मत्ती 12

बिँसैना दिनके प्रभु

(मर्कू. २:२३-२८; ३:१-६; लूक. ६:१-५)

1यहूदिनके बिँसैना दिनमे येशू और हुँकार चेलनके खेत्वैखेट्वा जाइतिहिँत। हुँकार चेलनके भुँखाइल रहिँत, और अनाजके बाली टुरके खाई लग्लाँ। 2पर फरिसीनके यी देख्के हुँकिन्हे कलाँ, “हेरी, अप्निक चेलनके वहे करतताँ! जोन बिँसैना दिनमे नै सोहाइत।” 3पर ऊ ओइन्हे कलाँ, “दाऊद जब अप्ने और ओकर संगे रहुइयन भुँखाइल रहिँत, तब् ओइने का करलाँ, का तुहुरे नै पह्रल हुइतो? 4कसिके उ परमेश्वरके तम्बूमे पैँठ्के चह्राइल रोटी खाइल रहे? उ रोटी खैना ना ते उहिहे, ना ओकर संग रहुइयनहे, पर पुजारीनहे किल उचित रहे। 5अथवा का मोशक नियम कानुनमे नै पह्रल हुइतो, कसिके हर बिँसैना दिनमे पुजारी मन्दिरमे काम करत, जोन मोशक नियम कानुनके विरोधमे बा, तभुन फेन ओइने निर्दोष ठहरथाँ? 6पर यहाँ केऊ बा, जे मन्दिरसे फेन भारी बा। 7मै बलिदान नै चहथुँ, पर मै चहथुँ कि ‘तुहुरे दोसुर जहनहे दया देखाऊ’ कना पवित्र शास्त्रमे लिखल बातके मतलब तुहुरे जानल रतो कलेसे तुहुरे मोरिक निर्दोष चेलाहे दोष नै लगैतो। 8काकरेकी मै, मनैयक छावाहे असिक कना अधिकार बा कि यहूदिनके बिँसैना दिनमे मनैनहे का करना अनुमति बा।”

हाँथ सुखल मनैया

9वहाँसे निकरके येशू ओइन्के बैठक भवनमे गैलाँ। 10वहाँ एकथो हाँथ सुखल मनैया रहे। ओइने येशूहे दोष लगैना विचारसे हुँकिन्हे पुँछ्लाँ, “का बिँसैना दिनमे किहुहे चोख्वैना उचित बा?” 11येशू ओइन्हे कलाँ, “मानलेऊ कि तुहुरिन्केमेसे केक्रो थेन एकथो भेँरवा बा और बिँसैना दिनमे उ गड्ढामे गिरगिल कलेसे, का तुँ उहिहे पकरके बाहेर नै निकरथो? 12भेँरवासे मनैया धेउर किम्ती बा! तबेकमारे हमार नियम कानुन हम्रिहिन्हे बिँसैना दिनमे मनैनहे चोख्वैना अनुमति देहत।” 13तब येशू उ सुखल हाँथ रहल मनैयाहे कलाँ, “अपन हाँथ पसार।” ऊ अपन हाँथ आघे पसारल, और ओकर हाँथ फट्से चोखागिलिस। 14पर फरिसीनके बैठक भवनमेसे बाहेर जाके हुँकिन्हे कसिके मुवाई कहिके हुँकार विरोधमे योजना बनाई लग्लाँ।

परमेश्वरके चुनल सेबक

15तब् उ बात पता पाके येशू वहाँसे चलगिलाँ। तब् मनैनके बरवार भीड़ हुँकार पाछे लागल, और येशू उ भीड़के सक्कु बेमार मनैनहे चोख्वादेलाँ। 16पर येशू मनैनहे कड़ा चेतावनी देलाँ, “दोसुर मनैनहे ना बतैहो कि मै के हुइतुँ।” 17यशैया अगमवक्तक माध्यमसे परमेश्वरके कहल वचन पूरा हुइक लग यी हुइल रहे,

18“मोरिक सेबक जिहिहे मै चुनल बतुँ।

मोरिक दुलार जिहिसे मै खुशी बतुँ।

मै मोरिक आत्मा ओकरमे दारदेहम। और ऊ जाति-जातिनहे न्यायक घोषणा करी।

19ऊ ना ते झगरा करी, ना जोरसे चिल्लाई।

ना ते मनैनहे ऊ घमण्डसे भरल भाषण जोरसे करी।

20चरमराइल गौलर हस कमजोर मनैनहे ऊ नोकसान नै पुगाई।

और समस्यामे रहल मनै बुते भिरल दिया हस हुइताँ।

और ऊ ओइन्हे नोकसान नै पुगाई।

और अन्त्यमे ऊ न्यायहे जिता देहुइया कारण बनी।

21जाति-जातिक मनै ओकरमे आशा करहीँ।”

येशू और शैतान

(मर्कू. ३:२०-३०; ११:१४-२३)

22तब् हुँकार थेन भूत्वा लागल एकथो आँधर और लाट मनैया नानगिलस। येशू उहिहे चोख्वादेलाँ। यहाँसम कि, ऊ लाट और आँधर मनैया बोल्नाहाँ और देख्नाहाँ होगिल। 23तब् भीड़के सक्कु मनै अचम्म होके कलाँ, “का यी दाऊद रज्वक छावा हुई सेकी?” 24पर यी सुनके फरिसीनके कलाँ, “यी मनैया भूत्वनके मलिक्वा शैतानसे किल भूत्वनहे निकारत।” 25पर येशू ओइन्के विचार पता पाके ओइन्हे कलाँ, “यदि कौनो राजके मनै असिन समूहमे बँटजैहीँ, जेने एकदोसर जहनसे झगरा कर्ती रथाँ कलेसे उ राज पक्कै फेन बर्बाद होजाई। और यदि कौनो शहर और परिवार लर्ती रहिहीँ कलेसे ओइने नम्मा समयसम एक्केमे रहे नै सेक्हीँ। 26यदि शैतान अपने भूत्वनसे लरी कलेसे, ऊ अपनेहे ओरवादी। ओसिक हुई कलेसे ओकर राज कसिके टिके सेकी? 27यदि मै शैतानके सहायतासे भूत्वनहे भगैथुँ कलेसे, तुहुरिन्के छावनके भर केकर सहायतासे उहिहे निकरथाँ? तबेकमारे ओइनेहेँ तुहुरिन्के न्याय करहीँ। 28पर यदि परमेश्वरके आत्मक सहायतासे मै भूत्वनहे निकरथुँ कलेसे, परमेश्वरके राज तुहुरिन्केमे आसेकल बा। 29केऊ फेन बल्गर मनैयक घरहे फोरे नै सेकी, जबसम ऊ बल्गर मनैयाहे जितक लग और बाँधक लग उहिसे धेउर बल्गर नै होजाई। तब् ऊ ओकर घरेमसे सक्कु चिज लैजाई सेकी। 30जे मोरिक संग नै हो, उ मोरिक विरोधमे बा, और जे मोरिक संग नै बिटोरत, उ छित्रादेहत। 31तबेकमारे मै तुहुरिन्हे कहतुँ, मनैनके करल हर पाप माफ होजाई, पर पवित्र आत्मक विरोधमे करल निन्दा कबु माफ नै हुई। 32केऊ मै, मनैयक छावक विरोधमे कुछु कही कलेसे उहिहे माफ होजाई। पर केऊ फेन पवित्र आत्मक विरोधमे निन्दा करी कलेसे उहिहे यी युगमे और अइना युगमे फेन माफ नै हुई।”

रुख्वा अपन फारासे चिन्हाजाइत

33“यदि एकथो रुख्वा मजा बा कलेसे ओकर फारा फेन मजा रही। और यदि एकथो रुख्वा खराब बा कलेसे ओकर फारा फेन खराब रही। काकरेकी फारासे रुख्वा चिहिन्जाइत। 34तुहुरे बिखार साँपनके लरका हस हुइतो! तुहुरे अप्निहीँ दुष्ट बतो, कलेसे मजा बात कसिके बोले सेक्बो? काकरेकी कौनो एकथो मनैया वहे बोलत, ज्या ओकर मनमे भरल रथिस। 35एकथो मजा मनैया अपन मनमे रहल मजा चिजसे मजै बात निकारत। पर एकथो खराब मनैया अपन मनमे रहल खराब चिजसे खराबे बात निकारत। 36मै तुहुरिन्हे कहतुँ, हर बिनाकामक बात जोन मनै बोल्थाँ, न्यायक दिनमे ओइन्हे ओकर लेखा देहे पर्हिन। 37काकरेकी परमेश्वर न्याय करहीँ, और कौनो फेन मनैया निर्दोष बा कि दोषी बा कहिके ओकर बोल्लक बोलीएसे छुट्यैहीँ।”

चिन्हा हेरना इच्छा

(मर्कू. ८:११-१२; लूक. ११:२४-२६,२९-३२)

38तब् यहूदी कानुनके गुरु और फरिसीनमेसे केऊ-केऊ हुँकिन्हे कलाँ, “गुरुजी, हम्रे चहथी कि अप्नि एकथो चमत्कार करके देखाई।” 39येशू ओइन्हे जवाफ देलाँ, “दुष्ट और व्यभिचारी मनै चमत्कार खोज्थाँ। पर यी युगके मनैनहे परमेश्वरके अगमवक्ता योनक जीवनमे जोन घटना घट्लिस, उ चमत्कार बाहेक दोसुर चमत्कार नै देजैहिन। 40काकरेकी जसिके योना बरवार मच्छिक पेटमे तीन दिन और तीन रात रहल। ओस्तेके मै, मनैयक छावा फेन धर्तीक भित्तर तीन दिन और तीन रात रहम। 41निनवे शहरके मनै न्यायक दिनमे तुहुरिन्के संग ठरह्यैहीँ, और तुहुरे दोषी ठहरजिबो। काकरेकी तुहुरे अपन मन बदलके पाप करे नै छोरलो। पर ओइने योनक प्रचार सुनके अपन मन बदलके पाप करे छोरदेले रहिँत। पर हेरो, योनासे फेन महान केऊ यहाँ बा। पर तभुन फेन तुहुरे अपन मन बदलके पाप करना नै छोरथो। 42दक्खिनके महारानी न्यायक दिनमे तुहुरिन्के संग ठरह्याई, और तुहुरे दोषी ठहरजिबो। काकरेकी तुहुरे अपन मन बदलके पाप करना नै छोरलो। पर ऊ पृथ्वीक छोरसे सुलेमानके बुद्धिक बात सुने आइल रहे। पर हेरो, सुलेमानसे महान केऊ यहाँ बा। तभुन फेन तुहुरे पाप करे छोरना नै चहथो।”

अपन लग घरक खोजी करुइया भूत्वा

43“जब भूत्वा मनैयकमेसे निकरके जाइत, उ बिसाँइक लग सुखल ठाउँ खोज्ती नेगत, पर केहोँरो नै भेटाइत। 44तब् ऊ अपन मनमने कहत, ‘जोन मनैयकमेसे मै निकरके अइनु, फेनदोस्रे मै ओकर जीवनमे चलजिम।’ जब उ भूत्वा घुमके आइत, तब उ मनैयक जीवनहे खाली, बहारल और सवाँरल घर हस भेटाइत। 45तब् उ भूत्वा जाइत, और अपनसे फेन धेउर खराब आकुर सातथो भूत्वन अपन संग नानत, और मनैयक भित्तर पैँठ्के ओइने वहाँ डेरा दरथाँ। और उ मनैयक पाछेक दशा आघेक दशासे फेन खराब होजिथिस। यी समयक दुष्ट मनैनके संग फेन ओस्तेहेँ हुई।”

येशूक दाई और भैयन

(मर्कू. ३:३१-३५; लूक. ८:१९-२१)

46येशू भीड़के मनैनसे बोलेबेर, हुँकार दाई और भैयन ठरह्याइल रहिँत, और हुँकिन्से बात बत्वाइक लग रहिँत। 47तब् केऊ येशूहे कहल, “यहोँर सुनी, अप्निक दाई और भैयन बाहेर बताँ, और ओइने अप्निसे बात बत्वाइक लग बताँ।” 48पर उ बोलुइया मनैयाहे येशू कलाँ, “मोरिक दाई और मोरिक भैयन के हुइँत?” 49तब् ऊ अपन हाँथेलेके चेलनहे देखाके कलाँ, “हेरो, यी मोरिक दाई और यी मोरिक भैयन हुइँत! 50काकरेकी जे ओसिक करत, जसिन स्वर्गमे रहुइया परमेश्वर चहथाँ, ओइनेहेँ मोरिक भैया, मोरिक बाबु और मोरिक दाई हुइताँ।”

Currently Selected:

मत्ती 12: DVGNT

Highlight

Copy