी दिनला जोम्दी येह।”
पत्रुसगी लेहमेन क्यिहपागी मिहया़ला या़हबु लेहङगु स्येक्यो
34ओहले पत्रुसगी ताम माज्ये छ़ूसीन, “दि ताम तेहम्बाराङ यिहम्बा दु किन्ज्योगी सुॱलाङ ङ्येम्बा-ङ्य़ेहरी जे मेहनाङगे।#व्य १०:१७ 35का़हन्दी क्यिहपागी मिह यिहॱनाङ, किन्ज्योगी ज्यिक्पा पेहकें दाङ या़हबु ल़ेह पेहकेनया़ला किन्ज्योगी थुज्यी ज़ी़ नाङगेन। 36किन्ज्योगी इस्राएलीया़ला ताङ नाङग्योकी लेहङगु, येशू मास्यीका लाहमले प्रा साल नाङग्योकी स्य़िहदेगी या़हबु लेहङगु राहङ फे़बेया़ला थुयी़ येह। (मिह-रो़हराङ मिह थाम्ज्यीगी चो़वो छ्येवा यिहम्बा।) 37यूहन्नागी बप्तिस्मागी तेहन्दाला लोप्च्युङ नाङ फान्ज्यो गालील साने़ यिहन्ज्यु छ़ूदी यहूदीया लुहङबा काहङ्येॱराङ काहल्ग्योगी तामया़ राहङ फे़बेया़ला थुयी़राङ येह। 38किन्ज्योगी नासरतगी येशूला राहङगी नाम्पार-ताहक्पा थु दाङ स्युक नाङसीन। ओहले किन्ज्यो येशू ङ्याम्बु ज़्य़ू नाङग्यो सोङबे येशूगी छ्या़ले या़हबुया़ जे नाङसीन। ओहले ती़ह स्युहक्यो मिहया़ला टा़ह च्य़ू नाङगेराङ थाम्ज्यी ग्या़या़ला फेप नाङसीन। 39ओहले येशूगी यहूदीया दाङ यरूशलेम लुहङबाला जे नाङग्योकी थाम्ज्यीराङ तामया़गी पाङबु ङ्यिह येहबा। येशूला खुङया़गी क्याहङस्यीङला च्याङदी सेसीन। 40यिहॱनाङ स्याहक्पु सुम तिङले किन्ज्योगी येशूला टोहङग्यो ग्या़लेगी सोम्बो ज़्याङ च्य़ू नाङसीन ओहले मिहया़गी येशूला येहपाराङ थोङ ङ्युहङसीन। 41मिह थाम्ज्यीगीनी येशूला थोङ माहङ्युहङ, ओहले येशू सोम्बो ज़्याङ नाङ फान्ज्यो ङ्यिह ङ्याम्बुराङ सोल छ्ये नाङसीन, च्यिबेमाना किन्ज्योगी ङ्यिहया़ला दि तामगी पाङबु तेहच्येला तोहङलेराङ दाम नाङग्यो येहकें। 42या़हबु लेहङगु स्येच्ये दाङ किन्ज्योगी येशूला सोम्बो दाङ स्यिक्यो मिहया़ला ठिम ताङज्येला का नाङदी येह म़ेदी पाङबु तेर्च्येला ङ्यिहया़ला का नाङसीन। 43येशूला यिह-छ्य़े पेहकें मिहया़गी येशूगी छेनला तिहक्पा ता़हज्ये येह म़ेदी थाम्ज्यी लुहङतेम्बाया़गी येशूगी तेहन्दाला स्येती येह।”
44पत्रुसगी दि ताम स्येके स्येकेमुॱराङ ङ्यिहन्गे मिह थाम्ज्यी थो़ला नाम्पार-ताहक्पा थु फेप नाङसीन। 45ओहले किन्ज्योगी राहङगी नाम्पार-ताहक्पा थुगी काबाप लेहमेन क्यिहपागी मिहया़ला नाङगेन थोङदी पत्रुस ङ्याम्बु ओहङग्यो, येशूला यिह-छ्य़े पेहकेन यहूदी रो़हया़ ह्अ ल़ेहसीन। 46च्यिबेमाना लेहमेन लेहमेन क्यिहपागी तामया़ ङो़ले खुङया़गी किन्ज्योला त़ेरा तेच्या फुल्ग्यो थ़ेसीन। ओहले पत्रुसगी मासीन, 47ङ्यिहगी ल़ेहमुराङ दिया़गीॱआङ नाम्पार-ताहक्पा थु ज्योर्ती येह। ता़ह दि मिहया़ला छ्युगी बप्तिस्मा लेहन्ज्येला सुगी का़ ख़ूज्ये? 48ओहले पत्रुसगी खुङया़ला येशू मास्यीकाकी छेनला बप्तिस्मा तेर्तोङ म़ेदी का नाङसीन। ओ़ह तिङले खुङया़गी पत्रुसला “ओहर-छ्य़े! ङ्यिहमा तोबा थु ङ्यिह ङ्याम्बुराङ ज़्य़ू नाङदोङ” म़ेदी स्युहसीन।
Currently Selected:
ल़ेह-पेन 10: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
