मर्कूस 2

येशू एकथो असिन मनैयाहे चोख्वैलाँ, जे नेङघुम करे नै सेके

(मत्ती ९:१-८; लूक. ५:१७-२६)

1थोरिक दिन पाछे येशू कफर्नहुम नगरमे फिर्ता गैलाँ, और वहाँक मनै पता पैलाँ कि नगरमे ऊ फिर्ता आगिल बताँ। 2तब् वहाँ बहुत्ते मनै जमा होगिलाँ, और उ घर मनैनसे भरगिल। यहाँसम कि दवारके बाहेर अंग्नम फेन मनै भरगिलाँ, और येशू ओइन्हे परमेश्वरके वचन सिखाइतिहिँत। 3कौनो मनै वहाँ अइलाँ, ओइने एकथो कुँज रोग लागल मनैयाहे लेके येशूक थेन अइलाँ। चारजाने उ मनैयाहे दरीमे लेके आइल रहिँत। 4जब ओइने उ मनैयाहे भीड़के कारण येशूक थेन पुगाई नै सेक्लाँ, तब् ओइने येशूक मुन्टक सोझे उप्पर छँपरा उजरलाँ। तब् ओइने उप्परसे येशूक ठिक आघे उ मनैयाहे दरीसुन्धे झुलाके उतारदेलाँ। 5जब येशू अपन उप्पर ओइन्के विश्वास देख्लाँ, तब कुँज रोग लागल मनैयाहे ऊ कलाँ, “मोरिक संघरिया तोहाँर पाप माफ होगिलाँ।” 6पर वहाँ केऊ-केऊ यहूदी कानुनके गुरुन बैठल रहिँत, और अपन मनमे असिक कहिके विचार करतिहिँत। 7“यी मनैया असिन बात काकरे बोलता? यी ते परमेश्वरके निन्दा करता! यिहिहे सोँचे परना रहिस कि ऊ परमेश्वर हुइँत! सिरिफ परमेश्वर किल पापहे माफ करे सेक्थाँ।” 8वहे बेला येशू ओइन्के मनके बात बुझगिलाँ कि ओइने का सोचतताँ। तब् ऊ ओइन्हे कलाँ, “तुहुरे अपन मनमे असिन काकरे सोँचतो? 9सहजिल का बा, यी कुँज रोग लागल मनैयाहे असिन कना, तोरिक पाप माफ होगिल,” या असिन कना, “उठ्जा, अपन दरी उठा और नेगे लाग? 10पर मै चहथुँ कि तुहुरे जानो कि मै, मनैयक छावाहे धर्तीमे मनैनके पाप माफ करना अधिकार बा।” 11तब् येशू उ कुँज रोग लागल मनैयाहे कलाँ, “मै तुहिहे कहतुँ, ठरह्याजा, अपन दरी उठा और अपन घरे जा।” 12उ कुँज रोग लागल मनैया जुरतेहेँ ठरह्यागिल। अपन दरी उठालेहल, और वहाँसे सक्कुहुनके आघेसे बाहेर चलगिल। उहिहे देख्के सक्कु जहनहे अचम्म लग्लिन, और ओइने सक्कु जाने परमेश्वरके महिमा करलाँ और कलाँ, “हम्रे कबु फेन यिहिसे आघे असिन नै देख्ली।”

लेवीहे बोलावत

(मत्ती ९:९-१३; लूक. ५:२७-३२)

13येशू एकचो फेनदोस्रे गालील समुन्दरके आँरितिर गैलाँ। बहुत्ते मनै हुँकार थेन जमा होगिलाँ, तब ऊ ओइन्हे परमेश्वरके वचन सुनाई लग्लाँ। 14जब येशू डग्रेडगर नेगतिहिँत, तब ऊ कर उठुइया मत्ती नाउँक लेवी मनैयाहे देख्लाँ, जे अल्फयसके छावा रहे। ऊ कर उठुइयनके ठाउँमे बैठल रहे। येशू उहिहे कलाँ, “मोरिक पाछे लाग।” लेवी उठ्गिल और येशूक पाछे लागगिलस।

15ओकरपाछे येशू और हुँकार चेलनके लेवीक घरेम खाना खाइतिहिँत। बहुत्ते कर उठुइयन और औरे दोसुर बहुत्ते जाने जेनहे यहूदी मनै पापी कहिँत, ओइने वहाँ रहिँत। ओइने फेन येशू और हुँकार चेलनके संग खाना खाइतिहिँत। काकरेकी वहाँ असिन बहुत्ते मनै रहिँत, जेने येशूक संग रहतिहिँत। 16यहूदी कानुनके गुरु जेने फरिसी दलके मनै रहिँत, ओइने येशूहे उ कर उठुइयनके संग खाइत देख्लाँ, जेनहे यहूदी मनै पापी कहिँत। ओइने हुँकार चेलनहे कलाँ, “यी कर उठुइयनके और पापीनके संग बैठ्के काकरे खाइत?” 17यी सुनके येशू ओइन्हे जवाफ देलाँ, “निरोगीनहे वैदक जरुरी नै पर्थिन, पर रोगीनहे वैदक जरुरी पर्थिन। मै ओइन्हे बलाई नै अइनु, जेने अपनहे धर्मी मन्थाँ। पर मै पापीनहे बलाई अइनु, ताकि ओइने पाप करना छोरदिँत, और अपन मन बद्लिँत।”

उपवासके बारेमे प्रश्न

(मत्ती ९:१४-१७; लूक. ५:३३-३९)

18एकचो जब यूहन्नक चेलनके और फरिसीनके उपवास बैठल रहिँत ते कौनो मनै येशूक थेन अइलाँ और हुँकिन्हे पुँछ्लाँ, “अप्निक चेलनके असिन उपवास काकरे नै बैट्थाँ? जसिके यूहन्नक चेलन और फरिसीनके करथाँ?” 19येशू ओइन्हे कलाँ, “मोरिक चेलनके और मै एकथो दुल्हा और ओकर बरत्यनके हस हुइती। का दुल्हक बरत्यन ओकर संग रहतसम बिना भोजक खाना खैले जाई सेक्हीँ? जात्तिके बिना खैले जाई नै सेक्हीँ। 20पर असिन समय फेन आई, जब दुल्हा बरत्यनके थेनसे अलग करवाजाई। तब् बरत्यन बिना खैले जैहीँ। 21केऊ फेन पुरान लुग्गामे लावा लुग्गक पेउँदा नै लगाइत। यदि ओइने असिक करहीँ कलेसे जब लुग्गाहे धुइहीँ, तब् पेउँदा फाट्के निकरजाई, और लावा पेउँदा पुरान लुग्गाहे आकुर धेउर फटादी।” 22अस्तेहेँके, केऊ फेन लावा अंगुरके रस पुरान छालक ठैलामे नै धारत। यदि ओइने असिक करहीँ ते जब अंगुरके रस फुली कलेसे पुरान छालक ठैला नै नमी, पर ठैलाहे उ फारदी और अंगुरके रस और छालक ठैला दुनु खराब होजाई। तबेकमारे लावा अंगुरके रस लावै छालक ठैलामे धारे परत।

यहूदिनके बिँसैना दिनके प्रभु

(मत्ती १२:१-१४; लूक. ६:१-११)

23एकथो यहूदिनके बिँसैना दिन जब येशू और हुँकार चेलनके खेट्वैखेट्वा जाइतिहिँत, तब् हुँकार चेलनके अनाजके बाली टुरे लग्लाँ। 24तब् फरिसी दलके मनै येशूहे कलाँ, “यी हमार कानुनके विरोध हो, जोन अप्निक चेलनके यहूदिनके बिँसैना दिनमे करतताँ! अप्नि ओइन्हे बताई परना रहे कि ओइने असिन ना करिँत्।” 25-26तब् येशू ओइन्हे कलाँ, “का तुहुरे कबु नै पहरलो कि हमार पुर्खा दाऊद बहुत साल आघे का करल? जब अबियाथार यहूदी प्रधान पुजारी रहे? जब दाऊद और ओकर संघरियन भुँखाइल रहिँत। तब ऊ परमेश्वरके तम्बूमे गैल, और ऊ उ रोटी खाइल, जोन परमेश्वरहे दान चह्राइल रहे, और ऊ अपन संघरियन फेन उ रोटी बाँटल। हमार मोशक कानुन अनुसार यी रोटीहे यहूदी मुख्य पुजारीनके किल खाई सेक्थाँ।” 27तब् येशू ओइन्हे कलाँ, “परमेश्वर मनैनहे बिँसैना दिनके लग नै बनाइल हुइँत, पर परमेश्वर मनैनके लग बिँसैना दिन बनैलाँ। 28तबेकमारे मै, मनैयक छावाहे असिक कना अधिकार बा कि यहूदिनके बिँसैना दिनमे मनैनहे का करना अनुमति बा।”

Currently Selected:

मर्कूस 2: DVGNT

Highlight

Copy