मरकुस 1

युहन्ना बप्तिस्मा आपनाराआ संदेश

(मत्ती 3.1-12; लूका 3.1-9,15-17; युहन्ना 1.19-28)

1ओ परमेश्वरोओ पोऱ्या येशु ख्रिस्त याविषयी सुसमाचारो सुरवात होय. 2यशायाह संदेष्टाआ ग्रंथात लेखिलो होय का, “होमला आय आपाआ दूत ताआगाडी मोकलित होय, तो ताआ मार्ग तीयार कोए.” 3डोगोम घोषणा कोअनाराआ शब्द होमला आवीत होय “प्रभु कोअता वाट तीयार को.” “अने तियाआ वाट सिद्ध को.” 4योहान माहुंहु जंगलूम बाप्तिस्मे लेवा पापो माफी एहली घोषणा कोईत प्रकट ओवयू. 5तेहलाम आरन्यो यहुदा देश अने यरुशलेमकर तिया जागे आव्ये अने तिये स्वताची पापे मानीत यार्देन खाडीम त्याआरोत बाप्तिस्मे लेदो. 6योहान उटडाहा सिंज्याआ कापडे पाघरीलो एहलो तियाआ कमरूम सामडाआ कोमरबोंद एहलो अने तो टोळ अने रानमध खायलो एहलो. 7तो घोषणा कोईत कोयो एहलो, मांपोरोत समर्थ एहेलू कोडु एक माहहू मापासाडी आवीत होय; माआ तियाआ चप्पलो बंद लागाडी सोडीला तीयाहाभी माआ लायकी नाहा. 8आय तुमाआ बाप्तिस्मे पायोंवाही आपित होय, पण तो तुमाआ बाप्तिस्मे पवित्र आत्मावांहि कोअनारू होय.

येशुउ बाप्तिस्मा

(मत्ती 3.13-17; लूका 3.21-22)

9तियाअ दिहोम एहलो उवे का येशु गालीलामे नासरेथामरोत आवयू अने योहानाआ आथोवाही यार्देन खाडीम तिया बाप्तिस्मे ओवयू. 10जेहलो तो पाअयोपोरोत उपो आवयू, जुग विदारले होय अने आत्माआ कबूतरो होस रुपोमे आपापो उतरीलो होय एहलो तियाहा देखायो. 11तेहलाम जुगोमोरत एहेलू आवाज आवयू का, “तू माआ पोऱ्या, माहु परम प्रिय होय, तोओ बारामे आय संतुष्ट होय.”

येशुउ परीक्षा

(मत्ती 4.1-11; लूका 4.1-13)

12लागेज आत्मावांहि तियाहा लगेंच डोगोम मोकल्यीत. 13त्याजागे शैतान तियाआ परीक्षा लेत ओतलू तो डोगोम सालीह दीही रोला, तो वनपशुमेहे ओतु, अने स्वर्गदूत तियाआ सेवा कोईत ओते.

गलील मेहे येशुउ सन्देश

(मत्ती 4.12-17; लूका 4.14-15)

14योहानाआ अटक उवलानंतर येशु गलीलाम आवयू अने परमेश्वरोओ राज्याआ सुवार्ता कोहू लाग्यू. 15तो कोयु काळाआ पूर्णता उवी होय अने देवोओ राज्य जागे आव्ये होय पश्चाताप को अने सुवर्तेवर विश्वास को.

चार मासाराहा हाद्लोओ

(मत्ती 13.10-17; लूका 8.9-10)

16जांहा येशु गालील समुद्राआरी रोत जात ओतलू तियाहा शिमोन अने तिया पाही आंद्रिया ओ समुद्राम जाळे टाकत्ले देखायो, काहाके ते मासे दोनाराआ ओते. 17येशु तियाहा कोयु, मा फासाडी आव, म्हणजे आय तुमाहा मांहे तोअनारु उवे एहलो कोअनारू. 18फासाडी ते जालो सोडीत लागेज तियाआ फासाडी आव्ये. 19तिहीरोत आगाडी जातु ओतु तेहलाम तियाहा जब्दीचा पोऱ्या याकोब अने तिया पाही योहान ओ नावीम जाली हुदारते देखायो. 20अने तिये लागेज हादाडये, फासाडी ते लागेज आपाआ बाह्हू जब्दी याहा मजदूरो आरी नावूमे सोडीत तिया फासाडी गोये.

दुष्टआत्मा सी पीडीत मांहोहो छुटकारु

(लूका 4.31-37)

21फासाडी ते कफर्णहुमाम गोये अने लागेज तिये शब्बाथ तेदीही सभास्थानात जात शिक्षण आप्लु. 22तियाआ शिक्षणापोरोत मांहे थक्क उवे, काहाके तो तियाहा शास्त्री माहुंहोस नाहा ताहा अधिकार ओय एहलू हिकाडतो ओतु. 23तियाआ टायमोमें तियाआ सभास्थानात अशुद्ध आत्माआ लागल्यो एक मांहु ओतु 24तो आयडीत कोयु, ओ येशु नासरी, तू आमा माय काहा गुंगदिलो? आमाआ नाश कोईलाकाजे आवयू का नाहाकोत? तू कोडू होय ओ माहु मालूमे होय, देवाआ पवित्र तो तांहुज होय. 25येशु तियाहा धमकाव्यो कोयु, चुप रो अने यामेरोत निह 26तेहलाम अशुद्ध आत्माआ तियाहा निपटी जोरेज आअड्यू अने तीयामरोत निहित गोल्यो. 27तेहलाम ते एवडे थक्क उवे का ते एकमेकाहा फुसिलो लागाडीत, ओ होय तेबी नाहाकोत? नाहाकोत ए अधिकार युक्त नवो हिकवन ओ दुष्ट आत्माहा ए आज्ञा कोअत्लू अने ते तियाआ होमलित्ली. 28ए तियाआ वाहवा लागेज गालीलाआ चारवोगेरोत आखे भागुम फेलितगोई.

बीमार मांहोहो हाजु कोअलोओ

(मत्ती 8.14-17; लूका 4.38-41)

29सभास्थानामरोत निहीलानंतर ते लागेज याकोब अने योहान त्याआरी शिमोन अने आंद्रियाआ कोओ गोये. 30शिमोनाआ हाविह्ही जाखो ताव मांदवाड्यू पोड्यी ओती, त्याविषयी लागेज तिये तियाहा कोयु. 31तेहलाम तिये जागे जात तिया आथ तोईत तीही उठविले अने तीई ताव निघाल्यू, अने तियाआ सेवा कोहू लागीई. 32दिह बुडेताहा हांजेपो माहु आखे दुष्टात्मा अने तिया जागे लाविले. 33अने सबंध शहर बाअणारी आव्ये. 34तेहलाम नाना एह्लाम रोगोम पोडीत रोल्या खूप मांहोहो तिये हाजो कोल्यु अने अनेक दुष्टात्मा काढीलो; तियाअ दुष्टात्मा तिये ओलख कोईत तिये तियाहा गोगूहु नाहा देदे.

एकान्त मेहे येशुउ प्रार्थना

(लूका 4.42-44)

35कोईत तो वेगीई वोडो वेगर्युज उठित बारथे गोल्यो अने जंगलूम जात तीही तिये प्रार्थना कोअयी 36तेहलाम शिमोन अने तियाआ होबती तिया होद. कोईत गोये 37अने तो जोडल्यापो ते तियाहा कोयु, आखे मांहे आपाआ होद कोईत होय. 38तेहलाम तो तियाहा कोयु, माहु आसेपासेए गावून उपदेश कोअता आवे कोईत आपु दिहरी जागे जाऊ काहाके इयाच उद्देशावाही आय निहयू होय. 39फासाडी तो आरन्यो गालील माय तियाआ सभास्थानात जात उपदेश कोईत अने दुष्टात्मा काडीन फिरीत.

येशु कोड़ीही हाजु कोअलोओ

(मत्ती 8.1-4; लूका 5.12-16)

40तेहलाम एक कुष्ठरोगी तिया जागे आवयू अने त्याआगाडी टोसणे टेक्यू तियाहा विनंती कोहू लाग्यू अने तियाहा कोयु आपाआ इच्छा होय ताहा माहु शुद्ध कोईलाकाजे आपु समर्थ होय.

41तेहलाम तियाहा तिया तरस खादु तिये आथे आगाडी कोईत तियाहा स्पर्श कोअयु अने कोयु माआ इच्छा होय, शुद्ध होय. 42तेहलाम लागेज तो कुष्ठरोगी शुद्ध ओवयू. 43ताहा तो तियाहा चेतावणी आप्यी अने लागेज मोकलित आप्लु. 44अने कोयु पाला, कोडाआ याविषयी किबी मा कोही, ताहा जात स्वतः याजकाहा देखाळ अने तियाहा प्रमाण पोटुहुजोवे कोईत तू आपाआ शुद्धीकोअता मोशेई निवडीलेले अर्पण को याकोअता का तू शुद्ध होऊला साक्षी प्रत्येकाहा सोमजे. 45पोन तो बारथे गोइत्लुताहा घोषणा कोईत तियाअ गोठीकोता एवडे प्रसिद्ध कोल्यु का येशुहू उघडपणे शहरामे जाता नेआवतली; कोईत तो बारथे डोगोमेज रोला तेबी मांहे चारीवोलेरोत तिया जागे आविलो.

Currently Selected:

मरकुस 1: NOINT

Highlight

Copy