ମାତ୍ତିଉ 13

ହିତା ହେର୍‍ନିଃ ରାଃ ଜୋନୋକା

(ମାର୍କୁ. 4:1-9; ଲୁକା. 8:4-8)

1ଏନ୍ ହୁଲାଙ୍ଗ୍ ଗି ୟୀଶୁ ଅଡ଼୍ଆଃ ଏତେ ଅଡୋଙ୍ଗ୍ କେତେ ଗାଲିଲୀ ସାମୁଦାର୍ ଗେନା ରେ ଦୁବ୍ ଜାନାଏ। 2ହାର୍ ଇନିଜାଃ ନାଡ଼େଏ ରେ ମିଃଥିମ୍ବା ହୋଡ଼ୋକୋ ହୁଣ୍ଡି ଜାନାକୋ, ଏନାମେନ୍ତେ ଇନିଃ ଡୋଙ୍ଗା ରେ ରାକାବ୍ ଜାନାଏ, ହାର୍ ସବେନ୍ ମିଃଥିମ୍ବା ହୋଡ଼ୋକୋ ଗେନା ରେ ତିଙ୍ଗୁ ଲେନ୍ ତାଇକେନାକୋ।

3ଏନ୍ତେ ଇନିଃ ଇନ୍‍କୁକେ ଜୋନୋକା ଲେକାତେ ବାହୁତ୍ ଗି କାଜିକୋ କାଜିକେଃକୋୱାଏ, “ନେଲେପେ, ମିୟାଃ ହେର୍‍ନିଃ ହିତା ହେର୍ ଅଡୋଙ୍ଗ୍ ଜାନାଏ। 4ହେର୍ ସାମାୟ୍ ଚିମିନାଙ୍ଗ୍ ହିତା ହୋରା ରାଃ ଗେନା ରେ ଉୟୁଃଜାନା ହାର୍ ଅଡ଼େକୋ ହିଜୁଃକେତେ ଏନ୍ ହିତା କୋକେ ଜୋମ୍ କେଦାକୋ। 5ଚିମିନାଙ୍ଗ୍ ହିତା ଦିରିଅତେ ରେ ଉୟୁଃଜାନା, ଏନ୍ତାଃରେ ଏନାକେ ଥିମ୍ବା ହାସା କାନାମ୍‍ଜାନା, ହାର୍ ଏନା ଥିମ୍ବା ହାସା କା ନାମେ ରାଃ ହୋରାତେ ଏନା ସେକାଡ଼୍ ଗି ଅମୋନ୍ ଜାନା। 6ମେନ୍ଦୋ ଶିଙ୍ଗି ଅଡୋଙ୍ଗ୍ ଲୋଃ ଏନା ଗୋସୋ ଜାନା ହାର୍ ରେହେଃ କା ସାବେ ରାଃ ହୋରାତେ ରୋହଡ଼୍ ଜାନା।

7ଚିମିନାଙ୍ଗ୍ ହିତା ଜାନୁମ୍ ବୁଟା ରେ ଉୟୁଃଜାନା ହାର୍ ଜାନୁମ୍ ବୁଟା କୋ ହାରା ଜାନା ହାର୍ ଏନାକୋକେ ତୋପା କେଦାଏ। 8ମେନ୍ଦୋ ଚିମିନାଙ୍ଗ୍ ହିତା ବେଶ୍ ଅତେ ରେ ଉୟୁଃଜାନା, ହାର୍ ଯଅ ଜାନା ଅକନାଃ ଶାଅ ଗୁନା ଅକନାଃ ସାଠ୍ ଗୁନା ହାର୍ ଅକନାଃ ତିସ୍ ଗୁନା। 9ଅକେୟାଃ ଲୁତୁର୍ ମେନାଃ ଇନିଃ ଆୟୁମେ କାଏ।”

ଜୋନୋକା କାଜି ରାଃ ମାନେ

(ମାର୍କୁ. 4:10-12; ଲୁକା. 8:9,10)

10ଏନା ତାୟୋମ୍ତେ ଚେଲାକୋ ନାଡ଼େଏ ହିଜୁଃକେତେ ଇନିଃକେ କାଜିକିଜାକୋ, “ଚିନାଃ ଲାଗିନ୍ ଆମ୍ ହୋଡ଼ୋକୋ ଲୋଃ ଜୋନୋକା ଲେକାତେ ବାକାଣ୍ ୟାମ୍?” 11ଇନିଃ କାଜିରୁଆଡ଼୍ କେଦାଏ, “ଆପେକେ ସିର୍ମାଦିଶୁମ୍ ରାଃ ରାଇଜ୍ ରାଃ ଉକୁକାନ୍ କାଜି ରାଃ ସେଣା ଏମାକାନା, ମେନ୍ଦୋ ଇନ୍‍କୁକେ କାହା। 12ଚିୟାଃଚି ଅକଏ ତାଃ ରେ ଆତ୍ମିକ୍ ସେଣା ମେନାଃ ଇନିଃକେ ଥିମ୍ବା ଏମୋଗା, ହାର୍ ଇନିଃତାଃ ରେ ମିଃଥିମ୍ବା ହୋବାଅଗା, ମେନ୍ଦୋ ଅକଏ ତାଃରେ ଆତ୍ମିକ୍ ସେଣା ବାନୋଗା, ଇନିଃତାଃ ଏତେ ଅକନାଃ ଇନିଜାଃ ତାଃ ରେ ମେନାଃ ଏନା ହଗି ଇଦିୟୋଗା।

13ଇଙ୍ଗ୍ ଇନ୍‍କୁ ଲୋଃ ଜୋନୋକା ଲେକାତେ ଏନ୍ ଲାଗିନ୍ତେ କାଜିୟାଇଙ୍ଗ୍, ଚି ଇନ୍‍କୁ ନେଲ୍‍ତାନ୍ ରେ ହଗି କାକୋ ନେଲ୍‍ତାନା, ହାର୍ ଆୟୁମ୍‍ତାନ୍ ରେ ହଗି କାକୋ ଆୟୁମେତାନା, ହାର୍ କାକୋ ବୁଝାଅଃ ତାନା।

14ଇନ୍‍କୁୱାଃ ବିଷାୟ୍ ରେ ୟାଶାୟାହ୍ ନାବୀ ରାଃ ନେ ଆୟାର୍‍କାଜି ପୁରାଅଃ ତାନା,

‘ଆପେ ଲୁତୁର୍ ତେଦୋ ପେ ଆୟୁମେୟା, ମେନ୍ଦୋ କାପେ ବୁଝାଅଃୱା,

ହାର୍ ମେଏଃ ତେଦୋ ପେ ନେଲେୟା ମେନ୍ଦୋ କାପେ ନେଲ୍ ଉରୁମେୟା।

15ଚିୟାଃଚି ନେ ହୋଡ଼ୋକୋୱାଃ ମୋନ୍ କେଟେଃ ଛାବାକାନା

ହାର୍ ଇନ୍‍କୁୱାଃ ଲୁତୁର୍ ରେ ଜୋର୍ ତେ କାଜି ରେ ଆୟୁମ୍ ୟାକୋ

ହାର୍ ଇନ୍‍କୁ ଆକୋୱାଃ ମେଏଃ କୋକେ ଜାପିଃ କାଦାକୋ,

କାରେଦୋ ଇନ୍‍କୁ ମେଏଃ ତେ ନେଲ୍‍ତେକୋ,

ହାର୍ ଲୁତୁର୍ ତେ ଆୟୁମ୍‍ତେକୋ,

ହାର୍ ମୋନ୍ ତେ ବୁଝାଅଃ ତେକୋ,

ହାର୍ ରୁଆଡ଼୍ କେନୋଃ ତେକୋ,

ଆଡୋଃ ଇଙ୍ଗ୍ ଇନ୍‍କୁକେ ଚାଙ୍ଗାଇ କୋତେୟାଃଇଙ୍ଗ୍।’

16ମେନ୍ଦୋ ଧାନ୍ୟା ତାନାଃ ଆପେୟାଃ ମେଏଃ, ଚି ଏନା ନେଲ୍‍ତାନାଏ, ହାର୍ ଆପେୟାଃ ଲୁତୁର୍ ଚି ଏନା ଆୟୁମ୍ ତାନାଏ। 17ଚିୟାଃଚି ଇଙ୍ଗ୍ ଆପେକେ ସାର୍ତିଗୀ କାଜିୟାପେ ତାନିଙ୍ଗ୍ ଚି ଥିମ୍ବାଗି ନାବୀ କୋ ହାର୍ ଧାର୍ମୀକୋ ସାନାଙ୍ଗ୍ କେଦାକୋ ଚି ଅକନ୍ କାଜିକୋ ଆପେ ନେଲ୍ ତାନାପେ, ନେଲେୟାକୋ ମେନ୍ଦୋ କାକୋ ନେଲ୍‍କେଦା, ହାର୍ ଅକନ୍ କାଜି ଆପେପେ ଆୟୁମ୍ ତାନା, ଆୟୁମ୍ ସାନାଙ୍ଗ୍ କେନାକୋ ମେନ୍ଦୋ କାକୋ ଆୟୁମ୍‍କେଦା।”

ହିତା ହେର୍‍ନିଃ ରାଃ ଜୋନୋକା କେ ବୁଝାଅ

(ମାର୍କୁ. 4:13-20; ଲୁକା. 8:11-15)

18“ନାଆ ଆପେ ହେର୍‍ନିଃ ରାଃ ଜୋନୋକା ରାଃ ମାନେ ଆୟୁମ୍ ଏପେ, 19ଅକଏ ପାର୍ମେଶ୍ଵାର୍ ରାଃ ରାଇଜ୍ ରାଃ ବାଚାନ୍ କେ ଆୟୁମ୍‍କେତେ କାଏ ବୁଝାଅଃ ତାନାଏ, ଇନିଜାଃ ମୋନ୍ ରେ ଅକନାଃ ହେର୍ ଲେନ୍ ତାଇନା, ଏନାକେ ଏନ୍ ଦୁଷ୍ଟ ଶାଏତାନ୍ ହିଜୁଃକେତେ ରେଏଃ କେୟାଏ। ନିଈ ଇନିଃ ତାନିଃ, ଅକନାଃ ହୋରା ଗେନା ରେ ହେର୍ ଲେନ୍ ତାଇନା।

20ହାର୍ ଅକନାଃ ଦିରିଅତେ ରେ ହେର୍ ଲେନ୍ ତାଇନା, ଇନିଃ ନିଈ ତାନିଃ, ଅକନିଃ ବାଚାନ୍ କେ ଆୟୁମ୍‍କେତେ ଇମ୍ତାଗି ରାଶିକା ଲୋଃ ମାନାତିଙ୍ଗ୍ କେୟାଏ। 21ମେନ୍ଦୋ ଆଜାଃ ରେ ରେହେଃ କା ସାବେ ରାଃ ହୋରାତେ ଇନିଃ ହୁଡିଙ୍ଗ୍ ଦିନ୍ ଲାଗିନ୍ ତାନିଃ, ହାର୍ ଚିମ୍ତାଙ୍ଗ୍ ବାଚାନ୍ ରାଃ ହୋରାତେ ସାସାତି ହାର୍ ସାତାଅ ହୋବାୱା, ଦୋ ଇମ୍ତାଗି ବିଶ୍ଵାସ୍ କେ ବାଗେ କେୟାଏ।

22ଆଡୋଃ ଅକନାଃ ଜାନୁମ୍ ବୁଟା ରେ ହେର୍ ଲେନା, ଇନିଃ ନିଈ ତାନିଃ, ଅକଏ ବାଚାନ୍ କେ ଆୟୁମ୍ ତାନାଏ, ମେନ୍ଦୋ ନେ ଅତେଦିଶୁମ୍ ରେ ଜୀହିଃ ରାଃ ଚିନ୍ତା, ହାର୍ କିଶାଣ୍ ବାଇୟେନ୍ ଲାଗିନ୍ ଦୁଲାଡ଼୍ ବାଚାନ୍ କେ ଅତାତୋପା କେୟାଏ, ହାର୍ ଇନିଃ କାଏ ଯଅ ୱାଏ। 23ଅକନାଃ ବେଶ୍ ଅତେ ରେ ହେର୍ ଜାନା, ଇନିଃ ନିଈ ତାନିଃ, ଅକଏ ବାଚାନ୍ ଆୟୁମ୍‍କେତେ ବୁଝାଅଃ ତାନାଏ, ହାର୍ ଯଅ ଆଉ ତାନାଏ; ଅକଏ ଶାଅ ଗୁନା, ଅକଏ ସାଠ୍ ଗୁନା, ହାର୍ ଅକଏ ତିସ୍ ଗୁନା।”

ତାସାଃ ରାଃ ଜୋନୋକା

24ୟୀଶୁ ଇନ୍‍କୁକେ ମିୟାଃ ଆଡୋଃ ଜୋନୋକା କାଜିକେଃକୋୱାଏ, “ସିର୍ମାଦିଶୁମ୍ ରାଃ ରାଇଜ୍ ଏନ୍ ଚାଷୀହୋଡ଼୍ ରାଃ ଲେକା ତାନାଃ ଅକନିଃ ଆଜାଃ ଅତେ ରେ ବେଶ୍ ହିତା ହେର୍ କେଦାଏ। 25ମେନ୍ଦୋ ଚିମ୍ତାଙ୍ଗ୍ ହୋଡ଼ୋକୋ ଦୁଣୁମ୍ ତାଇନାକୋ ଇମ୍ତାଙ୍ଗ୍ ଇନିଜାଃ ବାଇରୀ ହିଜୁଃକେତେ ଗହମ୍ ରାଃ ଥାଲା ରେ ତାସାଃ ହେର୍ କେତେ ସେନୋଃ ଜାନାଏ। 26ଚିମ୍ତାଙ୍ଗ୍ ଅମୋନ୍ ଜାନା ହାର୍ ଗେଲେ ଜାନା, ଦୋ ତାସାଃ ରାଃ ବୁଟାକୋ ହଗି ନେଲ୍ ଜାନା।

27ଏନାମେନ୍ତେ ଅତେ ରେନ୍ ମାଲିକ୍ ରାଃ ଦାସୀକୋ ହିଜୁଃକେତେ ଇନିଃକେ କାଜିକିଜାକୋ, ‘ହେ ଗୋମ୍‍କେ, ଚିନାଃ ଆମ୍ ଆମାଃ ଅତେ ରେ ବେଶ୍ ହିତା ହେର୍ ଲାଗିନ୍ତେ କାମ୍ ଏମ୍ ଲେଃ ତାଇନା? ଏଣ୍ଡେ ତାସାଃ ରାଃ ବୁଟା ଏନାରେ କୋତାଃ ଏତେ ହିଜୁଃଲେନା?’ 28ଇନିଃ ଇନ୍‍କୁକେ କାଜିକେଃକୋୱାଏ, ‘ନେୟା ମିୟାଃ ବାଇରୀ ରାଃ କାମି ତାନାଃ।’ ଦାସୀକୋ ଇନିଃକେ କାଜିକିଜାକୋ, ଚିନାଃ ଆମ୍ ସାନାଙ୍ଗ୍ ତାନାମ୍ ଚି ଆଲେ ସେନ୍ କେତେ ଏନାକେ ହେଡ଼େଦ୍ ହୁଣ୍ଡି ଆଲେ?

29ଇନିଃ କାଜିୟାଃକୋୱାଏ, ‘କାହା, ଏନ୍‍ଲେକା ଆଲୋପେ ରିକାଏ କାରେଦୋ ତାସାଃ ବୁଟା ହେଡ଼େଦ୍ ତାନ୍‍ଲୋଃ ଆପେ ଏନା ଲୋଃ ଗହମ୍ କେ ହଗି ତୁଃ ତାଃପେ। 30ଇରଃ ସାନ୍ତେ ବାରାନାଃ କେ ମିଶାତେ ହାରା ରିକାଏପେ, ହାର୍ ଇରଃ ସାମାୟ୍ ରେ ଇର୍‍ତାନ୍ କୋକେ କାଜିୟା କୋୱାଇଙ୍ଗ୍ ଚି ସିଦା ତାସାଃ ରାଃ ବୁଟାକେ ଥାଇଃ ହୁଣ୍ଡି କେତେ ଜୁଲ୍ ଲାଗିନ୍ତେ ଏନାକେ ମୁଠିଆ ଥୋଲେପେ, ହାର୍ ଗହମ୍ କୋକେ ଇଙ୍ଗ୍ଆଃ ପୋଟୋମ୍ ଅଡ଼୍ଆଃ ରେ ହୁଣ୍ଡି ପେ।’”

ମାନି ଯାଙ୍ଗ୍ ରାଃ ଜୋନୋକା

(ମାର୍କୁ. 4:30-32; ଲୁକା. 13:18,19)

31ଏନ୍ତେ ୟୀଶୁ ଇନ୍‍କୁକେ ଆଡୋଃ ମିୟାଃ ଜୋନୋକା କାଜିକେଃକୋୱାଏ, ସିର୍ମାଦିଶୁମ୍ ରାଃ ରାଇଜ୍ ମାନି ରାଃ ମିୟାଃ ଯାଙ୍ଗ୍ ଲେକା ତାନାଃ, ଏନାକେ ମିୟାଃ ହୋଡ଼ ଇଦିକେତେ ଆଜାଃ ଅତେ ରେ ହେର୍ କେଦାଏ। 32ଏନା ସବେନ୍ ହିତା କୋଏତେ ଦୋ ହୁଡିଙ୍ଗ୍ଆ। ମେନ୍ଦୋ ଚିମ୍ତା ହାରା କେନୋଃୱା, ଇମ୍ତା ସବେନ୍ ଆଡ଼ାଆଃ-ସାକାମ୍ କୋଏତେ ମାରାଙ୍ଗ୍ ହୋବାଅଃୱା, ହାର୍ ନେକା ଦାରୁ ବାଇକେନୋଗା ଚି ରିମିଲ୍‍ଦିଶୁମ୍ ରେନ୍ ଅଡ଼େକୋ ହିଜୁଃକେତେ ଏଣ୍ଡେରାଃ କୋତୋକୋ ରେ ତୂକାକୋ ବାଇୟାକୋ।

ଖାମୀର୍ ରାଃ ଜୋନୋକା

(ଲୁକା. 13:20,21)

33ଏନ୍ତେ ୟୀଶୁ ମିୟାଃ ଆଡୋଃ ଜୋନୋକା ଇନ୍‍କୁକେ ଉଦୁବ୍ କେଃକୋୱାଏ, “ସିର୍ମାଦିଶୁମ୍ ରାଃ ରାଇଜ୍ ଖାମୀର୍ ରାଃ ଲେକା ତାନାଃ ଅକନାଃକେ ମିୟାଃ କୁଡ଼ି ଇଦିକେତେ ଆପି ନାପ୍ ଆଟା ରେ ମେଶା କେଦାଏ ହାର୍ ଏନା ସବେନାଃ ଖାମୀର୍ ମେଶା ହୋବାଅଃ ସାନ୍ତେ ସିପୁଃ କେଦାଏ।”

ଜୋନୋକା ହାର୍ ଆୟାର୍ କାଜି

(ମାର୍କୁ. 4:33-34)

34ୟୀଶୁ ନେ ସବେନ୍ କାଜିକୋ ଜୋନୋକା ଲେକାତେ ହୋଡ଼ୋକୋକେ କାଜିକେଃକୋୱାଏ, ହାର୍ ଜୋନୋକା କାଏ କାଜି ରେ ଇନିଃ ଇନ୍‍କୁ ଲୋଃ ଜେତ୍ନାଃ ଅଗି କାଏ କାଜି ତାଇନାଏ। 35ଏନାତେ ଅକନ୍ ବାଚାନ୍ ନାବୀ ରାଃ ହୋରାତେ ପାର୍ମେଶ୍ଵାର୍ କାଜିଲେଦାଏ, ଏନା ପୁରାଅଃ ଚା, “ଇଙ୍ଗ୍ ଜୋନୋକା କାଜି ଲାଗିନ୍ତେ ଇଙ୍ଗ୍ଆଃ ମୋଚା ଖଲାଅୟାଇଙ୍ଗ୍, ଇଙ୍ଗ୍ ଏନ୍ କାଜିକୋକେ ଅକନାଃ ଅତେଦିଶୁମ୍ ରାଃ ମୁନୁ ଏତେ ଉକୁକାନ୍ ମେନାଃ ଉଦୁବେୟାଇଙ୍ଗ୍।”

ତାସାଃ ରାଃ ଜୋନୋକା କେ ବୁଝାଅ

36ଏନ୍ତେ ୟୀଶୁ ମିଃଥିମ୍ବା ହୋଡ଼ୋକୋକେ ବାଗେ କେତେ ଅଡ଼୍ଆଃ ତେ ହିଜୁଃଲେନାଏ, ହାର୍ ଆଜାଃ ଚେଲାକୋ ଇନିଜାଃ ନାଡ଼େଏ ହିଜୁଃକେତେ କାଜିକେଦାକୋ, “ଅତେ ରାଃ ତାସାଃ ରାଃ ଜୋନୋକା ଆଲେକେ ବୁଝାଅ ତାଲେମ୍।” 37ୟୀଶୁ ଇନ୍‍କୁକେ କାଜିରୁଆଡ଼୍ କେଃକୋୱାଏ, “ବେଶ୍ ହିତା କେ ହେର୍‍ତାନ୍ ଚାଷୀହୋଡ଼୍ ଇଙ୍ଗ୍ ମାନ୍‍ୱା ରାଃ ହୋନ୍ ତାନିଙ୍ଗ୍। 38ଅତେ ମାନେ ଅତେଦିଶୁମ୍ ରେନ୍ ହୋଡ଼ୋକୋ ତାନ୍‍କୋ, ବେଶ୍ ହିତା ମାନେ ସିର୍ମାଦିଶୁମ୍ ରାଃ ରାଇଜ୍ ରେନ୍ ହୋଡ଼ୋକୋ ହାର୍ ତାସାଃ ମାନେ ଦୁଷ୍ଟ ଶାଏତାନ୍ ରାଃ ହୋଡ଼ୋକୋ ତାନ୍‍କୋ। 39ଅକନ୍ ବାଇରୀ ଏନାକେ ହେର୍ କାଦାଏ ଇନିଃ ଶାଏତାନ୍ ତାନିଃ, ଇରଃ ସାମାୟ୍ ଦିଶୁମ୍ ରାଃ ଟୁଣ୍ଡୁ ତାନାଃ ହାର୍ ଇର୍‍ତାନ୍‍କୋ ସିର୍ମାଦାସୀକୋ ତାନ୍‍କୋ।

40ଏନାମେନ୍ତେ, ଚିଲ୍‍କା ତାସାଃ ହୁଣ୍ଡିଅଃ ୱାଃ ହାର୍ ଜୁଲୋଃ ତାନା ଏନ୍‍ଲେକାଗି ଅତେଦିଶୁମ୍ ରାଃ ଟୁଣ୍ଡୁ ରେ ହୋବାୱା। 41ଇଙ୍ଗ୍ ମାନ୍‍ୱା ରାଃ ହୋନ୍ ଇଙ୍ଗ୍ଆଃ ସିର୍ମାଦାସୀ କୋକେ କୁଲ୍ କୋୱାଇଙ୍ଗ୍, ହାର୍ ଇନ୍‍କୁ ପାର୍ମେଶ୍ଵାର୍ ରାଃ ରାଇଜ୍ ଏତେ ଇଙ୍ଗ୍ଆଃ ରେ ବିଶ୍ଵାସ୍ ବାଗେ ତାନ୍ କୋକେ ହାର୍ ଖାରାପ୍ କାମି ରିକାତାନ୍ କୋକେ ହୁଣ୍ଡି କୋୱାକୋ, 42ହାର୍ ଇନ୍‍କୁ କେ ନାରାକ୍ ରାଃ ସେଙ୍ଗେଲ୍ ରେ ଦୁଡ଼ିଙ୍ଗ୍ କୋୱାକୋ ଏନ୍ତାଃରେ ରାଆ ହାର୍ ଡାଟା ରିଦ୍ ହୋବାୱା। 43ଏନ୍ ସାମାୟ୍ ଧାର୍ମୀ ହୋଡ଼ୋକୋ ଆକୋୱାଃ ଆପୁ ରାଃ ରାଇଜ୍ ରେ ଶିଙ୍ଗି ଲେକା ମାର୍ଶାଲ୍ ଅଗାକୋ, ଅକେୟାଃ ଲୁତୁର୍ ମେନାଃ ଇନିଃ ଆୟୁମେ କାଏ।”

ଅତେ ରେ ଉକୁକାନ୍ ଧାନ୍ ରାଃ ଜୋନୋକା

44ସିର୍ମାଦିଶୁମ୍ ରାଃ ରାଇଜ୍ ଅତେ ରେ ଉକୁକାନ୍ ଗୋନୋଙ୍ଗାନ୍ ଜିନିଷ୍ ରାଃ ଲେକା ତାନାଃ, ଏନାକେ ମିୟାଃ ହୋଡ଼ ନାମ୍ କେଦାଏ ହାର୍ ଉକୁ ମାଣ୍ଡାଅ କେଦାଏ, ହାର୍ ରାଶିକା ତେ ସେନ୍ କେତେ ଆଜାଃ ସବେନାଃ ଆଖ୍ରିଙ୍ଗ୍ କେଦାଏ ହାର୍ ଏନ୍ ଅତେ କେ କିରିଙ୍ଗ୍ କେଦାଏ।

ଗୋନୋଙ୍ଗାନ୍ ମୋତି ରାଃ ଜୋନୋକା

45ଆଡୋଃ ସିର୍ମାଦିଶୁମ୍ ରାଃ ରାଇଜ୍ ମିୟାଃ ବେପାରୀ ହୋଡ଼ ଲେକା ତାନାଃ ଅକନିଃ ବେଶ୍ ମୋତି ରାଃ ଦାଣା ରେ ତାଇକେନାଏ। 46ଚିମ୍ତାଙ୍ଗ୍ ଇନିଃକେ ମିୟାଃ ଗୋନୋଙ୍ଗାନ୍ ମୋତି ନାମ୍‍ଜାନା ଦୋ ଇନିଃ ସେନ୍ କେତେ ଆଜାଃ ସବେନାଃ ଆଖ୍ରିଙ୍ଗ୍ କେତେ ଏନାକେ କିରିଙ୍ଗ୍ କେଦାଏ।

ହାକୁ ପାଶେ ମାରାଙ୍ଗ୍ ଜାଲୋମ୍ ରାଃ ଜୋନୋକା

47ଆଡୋଃ ସିର୍ମାଦିଶୁମ୍ ରାଃ ରାଇଜ୍ ଏନ୍ ହାକୁ ପାଶେ ମାରାଙ୍ଗ୍ ଜାଲୋମ୍ ରାଃ ଲେକା ତାନାଃ ଅକନାଃ ସାମୁଦାର୍ ରେ ଦୁଡ଼ିଙ୍ଗ୍ ଜାନା ହାର୍ ସବେନ୍ ରାକାମ୍ ରାଃ ହାକୁ କୋକେ ସାମୁଟାଅ କେତେ ଆଉ କେଃକୋୱାଏ। 48ହାର୍ ଚିମ୍ତାଙ୍ଗ୍ ଜାଲୋମ୍ ଫେରେଃ ଜାନା, ଦୋ ଝୋରାକୋ ଏନାକେ ଗେନା ପାଡ଼୍ ଥାଇଃ କେତେ ଆଉ ଲେଦାକୋ, ଏନ୍ତେ ଦୁବ୍ କେତେ ବେଶ୍-ବେଶ୍ ହାକୁକୋକେ ଟୁଙ୍କି କୋରେ ହୁଣ୍ଡି କେଦାକୋ ହାର୍ ଖାରାପ୍-ଖାରାପ୍ କୋକେ ଦୁଡ଼ିଙ୍ଗ୍ ତାଦାକୋ।

49ଅତେଦିଶୁମ୍ ରାଃ ଟୁଣ୍ଡୁ ରେ ଏନ୍‍ଲେକା ଗି ହୋବାଅଃୱା। ସିର୍ମାଦାସୀକୋ ହିଜୁଃକେତେ ଖାରାପ୍ ହୋଡ଼ୋକୋକେ ଧାର୍ମୀ ହୋଡ଼ୋ କୋଏତେ ଆଲାଗ୍ କୋୱାକୋ, 50ହାର୍ ଖାରାପ୍ ହୋଡ଼ୋକୋକେ ନାରାକ୍ ରାଃ ସେଙ୍ଗେଲ୍ ରେ ଦୁଡ଼ିଙ୍ଗ୍ କୋୱାକୋ। ଏନ୍ତାଃରେ ରାଆ ହାର୍ ଡାଟା ରିଦ୍ ହୋବାଅଃୱା।

ମାରି ହାର୍ ନାୱା ଶିଖାଅ କାଜି

51ଚିନାଃ ଆପେ ନେ ସବେନ୍ କାଜିକୋକେ ପେ ବୁଝାଅଜାନା? ଇନ୍‍କୁ ଇନିଃକେ କାଜିକିଜାକୋ, “ହାଁ।” 52ଏନ୍ତେ ୟୀଶୁ ଇନ୍‍କୁକେ କାଜିକେଃକୋୱାଏ, “ଏନାଲାଗିନ୍ ସବେନ୍ ଆଇନ୍ ଗୁରୁ ଅକଏ ସିର୍ମାଦିଶୁମ୍ ରାଃ ରାଇଜ୍ ରାଃ ଚେଲା ବାଇକାନାଏ, ଇନିଃ ଏନ୍ ଅଡ଼୍ଆଃ ରାଃ ମାଲିକ୍ ଲେକା ତାନିଃ ଅକନିଃ ଆଜାଃ ପୋଟୋମ୍ ଅଡ଼୍ଆଃ ଏତେ ନାୱା ହାର୍ ମାରି ଗୋନୋଙ୍ଗାନ୍ ଜିନିଷ୍‍କୋ ଅଡୋଙ୍ଗ୍ ୟାଏ।”

ନାଜ୍ରେଥ୍ ସାହାର୍ ରେ ୟୀଶୁ କେ କା ମାଇନ୍

(ମାର୍କୁ. 6:1-6; ଲୁକା. 4:16-30)

53ଚିମ୍ତାଙ୍ଗ୍ ୟୀଶୁ ନେ ସବେନ୍ ଜୋନୋକା କୋ କାଜି ଛାବା କେଦାଏ, ଦୋ ଏନ୍ତାଃ ଏତେ ସେନୋଃ ଜାନାଏ।

54ହାର୍ ଆଜାଃ ହାତୁ ରେ ହିଜୁଃକେତେ ୟାହୁଦୀ କୋୱାଃ ଆରାମେ ହୁଲାଙ୍ଗ୍ ଇନିଃ ଆକୋୱାଃ ବିନ୍ତିଅଡ଼୍ଆଃ ରେ ଇନ୍‍କୁକେ ଏନ୍ ଲେକା ଉପ୍‍ଦେଶ୍ ଏମ୍ କେଃକୋୱାଏ, ଚି ଇନ୍‍କୁ ଆକ୍‍ଦାନ୍ଦା ହୋବା କେତେ କାଜିକେଦାକୋ, “ନେ ହୋଡ଼ କେ ନେଲେକା ସେଣା ହାର୍ ପେଡ଼େଏ ରାଃ କାମି କୋତାଃ ଏତେ ନାମ୍‍ଜାନା? 55ଚିନାଃ ନିଈ ଏନ୍ ବାଢ଼ାଇ ରାଃ ହୋନ୍ତେକଡ଼ା ନାହାଲାଏ? ହାର୍ ଚିନାଃ ଇନିଜାଃ ଏଙ୍ଗା ରାଃ ନୁତୁମ୍ ମାରିୟାମ୍ ହାର୍ ଇନିଜାଃ ହାଗା କୋୱାଃ ନୁତୁମ୍ ୟାକୁବ୍, ଯୋଶେଫ୍, ଶିମୋନ୍ ହାର୍ ୟାହୁଦା ନାହାଲା? 56ହାର୍ ଚିନାଃ ଇନିଜାଃ ସବେନ୍ ମିଶିକୋ ଆବୁୱାଃ ଥାଲା ରେ କାକୋ ତାଇନ୍ ତାନା? ଏଣ୍ଡେ ନିଈକେ ନେ ସବେନାଃ କୋତାଃ ଏତେ ନାମ୍‍ଜାନା?”

57ଏନାଲାଗିନ୍ ଇନ୍‍କୁ ଇନିଃକେ ଫାସିୟାର୍ ହିଲାଙ୍ଗ୍ କିଜାକୋ, ମେନ୍ଦୋ ୟୀଶୁ ଇନ୍‍କୁକେ କାଜିକେଦାଏ, “ନାବୀ କେ ଆଜାଃ ହାତୁ ହାର୍ ଆଜାଃ ଅଡ଼୍ଆଃ ବାଗେ କେତେ ଆଡୋଃ କୋତାଃ ରେହ ଆପ୍‍ମାନ୍ କା ହୋବାଅଃୱା।” 58ହାର୍ ୟୀଶୁ ଏନ୍ତାଃରେ ଇନ୍‍କୁୱାଃ ଆବିଶ୍ଵାସ୍ ଚାଲ୍ତେ ଥିମ୍ବା ପେଡ଼େଏ ରାଃ କାମି କାଏ ରିକା କେଦାଏ।

Currently Selected:

ମାତ୍ତିଉ 13: UNXNT

Highlight

Copy