1 Timote 4

Pool minaag Timote ɗo bi ka gay raadindi

1Ruwwin ta Buŋdi kaaw waraŋ kadar ɗo wiktin ta ba aaro, gee daarin̰ yaa rasin imaanco a ŋuu aaɗe ruwwinnay kuuk raada ho iŋ ɓilde kaak asa min ɗo aariɗnar. 2Gee-ak rasaag gay raadindi jagiig iŋ kaawinco. Gay raadindi-ak kaawa iŋ biŋkico di ho ta aditco gay keetiti. Ŋu ibanno doɓe maan kaak samaane asaan pikirrico nig ar ŋu beesit iŋ hadinne kaak nee dindik buŋ ɗo aki. 3Gee-ak bera ɓilde kaak toɗa obe ka daatir ho kaak toɗa tee daarin̰. Kar gay, Buŋ kilgiyig gamin ku teendi-ak a gee kuuk aamine loci ho kuuk ibingit seeney yaa teen̰co iŋ dele ka barkiner ɗo Buŋdi. 4-5Gamin okin̰co kuuk Buŋ kilgiytu-aŋ, ŋuur samaane. Kaaw ta Buŋdi kaawa a ŋu samaane ho iŋ dele ka barkiner kat gi ooyiig a ŋu samaane. Pa-ak, ginno yoo tee rakki kaak gee yaa pooce. Illa gee yaa delen̰ ja barkin ɗo Buŋdi, kar kat, ŋuu tee.

Gay riyor kaak taɓ ka Iisa Masi

6Gaarig gamin-aŋ ɗo siŋtan̰. Paa kat, kii kuuniye gay riyor kaak taɓ ka Iisa Masi ho kii gaare kadar ki sin̰ja iŋ uŋji ɗo kaawin ku Buŋdi kuuk ki aamintu ho iŋ ɓilde kaak sellen̰ ki aaɗiy iŋ gelbin rakki. 7Dak cokiyenno maliyin kuuk gee imiliy min ɗo kaƴco di ho kuuk arro iŋ imaante. Kar gay, zeeɗu kii goye sellen̰ ɗo uŋji ka Buŋdi. 8Ka seener, taale ka ziŋkar, ŋaar samaane ɗo gamin sooɗ di. Kar waan kaak goyin̰ji gaara kadar ŋa karmiya Buŋ gay, iŋ taar-at ko, ŋa ibiniy kadar ŋa gas goye kaak taɓ diŋka ho neginda oki. 9Kaaw taat nec gee okin̰co yaa obe bombo, taar ko anta : 10ya gi oosa kaƴte ɗo riyor ho gi sila ɗo bi ka imaante, gi giniy ampa-ak asaan gi diy gelbinte iŋ Buŋ kaak goy mento. Ŋa jilaag gee okin̰co, kar gay, illa gee kuuk aamin ja kat yaa gasin̰ jile ŋaar-aka.

11Taar-an kaaw taat kii taaƴguwe gee ho kii ɓildiguwin̰co. 12Waan ke aan̰aacinno ɗo saan taat a ki kapak. Kar gay, illa kii kuuniye gem kaak gee kuuk aamine yaa ice goyin̰ji, elin̰ji, imaanji, *cawirkuwin̰ ho ŋuu kaawe ar kiŋke. 13Kadar ta naa ɓaawe, ber zin̰ ɗo iskindi, ɗo ɓildindi ho ɗo garaan ta Kitamner ɗo uŋco ka gee kuuk aamine. 14Dak rawtin̰jiɗo bere kaak Ruwwin ta Buŋdi beriijiŋ. Maanna-aŋ, ki gasig ɗo wiktin taat nabiinna kaawtu ɗo bi kan̰ji ho agindaw ku *Eglizdi leetu pisin̰co ɗo kaan̰. 15Ginig gamin-aŋ okin̰co ɗo botilco, ber zin̰ okin̰ji ɗo riy-anta. Ansi-ak, gee okin̰co yaa tale kadar ki sin̰ja iŋ uŋji. 16Ob zin̰ ho pakar ɗo ɓildin̰ji. Dak rasin̰coɗo bat. Ansii kat, Buŋ yaan̰ jile kiŋke iŋ kuuk cokiyaaciŋ oki.

Currently Selected:

1 Timote 4: daa

Highlight

Copy