ମାତ୍ତିଉ 17

ୟୀଶୁ ରାଃ ରୂପ୍ ବାଦ୍‍ଲାଅ ଜାନା

(ମାର୍କୁ. 9:2-13; ଲୁକା. 9:28-36)

1ଛାଅ ଦିନ୍ ତାୟୋମ୍ତେ ୟୀଶୁ ପାତ୍ରାସ୍, ୟାକୁବ୍ ହାର୍ ଇନିଜାଃ ହାଗା ଯୋହାନ୍ କେ ମିଶାତେ ଇଦି କେତେ ଇନ୍‍କୁକେ ଗେନା କେତେ ମିୟାଃ ସାଲିଙ୍ଗି ବୁରୁ ଚେତାନ୍ ତେ ଇଦି କେଃକୋୱାଏ। 2ଏନ୍ତାଃରେ ଇନ୍‍କୁୱାଃ ସାମ୍‍ନାଙ୍ଗ୍ ରେ ଆଜାଃ ରୂପ୍ ବାଦ୍‍ଲାଅ ଜାନା, ହାର୍ ଆଜାଃ ମେଏଃମୁହାଡ଼୍ ଶିଙ୍ଗି ଲେକା ଚାମ୍‍କାଓ ଜାନା ହାର୍ ଇନିଜାଃ ଲିଜାଃ ବାତୀ ଲେକା ମାସ୍କାଲ୍ ଜାନା।

3ଆଡୋଃ ମୁଶା ନାବୀ ଆଡୋଃ ଏଲିୟା ନାବୀ ୟୀଶୁ ଲୋଃ ବାକାଣ୍ ତାନ୍‍ଲୋଃ ଇନ୍‍କୁକେ ନେଲ୍ ଜାନାକିନ୍। 4ଏନ୍ତେ ପାତ୍ରାସ୍ ୟୀଶୁ କେ କାଜିୟାଜାଏ, “ହେ ପ୍ରାଭୁ, ଆଲେୟାଃ ନେତାଃ ତାଇନ୍ ବେଶ୍ ତାନାଃ। ଆଗାର୍ ଆମ୍ ସାନାଙ୍ଗ୍ ରେଦୋ, ଇଙ୍ଗ୍ ନେତାଃ ରେ ଆପିୟା ମାଣ୍ଡ୍‍ୱା ବାଇୟାଇଙ୍ଗ୍, ମିୟାଃ ଆମାଃ ଲାଗିନ୍, ମିୟାଃ ମୁଶା ଲାଗିନ୍, ଆଡୋଃ ମିୟାଃ ଏଲିୟା ଲାଗିନ୍।”

5ଇନିଃ ନେ କାଜି କାଜିତାନ୍ ରେ ଗି, ନେଲେପେ, ମିୟାଃ ମାସ୍କାଲ୍ ରିମିଲ୍ ଇନ୍‍କୁକେ ଉମ୍ବୁଲ୍ କେଃକୋୱାଏ, ହାର୍ ଏନ୍ ରିମିଲ୍ ଏତେ ପାର୍ମେଶ୍ଵାର୍ ରାଃ ଆୱାଜ୍ ଆୟୁମ୍ ଜାନା, “ନିଈ ଇଙ୍ଗ୍ଆଃ ଦୁଲାଡ଼୍ ହୋନ୍ ତାନିଃ, ନିଈକେ ଇଙ୍ଗ୍ ସୁକୁକାନାଇଙ୍ଗ୍, ନିଜାଃ ଆୟୁମେପେ।” 6ଚେଲାକୋ ନେୟା ଆୟୁମ୍ ଲୋଃ ବୋଅ ତିରୁବ୍ କେତେ ହୋମ୍ବୋଃ ଉୟୁଃ ଜାନାକୋ ହାର୍ ଥିମ୍ବାଗି ବୋରୋଜାନାକୋ। 7ଏନ୍ତେ ୟୀଶୁ ନାଡ଼େଏ ହିଜୁଃକେତେ ଇନ୍‍କୁକେ ଜୁଟିଃ କେଃକୋୱାଏ, ହାର୍ କାଜିକେଃକୋୱାଏ, “ବିରିଃପେ, ଆଲୋପେ ବୋରୋୟା।” 8ଏନ୍ତେ ଇନ୍‍କୁ ଆକୋୱାଃ ମେଏଃ ଆରିଃ କେଦାକୋ ହାର୍ ୟୀଶୁ କେ ବାଗେ କେତେ ଆଡୋଃ ଜେତାଏ କେ କାକୋ ନେଲ୍ କେଦା।

9ଚିମ୍ତା ଇନ୍‍କୁ ବୁରୁ ଏତେକୋ ଆଡ଼୍‍ଗୁନ୍ ତାଇନା ଇମ୍ତାଙ୍ଗ୍ ୟୀଶୁ ଇନ୍‍କୁକେ ନେୟା ଆନାଚୁ ଏମାଃ କୋୱାଏ, “ଚିମିନ୍ ସାନ୍ ଇଙ୍ଗ୍ ମାନ୍‍ୱା ରାଃ ହୋନ୍ ଗୋଜାକାନ୍ କୋଏତେ କାଇଙ୍ଗ୍ ବୀରିଦା, ଏନ୍ ସାନ୍ତେ ଅକନାଃ ଆପେ ପେ ନେଲା କାଦା ଏନା ଅକଏ କେହ ଆଲୋପେ କାଜିୟା।” 10ଏନ୍ତେ ଇନିଜାଃ ଚେଲାକୋ ଇନିଃକେ କୁଲିକିଜାକୋ, “ଏଣ୍ଡେ ଆଇନ୍ ଗୁରୁକୋ ଚିନାଃ ମେନେଃ କାଜିୟାକୋ ଚି ଏଲିୟା ନାବୀ ରାଃ ସିଦା ହିଜୁଃ ଜାଲେକାତେ ମେନାଃ?”

11ୟୀଶୁ କାଜିରୁଆଡ଼୍ କେଃକୋୱାଏ, ଏଲିୟା ଜାଲେକାତେ ଗି ହିଜୁଗାଏ, ଆଡୋଃ ସବେନାଃ ବାଇରୁଆଡ଼୍‍ୟାଏ। 12ମେନ୍ଦୋ ଇଙ୍ଗ୍ ଆପେକେ କାଜିୟାପେ ତାନିଙ୍ଗ୍, ଚି ଏଲିୟା ହିଜୁଃ ଛାବାନାଏ, ଆଡୋଃ ହୋଡ଼ୋକୋ ଆଏଃକେ କାକୋ ନେଲ୍ଉରୁମ୍ କିଜା; ମେନ୍ଦୋ ଚିଲ୍‍କା କୋ ସାନାଙ୍ଗ୍ କେଦା ଏନ୍ କାଗି ଇନିଜାଃ ଲୋଃ କୋ ରିକାକେଦା। ନେଲେକାଗି ଇଙ୍ଗ୍ ମାନ୍‍ୱା ରାଃ ହୋନ୍ ହଗି ଇନ୍‍କୁୱାଃ ତିଈ ତେ ଦୁକୁ ସାହାତିଙ୍ଗ୍ ୟାଇଙ୍ଗ୍। 13ଏନ୍ତେ ଚେଲାକୋ ବୁଝାଅ ଜାନାକୋ ଚି ଇନିଃ ଆବୁକେ ଯୋହାନ୍ ବାପ୍ତିସ୍ମା ଏମ୍‍ନିଜାଃ ବିଷାୟ୍ ରେ କାଜିକେଦାଏ।

ବୋଙ୍ଗାଆତ୍ମା ତେ ଏସେର୍କାନ୍ କୋଡ଼ାହୋନ୍ ରାଃ ବେଶ୍ ହୋବା

(ମାର୍କୁ. 9:14-29; ଲୁକା. 9:37-43)

14ଚିମ୍ତାଙ୍ଗ୍ ୟୀଶୁ ଆଡୋଃ ଆଜାଃ ଆପିୟା ଚେଲାକୋ ବାକି ଚେଲା କୋତାଃ ହାର୍ ମିଃଥିମ୍ବା ହୋଡ଼ୋକୋ ତାଃ ସେଟେର୍ ଜାନାକୋ ଦୋ ମିୟାଃ ହୋଡ଼ ଇନ୍‍କୁୱାଃ ନାଡ଼େଏ ହିଜୁଃ ଲେନାଏ, ଆଡୋଃ ଇକ୍ଡ଼ୁମ୍ କେତେ କାଜିକେଦାଏ, 15“ହେ ପ୍ରାଭୁ, ଇଙ୍ଗ୍ଆଃ ହୋନ୍‍କଡ଼ା ଚେତାନ୍ ରେ ଦାୟା କେତେ ବେଶ୍ ତାଇମେ! ଚିୟାଃଚି ଇନିଃ ମିର୍ଗି ବେମାର୍ ଏତେ ଥିମ୍ବାଗି ଦୁକୁ ସାହାତିଙ୍ଗ୍ ତାନାଏ, ଆଡୋଃ ଘାଡ଼ି-ଘାଡ଼ି ସେଙ୍ଗେଲ୍ ରେ ଆଡୋଃ ଘାଡ଼ି-ଘାଡ଼ି ଦାଆ ରେ ଉୟୁଗୋଃ ତାନାଏ। 16ଇଙ୍ଗ୍ ଇନିଃକେ ଆମାଃ ଚେଲା କୋୱାଃ ନାଡ଼େଏ ଆଉଲିଜାଇଙ୍ଗ୍, ମେନ୍ଦୋ ଇନ୍‍କୁ ଇନିଃକେ କାକୋ ବେଶ୍ ଧାଡ଼ିଜାନା।”

17ୟୀଶୁ କାଜିରୁଆଡ଼୍ କେଃକୋୱାଏ, “ହେ ଆବିଶ୍ଵାସୀ ଆଡୋଃ ସେଠ୍ରା ହୋଡ଼ୋକୋ, ଇଙ୍ଗ୍ ଚିଉଲା ସାନ୍ତେ ଆପେୟାଃ ଲୋଃ ତାଇନାଇଙ୍ଗ୍? ଚିମିନ୍ ସାନ୍ତେ ଆପେୟାଃ ସାହାତିଙ୍ଗ୍ ୟାଇଙ୍ଗ୍? ଇନିଃକେ ନେତାଃ ଇଙ୍ଗ୍ଆଃ ନାଡ଼େଏ ଆୱିପେ।” 18ଏନ୍ତେ ୟୀଶୁ ବୋଙ୍ଗାଆତ୍ମା କେ ଏଗେର୍ କିଜାଏ, ଆଡୋଃ ଇନିଃ ଇନିଜେତେ ଅଡୋଙ୍ଗ୍ ଜାନାଏ, ଏନ୍ତେ କଡ଼ାହୋନ୍ ଇମ୍ତାଗି ବେଶ୍ ଜାନାଏ।

19ଏନ୍ତେ ଚେଲାକୋ ଏସ୍କାର୍ ଇମ୍ତାଙ୍ଗ୍ ୟୀଶୁ ତାଃ ହିଜୁଃକେତେ କାଜିକେଦାକୋ, “ଆଲେ ଇନିଃକେ ଚିନାଃ ମେନ୍ତେ କାଲେ ଅଡୋଙ୍ଗ୍ ଧାଡ଼ିଜାନା?” 20ଇନିଃ ଇନ୍‍କୁକେ କାଜିୟାଃକୋୱାଏ, “ଆପେୟାଃ କାଟିଃ ବିଶ୍ୱାସ୍ ରାଃ ହୋରାତେ, ଚିୟାଃଚି ଇଙ୍ଗ୍ ଆପେକେ ସାର୍ତିଗୀ କାଜିୟାପେ ତାନିଙ୍ଗ୍, ଆଗାର୍ ଆପେୟାଃ ବିଶ୍ଵାସ୍ ମାନି ରାଃ ଯାଙ୍ଗ୍ ଲେକା ତାଇନ୍ ରେଦୋ, ନେ ବୁରୁ କେ କାଜି ଧାଡ଼ିୟାପେ, ନେତାଃ ଏତେ ହାନ୍ତାଃ ସେନୋଃମେ, ଦୋ ଏନା ସେନୋଃ କେନୋଗା, ଆଡୋଃ ଜେତାନ୍ କାଜି ଆପେୟାଃ ଲାଗିନ୍ତେ କାଧାଡ଼ିଲେକା କା ତାଇନା। 21ମେନ୍ଦୋ ନେ ଲେକାନ୍ ବୋଙ୍ଗା ବେଗାର୍ ବିନ୍ତି ଆଡୋଃ ଉପାସ୍ ତେ ଏଟାଃ ଜାହାନ୍ ଲେକାତେ କାଏ ଅଡୋଙ୍ଗୋଗା।”

ୟୀଶୁ ଆଜାଃ ଗୋନୋଏଃ ବିଷାୟ୍ ରେ ଆଡୋଃ ମିଶା ଆୟାର୍ କାଜି

(ମାର୍କୁ. 9:30-32; ଲୁକା. 9:43-45)

22ଚିମ୍ତା ଇନ୍‍କୁ ଗାଲିଲୀ ଜିଲ୍ଲା ରେ ତାଇକେନାକୋ, ୟୀଶୁ ଇନ୍‍କୁକେ କାଜିୟାଃକୋୱାଏ, “ଇଙ୍ଗ୍ ମାନ୍‍ୱା ରାଃ ହୋନ୍ ହୋଡ଼ୋକୋୱାଃ ତିଈ ରେ ସାବୋଃ ଗାଇଙ୍ଗ୍। 23ଇନ୍‍କୁ ଇଙ୍ଗ୍‍କେ ଗୋଜିଙ୍ଗ୍‍ୟାକୋ, ହାର୍ ଇଙ୍ଗ୍ ଆପି ହୁଲାଙ୍ଗ୍ ରେ ଜୀହିଃ ବୀରିଦୋଗାଇଙ୍ଗ୍।” ନେୟାରେ ଇନ୍‍କୁ ଥିମ୍ବାଗି ଦୁକୁ ଜାନାକୋ।

ମାନ୍ଦିର୍ ରାଃ ମାଲ୍-ଟାକା

24ଚିମ୍ତା ଇନ୍‍କୁ କାଫାର୍ନାହୁମ୍ ସାହାର୍ ସେଟେର୍ ଜାନାକୋ, ଦୋ ମାନ୍ଦିର୍ ରାଃ ମାଲ୍-ଟାକା ହାରୋମ୍ ତାନ୍‍କୋ ପାତ୍ରାସ୍ ତାଃ ହିଜୁଃକେତେ କୁଲିକିଜାକୋ, ଚି ଚିନାଃ ଆମାଃ ଗୁରୁ ମାନ୍ଦିର୍ ରାଃ ମାଲ୍-ଟାକା କାଏ ଏମ୍ ତାନାଏ? 25ଇନିଃ କାଜିକେଦାଏ “ହାଁ ଏମ୍ ତାନାଏ।” ଚିମ୍ତା ଇନିଃ ଅଡ଼୍ଆଃ ହିଜୁଃ ଲେନାଏ, ଦୋ ୟୀଶୁ ଇନିଜାଃ କୁଲି ସିଦାରେ ଗି ଇନିଃକେ କାଜିକେଦାଏ “ହେ ଶିମୋନ୍ ଆମ୍ ଚିନାଃ ପାହୋମ୍ ତାନାମ୍? ଅତେ ରେନ୍ ରାଜା ବାଜାର୍ ମାଲ୍ ହାରୋମ୍ ଟାକା ୟା ମାଲ୍-ଟାକା ଅକେୟାଃ ତେ ଇଦିୟାଏ? ଆପାନାଃ ହୋନ୍ କୋଏତେ ଚି ଏଟାଃ କୋଏତେ?”

26ପାତ୍ରାସ୍ ଇନିଃକେ କାଜିକିଜାଏ, “ଏଟାଃ କୋଏତେ।” ୟୀଶୁ ଇନିଃକେ କାଜିକିଜାଏ, “ଦୋ ହୋନ୍‍କୋ ବାଚାଓ ଜାନାକୋ। 27ଏଣ୍ଡେୟଗି ଏନାମେନ୍ତେ ଚି ଆବୁ ଇନ୍‍କୁ କେ କାବୁ ଖିସ୍ ଏମାକୋୱା, ଆମ୍ ସାମୁଦାର୍ ଗେନା ରେ ସେନ୍‍କେତେ ବାଣ୍‍ସୀ ଉୟୁଗେମ୍ ଆଡୋଃ ଅକନ୍ ହାକୁ ସିଦା ପାଶେ ଅଗାଏ, ଇନିଃକେ ସାବିମ୍; ଇନିଜାଃ ମୋଚା ଖଲାଅ ରେ ରୂପା ରାଃ ମିୟାଃ ଟାକା ଆମ୍‍କେ ନାମୋଗା, ଏନାକେ ଇଦିକେତେ ଇଙ୍ଗ୍ଆଃ ହାର୍ ଆମାଃ ଲାଗିନ୍ ଇନ୍‍କୁକେ ଏମାକୋମ୍।”

Currently Selected:

ମାତ୍ତିଉ 17: UNXNT

Highlight

Copy