मर्कूस 7

चोखा और छुटिह्या

(मत्ती १५:१-२०)

1एक दिन फरिसी दलके मनै और यहूदी कानुनके गुरुनके यरुशलेम शहरमेसे आके येशूक आँजरपाँजर जमा होगिलाँ। 2ओइने देख्लाँ कि येशूक कौनो-कौनो चेलनके बिना हाँथ धुइले खाना खाइतिहिँत। यकर मतलब यी हो कि ओइने यहूदी चलन अनुसार अपन हाँथ नै धुइल रहिँत। 3काकरेकी सक्कु यहूदी मनै ओम्नेमेसे विशेष करके फरिसीनके अपन पुर्खनसे मिलल शिक्षाके पालन करथाँ। तबेकमारे ओइने तबसम खाना नै खाँइत, जबसम ओइने अपन चलन अनुसार हाँथ नै धुँइत। 4बजारमेसे आके ओइने खैनासे आघे जबफेन यहूदी चलन अनुसार अपनहे सफा करिँत्। ओइन्के पुर्खनके आकुर फेन चलन बा, जेकर ओइने पालन करिँत्, जस्ते कि लोटा, पानी धरना भाँरा, तामक खोरिया धुइना। 5तबेकमारे फरिसीनके और यहूदी कानुनके गुरुनके येशूहे पुँछ्लाँ, “अप्निक चेलनके हमार बाबापुर्खनके चलनहे काकरे पालन नै करथुँइत? ओइने बिना हाँथ धुइले खाना काकरे खाइतताँ?” 6येशू ओइन्हे जवाफ देलाँ, “परमेश्वरके अगमवक्ता यशैया तुहुरे कपटीनके बारेमे यी ठिक भविष्यवाणी कर्ले बा, जसिके लिखल बा, ‘ओइने मोरिक बारेमे मजा ते बोल्थाँ, पर जात्तिकमे महिन्हे प्रेम नै करथाँ। 7ओइन्के आराधना मोरिक लग कुछु फेन नै हो। काकरेकी ओइने मनैनके बनाइल चलनहे सिखैथाँ।’ 8ओइने परमेश्वरके आज्ञा पालन करना छोरदेले बताँ, और ओइने अपन पुर्खनके चलनहे पालन करतताँ।” 9येशू ओइन्हे यी फेन कलाँ, “तुहुरे अपन चलन निभाइक लग महा चलाँखीसे परमेश्वरके आज्ञाहे पन्ज्र्या देथो। 10जस्ते कि मोशा परमेश्वरके ओहोँरसे असिन नियम कानुन देहल बा, ‘अपन दाईबाबक आदर करो, जे अपन दाईबाबाहे आदर नै करी उहिहे मुवा देहे परी।’ 11पर तुहुरे मनैनहे यी कथो कि ओइने अपन दाईबाबाहे असिक कहिँत कना तुहुरे चहथो, ‘महिन्हे माफ करो, मै तुहुरिन्हे सहयोग करे नै सेकम। काकरेकी ज्या मै तुहुरिन्हे देना रहे, उ मै परमेश्वरहे देना वाचा कर्ले बतुँ।’ 12असिके तुहुरे मनैनहे ओइन्के दाईबाबाहे सहयोग करे नै देथो। 13और अपन चलनहे कायम करक लग तुहुरे परमेश्वरके आज्ञाहे पन्ज्र्या देथो, और असिके तुहुरे कैयो गलत चिज सिखैथो।”

मनैनहे अशुद्ध बनैना बात

14तब् येशू ओइन्हे फेन एकचो अपन थेन बलैलाँ और कलाँ, “तुहुरे सक्कु जाने मोरिक बात सुनो और बुझो। 15असिन कुछु चिज नै हो, जोन बाहेरसे भित्तर जाके तुहुरिन्हे अशुद्ध बनाइत। पर जोन चिज मनैनमेसे बाहेर निकरत, वहे चिज उहिहे अशुद्ध बनाइत। 16यदि तुहुरे बुझे चहथो कलेसे, यी बातमे ध्यान देऊ कि मै अब्बे तुहुरिन्हे का कनु।” 17तब् येशू मनैनके भीड़हे छोरके एकथो घरेम गैलाँ, और हुँकार चेलनके ओकर मतलब पुँछ्लाँ, जोन दृष्टान्त अब्बे भर्खर येशू उ मनैनसे कले रहिँत। 18येशू ओइन्हे कलाँ, “मै ज्या कनु, का ओकर बारेम तुहुरे फेन नै बुझ्लो? जोन खाना हम्रे खैथी, उहिसे हम्रे परमेश्वरके आघे अशुद्ध नै हुइथी। 19काकरेकी यी तुहुरिन्के मनमे नै जाइत, बेन पेटेम जाइत, और तब् तुहुरिन्के शरीरमेसे बाहेर चलजाइत।” असिक कहिके येशू सक्कु खैना चिजहे शुद्ध ठहरैलाँ। 20फेनदोस्रे येशू यी फेन कलाँ, “तुहुरिन्के मनमेसे जोन बाहेर निकरत, वहे मनैनहे अशुद्ध बनाइत। 21काकरेकी तुहुरिन्के मनमेसे खराब विचार निकरत, जोन तुहुरिन्हे व्यभिचार, चोरी, हत्या, दोसुर जहनके जन्नीक थेन जैना। 22लालच, हरेक मेरके खराब चिज, कपट, धोखा देना, जन्नीनके बारेम गलत व्यवहार, निन्दा, बिह्रे मुना और ठग्ना बात घमण्ड और मूर्खताके ओहोँर लैजाइत। 23यी सक्कु बात तुहुरिन्के भित्तरसे निकरत, और यहे तुहुरिन्हे अशुद्ध बनाइत।”

एकथो जन्नीक विश्वास

(मत्ती १५:२१-२८)

24यकरपाछे येशू और हुँकार चेलनके गालील प्रदेशमेसे चलगिलाँ, और टुरोस नगरके आँजरपाँजरके ईलाकामे गैलाँ। येशू एकथो घरेम गैलाँ, और ऊ वहाँ बताँ कना केऊ फेन पता ना पाए कहिके चाहिँत। पर येशू वहाँ बताँ कहिके मनै महा झत्ते पता पादरलाँ। 25तब्बेहेँ एकथो जन्नी, जेकर छाईकमे भूत्वा लागल रहिस। ऊ येशूक बारेम सुनल, और येशूक थेन आके हुँकार आघे ठेहुनी टेकल। 26उ जन्नी यहूदी नै रहे, उ जन्नी सिरिया देशके फोनिके ईलाकामे जल्मल रहे। ओकर छाईकमेसे भूत्वा निकारदिँत कहिके उ जन्नी येशूहे बिन्ती करल। 27येशू उ जन्नीहे कलाँ, “आघे छाइछावनहे अघाई देऊ। काकरेकी लरकनके रोटी लेके कुकरीनहे दारदेना ठिक नै हो।” (काकरेकी यहूदी मनै ओइन्हे कुकरीनके हस व्यवहार करिँत्, जे यहूदी नै हो।) 28उ जन्नी बुझगिल रहे कि येशू गैर-यहूदिनहे कुकरीनके और यहूदिनहे लरकनके रुपमे बुझाइतताँ। तबेकमारे ऊ जवाफ देहल, “हाँ प्रभु, कुक्कुर फेन अंगनामे लरकनके बच्का खैथाँ।” 29तब् येशू उ जन्नीहे कलाँ, “तुँ ठिक जवाफ देलो! आब तुँ अपन घरे जाऊ। भूत्वा तोहाँर छाईकमेसे निकरके चलगिल बा।” 30तब् ऊ अपन घरे गैल, और अपन छाइहे खटियामे सुतल देखल, और ओकरमनसे भूत्वा निकरगिल रहिस।

बहिर और गोँगाहा मनैया

31यकरपाछे येशू और हुँकार चेलनके टुरोस नगरके आँजरपाँजरके ईलाकाहे छोरदेलाँ। ओइने सीडोन ईलाका ओहोँरसे गैलाँ, और ओइने डेकापोलिस प्रदेशके आँजरपाँजरके ठाउँसे हुइती निकरलाँ, और गालील समुन्दरमे पुग्लाँ। 32कौनो मनै येशूक थेन एकथो मनैयाहे नन्लाँ, और ऊ बहिर रहे और फरछ्वारसे बोले फेन नै सेके। ओइने येशूहे बिन्ती करलाँ कि ऊ अपन हाँथ ओकर उप्पर धारदिँत, ताकि ऊ चोखाजाए। 33तब् येशू उ मनैयाहे भीड़मेसे दूर अल्गे लैगिलाँ। तब् येशू ओकर कानेम अपन अंग्री दरलाँ, तब् अपन अंग्रीमे थुक्लाँ, और उ मनैयक जीभहे छुलाँ। 34और येशू स्वर्ग ओहोँर हेरलाँ, प्राथनामे एकचो नम्मा साँस लेके उ मनैयाहे कलाँ, “इफ्फाता,” जेकर मतलब हुइत “खुलजा।” 35जुरतेहेँ उ मनैया सुने लागल, और ऊ फरछ्वारसे बोले लागल। 36येशू मनैनहे कलाँ, “जोन मै अब्बे कर्नु, यी किहु ना बतैहो।” पर जतरा येशू चेतावनी देलाँ कि मनैनहे ना बतैहो, ओत्रेहे धेउर हौसलासे ओइने यी खबर दोसुर जहनसम पुगैलाँ। 37यी बात सुनुइया सक्कु जहनहे अचम्म लग्लिन। और ओइने घनिघनी असिक कहे लग्लाँ, “ऊ सक्कु चिज बहुत मजा करल! यहाँसम कि ऊ बहिराहे सुन्नाहा और गोँगाहाहे बोल्नाहा बनाइत।”

Currently Selected:

मर्कूस 7: DVGNT

Highlight

Copy