ମାର୍କୁସ୍ 16

ୟୀଶୁ ରାଃ ଜୀବିନିରିଦ୍

(ମାତ୍ତି. 28:1-8; ଲୁକା. 24:1-12; ଯୋହା. 20:1-10)

1ଚିମ୍ତାଙ୍ଗ୍ ୟାହୁଦୀ କୋୱାଃ ଆରାମେ ହୁଲାଙ୍ଗ୍ ଫାରୋମ୍ ଜାନା, ଦୋ ମାରିୟାମ୍ ମାଗ୍‍ଦାଲା ସାହାର୍ ରେନ୍, ହାର୍ ୟାକୁବ୍ ହାର୍ ଯୋଶେଷ୍ ରାଃ ଏଙ୍ଗା ମାରିୟାମ୍, ହାର୍ ସାଲୋମି ସୋୱାନ୍ ସୁନୁମ୍ ଜିନିଷ୍‍କୋ କିରିଙ୍ଗ୍ ଆଉ ଲେଦାକୋ ଚି, ହିଜୁଃକେତେ ଇନିଜାଃ ରେ ସୁନୁମ୍ ଗୋସୋଃ ୟାକୋ। 2ଏତ୍ଵାର୍ ହୁଲାଙ୍ଗ୍ ସେତାଃ ପାଡ଼୍ ଚିମ୍ତାଙ୍ଗ୍ ଶିଙ୍ଗି ତୁରୋଃ ତାଇନା, ଇନ୍‍କୁ କାବାର୍ ତାଃ ସେନ୍ ଜାନାକୋ। 3ଏନ୍ତେ ଆକୋ-ଆକୋ ରେ ବାକାଣ୍ ତାଇକେନାକୋ, “ଆବୁୱାଃ ଲାଗିନ୍ କାବାର୍ ରାଃ ଦୁହାର୍ ଏତେ ମାରାଙ୍ଗ୍ ଦିରି କେ ଅକଏ ଉଦୁର୍ ୟାଏ?” 4ଚିମ୍ତାଙ୍ଗ୍ ଇନ୍‍କୁ ମେଏଃ ଆରିଃ କେତେ ନେଲ୍ କେଦାକୋ ଅକନାଃ ଥିମ୍ବାଗି ମାରାଙ୍ଗ୍ ଦିରି ତାଇକେନା, ଏନ୍ ଦିରି ଆତୋମ୍ କାନ୍ ତାଇକେନା। 5ଏନ୍ତେ କାବାର୍ ରାଃ ଭିତାର୍ ସେନ୍ କେତେ, ଇନ୍‍କୁ ମିୟାଃ ଜାୱାନ୍ କଡ଼ା କେ ପୁଣ୍ଡୀ ଲିଜାଃ ତୁସିଙ୍ଗ୍ କାନ୍ ଜୋମ୍ ପାଡ଼୍ ରେ ଦୁବାକାନ୍ ନେଲ୍ କିଜାକୋ, ହାର୍ ଥିମ୍ବାଗି ବୋରୋ ଜାନାକୋ। 6ଏନ୍ତେ ଏନ୍ ଜାୱାନ୍ କଡ଼ା ଇନ୍‍କୁକେ କାଜିକେଃକୋୱାଏ, “ଆଲୋପେ ବୋରୋୟା, ଆପେ ନାଜ୍ରେଥିୟା ୟୀଶୁ କେ, ଅକନିଃ କ୍ରୁଶ୍ ରେ ରାକାବ୍ ଲେନ୍ ତାଇନାଏ, ଦାଣାଇ ତାନାପେ। ଇନିଃ ଜୀବିରିଃ କାନାଏ, ନେତାଃ ରେ ବାଙ୍ଗୁଇଜା, ନେଲେପେ, ନେୟା ଏନ୍ ଜାଗା ଗି ତାନାଃ, ଅକତାଃରେ ଇନ୍‍କୁ ଇନିଃକେ ମାଣ୍ଡାଅ ଲିଜାକୋ। 7ମେନ୍ଦୋ ନାଆ ଆପେ ସେନୋଃ ପେ, ହାର୍ ପାତ୍ରାସ୍ କେ ହାର୍ ଇନିଜାଃ ଏଟାଃ ଚେଲାକୋକେ କାଜିକୋପେ ଚି, ‘ଇନିଃ ଆପେ ତେ ସିଦା ଗାଲିଲୀ ଜିଲ୍ଲା ତେ ସେନାଏ ଜେଲେକା ଇନିଃ ଆପେକେ ସିଦାରେ କାଜିଲେଦାଏ, ଆପେ ଏନ୍ତାଃରେ ଇନିଃକେ ନେଲିୟାପେ।’ ” 8ନେୟା ଆୟୁମ୍‍କେତେ ଇନ୍‍କୁ କାବାର୍ ଏତେ ଅଡୋଙ୍ଗ୍ କେତେ ନିର୍ କେଦାକୋ; ଚିୟାଃଚି ଇନ୍‍କୁ ବୋରୋତେ ଥାର୍ଥାରାଅ ହାର୍ ଆକ୍‍ଦାନ୍ଦା ଲେନାକୋ, ଏନ୍ତେ ହୋରା ରେ ଇନ୍‍କୁ ଅକଏ କେହ ଜାହାନାଃ କାକୋ କାଜିକେଦା, ଚିୟାଃଚି ଇନ୍‍କୁ ବୋରୋ ଲେନ୍ ତାଇକେନାକୋ।

ମାରିୟାମ୍ ମାଗ୍‍ଦାଲିନୀ କେ ୟୀଶୁ ନେଲ୍ ଜାନାଏ

(ମାତ୍ତି. 28:9-10; ଯୋହା. 20:11-18)

9ଏତ୍ଵାର୍ ହୁଲାଙ୍ଗ୍ ସେତାଃ ପାଡ଼୍ ଚିମ୍ତାଙ୍ଗ୍ ୟୀଶୁ ଜୀବିରିଃ ଜାନାଏ, ଇନିଃ ସିଦାରେ ମାରିୟାମ୍ ମାଗ୍‍ଦାଲା ସାହାର୍ ରେନ୍ ନିଈ କେ, ଅକନିଃତେ ସାତ୍‍ଠୁ ବୋଙ୍ଗାଆତ୍ମା କୋକେ ଅଡୋଙ୍ଗ୍ ଲେଃକୋୱାଏ, ନେଲ୍ ଜାନାଏ। 10ଇନିଃ ସେନ୍ କେତେ ୟୀଶୁ ରାଃ ଚେଲାକୋକେ ଉଦୁବ୍ କେଃକୋୱାଏ। ଇନ୍‍କୁ ଇନିଜାଃ ଲାଗିନ୍ ଦୁକୁଅଃ ତାଇକେନାକୋ ହାର୍ ରାଆ ତାଇକେନାକୋ। 11ମେନ୍ଦୋ ଚିମ୍ତା ମାରିୟାମ୍ ଇନ୍‍କୁକେ ନେ କାଜି ଉଦୁବ୍ କେଃକୋୱାଏ ଚି, “ୟୀଶୁ ଜୀବିରିଃ କାନାଏ ହାର୍ ଇଙ୍ଗ୍ ଇନିଃକେ ନେଲ୍ କିଜାଇଙ୍ଗ୍!” ମେନ୍ଦୋ ଇନ୍‍କୁ ନେୟା ଆୟୁମ୍‍କେତେ କାକୋ ବିଶ୍ଵାସ୍ କେଦା।

ୟୀଶୁ ବାର୍ହୋଡ଼୍ ଚେଲାକିନ୍‍କେ ନେଲ୍ ଜାନାଏ

(ଲୁକା. 24:13-35)

12ନେୟା ତାୟୋମ୍ତେ ୟୀଶୁ ଏଟାଃ ରୂପ୍ ରେ ଇନ୍‍କୁ ଏତେ ବାର୍ହୋଡ଼୍ ଚେଲାକିନ୍ ତାଃ ରେ ଚିମ୍ତାଙ୍ଗ୍ ଆକିନ୍ ୟୀରୁଶାଲେମ୍ ସାହାର୍ ଏତେ ଆକୋୱାଃ ହାତୁ ପାଡ଼୍ କିନ୍ ସେନ୍ ତାଇନା, ନେଲ୍ ଜାନାଏ। 13ଚିମ୍ତାଙ୍ଗ୍ ଆକିନ୍ ୟୀଶୁ କେ ଉରୁମ୍ କିଜାକିନ୍, ଇନ୍‍କୁ ହଗି ରୁଆଡ଼୍ କେତେ ଏଟାଃ କୋକେ ଉଦୁବ୍ କେଦାକିନ୍, ମେନ୍ଦୋ ଜେତାଏ କାକୋ ବିଶ୍ଵାସ୍ କେଦା।

ମାରାଙ୍ଗ୍ ଆନାଚୁ

(ମାତ୍ତି. 28:16-20; ଲୁକା. 24:36-49; ଯୋହା. 20:19-23; କୁଲା. 1:6-8)

14ତାୟୋମ୍ତେ ୟୀଶୁ ଏନ୍ ଏଗାରା କୁଲାକାନ୍ ଚେଲାକୋକେ ହଗି, ଚିମ୍ତାଙ୍ଗ୍ ଇନ୍‍କୁ ଜୋମ୍ ଲାଗିନ୍ ଦୁବ୍‍ଲେନ୍ ତାଇନାକୋ ନେଲ୍ ଜାନାଏ, ହାର୍ ଇନ୍‍କୁୱାଃ କାବିଶ୍ଵାସ୍ ହାର୍ କେଟେଃ ମୋନ୍ ଲାଗିନ୍ତେ ଏଗେର୍ କେଃକୋୱାଏ, ଚିୟାଃଚି ଅକନ୍‍କୋ ଇନିଜାଃ ଜୀବିରିଃ ରାଃ ତାୟୋମ୍ତେ ଇନିଃକେ ନେଲ୍ ଲିଜାକୋ, ଇନ୍‍କୁୱାଃ କାଜିକେ ଇନ୍‍କୁ କାକୋ ବିଶ୍ଵାସ୍ ଲେଦା। 15ଏନ୍ତେ ୟୀଶୁ ଇନ୍‍କୁକେ କାଜିକେଦାଏ, “ଆପେ ସବେନ୍ ଅତେଦିଶୁମ୍ ରେ ସେନ୍ କେତେ ସବେନ୍ ହୋଡ଼ୋକୋକେ ସୁସାମାଚାର୍ ଉଦୁବ୍ କୋପେ। 16ଅକଏ ଇଙ୍ଗ୍‍କେ ବିଶ୍ଵାସ୍ ଏୟାଏ ହାର୍ ଚିହ୍ନା ଲାଗିନ୍ ବାପ୍ତିସ୍ମା ଇଦିୟାଏ, ଇନିଃ ପାର୍ମେଶ୍ଵାର୍ ରାଃ ଦାଣ୍ଡ୍ ଏତେ ବାଞ୍ଚାଅ ୱାଏ, ମେନ୍ଦୋ ଅକଏ କାଏ ବିଶ୍ଵାସ୍ ୟାଏ ଇନିଃ ପାପ୍ କୋରାଃ ଦାଣ୍ଡ୍ ନାମେୟାଏ। 17ବିଶ୍ଵାସ୍ ତାନ୍‍କୋ ରେ ନେ ଚିହ୍ନା ହୋବାୱାଃ ଚି ଇନ୍‍କୁ ଇଙ୍ଗ୍ଆଃ ନୁତୁମ୍ ତେ ବୋଙ୍ଗାଆତ୍ମା କୋକେ ଅଡୋଙ୍ଗ୍ କୋୱାକୋ, ଇନ୍‍କୁ ନାୱା-ନାୱା ଭାଷା ରେ କାଜି କାଜିୟାକୋ। 18ବିଙ୍ଗ୍ କୋକେ ଉଠାଓ କୋୱାକୋ ହାର୍ ଜେତାନ୍ ଗୋଜୋଃ ତେୟାଃ ନୁୱେ ରେହ ଇନ୍‍କୁୱାଃ ଜେତ୍ନାଃ ହାନି କା ହୋବାୱା; ଇନ୍‍କୁ ବେମାରୀ କୋୱାଃ ରେ ତିଈ ମାଣ୍ଡାଅୟାକୋ, ହାର୍ ଇନ୍‍କୁ ବୁଗିନ୍ କେନୋଗାକୋ।”

ୟୀଶୁ ସିର୍ମାଦିଶୁମ୍ ତେ ଉଠାଓ ଇଦି ଜାନାଏ

(ଲୁକା. 24:50-53; କୁଲା. 1:9-11)

19ଏନ୍ତେ ପ୍ରାଭୁ ୟୀଶୁ ଇନ୍‍କୁ ଲୋଃ ବାକାଣ୍ ତାୟୋମ୍ତେ ସିର୍ମାଦିଶୁମ୍ ତେ ଉଠାଓ ଇଦି ଜାନାଏ, ହାର୍ ପାର୍ମେଶ୍ଵାର୍ ରାଃ ଜୋମ୍ ପାଡ଼୍ ରେ ଦୁବ୍ ଜାନାଏ। 20ହାର୍ ଇନ୍‍କୁ ଅଡୋଙ୍ଗ୍ କେତେ ସବେନ୍ ପାଡ଼୍ ପାର୍ଚାର୍ କେଦାକୋ, ଏନ୍ତେ ପ୍ରାଭୁ ଇନ୍‍କୁ ଲୋଃ ଆକ୍‍ଦାନ୍ଦା କାମି ତାଇନାଏ ହାର୍ ଏନ୍ ଚିହ୍ନା କୋୱା ରାଃ ହୋରାତେ ଅକନାଃ ଇନ୍‍କୁ ଲୋଃ ହୋବାଅଃ ତାଇନା, ଆଜାଃ ବାଚାନ୍ କୋକେ ସାର୍ତି ମେନ୍ତେ ପ୍ରାମାଣ୍ ଇଦିକେଦାଏ। “ଆମୀନ୍#16:20 ଆମୀନ୍ ଏନ୍‍କା ଗି ହୋବାଅଃକା।”

Currently Selected:

ମାର୍କୁସ୍ 16: UNXNT

Highlight

Copy