ମାର୍କୁସ୍ 8
8
ଚାଇର୍ ହାଜାର୍ ହୋଡ଼ୋକୋକେ ଜୋମ୍ ଏମ୍
(ମାତ୍ତି. 15:32-39)
1ଏନ୍ ହୁଲାଙ୍ଗ୍ କୋରେ, ଚିମ୍ତାଙ୍ଗ୍ ଆଡୋଃ ମିଶା ଥିମ୍ବା ହୋଡ଼ୋକୋ ହୁଣ୍ଡି ଜାନାକୋ, ଏନ୍ତେ ଇନ୍କୁୱାଃ ତାଃ ଜାହାନାଃ ଜୋଜୋମାଃ କା ତାଇକେନା, ଦୋ ୟୀଶୁ ଆଜାଃ ଚେଲାକୋକେ ନାଡ଼େଏ କେଡ଼ାକେତେ ଇନ୍କୁକେ କାଜିକେଦାଏ, 2“ଇଙ୍ଗ୍କେ ନେ ଥିମ୍ବା ହୋଡ଼ୋକୋ ଚେତାନ୍ ରେ ଦାୟା ହିଜୁଃ ତାନା, ଚିୟାଃଚି ନିକୁ ତିନ୍ ଦିନ୍ ଏତେ ଇଙ୍ଗ୍ଆଃ ଲୋଃ ମେନାକୋୱା ହାର୍ ନାଆ ଇନ୍କୁୱାଃ ତାଃ ଜେତ୍ନାଃ ଅଗି ଜୋମେୟାଃ ବାନୋଗା। 3ଇଙ୍ଗ୍ ଇନ୍କୁକେ ରେଙ୍ଗେଃ ଗି ଅଡ଼୍ଆଃ କୁଲ୍ ତାକୋୱାଇଙ୍ଗ୍ ରେଦୋ, ହୋରା ରେ ଲାଗା କେନୋଃ ୱାକୋ, ଚିୟାଃଚି ନିକୁଏତେ ଅକଏ-ଅକଏ ସାଙ୍ଗିନ୍ ଏତେ ହିଜୁଃ କାନାକୋ।” 4ଇନିଜାଃ ଚେଲାକୋ ଇନିଃକେ କାଜିରୁଆଡ଼୍ କିଜାକୋ, “ନେତାଃ ସୁନ୍ସାନ୍ ଜାଗା ରେ ନିମିନାଙ୍ଗ୍ ହୋଲୋଙ୍ଗ୍କୋ ଅକଏ କୋତାଃ ଏତେ ଆଉୱେୟାଏ ଚି ନିକୁ ବିୟୋଃ ୱାକୋ?” 5ୟୀଶୁ ଇନ୍କୁକେ କୁଲିକେଦାଏ, “ଆପେୟାଃ ତାଃ ଚିମିନାଙ୍ଗ୍ ହୋଲୋଙ୍ଗ୍କୋ ମେନାଃ?” ଇନ୍କୁ କାଜିକେଦାକୋ, “ସାତ୍ଠୁ।” 6ଏନ୍ତେ ଇନିଃ ହୋଡ଼ୋକୋକେ ଅତେ ରେ ଦୁବ୍ ଲାଗିନ୍ ଆନାଚୁ ଏମାଃ କୋୱାଏ, ଏନା ତାୟୋମ୍ତେ ସାତ୍ଠୁ ହୋଲୋଙ୍ଗ୍ କୋକେ ଇଦିକେଦାଏ ହାର୍ ପାର୍ମେଶ୍ଵାର୍ କେ ଧାନ୍ୟାବାଦ୍ କେତେ କେଚାଃ କେଦାଏ, ହାର୍ ଆଜାଃ ଚେଲାକୋକେ ହାଟିଙ୍ଗ୍ ଲାଗିନ୍ ଏମ୍କେଦାଏ, ଆଡୋଃ ଇନ୍କୁ ହୋଡ଼ୋକୋକେ ହାଟିଙ୍ଗ୍ କେଦାକୋ। 7ଇନ୍କୁ ତାଃ ରେ ହୁଡିଙ୍ଗ୍ ଲେକା ହୁପୁଡିଙ୍ଗ୍ ହାକୁକୋ ହ ତାଇକେନା, ଇନିଃ ପାର୍ମେଶ୍ଵାର୍ କେ ଧାନ୍ୟାବାଦ୍ କେତେ ଏନାକେ ହଗି ହାଟିଙ୍ଗ୍ ଲାଗିନ୍ କାଜିକେଃକୋୱାଏ। 8ହୋଡ଼ୋକୋ ଜୋମ୍ କେତେ ବିଇ ଜାନାକୋ। ଏନା ତାୟୋମ୍ତେ ଚେଲାକୋ ୟୀଶୁ କେଚାଃକାନ୍ ସାରେଃ ହୋଲୋଙ୍ଗ୍ ଖାଣ୍ଡା କୋକେ ସାତ୍ ଡାଲି ଫେରେଃ କେତେ ଉଠାଓ କେଦାକୋ। 9ହାର୍ ହୋଡ଼ୋକୋ ଚାଇର୍ ହାଜାର୍ ଲେକା ତାଇକେନାକୋ, ଏନ୍ତେ ଇନିଃ ଇନ୍କୁକେ ବିଦା କେଃକୋୱାଏ। 10ହାର୍ ୟୀଶୁ ଇମ୍ତାଗି, ଆଜାଃ ଚେଲାକୋଲୋଃ ଡୋଙ୍ଗା ରେ ରାକାବ୍ କେତେ ଦଲ୍ମନୁତା ଜିଲ୍ଲା ତେ ସେନୋଃ ଜାନାଏ।
ଫାରିସୀ ହୋଡ଼ୋକୋ ୟୀଶୁ କେ ଚିହ୍ନା ଆସି
(ମାତ୍ତି. 16:1-4)
11ଆଡୋଃ ଫାରିସୀ ହୋଡ଼ୋକୋ ହିଜୁଃକେତେ ୟୀଶୁ କେ କୁଲି-ବାଡ଼ା କିଜାକୋ ହାର୍ ଇନିଃକେ ଜାଞ୍ଚି ଲାଗିନ୍ତେ ଇନିଃତାଃ ତେ ରିମିଲ୍ଦିଶୁମ୍ ରାଃ ମିୟାଃ ଚିହ୍ନା ଆସିକିଜାକୋ। 12ୟୀଶୁ ଆଜାଃ ଆତ୍ମା ରେ ଦୁକୁ ଜାନାଏ ହାର୍ ସାହେଃ କେତେ କାଜିକେଦାଏ, “ନେ ସାମାୟ୍ ରେନ୍ ହୋଡ଼ୋକୋ ଚିନାଃ ମେନ୍ତେ ଚିହ୍ନା ଦାଣା ତାନାକୋ? ଇଙ୍ଗ୍ ଆପେକେ ସାର୍ତିଗୀ କାଜିପେ ତାନିଙ୍ଗ୍, ଚି ନେ ସାମାୟ୍ ରେନ୍ ହୋଡ଼ୋକୋକେ ଜେତାନ୍ ଚିହ୍ନା କା ଏମୋଗା।” 13ହାର୍ ଇନିଃ ଇନ୍କୁକେ ବାଗେ କେତେ ଆଡୋଃଗି ଡୋଙ୍ଗା ରେ ରାକାବ୍ ଜାନାଏ, ହାର୍ ଗାଲିଲୀ ସାମୁଦାର୍ ହାନ୍ ଫାରୋମ୍ ତେ ସେନୋଃ ଜାନାଏ।
ଫାରିସୀ ହୋଡ଼ୋକୋୱାଃ ହାର୍ ହେରୋଦ୍ ରାଜା ରାଃ ଖାମୀର୍
(ମାତ୍ତି. 16:5-12)
14ୟୀଶୁ ରାଃ ଚେଲାକୋ ହୋଲୋଙ୍ଗ୍ ଇଦି ରିଡ଼ିଙ୍ଗ୍ ଲେନାକୋ, ହାର୍ ଡୋଙ୍ଗା ରେ ଇନ୍କୁୱାଃ ତାଃ ରେ ମିୟାଃ ଗି ହୋଲୋଙ୍ଗ୍ ତାଇନ୍ କେନା। 15ୟୀଶୁ ଇନ୍କୁକେ କେଟେଃ ଆନାଚୁ ଏମ୍କେଦାଏ, “ନେଲେପେ, ଫାରିସୀ ହୋଡ଼ୋକୋୱାଃ ଖାମୀର୍ ହାର୍ ହେରୋଦ୍ ରାଜା ରାଃ ଖାମୀର୍ ଏତେ ହୁସିଆର୍ ତାଇନ୍ପେ।” 16ଇନ୍କୁ ଆକୋ-ଆକତେଗି କୁପୁଲି କେତେ କାଜି ବାଡ଼ା କେଦାକୋ, “ଆବୁୱାଃ ତାଃ ରେଦୋ ହୋଲୋଙ୍ଗ୍ ବାନୋଗା ଏନାମେନ୍ତେ ଇନିଃ କାଜି ତାନାଏ।” 17ନେୟା ସାରିକେତେ ୟୀଶୁ ଇନ୍କୁକେ କାଜିକେଦାଏ, “ଆପେ ଚିନାଃ ଆପେୟାଃ ରେ କୁପୁଲିଅଃ ତାନାପେ, ଚି ଆବୁୱାଃ ତାଃ ରେଦୋ ହୋଲୋଙ୍ଗ୍ ବାନୋଃ? ଚିନାଃ ନାଆ ସାନ୍ତେ କାପେ ସାରିତାନା ହାର୍ କାପେ ବୁଝାଅ ତାନା? ଚିନାଃ ଆପେ ଇଙ୍ଗ୍କେ କାପେ ବିଶ୍ଵାସ୍ ତାନା? 18ଚିନାଃ ମେଏଃ ତାଇନ୍ ରେ ହଗି କାପେ ନେଲ୍ତାନା, ହାର୍ ଲୁତୁର୍ ତାଇନ୍ ରେ ହଗି କାପେ ଆୟୁମ୍ ତାନା? ହାର୍ ଚିନାଃ ଆପେ ରିଡ଼ିଙ୍ଗ୍ ଜାନାପେ? 19ଚିମ୍ତାଙ୍ଗ୍ ଇଙ୍ଗ୍ ପାଞ୍ଚ୍ ହାଜାର୍ କୋୱାଃ ଲାଗିନ୍ ପାଞ୍ଚ୍ ହୋଲୋଙ୍ଗ୍ କୋକେ କେଚାଃ ଲେଦାଇଙ୍ଗ୍ ଦୋ ଆପେ ଖାଣ୍ଡା କୋରାଃ ଚିମିନାଙ୍ଗ୍ ଡାଲି ଫେରେଃ କେତେ ଉଠାଓ ଲେଦାପେ?” ଇନ୍କୁ ଇନିଃକେ କାଜିକିଜାକୋ, “ବାରା ଡାଲି।” 20ଇନିଃ ଇନ୍କୁକେ କାଜିକେଦାଏ, “ହାର୍ ଚିମ୍ତାଙ୍ଗ୍ ଚାଇର୍ ହାଜାର୍ କୋୱାଃ ଲାଗିନ୍ ସାତ୍ ଠୁ ହୋଲୋଙ୍ଗ୍ ତାଇକେନା ଦୋ ଆପେ ଖାଣ୍ଡା କୋରାଃ ଚିମିନ୍ ଡାଲି ଫେରେଃ କେତେ ଉଠାଓ ଲେଦାପେ?” ଇନ୍କୁ ଇନିଃକେ କାଜିକେଦାକୋ “ସାତ୍ ଡାଲି।” 21ୟୀଶୁ ଇନ୍କୁକେ କାଜିକେଦାଏ, “ଚିନାଃ ଆପେ ନାଆ ସାନ୍ତେ ଇଙ୍ଗ୍କେ କାପେ ବୁଝାଅଃ ତାନା?”
ବେଥ୍ସୈଦା ସାହାର୍ ରେ ମିୟାଃ ଆନ୍ଧା କେ ଚାଙ୍ଗାଇ ରିକା
22ଏନ୍ତେ ୟୀଶୁ ବେଥ୍ସୈଦା ସାହାର୍ ହିଜୁଃ ଲେନାଏ, ହାର୍ ହୋଡ଼ୋକୋ ମିୟାଃ ଆନ୍ଧା କେ ଇନିଜାଃ ନାଡ଼େଏ ଆଉଲିଜାକୋ ହାର୍ ଇନିଃକେ ଆର୍ଜି କିଜାକୋ ଚି ଇନିଃକେ ଜୁଟିଃ କେତେ ଚାଙ୍ଗାଇ କାଏ। 23ୟୀଶୁ ଏନ୍ ଆନ୍ଧା ରାଃ ତିଈ ସାବ୍ କେତେ ଇନିଃକେ ହାତୁ ରାଃ ବାହାରି ତେ ଇଦିକିଜାଏ। ହାର୍ ଆଜାଃ ବେଏଃ ଦାଆ ତେ ଏନ୍ ହୋଡ଼ ରାଃ ମେଏଃ ରେ ଜୁଟିଃ କେଦାଏ, ହାର୍ ଇନିଃକେ କୁଲିକିଜାଏ, “ଚିନାଃ ଆମ୍କେ ଜାହାନାଃ ନେଲୋଃ ତାନା?” 24ଇନିଃ ମେଏଃ ଆରିଃ କେତେ କାଜିକେଦାଏ, “ଇଙ୍ଗ୍ ହୋଡ଼ୋକୋକେ ନେଲ୍ କୋ ତାନାଇଙ୍ଗ୍, ମେନ୍ଦୋ ଇନ୍କୁ ଇଙ୍ଗ୍କେ ଦାରୁ ଲେକା, ସେସେନ୍ ତାନ୍ ନେଲୋଃ ତାନାକୋ।” 25ଏନ୍ତେ ୟୀଶୁ ଆଡୋଃ ମିଶା ଇନିଜାଃ ମେଏଃ ରେ ତିଈ ମାଣ୍ଡାଅ କେଦାଏ, ହାର୍ ଆନ୍ଧା ଧ୍ୟାନ୍ତେ ନେଲ୍କେଦାଏ। ହାର୍ ବେଶ୍ ଜାନାଏ ହାର୍ ସବେନାଃ ସାଫା-ସାଫା ନେଲ୍କେଦାଏ। 26ୟୀଶୁ ଇନିଃକେ ନେୟା କାଜିକେତେ ଅଡ଼୍ଆଃ ତେ କୁଲ୍କିଜାଏ, “ନେତାଃ ରେ ଚିନାଃ ହୋବାନା ଏନାକେ ହାତୁ ରେ ଉଦୁବ୍ ଲାଗିନ୍ ଆଲୋମ୍ ସେନ୍ ମେ।”
ପାତ୍ରାସ୍ ୟୀଶୁ କେ ମାସୀହ୍ ମାନାତିଙ୍ଗ୍ କିଜାଏ
(ମାତ୍ତି. 16:13-20; ଲୁକା. 9:18-21)
27ୟୀଶୁ ହାର୍ ଇନିଜାଃ ଚେଲାକୋ ବେଥ୍ସୈଦା ସାହାର୍ ବାଗେ କେତେ କୈସାରିୟା ଫିଲିପି ରାଃ ସାହାର୍ ଜାପାଃ ହାତୁ କୋରେ ସେନ୍ ଜାନାକୋ। ଆଡୋଃ ହୋରା ରେ ଇନିଃ ଇନ୍କୁକେ କୁଲିକେଦାଏ, “ହୋଡ଼ୋକୋ ଇଙ୍ଗ୍କେ ଚିନାଃ ମେତାଇଙ୍ଗ୍ ତାନାକୋ?” 28ଚେଲାକୋ କାଜିରୁଆଡ଼୍ କିଜାକୋ, “ଯୋହାନ୍ ବାପ୍ତିସ୍ମା ଏହେମ୍ ନିଈ; ହାର୍ ଅକଏ-ଅକଏ ଏଲିୟା; ହାର୍ ଅକଏ-ଅକଏ ନାବୀ କୋଏତେ ମିୟାଃ ତାନିଃ ମେନ୍ତେ କାଜିୟାକୋ।” 29ୟୀଶୁ ଇନ୍କୁକେ କୁଲିକେଃକୋୱାଏ, “ମେନ୍ଦୋ ଆପେ ଇଙ୍ଗ୍କେ ଚିନାଃ ପେ କାଜିତାନା?” ପାତ୍ରାସ୍ ଆଏଃକେ କାଜିରୁଆଡ଼୍ କିଜାଏ, “ଆମ୍ ମାସୀହ୍ ତାନ୍ମେ ପାର୍ମେଶ୍ଵାର୍ ପାଡ଼େତେ କୁଲାକାନାମ୍।” 30ଏନ୍ତେ ୟୀଶୁ ଇନ୍କୁକେ କେଟେଃ ତେ ଆନାଚୁ ଏମାଃ କୋୱାଏ ଚି, “ଇଙ୍ଗ୍ଆଃ ବିଷାୟ୍ ରେ ନେୟା ଜେତାଏ କେହ ଆଲୋପେ କାଜିୟା।”
ଆଜାଃ ଗୋନୋଏଃ ରାଃ ବିଷାୟ୍ ରେ ୟୀଶୁ ରାଃ ଆୟାର୍କାଜି
(ମାତ୍ତି. 16:21-23; ଲୁକା. 9:22)
31ଏନ୍ତେ ୟୀଶୁ ଇନ୍କୁକେ ଶିଖାଅ କେଃକୋୱାଏ, ଚି ମାନ୍ୱା ରାଃ ହୋନ୍ କେ ଦୁକୁ ସାହାତିଙ୍ଗ୍ ଲାଗାତିଙ୍ଗ୍ଆ ହାର୍ ୟାହୁଦୀ ମାରିହୋଡ଼ୋକୋ ହାର୍ ପ୍ରାଧାନ୍ ୟାଜାକ୍କୋ ହାର୍ ଆଇନ୍ ଗୁରୁକୋ ଇନିଃକେ ହିଲାଙ୍ଗ୍ କେତେ ଗୋଜିୟାକୋ ହାର୍ ଇନିଃ ତିନ୍ ଦିନ୍ ରାଃ ତାୟୋମ୍ତେ ଜୀବିରିଦାଏ। 32ଇନିଃ ନେ କାଜି ଇନ୍କୁକେ ସାଫା-ସାଫା କାଜିକେଃକୋୱାଏ। ନେୟା ରେ ପାତ୍ରାସ୍ ୟୀଶୁ କେ ଆଲାଗ୍ ଇଦିକିଜାଏ, ହାର୍ ଏଗେର୍ କିଜାଏ। ଚିୟାଃଚି ଆଏଃ ଗୋଜୋଗାଇଙ୍ଗ୍ ମେନ୍ତେ କାଜି ଲିଜାଏ। 33ମେନ୍ଦୋ ୟୀଶୁ ରୁଆଡ଼୍ କେତେ ଆଜାଃ ଚେଲାକୋ ପାଡ଼୍ ନେଲ୍କେଦାଏ, ହାର୍ ପାତ୍ରାସ୍ କେ ଏଗେର୍ କେତେ କାଜିକିଜାଏ, “ହେ ଶାଏତାନ୍! ଇଙ୍ଗ୍ଆଃ ନାଡ଼େଏ ତେ ଫାର୍କାନ୍ ମେ, ଚିୟାଃଚି ଆମାଃ ପାହୋମ୍ ପାର୍ମେଶ୍ଵାର୍ ରାଃ ପାହୋମ୍ ଲେକା କାହା, ମେନ୍ଦୋ ହୋଡ଼ୋକୋୱାଃ ଲେକା ପାହୋମ୍ ତାନାମ୍।”
ଚେଲା ବାଇୟେନ୍ ରାଃ ମାନେ
(ମାତ୍ତି. 16:24-28; ଲୁକା. 9:23-27)
34ଇନିଃ ମିଃଥିମ୍ବା ହୋଡ଼ୋକୋକେ ହାର୍ ଆଜାଃ ଚେଲାକୋକେ ନାଡ଼େଏ କେଡ଼ାକେତେ ଇନ୍କୁକେ କାଜିକେଦାଏ, “ଜେତାଏ ଇଙ୍ଗ୍କେ ଅତୋଙ୍ଗିଙ୍ଗ୍ ରେଦୋ, ଇନିଃ ଆଜାଃ ସାନାଙ୍ଗ୍ କୋକେ ବାଗିକାଏ ହାର୍ ଆଜାଃ କ୍ରୁଶ୍ ଉଠାଓକେତେ, ଇଙ୍ଗ୍କେ ଅତୋଙ୍ଗିଙ୍ଗ୍ କାଏ। 35ଚିୟାଃଚି ଜେତାଏ ଆଜାଃ ଜୀଉ କେ ନେ ଅତେଦିଶୁମ୍ ଲାଗିନ୍ ବାଞ୍ଚାଅ ସାନାଙ୍ଗାଏ ରେଦୋ ଇନିଃ ଏନାକେ ଆଦେୟାଏ, ମେନ୍ଦୋ ଅକଏ ଇଙ୍ଗ୍ଆଃ ହାର୍ ସୁସାମାଚାର୍ ଲାଗିନ୍ ଆଜାଃ ଜୀଉ କେ ଆଦେୟାଏ ଇନିଃ ସାର୍ତି ଜୀଦାନ୍ ନାମେୟାଏ। 36ମିୟାଃ ହୋଡ଼ ସବେନ୍ ଅତେଦିଶୁମ୍ କେ ନାମ୍ କେୟାଏ ହାର୍ ପାର୍ମେଶ୍ଵାର୍ ଏତେ ଜୀଉ କାଏ ନାମ୍ ରେଦୋ ଇନିଃକେ ଚିକାନ୍ ଲାଭ୍ ହୋବାୱା? 37ହାର୍ ହୋଡ଼ ଆଜାଃ ଜାନାଓ ଜୀଦାନ୍ ରାଃ ବାଦ୍ଲା ରେ ପାର୍ମେଶ୍ଵାର୍ କେ ଚିନାଃ ଏମେୟାଏ? 38ଜେତାଏ ହଗି ନେ ବ୍ୟାଭିଚାର୍ ହାର୍ ପାପୀ ଜାତି କୋୱାଃ ଥାଲା ରେ ଇଙ୍ଗ୍କେ ହାର୍ ଇଙ୍ଗ୍ଆଃ କାଜିକୋ ଏତେ ଗିୟୁଗୋୱାଏ, ଇଙ୍ଗ୍ ମାନ୍ୱା ରାଃ ହୋନ୍ ହଗି ଇମ୍ତାଙ୍ଗ୍ ଇନିଃକେ ହଗି ଗିୟୁଗୋୱାଇଙ୍ଗ୍, ଚିମ୍ତାଙ୍ଗ୍ ଇଙ୍ଗ୍ ପାବିତାର୍ ସିର୍ମାଦାସୀ କୋଲୋଃ ଇଙ୍ଗ୍ଆଃ ଆପୁ ରାଃ ମାନାରାଙ୍ଗ୍ ଲୋଃ ହିଜୁଗାଇଙ୍ଗ୍।”
Currently Selected:
ମାର୍କୁସ୍ 8: UNXNT
Highlight
Share
Copy
Want to have your highlights saved across all your devices? Sign up or sign in
Munda (ମୁଣ୍ଡା) Bible by The Love Fellowship is licensed under Creative Commons Attribution-ShareAlike 4.0 License.
