ଯୋହାନ୍ 18

ୟୀଶୁ ବାଇରୀ କୋୱାଃ ତିଈ ରେ ସାବୋଃ ତାନାଏ

(ମାତ୍ତି. 26:47-56; ମାର୍କୁ. 14:43-50; ଲୁକା. 22:47-53)

1ଚିମ୍ତାଙ୍ଗ୍ ୟୀଶୁ ନେ ବିନ୍ତି ଛାବା କେଦାଏ ଆୟାଃ ଚେଲାକୋ ଲୋଃ କିନ୍ଦ୍ରୋନ୍ ଗାଡା#18:1 କିନ୍ଦ୍ରୋନ୍ ଗାଡା ବୁରୁ ଗେନା ରାଃ ଗାଡା ଅତେ ଫାରୋମ୍ ସେନ୍ ଜାନାଏ। ଏନ୍ତାଃ ମିୟାଃ ବାଗିଚା ତାଇକେନା, ଅକ୍ତାଃ ଆଏଃ ହାର୍ ଆୟାଃ ଚେଲାକୋ ସେନ୍ ଜାନାକୋ। 2ଇନିଃକେ ସାବ୍ ରିକାନିଃ ୟାହୁଦା ହ ଏନ୍ ଜାଗା କେ ସାରି ତାଇନାଏ, ଚିୟାଃଚି ୟୀଶୁ ଆୟାଃ ଚେଲାକୋ ଲୋଃ ମିଶା-ମିଶା ହେନ୍ତାଃ ସେନ୍ ତାଇକେନାଏ। 3ଏନ୍ତେ ୟାହୁଦା ମିୟାଃ ଦାଲ୍ ପାଲ୍‍ଟାନ୍ କୋକେ ହାର୍ ପ୍ରାଧାନ୍ ୟାଜାକ୍‍କୋ ହାର୍ ଫାରିସୀ ହୋଡ଼ୋକୋ ପାଡ଼େତେ ମାନ୍ଦିର୍ କେ ହୋରୋତାନ୍ ସିପାହୀ କୋକେ ଇଦିକେତେ, ଦିମି କୋ ହାର୍ ହୁଲ୍ଲା#18:3 ହୁଲ୍ଲା ମାଶାଲ୍ କୋ ହାର୍ ହାତିୟାର୍ କୋ ଆଉକେତେ ହେନ୍ତାଃ ସେଟେର୍ ଜାନାଏ। 4ଏନ୍ତେ ୟୀଶୁ, ଏନ୍ ସବେନ୍ କାଜି ଅକନାଃ ଆୟାଃ ଚେତାନ୍ ରେ ହୋବାଅଃ ରାଃ ତାଇକେନା ସାରିକେତେ, ଇନ୍‍କୁ ତାଃ ସେନ୍ ଜାନାଏ ହାର୍ ଇନ୍‍କୁକେ କୁଲିକେଃକୋୱାଏ, “ଅକଏ କେ ଦାଣା ତାନାପେ?” 5ଇନ୍‍କୁ ଇନିଃକେ କାଜିରୁଆଡ଼୍ କେଦାକୋ, “ନାଜ୍ରେଥ୍ ସାହାର୍ ରେନ୍ ୟୀଶୁ କେ।” ୟୀଶୁ ଇନ୍‍କୁକେ କାଜିକେଦାଏ, “ଇଙ୍ଗ୍ ତାନିଙ୍ଗ୍।” ଇନିଃକେ ସାବ୍ ରିକାନିଃ ୟାହୁଦା ହ ଇନ୍‍କୁ ଲୋଃ ତିଙ୍ଗୁ ଲେନାଏ। 6ଇନିଜାଃ ନେୟା କାଜିତୋର୍ଷା ଚି, “ଇଙ୍ଗ୍ ତାନିଙ୍ଗ୍” ଇନ୍‍କୁ ତାୟୋମ୍ ଗେନା କେତେ ଅତେ ରେ ଉୟୁଃ ଜାନାକୋ। 7ଏନ୍ତେ ଇନିଃ ଇନ୍‍କୁକେ ଆଡୋଃଗି କୁଲିକେଃକୋୱାଏ, “ଆପେ ଅକଏ କେ ଦାଣା ତାନାପେ?” ଇନ୍‍କୁ ଆଡୋଃଗି କାଜିକେଦାକୋ, “ନାଜ୍ରେଥ୍ ସାହାର୍ ରେନ୍ ୟୀଶୁ କେ।” 8ୟୀଶୁ କାଜିରୁଆଡ଼୍ କେଃକୋୱାଏ, “ଇଙ୍ଗ୍ ଦୋ ଆପେକେ କାଜି ଛାବା କେଦାଇଙ୍ଗ୍, ଆଗାର୍ ଇଙ୍ଗ୍‍କେ ଦାଣା ତାନାପେ ଏଣ୍ଡେ ଇଙ୍ଗ୍ଆଃ ଚେଲାକୋକେ ବାଗେତାକୋପେ।” 9ନେୟା ଏନାମେନ୍ତେ ହୋବାଜାନା ଚି ଏନ୍ ବାଚାନ୍ ପୁରାଅଃକା ଅକନାଃ ଇନିଃ କାଜିଲେଦାଏ, “ଅକନ୍ କୋକେ ଆମ୍ ଇଙ୍ଗ୍‍‍କେ ଏମ୍ କାଦିଙ୍ଗାମ୍ ଇନ୍‍କୁ ହେତେ ମିହୋଡ଼୍ କେହ କାଇଙ୍ଗ୍ ଆଃ କେଦା।” 10ଏନ୍ତେ ଶିମୋନ୍ ପାତ୍ରାସ୍ ଆଜାଃ ତାଃ ତାଇକେନ୍ ତାଲ୍‍ୱାର୍ କେ ଥାଇଃ ଅଡୋଙ୍ଗ୍ କେଦାଏ ହାର୍ତେ ମାରାଙ୍ଗ୍ ୟାଜାକ୍ ରାଃ ଦାସୀ ଗାଃ ଜୋମ୍ ପାଡ଼୍ ରାଃ ଲୁତୁର୍ କେ ମାଆ ଖାଣ୍ଡାଅ କେଦାଏ। ଏନ୍ ଦାସୀ ରାଃ ନୁତୁମ୍ ମାଲ୍‍ଖୁସ୍ ତାଇକେନା। 11ଏନ୍ତେ ୟୀଶୁ ପାତ୍ରାସ୍ କେ କାଜିକିଜାଏ, “ଆମାଃ ତାଲ୍‍ୱାର୍ ଖାପ୍ ରେ ଦୋହୋଏମେ। ଅକନ୍ ଦୁକୁ ଆବା ଇଙ୍ଗ୍‍କେ ଏମ୍ କାଦିଙ୍ଗାଏ, ଚିନାଃ ଏନାକେ କାଇଙ୍ଗ୍ ସାହାତିଙ୍ଗ୍ ୟା?”

ହାନ୍ନା ରାଃ ନାଡ଼େଏ ୟୀଶୁ

12ଏନ୍ତେ ପାଲ୍‍ଟାନ୍ କୋ ହାର୍ ଇନ୍‍କୁୱାଃ ଗୋମ୍‍କେକୋ ଆଡୋଃ ୟାହୁଦୀ କୋୱାଃ ମାନ୍ଦିର୍ କେ ହୋରୋତାନ୍ ସିପାହୀକୋ ୟୀଶୁ କେ ସାବ୍ କେତେ ଥୋଲ୍ କିଜାକୋ, 13ହାର୍ତେ ଇନିଃକେ ସିଦା ହାନ୍ନା ତାଃ ଇଦିକିଜାକୋ, ଚିୟାଃଚି ଇନିଃ ଏନ୍ ଶିର୍ମା ରାଃ ମାରାଙ୍ଗ୍ ୟାଜାକ୍ କୈଫା ରାଃ ହଁୟାର୍ ତାଇକେନାଏ। 14ନିଈ ଏନ୍ କୈଫା ଗି ତାଇକେନାଏ, ଅକନିଃ ୟାହୁଦୀ ଗୁରୁ କୋକେ ସାଲ୍‍ହା ଏମ୍ ଲେଦାଏ ଚି ଆବୁ ହୋଡ଼ୋକୋ ଲାଗିନ୍ତେ ମିୟାଃ ହୋଡ଼ ଗୋଜୋଃ ବୁଗିନ୍ ତାନାଃ।

ୟୀଶୁ କେ ପାତ୍ରାସ୍ କାଇଙ୍ଗ୍ ସାରିୟା କାଜିକେଦାଏ

(ମାତ୍ତି. 26:69,70; ମାର୍କୁ. 14:66-68; ଲୁକା. 22:55-57)

15ଶିମୋନ୍ ପାତ୍ରାସ୍ ହାର୍ ମିହୋଡ଼୍ ଏଟାଃ ଚେଲା ହ ୟୀଶୁ ରାଃ ତାୟୋମ୍-ତାୟୋମ୍ ସେନ୍ ତାଇନାକୋ। ନେ ଚେଲା ମାରାଙ୍ଗ୍ ୟାଜାକ୍ ରାଃ ନେଲ୍ ଉପୁରୁମ୍ ହୋଡ଼ ତାଇକେନାଏ, ଏନାମେନ୍ତେ ଇନିଃ ୟୀଶୁ ଲୋଃ ମାରାଙ୍ଗ୍ ୟାଜାକ୍ ରାଃ ରାଚା ରେ ବୋଲୋ ଜାନାଏ। 16ମେନ୍ଦୋ ପାତ୍ରାସ୍ ବାହାରି ଦୁହାର୍ ରେ ତିଙ୍ଗୁ ଜାନାଏ। ଏନ୍ତେ ଏନ୍ ଏଟାଃ ଚେଲା ଅକନିଃ ମାରାଙ୍ଗ୍ ୟାଜାକ୍ ରାଃ ଉପୁରୁମ୍ ହୋଡ଼ ତାଇକେନାଏ, ବାହାରି ଅଡୋଙ୍ଗ୍ ଜାନାଏ ଆଡୋଃ ଦୁହାର୍-ହୋରୋ ଦାସୀ କୁଡ଼ି କେ କାଜିକେତେ ପାତ୍ରାସ୍ କେ ଭିତାର୍ ଆଉକିଜାଏ। 17ଏନ୍ ଦାସୀ କୁଡ଼ି ଅକନିଃ ଦୁହାର୍-ହୋରୋ ନିଈ ତାଇକେନାଏ, ପାତ୍ରାସ୍ କେ କାଜିକେଦାଏ, “ଚିନାଃ ଆମ୍ ହ ଦୋ ଏନ୍ ହୋଡ଼ ରାଃ ଚେଲାକୋ ଏତେ ନାହାଲାମ୍?” ଇନିଃ କାଜିକେଦାଏ, “ଇଙ୍ଗ୍ ନାହାଲାଇଙ୍ଗ୍।” 18ଦାସୀକୋ ଆଡୋଃ ମାନ୍ଦିର୍ କେ ହୋରୋତାନ୍ ସିପାହୀକୋ ରାବାଙ୍ଗ୍ ରାଃ ଚାଲ୍ତେ କୁଇଲା ଜୁଲ୍ କେତେ ସେଙ୍ଗେଲ୍ ଜୁରୁବେନ୍ ତାଇକେନାକୋ, ଆଡୋଃ ପାତ୍ରାସ୍ ହ ଇନ୍‍କୁ ଲୋଃ ତିଙ୍ଗୁ କେତେ ସେଙ୍ଗେଲ୍ ଜୁରୁବେନ୍ ତାଇକେନାଏ।

ମାରାଙ୍ଗ୍ ୟାଜାକ୍ ୟୀଶୁ କେ କୁଲିକିଜାଏ

(ମାତ୍ତି. 26:59-66; ମାର୍କୁ. 14:55-64; ଲୁକା. 22:66-71)

19ଏନ୍ତେ ମାରାଙ୍ଗ୍ ୟାଜାକ୍ ୟୀଶୁ କେ ଆୟାଃ ଚେଲା କୋୱାଃ ବିଷାୟ୍ ରେ ହାର୍ ଆୟାଃ ଉପ୍‍ଦେଶ୍ ବିଷାୟ୍ ରେ କୁଲିକିଜାଏ। 20ୟୀଶୁ ଇନିଃକେ କାଜିରୁଆଡ଼୍ କେଦାଏ, “ଇଙ୍ଗ୍ ସବେନ୍ କୋକେ ଥିମ୍ବାଗି ହୋଡ଼ୋକୋ ଥାଲାରେ କାଜିକେଦାଇଙ୍ଗ୍, ଇଙ୍ଗ୍ ବିନ୍ତିଅଡ଼୍ଆଃ ରେ ହାର୍ ମାନ୍ଦିର୍ ରାଃ ରାଚା ରେ, ଅକତାଃ ସବେନ୍ ୟାହୁଦୀ ଗୁରୁକୋ ହୁଣ୍ଡିଅଃ ତାଇକେନାକୋ, ଏନ୍ତାଃ ସାଦାଏଗି ଉପ୍‍ଦେଶ୍ ଏମ୍‍କେଦାଇଙ୍ଗ୍ ହାର୍ ଉକୁ କେତେ ଜାହାନାଃ ହ କାଇଙ୍ଗ୍ କାଜିକାଦା। 21ଆମ୍ ଇଙ୍ଗ୍‍କେ ଚିନାଃ ମେନ୍ତେ କୁଲିତାନାମ୍? ଆୟୁମ୍‍‍ଲାଃକୋ ଏନ୍ ହୋଡ଼ୋକୋକେ କୁଲିକୋମେ ଚି ଇଙ୍ଗ୍ ଇନ୍‍କୁକେ ଚିନାଃ କାଜିକେଦାଇଙ୍ଗ୍। ନେଲେମ୍, ଇନ୍‍କୁ ସାରିୟାକୋ ଚି ଇଙ୍ଗ୍ ଚିନାଃ-ଚିନାଃ କାଜିକେଦାଇଙ୍ଗ୍।” 22ଚିମ୍ତା ଇନିଃ ନେୟା କାଜିକେଦାଏ, ଏଣ୍ଡେ ମାନ୍ଦିର୍ କେ ହୋରୋତାନ୍ ସିପାହୀ ହେତେ ମିହୋଡ଼୍ ଅକନିଃ ନାଡ଼େଏ ରେ ତିଙ୍ଗୁ ଲେନ୍ ତାଇକେନାଏ, ୟୀଶୁ କେ ଚାଟ୍‍କାନ୍ କେତେ କାଜିକିଜାଏ, “ଚିନାଃ ଆମ୍ ମାରାଙ୍ଗ୍ ୟାଜାକ୍ କେ ନେଲେକା କାଜିରୁଆଡ଼ିୟାମ୍?” 23ୟୀଶୁ ଇନିଃକେ କାଜିରୁଆଡ଼୍ କିଜାଏ, “ଆଗାର୍ ଇଙ୍ଗ୍ ଗାଲ୍ତି କାଜି କାଜିକେଦାଇଙ୍ଗ୍, ଏଣ୍ଡେ ଏନା ଚିକାନ୍ ଗାଲ୍ତି ତାନାଃ କାଜିମ୍, ମେନ୍ଦୋ ଆଗାର୍ ବୁଗିନ୍ କାଜି କାଜିକେଦାଇଙ୍ଗ୍, ଏଣ୍ଡେ ଆମ୍ ଇଙ୍ଗ୍‍କେ ଚିନାଃ ଲାଗିନ୍ ହୁମାଃଇଙ୍ଗ୍ ତାନାମ୍?” 24ଏନ୍ତେ ହାନ୍ନା ଇନିଃକେ ଥୋଲାକାନ୍ ଗି କୈଫା ମାରାଙ୍ଗ୍ ୟାଜାକ୍ ନାଡ଼େଏ ତାଃ କୁଲ‍୍‍ତାଇଜାଏ।

ଆଡୋଃ ମିଶା ପାତ୍ରାସ୍ କାଇଙ୍ଗ୍ ସାରିୟା କାଜିକେଦାଏ

(ମାତ୍ତି. 26:71-75; ମାର୍କୁ. 14:69-72; ଲୁକା. 22:58-62)

25ଶିମୋନ୍ ପାତ୍ରାସ୍ ତିଙ୍ଗୁ କେତେ ସେଙ୍ଗେଲ୍ ଜୁରୁବେନ୍ ତାଇକେନାଏ। ଇମ୍ତା ଇନ୍‍କୁ ଇନିଃକେ କାଜିକିଜାକୋ, “ଚିନାଃ ଆମ୍ ହ ଦୋ ଇନିଜାଃ ଚେଲାକୋ ହେତେ ନାହାଲାମ୍?” ଇନିଃ ମାନା କେତେ କାଜିକେଦାଏ, “ଇଙ୍ଗ୍ ନାହାଲାଇଙ୍ଗ୍।” 26ମାରାଙ୍ଗ୍ ୟାଜାକ୍ ରାଃ ଦାସୀ କୋଏତେ ମିୟାଃ ହୋଡ଼, ଅକଏ ଇନିଜାଃ ପେଡ଼ା କୋଏତେ ତାଇକେନାଏ ଅକନିଜାଃ ଲୁତୁର୍ କେ ପାତ୍ରାସ୍ ମାଆ ଲେଦାଏ, ଇନିଃ କାଜିକେଦାଏ, “ଚିନାଃ ଇଙ୍ଗ୍ ଆମ୍‍କେ ଇନିଜାଃ ଲୋଃ ବାଖ୍‍ଡ଼ି ରେ କାଇଙ୍ଗ୍ ନେଲ୍ ଲେଃମେୟା?” 27ପାତ୍ରାସ୍ ଆଡୋଃଗି ମାନା କେଦାଏ, ହାର୍ତେ ଇମ୍ତାଗି ମିୟାଃ ସିମ୍ ରାଆ କେଦାଏ।

ପିଲାତୁସ୍ ସାମାନାଙ୍ଗ୍ ରେ ୟୀଶୁ

(ମାତ୍ତି. 27:1,2,11-14; ମାର୍କୁ. 15:1-5; ଲୁକା. 23:1-5)

28ଏନ୍ତେ ଇନ୍‍କୁ ୟୀଶୁ କେ କୈଫା ତାଃ ଏତେ ହାକିମ୍ ରାଃ ବିଚାର୍ ଅଡ଼୍ଆଃ ତେକୋ ଇଦିକିଜାକୋ, ହାର୍ ସେତାଃ ରାଃ ସାମାୟ୍ ତାଇକେନା, ମେନ୍ଦୋ ଇନ୍‍କୁ ଆକୋ ହାକିମ୍ ରାଃ ବିଚାର୍ ଅଡ଼୍ଆଃ ଭିତାର୍ ରେ କାକୋ ବୋଲୋଜାନା, ଏନାମେନ୍ତେ ଚି ଆଶୁଦ୍ଧ୍ କାକୋ ହୋବାଅଃୱା ମେନ୍ଦୋ ଫାସାହ୍ ପାରାବ୍ ରାଃ ଜୋମେୟାଃ ଜୋମ୍ ଧାଡ଼ିୟାକୋ। 29ଏନ୍ତେ ପିଲାତୁସ୍ ଇନ୍‍କୁ ତାଃ ବାହାରି ଅଡୋଙ୍ଗ୍ କେତେ କାଜିକେଦାଏ, “ଆପେ ନେ ହୋଡ଼ ଚେତାନ୍ ରେ ଚିନାଃ ଦୋଷ୍ ଲାଗାୱି ତାନାପେ?” 30ଇନ୍‍କୁ ଇନିଃକେ କାଜିରୁଆଡ଼୍ କେଦାକୋ, “ଆଗାର୍ ଇନିଃ ଏତ୍କାନ୍ କାମିନିଃ କାଏ ତାଇନ୍ ତେୟାଃଏ ଏଣ୍ଡେ ଆଲେ ଇନିଃକେ ଆମାଃ ନାଡ଼େଏ କାଲେ ଆୱିତେୟାଃ।” 31ପିଲାତୁସ୍ ଇନ୍‍କୁକେ କାଜିକେଃକୋୱାଏ, “ଆପେଗୀ ନିଈକେ ଇଦିକେତେ ଆପେୟାଃ ମୁଶା ନାବୀ ରାଃ ଆଇନ୍ ଲେକାତେ ଗି ନିଜାଃ ବିଚାର୍ ରିକାଏପେ।” ୟାହୁଦୀ ଗୁରୁକୋ ଇନିଃକେ କାଜିକେଦାକୋ, “ଆଲେକେ ଆଧିକାର୍ ବାନୋଗା ଚି ଜାହାଁଏ କେ ଗୋଜିୟାଲେ।” 32ନେୟା ଏନାମେନ୍ତେ ହୋବାଜାନା ଚି ୟୀଶୁ ରାଃ ଏନ୍ କାଜି ପୁରାଅଃକା ଅକନାଃ ଇନିଃ ନେୟା ଉଦୁବ୍ ସିଦା ଲେଦାଏ ଚି ଇନିଃ ଚିଲ୍‍କାନ୍ ଗୋନୋଏଃ ଗୋଜୋଗାଏ। 33ଏନ୍ତେ ପିଲାତୁସ୍ ଆଡୋଃଗି ହାକିମ୍ ରାଃ ବିଚାର୍ ଅଡ଼୍ଆଃ ଭିତାର୍ ସେନ୍ ଜାନାଏ, ଆଡୋଃ ୟୀଶୁ କେ ଅଡ଼୍ଆଃ ଭିତାର୍ କେଡ଼ାକେତେ କୁଲିକିଜାଏ, “ଚିନାଃ ଆମ୍ ୟାହୁଦୀ କୋୱା ରାଜା ତାନ୍‍ମେ?”

34ୟୀଶୁ କାଜିରୁଆଡ଼୍ କେଦାଏ, “ଚିନାଃ ନେ କାଜି ଆମାଃ ପାଡ଼େତେ କାଜିତାନାମ୍ ଚି ଏଟାଃ କୋ ଇଙ୍ଗ୍ଆଃ ବିଷାୟ୍ ରେ ଆମ୍‍କେ ନେୟା କାଜିକାଦାକୋ?” 35ପିଲାତୁସ୍ କାଜିରୁଆଡ଼୍ କେଦାଏ, “ଆମ୍ ସାରିୟାମ୍ ଚି ଇଙ୍ଗ୍ ୟାହୁଦୀ ନାହାଲିଙ୍ଗ୍? ଆମାଃଗି ଜାତି ହୋଡ଼ୋକୋ ଆଡୋଃ ପ୍ରାଧାନ୍ ୟାଜାକ୍‍କୋ ଆମ୍‍କେ ଇଙ୍ଗ୍ଆଃ ତିଈ ରେ ଜିମାକାଦିଙ୍ଗାକୋ। ଆମ୍ ଚିନାଃ ଚିକାକାଦାମ୍?” 36ୟୀଶୁ କାଜିରୁଆଡ଼୍ କେଦାଏ, “ଇଙ୍ଗ୍ଆଃ ରାଇଜ୍ ନେ ଅତେଦିଶୁମ୍ ରାଃ ନାହାଲା, ଆଗାର୍ ଇଙ୍ଗ୍ଆଃ ରାଇଜ୍ ନେ ଅତେଦିଶୁମ୍ ରାଃ ତାଇନ୍ ତେୟାଃ, ଏଣ୍ଡେ ଇଙ୍ଗ୍ଆଃ ଦାସୀ କୋ ଲାଡ଼ାଇ ରିକା ତେୟାଃକୋ ଏନ୍ତେ ଇଙ୍ଗ୍ ୟାହୁଦୀ ଗୁରୁ କୋୱା ତିଈ ରେ କାଇଙ୍ଗ୍ ସାବ୍ ରିକାଅଃ ତେୟାଃ। ମେନ୍ଦୋ ଇଙ୍ଗ୍ଆଃ ରାଇଜ୍ ନେତାଃ ରାଃ ନାହାଲା।” 37ପିଲାତୁସ୍ ଇନିଃକେ କାଜିକିଜାଏ, “ଏଣ୍ଡେ ଚିନାଃ ଆମ୍ ରାଜା ତାନ୍‍ମେ?” ୟୀଶୁ କାଜିରୁଆଡ଼୍ କେଦାଏ, “ଆମ୍ କାଜିତାନାମ୍ ଚି ଇଙ୍ଗ୍ ରାଜା ତାନିଙ୍ଗ୍। ଇଙ୍ଗ୍ ନେୟାମେନ୍ତେ ଜାନାମ୍ ଇଦିକାଦିଙ୍ଗ୍ ହାର୍ ନେୟାମେନ୍ତେ ଅତେଦିଶୁମ୍ ରେ ହିଜୁଃ କାନିଙ୍ଗ୍ ଚି ସାର୍ତି ରାଃ ଗୋୱା ଏମେୟାଇଙ୍ଗ୍। ଅକଏ ସାର୍ତି ରାଃ ତାନିଃ, ଇନିଃ ଇଙ୍ଗ୍ଆଃ କେଡ଼ା ଆୟୁମ୍ ୟାଏ।” 38ପିଲାତୁସ୍ ଇନିଃକେ କାଜିକିଜାଏ, “ସାର୍ତି ଚିନାଃ ତାନାଃ?”

ଗୋନୋଏଃ ଦାଣ୍ଡ୍ ନାମେଲାଗିନ୍ ଆନାଚୁ

(ମାତ୍ତି. 27:15-31; ମାର୍କୁ. 15:6-20; ଲୁକା. 23:13-25)

ନେୟା କାଜିକେତେ ଇନିଃ ଆଡୋଃ ୟାହୁଦୀ ଗୁରୁ କୋତାଃ ଅଡୋଙ୍ଗ୍ ଜାନାଏ ହାର୍ ଇନ୍‍କୁକେ କାଜିକେଦାଏ, “ଇଙ୍ଗ୍ ଦୋ ଇନିଜାଃ ରେ ଜାହାନ୍ ଦୋଷ୍ କାଇଙ୍ଗ୍ ନାମ୍ ତାନା। 39ମେନ୍ଦୋ ଆପେୟାଃ ନେୟା ନିୟାମ୍ ତାନାଃ ଚି ଇଙ୍ଗ୍ ଫାସାହ୍ ପାରାବ୍ ରେ ଆପେ ଲାଗିନ୍ ମିୟାଃ ହୋଡ଼ କେ ବାଗେ ତାୟିଙ୍ଗ୍। ଏନାତେ ଆପେ ଚିନାଃ ସାନାଙ୍ଗ୍ ତାନାପେ ଚି ଆପେୟାଃ ଲାଗିନ୍ ୟାହୁଦୀ କୋୱାଃ ରାଜା କେ ବାଗେ ତାୟିଙ୍ଗ୍?” 40ଏନ୍ତେ ଇନ୍‍କୁ ଆଡୋଃଗି କାଉରି କେତେ କାଜିକେଦାକୋ, “ନିଈ କେ କାହା, ମେନ୍ଦୋ ଆଲେୟାଃ ଲାଗିନ୍ତେ ବାରାବ୍ବା କେ ବାଗେତାମେ।” ହାର୍ ବାରାବ୍ବା ଝାଗ୍ଡ଼ା-ଝାଟି ହାର୍ ହୋଡ଼ ଗୋଗୋଏଃ ଡାକୁ ତାଇକେନାଏ।

Currently Selected:

ଯୋହାନ୍ 18: UNXNT

Highlight

Copy