ଲୁକା 10

ୟୀଶୁ ସାତାର୍ ଆଡୋଃ ଏଟାଃ ଚେଲାକୋକେ କୁଲ୍ କେଃକୋୱାଏ

1ନେ କାଜି କୋରାଃ ତାୟୋମ୍ତେ, ପ୍ରାଭୁ ଆଡୋଃ ଏଟାଃ ସାତାର୍#10:1 ସାତାର୍ ଚିମିନାଙ୍ଗ୍ ବାଇବେଲ୍ ରେ ବାହାତାର୍ ଅଲାକାନା ଝାନ୍ ଚେଲାକୋକେ ସାଲା କେଃକୋୱାଏ, ହାର୍ ଅକନ୍-ଅକନ୍ ସାହାର୍ ଆଡୋଃ ଜାଗା କୋ ଆଏଃକେ ସେନ୍ ରାଃ ତାଇକେନା, ହେନ୍ତାଃ ଇନ୍‍କୁକେ ବାର୍ହୋଡ଼୍-ବାର୍ହୋଡ଼୍ କେତେ ଆୟାଃ ଆୟୁର୍ ତେ କୁଲ୍ କେଃକୋୱାଏ। 2ଇନିଃ ଇନ୍‍କୁକେ କାଜିକେଦାଏ, “ଇରୋଃ ଲାଗିନ୍ ଦୋ ଥିମ୍ବା ଗିୟା, ମେନ୍ଦୋ କାମି ନାଲାକୋ ହୁଡିଙ୍ଗ୍ ଗିୟାକୋ; ଏନାଲାଗିନ୍ ଅତେ ରାଃ ଗୋମ୍‍କେ କେ ବିନ୍ତି ପେ ଚି ଇନିଃ ଆଜାଃ ଅତେ ଇହିର୍ ଲାଗିନ୍ କାମି ନାଲାକୋକେ କୁଲ୍ କୋୱାଏ।

3ଜୁ, ନେଲେପେ, ଇଙ୍ଗ୍ ଆପେକେ ମିଣ୍ଡୀହୋନ୍ କୋ ଲେକା ହୁଣ୍ଡାର୍ କୋୱା ଥାଲା ରେ କୁଲ୍ ପେ ତାନିଙ୍ଗ୍। 4ଏନାଲାଗିନ୍ ନାଦୋ ଟାକା ଥାଇଲା, ନାଦୋ ଥାଇଲା, ନାଦୋ ଖାର୍ପା ଇଦିପେ, ଆଡୋଃ ନାଦୋ ହୋରା ରେ ଜେତାଏ କେହ ଆଲୋପେ ଜୋହାର୍ କୋୱା।

5ଜେତାୟାଃ ଅଡ଼୍ଆଃ ରେହ ସେନ୍ ପେ, ସିଦା କାଜିପେ, ନେ ଅଡ଼୍ଆଃ ରେ ସୁକୁ ତାଇନୋଃକା। 6ଏନ୍ତାଃରେ ସୁକୁ ନାମେ ଲେକାନ୍ ହୋଡ଼ ତାଇନୋଃ ରେଦୋ ଆପେୟାଃ ସୁକୁ ଇନିଜାଃ ରେ ହୋବାୱା, କାରେ ଦୋ ଆପେୟାଃ ତାଃ ରୁଆଡ଼୍ କେନୋଗା। 7ଏନ୍ ଅଡ଼୍ଆଃ ରେଗି ତାଇନ୍‍ପେ, ଆଡୋଃ ଅକନାଃ ଇନ୍‍କୁ ଏତେ ନାମୋଗା, ଏନାଗି ଜୋମେପେ ହାର୍ ନୁୱେପେ, ଚିୟାଃଚି ନାଲାନିଃ କେ ଆଜାଃ ନାଲା ନାମୋଃ ଚାହି, ଅଡ଼୍ଆଃ-ଅଡ଼୍ଆଃ ଆଲୋପେ ହୋନୋର୍‍ୟା।

8ଜାହାନ୍ ସାହାର୍ ରେ ବୋଲୋୱାପେ, ଆଡୋଃ ହେନ୍ତାଃ ରେନ୍ ହୋଡ଼ୋକୋ ଆପେକେ ସୁକୁ ପେୟାକୋ, ଏଣ୍ଡେ ଆପେୟାଃ ନାଡ଼େଏ ରେ ଅକନାଃ ମାଣ୍ଡାଅଗା ଏନାଗି ଜୋମେପେ। 9ହେନ୍ତାଃ ରେନ୍ ବିମାରୀ କୋକେ ବେଶ୍ କୋପେ ଆଡୋଃ ଇନ୍‍କୁକେ କାଜିୟାକୋପେ, ‘ପାର୍ମେଶ୍ଵାର୍ ରାଃ ରାଇଜ୍ ଆପେୟାଃ ନାଡ଼େଏ ହିଜୁଃ ସେଟେର୍ କାନା।’

10ମେନ୍ଦୋ ଜାହାନ୍ ସାହାର୍ ରେ ସେନାପେ ଆଡୋଃ ଏନ୍ତାଃ ରେନ୍ ହୋଡ଼ୋକୋ ଆପେକେ କାକୋ ଗ୍ରାହାନ୍ ପେୟା, ଏଣ୍ଡେ ଇନ୍‍କୁୱାଃ ପିଟ୍ କୋରେ ସେନ୍ କେତେ କାଜିପେ। 11‘ଆପେୟାଃ ସାହାର୍ ରାଃ ଧୂଡ଼ି ଅଗି, ଅକନାଃ ଆଲେୟାଃ କାଟା ରେ ଲାଗାଅ କାନା, ଆଲେ ଆପେୟାଃ ନାଡ଼େଏ ରେ କୋଟା ତାନାଲେ, ଏଣ୍ଡେ ରେହ ନେୟା ସାରିକେପେ ଚି ପାର୍ମେଶ୍ଵାର୍ ରାଃ ରାଇଜ୍ ଆପେୟାଃ ନାଡ଼େଏ ହିଜୁଃ ସେଟେର୍ କାନା।’ 12ଇଙ୍ଗ୍ ଆପେକେ କାଜିତାନିଙ୍ଗ୍ ଚି ଏନ୍ ବିଚାର୍ ହୁଲାଙ୍ଗ୍ ଏନ୍ ସାହାର୍ ଅକନ୍ ଦାଣ୍ଡ୍ ନାମେୟାଏ ଏନାତେ ସାଦୋମ୍ ସାହାର୍ ରାଃ ଦାଣ୍ଡ୍ ହୁଡିଙ୍ଗ୍ ତାଇଲେନା।”

ଆବିଶ୍ଵାସୀ ସାହାର୍ ରେନ୍ ହୋଡ଼ୋକୋୱାଃ ବିଚାର୍

(ମାତ୍ତି. 11:20-24)

13“ହାୟ୍, ଖୁରାଜିନ୍ ସାହାର୍ ରେନ୍ ହୋଡ଼ୋକୋ! ହାୟ୍ ବେଥ୍‍ସୈଦା ସାହାର୍ ରେନ୍ ହୋଡ଼ୋକୋ! ଅକନ୍ ପେଡ଼େଏ ରାଃ କାମି ଆପେୟାଃ ରେ ରିକା ଲେନ୍ ତାଇନା, ଆଗାର୍ ଏନା ସୁର୍ ହାର୍ ସିଦୋନ୍ ସାହାର୍ କୋରେ ରିକା ଜାନ୍ତେ, ଏଣ୍ଡେ ଇନ୍‍କୁ ଦୁକୁଲିଜାଃ#10:13 ଦୁକୁଲିଜାଃ ସିଦା ସାମାୟ୍ ରେ ଏନ୍ ସାହାର୍ ରେନ୍ ହୋଡ଼ୋକୋ ପାପ୍ କୋଏତେ ମୋନ୍ ରୁଆଡ଼୍ ଦେଖାଅ ଲାଗିନ୍ ବୋରା ତେ ବାଇକାନ୍ ଲିଜାଃ ତୁସିଙ୍ଗେନ୍ ତାଇକେନାକୋ, ହାର୍ ତୋରେଃ କୋକେ ହୋଡ଼ମୋ ରେ ହେରୋଃ ତାଇନାକୋ ତୁସିଙ୍ଗ୍ କେତେ ହାର୍ ତରେଃ ରେ ଦୁବ୍‍କେତେ ଚିଉଲାଏତେ ଗି ପାପ୍ କାମି ବାଗେ ତାତେକୋ। 14ମେନ୍ଦୋ ବିଚାର୍ ରାଃ ହୁଲାଙ୍ଗ୍ ରେ ଆପେ ଅକନ୍ ଦାଣ୍ଡ୍ ନାମେୟାପେ ଏନାତେ ସୁର୍ ହାର୍ ସିଦୋନ୍ ସାହାର୍ ରେନ୍ କୋ ନାମ୍ ଲେନ୍ ଦାଣ୍ଡ୍ ହୁଡିଙ୍ଗ୍ ହୋବାୱା। 15ଆଡୋଃ ହେ କାଫାର୍ନାହୁମ୍ ସାହାର୍ ରେନ୍ ହୋଡ଼ୋକୋ, ଚିନାଃ ଆପେ ସିର୍ମାଦିଶୁମ୍ ସାନ୍ତେ ଚେତାନ୍ ଅଗାପେ? ଏନ୍‍କା କା ହୋବାୱା ଆପେ ନାରାକ୍ ସାନ୍ତେ ଲାଥାର୍ ତେ ସେନାପେ।”

16“ଅକଏ ଆପେୟାଃ ଆୟୁମ୍ ତାନାଏ ଇନିଃ ଇଙ୍ଗ୍ଆଃ ହ ଆୟୁମ୍ ତାନାଏ, ହାର୍ ଅକଏ ଆପେକେ ହିଲାଙ୍ଗ୍ ତାନାଏ ଇନିଃ ଇଙ୍ଗ୍‍କେ ହିଲାଙ୍ଗ୍ ତାନାଏ, ଆଡୋଃ ଅକଏ ଇଙ୍ଗ୍‍କେ ହିଲାଙ୍ଗ୍ ତାନାଏ ଇନିଃ ଇଙ୍ଗ୍ଆଃ କୁକୁଲ୍ ନିଃକେ ହିଲାଙ୍ଗ୍ ତାନାଏ।”

ସାତାର୍ ଝାନ୍ ଚେଲା କୋୱା ରୁଆଡ଼୍

17ଏନ୍ ସାତାର୍ ଝାନ୍ ଚେଲାକୋ ରାଶିକାତାନ୍ ଲୋଃ ରୁଆଡ଼୍ ଜାନାକୋ ଆଡୋଃ କାଜିକେଦାକୋ, “ହେ ପ୍ରାଭୁ, ଆମାଃ ନୁତୁମ୍ ତେ ବୋଙ୍ଗାଆତ୍ମା କୋଗି ଆଲେୟାଃ ଆଧିନ୍ ରେ ମେନାକୋୱା।”

18ଇନିଃ ଇନ୍‍କୁକେ କାଜିକେଃକୋୱାଏ, “ଇଙ୍ଗ୍ ଶାଏତାନ୍ କେ ବିଜ୍‍ଲୀ ଲେକା ରିମିଲ୍‍ଦିଶୁମ୍ ଏତେ ଉୟୁଃକାନ୍ ନେଲି ତାଇନାଇଙ୍ଗ୍। 19ନେଲେପେ, ଇଙ୍ଗ୍ ଆପେକେ ବିଙ୍ଗ୍ କୋକେ ଆଡୋଃ ମାର୍ମାର୍ କୋକେ ତିକା ସେରେଦ୍ ରାଃ ଆଡୋଃ ବାଇରୀ କୋୱାଃ ସବେନ୍ ପେଡ଼େଏ ଚେତାନ୍ ରେ ଆଧିକାର୍ ଏମାକାଦିଙ୍ଗ୍ ଆଡୋଃ ଜେତାନ୍ ଜିନିଷ୍ କୋଏତେ ଆପେକେ ଜାହାନ୍ ହାନି କା ହୋବାୱା। 20ଏଣ୍ଡେ ରେହ ନେୟା ରେ ଆଲୋପେ ରାଶିକା ଅଃୱା ଚି ବୋଙ୍ଗାଆତ୍ମା ଆପେୟାଃ ଆଧିନ୍ ରେ ମେନାଃ ମେନ୍ଦୋ ନେୟାତେ ରାଶିକାନ୍ ପେ ଚି ଆପେୟାଃ ନୁତୁମ୍ ସିର୍ମାଦିଶୁମ୍ ରେ ଅଲାକାନା।”

ୟୀଶୁ ରାଶିକା ଜାନାଏ

(ମାତ୍ତି. 11:25-27; 13:16,17)

21ଏନ୍ ସାମାୟ୍ ରେଗି ୟୀଶୁ ପାବିତାର୍ ଆତ୍ମା ରେ ହୋବାକେତେ ରାଶିକା ତେ ଫେରେଃ ଜାନାଏ, ଆଡୋଃ କାଜିକେଦାଏ, “ହେ ଆବା, ସିର୍ମାଦିଶୁମ୍ ଆଡୋଃ ଅତେ ରେନ୍ ପ୍ରାଭୁ ଇଙ୍ଗ୍ ଆମାଃ ଧାନ୍ୟାବାଦ୍ ତାନିଙ୍ଗ୍ ଚି ଆମ୍ ନେ କାଜିକୋକେ ସେଣାନ୍‍କୋ ହାର୍ ବୁଝାଅଧାଡ଼ି ଲେକାନ୍‍କୋ ଏତେ ଉକୁକେତେ ମାଣ୍ଡାଅ କେଦାମ୍, ଆଡୋଃ ବାଲେଃ ହୋନ୍ କୋୱାଃ ରେ ଉଦୁବ୍ କେଦାମ୍। ହାଁ, ହେ ଆବା, ଚିୟାଃଚି ଆମ୍‍କେ ନେୟାଗି ସୁକୁ ଆଦା କେଃମେୟା।

22ଇଙ୍ଗ୍ଆଃ ଆପୁ ଇଙ୍ଗ୍‍କେ ସବେନାଃ ଜିମା କାଦିଙ୍ଗାଏ, ଆଡୋଃ ଆପୁ କେ ବାଗି କେତେ ଅକଏ ହ କାକୋ ସାରିତାନା ଚି ଇଙ୍ଗ୍ ଅକଏ ତାନିଙ୍ଗ୍, ଆଡୋଃ ଇଙ୍ଗ୍‍କେ ବାଗେ କେତେ ଅକଏ ହଗି କାକୋ ସାରିତାନା ଚି ଆପୁ ଅକଏ ତାନିଃ, ଏନ୍ତେ ଇନିଃ ସାରିୟାଏ ଅକନିଃକେ ଇଙ୍ଗ୍ ଆପୁ ପାର୍ମେଶ୍ଵାର୍ ଅକଏ ତାନିଃ ମେନ୍ତେ ଉଦୁବ୍ ସାନାଙ୍ଗାଇଙ୍ଗ୍।”

23ଏନ୍ତେ ଚେଲାକୋ ପାଡ଼୍ ବିୟୁର୍ କେତେ ଇନ୍‍କୁ କେ ଏସ୍କାର୍ କାଜିକେଦାଏ, “ଧାନ୍ୟା ଆପେ ତାନ୍‍ପେ, ଅକନ୍ କାଜିକୋ ଆପେ ନେଲ୍ ତାନାପେ। 24ଚିୟାଃଚି ଇଙ୍ଗ୍ ଆପେକେ କାଜିତାନିଙ୍ଗ୍ ଚି ଥିମ୍ବାଗି ନାବୀ କୋ ଆଡୋଃ ରାଜା କୋ ସାନାଙ୍ଗ୍ କେଦାକୋ ଚି ଅକନ୍ କାଜି ଆପେପେ ନେଲ୍‍ତାନା ନେଲେୟାକୋ, ମେନ୍ଦୋ କାକୋ ନେଲ୍‍କେଦା, ଆଡୋଃ ଅକନ୍ କାଜି ଆପେପେ ଆୟୁମ୍ ତାନା ଆୟୁମ୍ ସାନାଙ୍ଗ୍ କେନାକୋ, ମେନ୍ଦୋ କାକୋ ଆୟୁମ୍‍କେଦା।”

ସାମାରୀ ଜାଗା ରେନ୍ ମିୟାଃ ଦାୟାଲୁ ହୋଡ଼ ରାଃ ଜୋନୋକା

25ନେଲେପେ, ମୁଶିଙ୍ଗ୍ ୟୀଶୁ ହୋଡ଼ୋକୋକେ ଶିଖାଅ କୋ ତାଇନାଏ, ଇମ୍ତା ମିୟାଃ ମୁଶା ନାବୀ ରାଃ ନିୟାମ୍ କେ ବୁଗିନ୍ ତେ ସାରିକାନ୍ ଆଇନ୍ ଗୁରୁ ବିରିଃ ଜାନାଏ, ଆଡୋଃ ନେୟା କାଜିକେତେ ଇନିଃକେ ପାରୀକ୍ଷା କେଦାଏ, “ହେ ଗୁରୁ, ଜାନାଓ ଜୀଦାନ୍ ରାଃ ହାନାଟିଙ୍ଗ୍ ନାମ୍ ଲାଗିନ୍ ଇଙ୍ଗ୍ ଚିନାଃ ରିକାୟାଇଙ୍ଗ୍?” 26ୟୀଶୁ ହିନିଃକେ କାଜିକେଦାଏ, “ମୁଶା ନାବୀ ରାଃ ଆଇନ୍ ରେ ଚିନାଃ ଅଲାକାନା? ଆମ୍ ଚିଲ୍‍କା ପାଢ଼ାଅନ୍ ତାନାମ୍?” 27ହିନିଃ କାଜିରୁଆଡ଼୍ କେଦାଏ, ଆମ୍ ପ୍ରାଭୁ ଆମାଃ ପାର୍ମେଶ୍ଵାର୍ କେ ଆମାଃ ସବେନ୍ ମୋନ୍ ତେ ଆଡୋଃ ଆମାଃ ସବେନ୍ ଜୀଉ ତେ ଆଡୋଃ ଆମାଃ ସବେନ୍ ପେଡ଼େଏ ତେ ଆଡୋଃ ଆମାଃ ସବେନ୍ ସେଣା ତେ ଦୁଲାଡ଼ି ମେ। ଆଡୋଃ ଆମାଃ ନାଡ଼େଏଃ-ଜାପାଃ ରେନ୍ କୋକେ ଆପାନାଃ ଲେକା ଦୁଲାଡ଼୍ କୋମ୍। 28ୟୀଶୁ ହିନିଃକେ କାଜିକେଦାଏ, “ଆମ୍ ଠିକ୍ କାଜିରୁଆଡ଼୍ କେଦାମ୍। ନେକାଗି ରିକାଏମ୍ ଏଣ୍ଡେ ଆମ୍ ପାର୍ମେଶ୍ଵାର୍ ଲୋଃ ସବେନ୍ ହୁଲାଙ୍ଗ୍ ନାଙ୍ଗ୍ ଜୀନିଦ୍ ତାଇନୋଗାମ୍।”

29ମେନ୍ଦୋ ଇନିଃ ଆଏଃ ଆଏଃକେ ଧାର୍ମୀ ବାଇୟେନ୍ ସାନାଙ୍ଗ୍ ତେ ୟୀଶୁ କେ କୁଲିକିଜାଏ, “ଏଣ୍ଡେ ଇଙ୍ଗ୍ଆଃ ନାଡ଼େଏଃ-ଜାପାଃ ରେନ୍ ଅକଏ ତାନିଃ?” 30ୟୀଶୁ ମିୟାଃ ଜୋନୋକା କାଜିତେ କାଜିରୁଆଡ଼୍ କେଦାଏ, “ମିୟାଃ ହୋଡ଼ ୟୀରୁଶାଲେମ୍ ସାହାର୍ ଏତେ ୟାରିହୋ ସାହାର୍ ତେ ସେନ୍ ତାଇକେନାଏ, ଇମ୍ତା ଡାକୁକୋ ଇନିଃକେ କେସେଃ କିଜାକୋ ହାର୍ ଇନିଜାଃ ଲିଜାଃ କୋ ହାର୍ ଏଟାଃ ଜିନିଷ୍ କୋ ଚିନାଃ ଇନିଃ ତାଃ ରେ ତାଇକେନା ସବେନାଃ ରେଏଃ ଇଦିକେଦାକୋ ହାର୍ ବିଡ଼ାହୁମାଃ କେତେ ଇନିଃକେ ଗୋଜୋଃ ଲେକା ବାଗିକେତେ ସେନୋଃ ଜାନାକୋ।

31ଏନ୍ତେ ନେକା ହୋବାଜାନା ଚି ଏନ୍ ହୋରା ତେଗି ମିୟାଃ ୟାହୁଦୀ ୟାଜାକ୍ ସେନ୍ ତାଇନାଏ, ମେନ୍ଦୋ ଇନିଃକେ ନେଲ୍‍କେତେ କାଏ ଦେଙ୍ଗା କିଜାଏ ହାର୍ ବିୟୁର୍ କେତେ ସେନୋଃ ଜାନାଏ। 32ଏନ୍‍ଲେକାଗି ୟୀରୁଶାଲେମ୍ ମାନ୍ଦିର୍ ରେ କାମିତାନ୍ ମିୟାଃ ଲେବୀ କିଲି ରେନ୍ ହୋଡ଼ ଏନ୍ ଜାଗା ତେ ହିଜୁଃ ଲେନାଏ ଇନିଃ ହଗି ଇନିଃକେ ନେଲ୍‍କେତେ କାଏ ଦେଙ୍ଗା କିଜାଏ ହାର୍ ବିୟୁର୍ କେତେ ସେନୋଃ ଜାନାଏ।

33ମେନ୍ଦୋ ସାମାରୀୟା ଜାଗା ରେନ୍ ମିୟାଃ ହୋଡ଼ ଏନ୍ ହୋରା ରେ ଅକ୍ତାଃ ଏନ୍ ହୋଡ଼ ଗୋଜୋଃ ଲେକା ବାଗେ ଲେନାଏ ହିଜୁଃ ସେଟେର୍ ଜାନାଏ, ହାର୍ ଇନିଃକେ ନେଲ୍‍କେତେ ଦାୟା ତେ ଫେରେଃ ଜାନାଏ। 34ଇନିଃ ଇନିଜାଃ ନାଡ଼େଏ ହିଜୁଃକେତେ ଇନିଜାଃ ଘାଅ ରେ ଜାଇତୁନ୍ ସୁନୁମ୍ ଆଡୋଃ ଆଙ୍ଗୁର୍ ରାଶି ଦୁଲ୍ କେତେ ପାଟି ଥୋଲ୍ କିଜାଏ ହାର୍ ଆଜାଃ ଗାଧା ଚେତାନ୍ ରେ ଦୁବ୍ କିଜାଏ ଏନ୍ତେ ଡେରା ଅଡ଼୍ଆଃ ଇଦିକିଜାଏ ଆଡୋଃ ଇନିଜାଃ ସେୱା କିଜାଏ। 35ଏଟାଃ ହୁଲାଙ୍ଗ୍ ଇନିଃ ବାରିୟା ଦିନାର୍#10:35 ଦିନାର୍ ମୁଶିଙ୍ଗ୍ ସିଂଙ୍ଗ୍‍ସାଟୁବ୍ ରାଃ ମାଜାଉରୀ ଅଡୋଙ୍ଗ୍ କେତେ ଡେରା ଅଡ଼୍ଆଃ ରେନ୍ ମାଲିକ୍ କେ ଏମ୍‍କିଜାଏ। ଆଡୋଃ କାଜିକେଦାଏ ନିଜାଃ ସେୱା ରିକାଏମ୍ ଆଡୋଃ ଅକନାଃ କୋ ଆମ୍‍କେ ଲାଗାଅଗା ଏନାକେ ଆମ୍‍କେ ରୁଆଡ଼୍ ଇମ୍ତା ଫେରେଃ ତାଃଇଙ୍ଗ୍।

36ନାଆ ଆମାଃ ବୁଝାଅନ୍ ଲେକାତେ ଅକନିଃ ଡାକୁ କୋଏତେ କେସେଃ ଲେନାଏ, ଇନିଜାଃ ଲାଗିନ୍ ନେ ଆପି ହୋଡ଼ କୋଏତେ ନାଡ଼େଏଃ-ଜାପାଃ ରେନ୍ ହୋଡ଼ ଲେକା ଦେଙ୍ଗା ଅକଏ ଏମ୍ କେଦାଏ?” 37ଇନିଃ କାଜିକେଦାଏ, “ହିନିଃ ଗି ଅକନିଃ ଇନିଃକେ ଦାୟା କିଜାଏ।” ୟୀଶୁ ଇନିଃକେ କାଜିକେଦାଏ, “ଜୁ, ଆମୋଗି ଏନ୍‍ଲେକା ରିକାଏମ୍।”

ମାର୍ଥା ହାର୍ ମାରିୟାମ୍ ରାଃ ଅଡ଼୍ଆଃ ରେ ୟୀଶୁ

38ଚିମ୍ତା ୟୀଶୁ ହାର୍ ଆଜାଃ ଚେଲାକୋ ସେନ୍ ତାଇକେନାକୋ ଇମ୍ତା ଇନ୍‍କୁ ମିୟାଃ ହାତୁ ରେ ବୋଲୋଜାନାକୋ, ଆଡୋଃ ମାର୍ଥା ନୁତୁମ୍ ମିୟାଃ କୁଡ଼ି ଇନ୍‍କୁକେ ଆଜାଃ ଅଡ଼୍ଆଃ ତେ କେଡ଼ାକେଃକୋୱାଏ। 39ମାରିୟାମ୍ ନୁତୁମ୍ ଇନିଜାଃ ମିୟାଃ ମିଶି ତାଇକେନାଏ ଇନିଃ ପ୍ରାଭୁ ଆଃ କାଟା ତାଃ ରେ ଦୁବ୍ କେତେ ଇନିଜାଃ ବାଚାନ୍ ଆୟୁମ୍ ତାଇନାଏ।

40ମେନ୍ଦୋ ମାର୍ଥା ଯୋଜୋମାଃ ବାବାଇ ରେ ଆସ୍‍ଦି ଜାନାଏ ଏନ୍ତେ ୟୀଶୁ ନାଡ଼େଏ ହିଜୁଃକେତେ କାଜିକେଦାଏ, “ହେ ପ୍ରାଭୁ ଚିନାଃ ଆମ୍ ଜେତ୍ନାଃ ହ କାମ୍ ପାହୋମ୍ ତାନା ଚି ଇଙ୍ଗ୍ଆଃ ମିଶି ଇଙ୍ଗ୍‍କେ ସବେନ୍ କାମି ରିକା ଲାଗିନ୍ତେ ଏସ୍କାର୍ ଗି ବାଗେ କାଦିଙ୍ଗାଏ? ଏନାଲାଗିନ୍ ଇନିଃକେ କାଜିମ୍ ଚି ଇଙ୍ଗ୍‍କେ ଦେଙ୍ଗାଇଙ୍ଗ୍ ୟାଏ।” 41ପ୍ରାଭୁ ଇନିଃକେ କାଜିରୁଆଡ଼୍ କିଜାଏ, “ମାର୍ଥା, ହେ ମାର୍ଥା; ଆମ୍ ଥିମ୍ବାଗି କାଜିକୋ ଲାଗିନ୍ତେ ଚିନ୍ତା ତାନାମ୍ ହାର୍ ଆସ୍‍ଦିଅଃ ତାନାମ୍। 42ମେନ୍ଦୋ ମିୟାଃ କାଜି ଭାଇର୍ ଲାଗାତିଙ୍ଗ୍ ତାନାଃ, ଆଡୋଃ ଏନ୍ ବୁଗିନ୍ କାଜିକେ ମାରିୟାମ୍ ସାଲା କେଦାଏ, ଅକନାଃ ଇନିଜେତେ କା ରେଜୋଗା।”

Currently Selected:

ଲୁକା 10: UNXNT

Highlight

Copy