मरकुस 10

वेहवाल अने तलाको विषय मेहे सिक्षा

(मत्ती 19.1-12)

1फाशु येशु तीहीरोत उठीत कोईत यहूदीयाआ सीमा मेहे अने यरदोनो पार आव्यू गोर्दी फाशी तियाआ आरी एखठी ओत गोई अने आपाज रीतीवाही तियाहा फाशु हीकाडूहु लाग्यु. 2तेहलाम किबी परुसी तियाआ परीक्षा कोअला तियाआ जागे आव्ये अने तियाहा फुसिलो लागाडीत का; के कोडा मांहांकोअता आपाआ लाडीई सोडीत आपलो योग्य होय? 3तिये तियाहा कोयु, “मोशेई तुमामे कि आज्ञा आप्यी होय?” 4तिये कोयु, “मोशेई माहुंहु आज्ञा आप्यी होय का तो सूटपत्र लेखित बुई बारथे काडीत आप.” 5पोन येशु तियाहा कोयु, “तिये ए आज्ञा तुमाआ मोनोमेहे कोठरता वाही लेखिलो.” 6पोन जग च्या पेलेरोत परमेश्वराने तियाहा बुई अने माहु बोनाडहि 7त्यापोत मांहु आपाआ याह्ही बाह्हाआ सोडीत आपाआ लाडीई आरी रोय. 8अने ओ बेन होमला डीलोओ उवे कोईत ते ओमे बेन नाहा पण एक डील होय. 9त्यापोत ज्याहा परमेश्वराने जोडीत होय तियाहा कोडु मांहु अलग कोअनारू नाहा. 10अने शिष्य कोअमे आविलो आव विषयी तियाहा फासी फुसुहू लागाडीत. 11तिये तियाहा कोयु जो कोडु आपाआ लाडीई सूटपत्र आपित दिहरा बुई आरी वेहवाल कोअनारू ताहा तो तिच्याविरुद्ध व्यभिचार कोअत्लू, 12अने बुई पोन आपाआ डोहाहा सूटपत्र आपित दिहरा मांहाआरी वेहवाल कोअते ताहा ती व्यभिचार कोईत ओते.

सोऐ अने होरगा राज्यो

(मत्ती 19.13-15; लूका 18.15-17)

13फासाडी मांहे पोऱ्याहा त्याजागे घेऊन आवहू लागाडीत का तो तियाहा स्पष्ट कोईओलो पण शिष्यांनी तियाहा धमकाव्यो. 14येशु जांहा ओ पालील्यो, तेहलाम क्रोधावाही तियाहा कोयु, “पोऱ्याहा मा आहने आवहू दया तियाहा नाहा कोहू विनाकारण परमेश्वरोओ राज्य तियाआ हारखोच होय. 15आय तुमामे खोरोज कोत्लू जो कोडु देवोओ राज्य हानू पोऱ्याहोस ग्रहण कोईत नाहा ताहा तो तीयाम खोरोज प्रवेश कोहू सेकेहे नाहा.” 16तेहलाम तो तियाहा आपाआ गोदमध्ये घेऊन अने तियाआ उपो आथे मेकीत आशिर्वाद आपुहू लाग्यू.

धनी जवान अने परमेश्वरोओ राज्यो

(मत्ती 19.16-30; लूका 18.18-30)

17अने जाहा तो प्रवासाम जाणारच ओतु तेहलाम एक माहुहू गुगदीत तियाआ जागे आवयू अने गुडू पोडीत फुसिलो लाग्यू, ओ हाजो गुरुजी, तू हाजूहोय अने अनंत जिवनाआ अधिकारी उविला कोअता आय की कोओ? 18येशु तियाहा कोयु तू माहु उत्तम काहा कोहे? परमेश्वरोप रोत कोडूच हाजो नाहा 19ताहु आज्ञा ताहा मालुमुज होय, हत्या कोहू नाहा, व्यभिचार कोहू नाहा, चोरी कोहू नाहा, झुटी साक्ष आपुहू नाहा, निंदा कोहू नाहा, आपाआ याह्ही अने बाह्हाआ सन्मान को. 20तिये तियाहा कोयु, गुरुजी, आय जन्मापोरोत आव आखे गोठीई पालीत कोईत आवयू होय. 21ओ पालीत येशुहू प्रेम आवयी अने तिये कोयु, तांआम फासी होमला गोठीई कोम होय, जा जे किबी ताआ होय अने गोरब्योम वाटीत आप अने होर्गाम ताहु धन जोडीत आविलो तू माआ फासाडी आव. 22ओ वचन होमलित तियाआ सोब उतरीलो अने तो दुखित ओतगोयु तिहीरोत निहित गोल्यो काहाके तो जाखो श्रीमंत ओतु. 23येशु चारही सेटे पालीत आपाआ शिष्यांआ कोयु, धनवानो कोअता परमेश्वरोओ राज्याकोअता प्रवेश कोअला केतो कठीण होय 24शिष्य तियाआ शब्दापोरोत जास्तीज आश्चर्य उवे पण येशु फासाडी कोयु, “ऐ पोऱ्या, परमेश्वरोओ राज्याम प्रवेश मिलविलो केहलो कठीण होय, 25परमेश्वरोओ राज्याम एगदा श्रीमताआ प्रवेश कोईलापेक्षा उटडाहा हुयीइ नाकामेरोत निहित जाअलो सोपो होय.” 26ते फासी जाखो आश्चर्यावांही फुसिलो लागाडीत फासाडी कोडाआ तारण ओवुहू सेकोहो? 27येशु त्याआरोत पालहु कोयु माआहुकोअता ओ कठिन होय पण परमेश्वरोओ कठिन नाहा काहाके परमेश्वरा कोअता आखे किबी शक्य होय. 28पेत्र तियाहा कोल्यु लाग्यू, पाला, आमाहा आखे सोडीत ताआ फासाडी लाग्यू होय. 29येशु कोयु, आय ताहु खोरोज कोत्लू, का एहलो जीआ माआ अने सुवार्ता कोअता को, पाही, बोईही अने याह्ही-बाप अने पोऱ्ये अने खेतीहो सोडये होय, 30अने तो ओमे योपो वर्तमान समयी कोओहो पाही बोईही, याह्ही बाह्हाहा अने पोऱ्ये अने खेतीहो होव पट्ट जाखो मेलवूहु नाहा पण सर्वकाळी रोणाआरा आरी अने आवनाराआ जुगोम अनंत जीवोन जोडे तांहुअजा रोही नाहा. 31पोन केते जोओ जे पहीले होय, आखरी होय अने जे आखिर होय ते पहीले होय.

येशु तियाआ मृत्यु विषय मेहे तीसरी कावा कोयु

(मत्ती 20.17-19; लूका 18.31-34)

32अने ते यरुशलेमेत जाआत्लू वातेम ओते अने येशु तियाआ आगाडी-आगाडी जात ओतू एन ते चक्कित उवनारा ओते अने जे मागित आवीत ओते ते बितगोये ओते अने फासी तो तियाअ बाराणा अलग घेऊन गोल्यो, अने जे किबी तियाआ आरी उवे ओते ते तियाहा कोयु ओतु, 33पाला, आपु यरुशलेमेत जात रोल्या होय अने माअहा पोऱ्या मुख्य याजक अने शास्त्रीच्या आथोमेहे तोईत आप्यू जानारू अने ते तियाहा मरण दंड योग्य ठेरवीत अन्यजाति आथे होफहोपिन आपी. 34ते तियाआ थट्टा कोअनारू, तियापो थुंकीलो, तियाहा चापके देही अने माईत टाकही अने तो तीन दिहीआ तो फासी जिवंत उठनारू.

सेवकायीई महानता

(मत्ती 20.20-28)

35तेहलाम जब्दिई बेन पोऱ्ये याकोब अने योहान तियाआ जागे आविलो कोहू लागाडीत, ओ गुरु, आमाहा लागेहे जे किबी आमाहा तापो मागहु ते तू आमा कोअता को. 36अने तिये तियाहा कोयु तुमामे कि लागेहे आय तुमा कोअता कोहू? 37तिये तियाहा कोयु, ताआ वैभवाआ आमामेरोत एक हाजावोगे अने दिहरू डावासाईटोहो बोहजी. 38पोन येशु तियाहा कोयु, तुमामे मालुम नाहा का तुमु नाहाकोत मागित होय जो पिदो आय पीही होय कि तो तुमु पीईअलो शकहू? किंवा जो बाप्तिस्मे आय लेही होय तो तुमु लेऊ सेकेहे नाहाकोत? 39अने तिये तियाहा कोयु, “आमाहा कोहू शकतो.” अने येशु तियाहा कोयु, तो पिदो आय पीही होय तुमु पीईअलो सेकतेहे अने तो बाप्तिस्मे जो आय लेही होय तुमु लेऊ सेकतेहे 40पोन आपाआ हाजाडी किंवा डावासाईटोहो बोअहाळीलो माआ काम नाहा पण त्यांकोअता होय याकोअता तीयार कोल्यु होय. 41एके ऐ होमलित दहा शिष्य याकोब अने योहानापो रागावीत गोये. 42कोईत येशु तियाहा जागे हादीत कोयु, तुमामे मालुम होय का जो अन्यजाति अधिकारी होमाज्या जात्लू ते तियापो राज्य कोअता अने तीयाम जे वोडो होय ते तियापो राज्य कोअता. 43पोन तुमामे एहलो नाहा जो कोडु तुमामे वोडू ओवुहू इच्छितो तिये तुमामे सेवक उवे, 44अने जो तुमामे अधिकारी बोनिलो मांगत्लू तिये आखाआ दास बोनिलो जोवे. 45काहाके माअहा पोऱ्या पण आपाआ सेवा कोईलाकाजे नाहा पण सेवा कोअला अने कोअता जो वेसातो घेण्यासाठी आपाआ छुटकारा जीव आपुहू आवयू होय.

आंदलू बरतिमाई हाजु ओवयु

(मत्ती 20.29-34; लूका 18.35-43)

46ते यरीहो शहर पुग्या अने जांहा तो आपाआ शिष्य अने होमला वोडो गर्दीआरी यरीहोमरोत बारथे जात ओते ताहा बर्तीमय नावाआ एक आंदलू भिकारी जो तिमय चा पोऱ्या ओतु वाटेए किनारावपो बोहयु ओतु. 47जाहा तिये होमल्यु का ओ नासरी येशु होय ताहा तो आळीही लाग्यू, ओ येशु दाविदाआ पुत्रा, मापो दया को. 48केत्येकोजो धमकाव्यो आपित कोयु का तो ठावकू रोंहु जोवे, पण तो फासी जोरे आअडीला लाग्यू दाविदाआ पुत्रा, मापो दया को, 49ताहा येशु थोबिलो कोयु, तियाहा हादाडा अने माहुहु तियाहा ओ कोयु हादाडये, धीरज तो, अने उठ तो ताहु हादीत होय. 50अने तो आपाआ कापडो होमला सेटे टाकी आप्यू अने कुदित उठ्यू अने येशुआरी आवयू. 51येशु उत्तर आपित कोयु, ताहु नाहाकोत लागेहे का आय ता कोअता कोहू? अने आदलाही तियाहा कोयु, माआ गुरु, माहु पालीलो होय 52येशु तियाहा कोयु, निहित जा ताआ विश्वास ताहु हाजो कोल्यु होय तो लागेज पालाहू लाग्यू अने वातेम तियाआ फासाडी जाऊ लाग्यू.

Currently Selected:

मरकुस 10: NOINT

Highlight

Copy