ମାର୍କୁସ୍ 1

ଯୋହାନ୍ ବାପ୍ତିସ୍ମା ଏମେନିଜାଃ ସାନ୍ଦେଶ୍

(ମାତ୍ତି. 3:1-12; ଲୁକା. 3:1-18; ଯୋହା. 1:19-28)

1ନେୟା ପାର୍ମେଶ୍ଵାର୍ ରାଃ ହୋନ୍ ୟୀଶୁ ମାସୀହ୍ ରାଃ ସୁସାମାଚାର୍ ରାଃ ସୁରୁ ତାନାଃ। 2ୟାଶାୟାହ୍ ନାବୀ ଆଜାଃ କିତାବ୍ ରେ ନେଲେକା ଅଲେୟାଏ, ପାର୍ମେଶ୍ଵାର୍ ଆଜାଃ ହୋନ୍ କେ କାଜିୟାଏ,

“ନେଲେମେ, ଇଙ୍ଗ୍ ଇଙ୍ଗ୍ଆଃ ସାନ୍ଦେଶ୍ ଏହେମ୍ ନିଈ କେ ଆମାଃ ଆୟୁର୍ କୁଲ୍ ତାନିଙ୍ଗ୍,

ଇନିଃ ଆମାଃ ଲାଗିନ୍ ହୋରା ବାଇୟେୟାଏ।

3ସୁନ୍‍ସାନ୍ ଜାଗା ରେ ମିୟାଃ ହୋଡ଼ ହୋଡ଼ୋକୋକେ କାଜିୟାକୋ ତାନାଏ, ଚି

ପ୍ରାଭୁ ହିଜୁଃ ତାନାଏ ସେକାଡ଼େନ୍ ପେ, ଇନିଜାଃ ଲାଗିନ୍ ହୋରା ବାଇୟେପେ, ଆଡୋଃ

ଏନ୍ ସାଣ୍ଡାକ୍ କୋକେ ସିଧା ରିକାଏପେ ଅକଣ୍ଡେ ଇନିଃ ହୁଜୁଗାଏ।”

4ଏନ୍ ସାନ୍ଦେଶ୍ ଏହେମ୍ ନିଈ, ଯୋହାନ୍ ବାପ୍ତିସ୍ମା ଏହେମ୍ ନିଈ ତାଇକେନାଏ, ଇନିଃ ସୁନ୍‍ସାନ୍ ଜାଗା ରେ ହୋଡ଼ୋକୋକେ ପାର୍ଚାର୍ ତାଇନାଏ, ଚି ଇନ୍‍କୁ ପାର୍ମେଶ୍ଵାର୍ ଏତେ ପାପ୍ କୋରାଃ ଛାମା ଲାଗିନ୍ ପାପ୍ କାମି ବାଗେ ରାଃ ବାପ୍ତିସ୍ମା ଇଦି ଚାହି। 5ୟାହୁଦୀୟା ଜିଲ୍ଲା ରେନ୍, ହାର୍ ୟୀରୁଶାଲେମ୍ ସାହାର୍ ରେ ତାଇତାନ୍ ମିଃଥିମ୍ବା ହୋଡ଼ୋକୋ ଅଡୋଙ୍ଗ୍ କେତେ ଇନିଜାଃ ନାଡ଼େଏ ହିଜୁଃ ଲେନାକୋ, ହାର୍ ଚିମ୍ତା ଇନ୍‍କୁ ଆକୋୱାଃ ପାପ୍ କୋକେ ମାନାତିଙ୍ଗ୍ କେଦାକୋ, ଯୋହାନ୍ ଯାର୍ଦାନ୍ ନାଈ ରେ ବାପ୍ତିସ୍ମା ଏମାଃ କୋୱାଏ। 6ଯୋହାନ୍ ଉଁଟ୍ ଉବ୍ ରାଃ ଲିଜାଃ ତୁସିଙ୍ଗ୍ କାନ୍ ହାର୍ ଆଜାଃ ମାୟାଙ୍ଗ୍ ରେ ଉହୁର୍ ରାଃ କାଶ୍ନା ଥୋଲାକାନ୍ ତାଇୟୋଃ ତାଇକେନାଏ ହାର୍ ସନ୍‍ସରୋଦ୍ କୋକେ ହାର୍ ଟୋନାଙ୍ଗ୍ ଉରୁମ୍‍ସୁକୁ ଜୋମ୍ ତାଇକେନାଏ। 7ହାର୍ ନେୟା ପାର୍ଚାର୍ ରିକା ତାଇକେନାଏ, “ଇଙ୍ଗ୍ଆଃ ଦୋୟା ତେ ହିନିଃ ହିଜୁଃ ୱାଲା ମେନିଜା, ଅକନିଃ ଇଙ୍ଗ୍ଆଃ ତେ ପେଡ଼େଜାନ୍ ତାନିଃ; ଇଙ୍ଗ୍ ଆଜାଃ ଦାସୀ ଲେକା କୁବୁଃକେତେ ଆୟାଃ ଖାର୍ପା ରାଃ ଥୋନୋଲ୍ ଖଲାଅ ଲେକାନିଃ ହ ନାହାଲାଇଙ୍ଗ୍। 8ଇଙ୍ଗ୍ ଦୋ ଆପେକେ ଦାଆ ତେ ବାପ୍ତିସ୍ମା ଏମ୍‍କାଦାଇଙ୍ଗ୍, ମେନ୍ଦୋ ଇନିଃ ଆପେକେ ପାବିତାର୍ ଆତ୍ମା ତେ ବାପ୍ତିସ୍ମା ଏମାପେୟାଏ।”

ୟୀଶୁ ରାଃ ବାପ୍ତିସ୍ମା

(ମାତ୍ତି. 3:13-4:11; ଲୁକା. 3:21-22; 4:1-13)

9ଏନ୍ ହୁଲାଙ୍ଗ୍ କୋରେ ୟୀଶୁ ଗାଲିଲୀ ଜିଲ୍ଲା ରାଃ ନାଜ୍ରେଥ୍ ସାହାର୍ ଏତେ ହିଜୁଃକେତେ, ଯାର୍ଦାନ୍ ନାଈ ରେ ଯୋହାନ୍ ତେ ବାପ୍ତିସ୍ମା ଇଦିକେଦାଏ। 10ଆଡୋଃ ଚିମ୍ତା ଇନିଃ ଦାଆ ଏତେ ଅଡୋଙ୍ଗ୍ କେତେ ଚେତାନ୍ ହିଜୁଃ ଲେନାଏ, ଏଣ୍ଡେ ଇମ୍ତାଗି ଇନିଃ ରିମିଲ୍‍ଦିଶୁମ୍ କେ ଖୋଲାଅଃତାନ୍ ଆଡୋଃ ପାବିତାର୍ ଆତ୍ମା କେ ଦୁଦ୍‍ମୁଲ୍ ଲେକା ଆଜାଃ ଚେତାନ୍ ରେ ଆଡ଼୍‍ଗୁତାନ୍ ନେଲ୍‍କେଦାଏ। 11ଆଡୋଃ ପାର୍ମେଶ୍ଵାର୍ ରାଃ ଆୱାଜ୍ ରିମିଲ୍‍ଦିଶୁମ୍ ତେ କାଜିକେଦାଏ, “ଆମ୍ ଇଙ୍ଗ୍ଆଃ ଦୁଲାଡ଼ାନ୍ ହୋନ୍ ତାନ୍‍ମେ, ଆମାଃ ଲୋଃ ଇଙ୍ଗ୍ ସୁକୁ ମେନାଇଙ୍ଗ୍‍ୟା।”

ୟୀଶୁ ରାଃ ପାରୀକ୍ଷା

12ଏନା ତାୟୋମ୍ତେ ପାବିତାର୍ ଆତ୍ମା ୟୀଶୁ କେ ଇମ୍ତାଗି ସୁନ୍‍ସାନ୍ ଜାଗା ପାଡ଼୍ କୁଲ‍୍‍କିଜାଏ। 13ସୁନ୍‍ସାନ୍ ଜାଗା ରେ ଚାଲିଶ୍ ଦିନ୍ ସାନ୍ ଶାଏତାନ୍ ଇନିଜାଃ ପାରୀକ୍ଷା କେଦାଏ; ହାର୍ ଏନ୍ ସୁନ୍‍ସାନ୍ ଜାଗା ରେ ଟୋନାଙ୍ଗ୍ ପାଶୁକୋ ତାଇକେନାକୋ, ହାର୍ ସିର୍ମାଦାସୀକୋ ଇନିଜାଃ ସେୱା ତାଇକେନାକୋ।

ଗାଲିଲୀ ଜିଲ୍ଲା ରେ ୟୀଶୁ ରାଃ ସାନ୍ଦେଶ୍

(ମାତ୍ତି. 4:12-17; ଲୁକା. 4:14-15; ମାତ୍ତି. 4:18-22; ଲୁକା. 5:1-11)

14ହୁଡିଙ୍ଗ୍ ସାମାୟ୍ ତାୟୋମ୍ତେ, ଯୋହାନ୍ କେ ଜେଲ୍ଅଡ଼୍ଆଃ ରେ ସାବ୍ ଆଦେର୍ କିଜାକୋ, ଏନ୍ତେ ୟୀଶୁ ଗାଲିଲୀ ଜିଲ୍ଲା ରେ ହିଜୁଃକେତେ ପାର୍ମେଶ୍ଵାର୍ ରାଃ ରାଇଜ୍ ରାଃ ସୁସାମାଚାର୍ ପାର୍ଚାର୍ କେଦାଏ। 15ଆଡୋଃ ଇନିଃ କାଜିକେଦାଏ, “ସାମାୟ୍ ପୁରା କାନା, ଆଡୋଃ ପାର୍ମେଶ୍ଵାର୍ ରାଃ ରାଇଜ୍ ନାଡ଼େଏ ସେଟେର୍ କାନା; ପାପ୍ କାମି ବାଗେ ତାପେ ଆଡୋଃ ସୁସାମାଚାର୍ ରେ ବିଶ୍ଵାସ୍ ଏପେ।” 16ମୁଶିଙ୍ଗ୍ ହୁଲାଙ୍ଗ୍ ୟୀଶୁ ଗାଲିଲୀ ରାଃ ସାମୁଦାର୍ ଗେନା-ଗେନା ସେନ୍ ଇମ୍ତା, ଶିମୋନ୍ ଆଡୋଃ ଇନିଜାଃ ହାଗା ଆନ୍ଦ୍ରିୟାସ୍ କେ ସାମୁଦାର୍ ରେ ଜାଲୋମ୍ ଦୁଡ଼ିଙ୍ଗ୍ ତାନ୍ ନେଲ୍ କେଃକୋୱାଏ; ଚିୟାଃଚି ଇନ୍‍କୁ ଝୋରା ତାଇକେନାକୋ। 17ହାର୍ ୟୀଶୁ ଇନ୍‍କୁକେ କାଜିକେଦାଏ, “ଇଙ୍ଗ୍‍କେ ଅତୋଙ୍ଗିଙ୍ଗ୍ ପେ। ନାଆ ସାନ୍ ଆପେ ହାକୁ କୋକେ ସାବ୍ ତାଇକେନାପେ, ମେନ୍ଦୋ ଇଙ୍ଗ୍ ଆପେକେ ହୋଡ଼ୋକୋକେ ଇଙ୍ଗ୍ଆଃ ତାଃ ବିଶ୍ଵାସ୍ ରେ ଆଉ ଶିଖାଅ ପେୟାଇଙ୍ଗ୍।” 18ଇନ୍‍କୁ ଇମ୍ତାଗି ଜାଲୋମ୍ ତେ ହାକୁ ସାବ୍ କାମି କେ ବାଗେ କେତେ ଇନିଃକେ ଅତୋଙ୍ଗ୍ କିଜାକୋ। 19ଚିମ୍ତା ୟୀଶୁ ହୁଡିଙ୍ଗ୍ ସାଙ୍ଗିନ୍ ଆୟୁର୍ ସେନ୍ କେତେ, ଇନିଃ ଯାବ୍ଦୀ ରାଃ ହୋନ୍ ୟାକୁବ୍, ଆଡୋଃ ଇନିଜାଃ ହାଗା ଯୋହାନ୍ କେ, ଡୋଙ୍ଗା ରେ ଜାଲୋମ୍ କେ ସୁଧ୍‍ରାଓ ତାନ୍ ନେଲ୍ କେଃକୋୱାଏ। 20ଚିଲ୍‍କା ଇନ୍‍କୁକେ ନେଲ୍ କେଃକୋୱାଏ ଇନିଃ ଇମ୍ତାଗି ଇନ୍‍କୁକେ କାଜିକେଃକୋୱାଏ, “ଇଙ୍ଗ୍‍କେ ଅତୋଙ୍ଗିଙ୍ଗ୍ ପେ।” ଆଡୋଃ ଇନ୍‍କୁ ଆକୋୱାଃ ଆପୁ ଯାବ୍ଦୀ କେ ନାଲାତାନ୍ କୋଲୋଃ ଡୋଙ୍ଗା ରେ ବାଗିକେତେ, ଇନିଃକେ ଅତୋଙ୍ଗ୍ କିଜାକୋ।

ବୋଙ୍ଗାଆତ୍ମା ଏସେର୍‍କାନ୍ ନିଜାଃ ଛୋଡ଼ାଓ

(ଲୁକା. 4:31-37)

21ଏନ୍ତେ ଇନ୍‍କୁ କାଫାର୍ନାହୁମ୍ ସାହାର୍ ତେ ହିଜୁଃ ନାକୋ, ଆଡୋଃ ୟୀଶୁ ସେକାଡ଼୍ ଗି ୟାହୁଦୀ କୋୱାଃ ଆରାମେ ହୁଲାଙ୍ଗ୍ ଆକୋୱାଃ ବିନ୍ତିଅଡ଼୍ଆଃ ରେ ସେନ୍ କେତେ ଶିଖାଅ ଏଟେଃ କେଦାଏ। 22ହାର୍ ହୋଡ଼ୋକୋ ଇନିଜାଃ ଶିଖାଅ କାଜିତେ ଆକ୍‍ଦାନ୍ଦା ଜାନାକୋ, ଚିୟାଃଚି ଇନିଃ ଇନ୍‍କୁକେ ଆଇନ୍ ଗୁରୁକୋ ଲେକା କାହା, ମେନ୍ଦୋ ଆଧିକାରୀ କୋ ଲେକା ଶିଖାଅ କୋତାଇନାଏ। 23ଚିମ୍ତା ୟୀଶୁ ଶିଖାଅ କୁତାଇନାଏ, ଇମ୍ତାଗି ଇନ୍‍କୁୱାଃ ବିନ୍ତିଅଡ଼୍ଆଃ ରେ ମିହୋଡ଼୍ ହୋଡ଼ ତାଇକେନାଏ, ଇନିଃକେ ମିୟାଃ ବୋଙ୍ଗାଆତ୍ମା ଏସେର୍ ଲିଜାଏ। 24ଇନିଃ କାଉରି କେତେ କାଜିକେଦାଏ, “ହେ ୟୀଶୁ ନାଜ୍ରେଥିୟା, ଆଲେୟାଃ ଲୋଃ ଆମ୍ ଚିନାଃ ସାନାଙ୍ଗ୍ ତାନାମ୍? ଚିନାଃ ଆଲେକେ ଆମ୍ ନାଷ୍ଟ୍ ଲାଗିନାମ୍ ହିଜୁଃ କାନା? ଇଙ୍ଗ୍ ଆମ୍‍କେ ସାରିୟାଇଙ୍ଗ୍, ଆମ୍ ଅକଏ ତାନ୍‍ମେ? ପାର୍ମେଶ୍ଵାର୍ ରାଃ ପାବିତାର୍ ହୋନ୍! ଅକନିଃ ପାର୍ମେଶ୍ଵାର୍ ଏତେ ହିଜୁଃ କାନାଏ।” 25ୟୀଶୁ ଇନିଃକେ ଧାମ୍‍କାଅ କେତେ କାଜିକେଦାଏ, “ହାପା ତାଇନୋଃମେ! ଆଡୋଃ ଇନିଜାଃ ତେ ଅଡୋଙ୍ଗ୍ ମେ!” 26ଏଣ୍ଡେ ବୋଙ୍ଗାଆତ୍ମା ଇନିଃକେ ଆଇଣ୍ଠାଅ କେତେ, ହାର୍ ମାରାଙ୍ଗ୍ ଗି କାଉରି କେତେ ଇନିଜାଃ ତେ ଅଡୋଙ୍ଗ୍ ଜାନାଏ। 27ଏନାତେ ହୋଡ଼ୋକୋ ଆକ୍‍ଦାନ୍ଦା ତାନ୍ ଲୋଃ ଆକୋ-ଆକୋ ରେ ବାକାଣ୍ କେଦାକୋ, “ନେୟା ଚିଲ୍‍କାନ୍ କାଜି ତାନାଃ? ନେୟା ଦୋ ମିୟାଃ ନାୱା ଶିଖାଅକାଜି ତାନାଃ! ଇନିଃ ଆଧିକାର୍ ଲୋଃ ବୋଙ୍ଗାଆତ୍ମା କୋକେ ହ ଆନାଚୁ ଏମାକୁୱାଏ, ହାର୍ ଇନ୍‍କୁ ଇନିଜାଃ ଆନାଚୁ ଆୟୁମ୍ ୟାକୋ।” 28ଏନ୍ତେ ଇନ୍‍କୁ ଇନିଜାଃ ବିଷାୟ୍ ରେ ଏଟାଃ କୋକେ ଉଦୁବ୍ କେଦାକୋ, ଆଡୋଃ ସେକାଡ଼୍ ଗି ଗାଲିଲୀ ଜିଲ୍ଲା ରାଃ ସବେନ୍ ଜାଗାକୋ ରେ ହୋଡ଼ୋକୋ ଇନିଜାଃ ବିଷାୟ୍ ରେ ଆୟୁମ୍ କେଦାକୋ।

ବିମାରୀକୋକେ ଚାଙ୍ଗାଇ ରିକା

(ମାତ୍ତି. 8:14-17; ଲୁକା. 4:38-41)

29ଏନ୍ତେ ୟୀଶୁ ହାର୍ ଆଜାଃ ଚେଲାକୋ ୟାହୁଦୀ କୋୱାଃ ବିନ୍ତିଅଡ଼୍ଆଃ ଏତେ ଅଡୋଙ୍ଗ୍ କେତେ, ୟାକୁବ୍ ଆଡୋଃ ଯୋହାନ୍ ଲୋଃ ଶିମୋନ୍ ଆଡୋଃ ଆନ୍ଦ୍ରିୟାସ୍ ରାଃ ଅଡ଼୍ଆଃ ତେ ହିଜୁଃ ଲେନାକୋ। 30ଏନ୍ ସାମାୟ୍ ରେ ଶିମୋନ୍ ରାଃ ହାନାର୍ କିନ୍‍କେ ଉରୁୟୁ ସାବ୍ ଲିଜାଏ, ଆଡୋଃ ଆକିନ୍ ଗିତିଜାକାନ୍ ତାଇକେନାକିନ୍। ଆଡୋଃ ଚିମ୍ତା ୟୀଶୁ ଏନ୍ ଅଡ଼୍ଆଃ ଥେବାଃ ଜାନାଏ, ଇନ୍‍କୁ ଇମ୍ତାଗି ଆକିନାଃ ବିଷାୟ୍ ରେ ଇନିଃକେ ଉଦୁବ୍ କିଜାକୋ। 31ଏନ୍ତେ ୟୀଶୁ ଆକିନାଃ ନାଡ଼େଏ ସେନ୍ ଜାନାଏ, ହାର୍ ଆକିନାଃ ତିଈ ସାବ୍ କେତେ ବିରିଃ କିଜାଏ; ହାର୍ ଆକିନାଃ ଉରୁୟୁ ଆଡ଼୍‍ଗୁ ଜାନା, ଆଡୋଃ ଆକିନ୍ ଇନ୍‍କୁୱାଃ ସେୱା-ସୁସାର୍ ରିକା କେଦାକିନ୍। 32ଚିମ୍ତା ୟାହୁଦୀ କୋୱାଃ ଆରାମେ ହୁଲାଙ୍ଗ୍ ଛାବାଜାନା ହାର୍ ଶିଙ୍ଗି ଡୁବିଃ ଜାନା, ଏଣ୍ଡେ ହୋଡ଼ୋକୋ ସବେନ୍ ରାକାମ୍ ରାଃ ବେମାର୍ ତାନ୍ କୋକେ, ଆଡୋଃ ଇନ୍‍କୁକେ ଅକନ୍ କୋୱାଃ ରେ ବୋଙ୍ଗାଆତ୍ମାକୋ ତାଇକେନାକୋ, ୟୀଶୁ ରାଃ ନାଡ଼େଏ ଆଉକେଃକୋୱାକୋ। 33ଆଡୋଃ ସାହାର୍ ଏତେ ମିଃଥିମ୍ବା ହୋଡ଼ୋକୋ ହିଜୁଃକେତେ ଦୁହାର୍ ରେ ହୁଣ୍ଡି ଜାନାକୋ। 34ଆଡୋଃ ଇନିଃ ଥିମ୍ବାଗି ହୋଡ଼ୋକୋକେ ଅକନ୍‍କୋ ରାକାମ୍ ରାଃ ବେମାର୍ କୋତେ ଦୁକୁ ତାଇକେନାକୋ, ଚାଙ୍ଗାଇ କେଃକୋୱାଏ; ଆଡୋଃ ଥିମ୍ବାଗି ବୋଙ୍ଗାଆତ୍ମା କୋଏତେ ଏସେର୍‍କାନ୍ ହୋଡ଼ୋକୋକେ ଛୋଡ଼ାଓ କେଃକୋୱାଏ, ଆଡୋଃ ବୋଙ୍ଗାଆତ୍ମା କୋକେ କାଜି କାଏ ଏମ୍ କେଃକୋୱାଏ, ଚିୟାଃଚି ଇନ୍‍କୁ ଇନିଃ କେ ମାସୀହ୍ ତାନିଃ ମେନ୍ତେ ନେଲ୍ଉରୁମ୍ ତାଇକେନାକୋ।

ଗାଲିଲୀ ଜିଲ୍ଲା ରେ ୟୀଶୁ ରାଃ ପାର୍ଚାର୍

(ଲୁକା. 4:42-44)

35ଆଡୋଃ ସେତାଃ ଶିଙ୍ଗି ତୁର୍ ସିଦାରେ, ୟୀଶୁ ବିରିଃ କେତେ ଅଡୋଙ୍ଗ୍‍ନାଏ, ଆଡୋଃ ମିୟାଃ ସୁନ୍‍ସାନ୍ ଜାଗା ରେ ସେନ୍ ଜାନାଏ ହାର୍ ଏନ୍ତାଃରେ ବିନ୍ତି କେଦାଏ। 36ଏନ୍ତେ ଶିମୋନ୍ ଆଡୋଃ ଇନିଜାଃ ଗାତିକୋ ନେଲ୍ କେଦାକୋ ଚି ୟୀଶୁ କାଏ ନେଲୋଃ ତାନାଏ, ଦୋ ଇନିଃକେ ଦାଣା ନାଙ୍ଗ୍ ସେନ୍ ଜାନାକୋ। 37ଚିମ୍ତା ଇନିଃ ନାମ୍ ଜାନାଏ, ଏଣ୍ଡେ ଇନିଃକେ କାଜିକେଦାକୋ ଚି, “ଥିମ୍ବାଗି ହୋଡ଼ୋକୋ ଆମ୍‍କେ ଦାଣାମେ ତାନାକୋ।” 38ଇନିଃ ଇନ୍‍କୁକେ କାଜିକେଃକୋୱାଏ, “ଦୋଲା, ଆବୁ ଆଡୋଃ ଏଟାଃ ନାଡ଼େଏ ହାତୁ କୋରେ ସେନାଃବୁ, ଚି ଇଙ୍ଗ୍ ହେନ୍ତାଃ ରେହ ସୁସାମାଚାର୍ ପାର୍ଚାର୍ ରିକାୟାଇଙ୍ଗ୍, ଚିୟାଃଚି ଇଙ୍ଗ୍ ଏନାଲାଗିନ୍ ଗି ଅତେଦିଶୁମ୍ ରେ ହିଜୁଃ କାନିଙ୍ଗ୍।” 39ଏନ୍ତେ ୟୀଶୁ ଆଜାଃ ଚେଲାକୋଲୋଃ ଗାଲିଲୀ ଜିଲ୍ଲା ରେ ହୋନୋର୍ ତାନ୍ ଲୋଃ ୟାହୁଦୀ କୋୱାଃ ବିନ୍ତିଅଡ଼୍ଆଃ କୋରେ ସେନ୍-ସେନ୍ କେତେ ପାର୍ଚାର୍ କେଦାଏ, ଆଡୋଃ ବୋଙ୍ଗାଆତ୍ମା କୋଏତେ ଏସେର୍‍କାନ୍ ହୋଡ଼ୋକୋକେ ଛୋଡ଼ାଓ କେଃକୋୱାଏ।

ୟୀଶୁ କୋଢ଼୍ ବିମାରୀ କେ ବେଶ୍ କିଜାଏ

(ମାତ୍ତି. 8:1-4; ଲୁକା. 5:12-16)

40ଆଡୋଃ ଏନ୍ତାଃରେ ମିୟାଃ ହୋଡ଼ କେ କୋଢ଼୍ ବିମାର୍ ହୋବାଲେନା, ଇନିଃ ୟୀଶୁ ରାଃ ନାଡ଼େଏ ହିଜୁଃକେତେ, ଇନିଃକେ ଗୁହାରି କିଜାଏ, ହାର୍ ଇନିଜାଃ ନାଡ଼େଏ ଇକ୍ଡ଼ୁମ୍ କେତେ ଇନିଃକେ କାଜିକେଦାଏ, “ଆମ୍ ସାନାଙ୍ଗ୍ତାନ୍ ରେଦୋମ୍, ଇଙ୍ଗ୍‍କେ ବେଶ୍ ଧାଡ଼ିୟାମ୍।” 41ୟୀଶୁ ଇନିଃକେ ଦାୟା କେତେ ଇନିଜାଃ ରେ ତିଈ ମାଣ୍ଡାଅ କେଦାଏ, ହାର୍ କାଜିକେଦାଏ, “ଇଙ୍ଗ୍ ସାନାଙ୍ଗ୍ ତାନାଇଙ୍ଗ୍। ବେଶ୍ କେନୋଃମ୍!” 42ହାର୍ ଇମ୍ତାଗି ଇନିଃ କୋଢ଼୍ ବିମାର୍ ଏତେ ବେଶ୍ ଜାନାଏ। 43ଏନ୍ତେ ୟୀଶୁ ଇନିଃକେ କେଟେଃଗି ଆନାଚୁ କେତେ ଇମ୍ତାଗି ବିଦା କେତେ କାଜିକିଜାଏ, 44“ନେଲେମ୍, ଜେତାଏ କେ ଆଲୋମ୍ କାଜିୟା ଚି ଇଙ୍ଗ୍ ଆମ୍‍କେ ବେଶ୍ କାଃମେୟାଇଙ୍ଗ୍, ମେନ୍ଦୋ ସେନ୍ କେତେ ଆପାନ୍ କେ ୟାଜାକ୍ କେ ଦେଖାୱିମେ, ଆଡୋଃ ଆପେୟାଃ ବେଶ୍ ହୋବାଅଃ ବିଷାୟ୍ ରେ ଅକନାଃ ମୁଶା ନାବୀ ଠାହ୍‍ରାଓ କାଦାଏ ଏନାକେ ଭେଁଟ୍ ରାକାବେମେ, ଏନାତେ ସବେନ୍ କୋ ସାରିୟାକୋ ଚି ଆମ୍ ବେଶ୍ ଜାନାମ୍।” 45ମେନ୍ଦୋ ଇନିଃ ଏନ୍ ଜାଗା ତେ ଅଡୋଙ୍ଗ୍ କେତେ ନେ କାଜିକେ ଥିମ୍ବାଗି ହୋଡ଼ୋକୋକେ ଉଦୁବ୍ କେଃକୋୱାଏ। ଏନାରାଃ ଚାଲ୍ତେ, ୟୀଶୁ ଆଡୋଃ ହୋଡ଼ୋକୋୱାଃ ନେନେଲାନ୍ ରେ ଜାହାନ୍ ହାତୁ ରେ କାଏ ସେନ୍ ଧାଡ଼ିଜାନାଏ, ମେନ୍ଦୋ ସାହାର୍ ବାହାରି ସୁନ୍‍ସାନ୍ ଜାଗାକୋ ରେ ତାଇଜାନାଏ; ମେନ୍ଦୋ ହୋଡ଼ୋକୋ ସବେନ୍ ପାଡ଼୍ ତେ ଇନିଜାଃ ନାଡ଼େଏ ହିଜୁଃ ତାଇକେନାକୋ।

Currently Selected:

ମାର୍କୁସ୍ 1: UNXNT

Highlight

Copy