मत्ती 26

येशुहू माअलो योजना

(मरकुस 14.1-2; लूका 22.1-2; युहन्ना 11.45-53)

1जाहा येशु ऐ आखी गोठ कोत देदु ते तियाआ चेलाहा कोहू लाग्यु. 2तुमामे मालुम होय का बेन दिहायापासाडी वल्हांडन तिवार आवीत होय अने माअहा पोऱ्या क्रूसापोओ सोडविला कोअता तोईत आप्यू जानारू. 3तेहलाम मुख्य याजक अने माहा बाह्हू प्रमुख याजकाआ खोलीम एकटा, महायाजकाअ नाव कायफा ओते. 4अने तिये आपसामेहे येशुहू गुपचुप तोईत माईत टाकिलाआ कट रर्च्योहो. 5पण ते कोओलो आखाआ टायमोमें नाहा का एहलो उवूंहू नाहा का माहुंमे गडबड ओतगोयु जाइअलो.

येशुपोओ बहुमूल्य इत्रोओ छिडकाव

(मरकुस 14.3-9; युहन्ना 12.1-8)

6जांहा येशु बैथानिया शिमोन कोढी च्या कोअमे ओतु. 7तेहलाम एक बाय संगम खोराआ बासनाम बहुमूल्य तेल घेऊन येशुआरी आवयी अने जांहा ते रोटू कोईलाकाजे बोह्ये, तेहलाम तियाआ मुंडकापो तीही ओतीत आप्लु. 8पण शिष्यांनी ओ पालीत रागावीत गोये कोहू लागाडीत, ओ काहा नाश कोल्यु? 9आव तेलुहू जाखो किमती वेसेत गोरब्योहो रुपये आपुहू शकत ओते. 10ओ होमजीत येशु तियाहा कोयु, तुमु आव बोयिंही काहा त्रास आपत्ले? नाहाकोत आव याकोअता का तीही माकोअता हाजो कोल्यु होय? 11गरीब ताहा तुमाआरी कायम रोत्ले, पण आय तुमाआरी हमेशा रोही नाहा. 12जांहा तीही माआ डीलोपो ओ सुंगधीत तेल ओतिला ओ याकोअता ओतिला का माआ जुना टाईमोपो तीयारी तीही कोअयी. 13आय तुमामे खोरोज कोत्लू, आखे जगात जीही का ओ सुसमाचार आपलो आवे तीइही आव बोहीही कामाला वर्णन पण ओर कोअलाआ आवे.

यहूदा ईस्कोरियोतीई विश्वासघात

(मरकुस 14.10-11; लूका 22.3-6)

14तेहलाम बारा मायरोत एक ज्याआ नाव यहुदा इस्करियोती ओते मुख्य याजका आहाने गोल्यो. 15अने तिये कोयु, जर आय येशुहू तुमाआ आथे तोईत आपी ताहा माहु नाहाकोत आपी? ने तिये तियाहा सांदीई तीस सिक्के तोलीत आप्लु. 16तेहलाम त्यापोरोत तो तियाहा तोईत आपलो कोअता योग्यवेळ होदहू लाग्यू.

चेलारी फसहोओ आखरी खाणों

(मरकुस 14.12-21; लूका 22.7-14,21-23; युहन्ना 13.21-30)

17फासाडी शिष्य बेखमीर रोटाहा तिवाराआ पाल्या तेदीही कोईली, येशु जागे आविलो फुसुहू लागाडीत, ताहु का बेखमीर भाकर खालो तिवार पालीलाकोता तीयारी कोईली एहलो लागेहे? 18तिये कोयु नगरोत तियाअ व्यक्तीई जागे जात तियाहा कोआ गुरु कोयु होय माआ वेल जागे होय माहु माआ शिष्याआरी बेखमीराआ तिवार पडिलो होय. 19तेहलाम येशुउ आज्ञेनुसार शिष्यांनी होणाहा तिवारो तीयारी कोअयी. 20जांहा हांजेपो उवी तेहलाम ते बारा शिष्य येशुआरी रोटूखाहू बोह्ये. 21जांहा ते रोटू खाता ओता तेहलाम तिये कोयु आय खोरोज कोत्लू का तुमा मेहेरोत एक माहु तोईत आपी. 22योपो ते जास्तीज दुखित ओतगोयु एक-एक जण तियाहा फुसिलो लागाडीत, प्रभू आयताहा नाहा ने? 23तिये कोयु तो जीआ माआरी ताटमेहे आथे टाक्यू होय तोज माहु तोईत आपी. 24माअहा सुआहा ताहा जेहलो त्याविषयी लेखिलो होय तेहलूज ऊवणारोज होय पण तिया धिक्कार होय ज्यावाही माअहा पोऱ्या तोईत आपलो आवे, तियाअ मांहाकोअता हाजो ओते जर तिये जन्मो लेधलो कायना ओतो. 25तेहलाम तियाहा तोईत आपणारो म्हणजे यहुदाने कोयु रब्बी नाहाकोत आय होय तो? तिये कोयु तू स्वताआ कोत आप्लु.

प्रभु भोज

(मरकुस 14.22-26; लूका 22.15-20; 1 कुरिन्थि 11.23-25)

26जांहा ते रोटू कोईत ओते येशु भाकर लेदि अने आशीर्वाद मागीत्ल्यो भाकर तोडीत शिष्यांआ आपित कोयु, ल्या अने खा ओ माआ डील होय. 27फासाडी तिये पिदो लेदो आभार महांआ अने तियाहा आपित कोयु तुमु आखे यामेरोते पिवा. 28काहाके ओ माआ कराराआ रक्त होय जे माहा कोअता पापाआ माफीकोता ओतिला जानारू होय. 29पण आय तुमामे कोत्लू का द्राक्षरस ओमोरोत तियाअ दिहेजा पीही नाहा तोपोरोत आय आपाआ बाह्हाआ राज्याम नवो द्राक्षरस पीही नाहा. 30फासाडी ते गीत गावित जैतुनाआ डोगोपो सोडवीत गोये.

पतरसो इन्कारोओ भविष्यवाणी

(मरकुस 14.27-31; लूका 22.31-34; युहन्ना 13.36-38)

31तेहलाम येशु तियाहा कोयु, आज राती आखे तुमु माविषयी अडखळाल, एहेलू शास्त्रलेख होय का आय. मेंढवालो देही अने कडपाम्रोत मेंढे तितर बितर ओतगोयु जानारू. 32पोन जिवंत उवेताहा आय तुमापेले गालील मेहे जानारू. 33यापो पेत्राई कोयु जेबी आखे तापोजेसे अडखळीत जानारू पण आय केधीज अडखळनार नाहीत. 34येशु तियाहा कोयु आय खोरोज कोत्लू का आजुजे राती कुकडाआ वाहलो पेल तू माहु तीन टायमोआ नाहाकोही. 35पेत्राई तियाहा कोयु जर माहु ताआरी मोईला पण लागे तेबी आयताआ नकार कोअनारू नाहीत, आखे शिष्यांनी पण एज गोठी कोल्यी.

गतसमनी बगीचा मेहे प्रार्थना

(मरकुस 14.32-42; लूका 22.39-46)

36तेहलाम येशु त्याआरी गेथशेमाने नावोओ जागापो आवयू अने आपाआ शिष्यांआ कोयु, जोपोरोत आय जीहीजानारो प्रार्थना कोअत्लू तुमु इहीजा बोहीलो. 37तिये आपाआरी पेत्र अने जब्दिई बेन पोऱ्या लेधलो अने दुखित अने मेहनती ओवुहू लाग्यू. 38फासाडी तिये तियाहा कोइतलु माआ मोन खिन्न होय आय मोअनारू, एवडोज खिन्न होय इहीजा थोबा अने माआरी जागतू रो. 39फासाडी तो थोडू आगाडी गोल्यो पाया पोडीत प्रार्थना कोहू लाग्यू, ओ माआ ओबा, जर होतजाई होय ताहा ओ पिदो मापोरोत निहित जाऊ आप तेबी पण माआ नाहा ताआ इच्छा पुरो ओवुहू आप. 40तेहलाम तो शिष्याआरी आवयू अने तियाहा हुवतले पालीत पेत्राहा कोयु नाहाकोत तुमु माआरी थोडूटायम पण जगू सेकेले नाहा? 41जागतू रो अने प्रार्थना कोईत रो का तुमु परीक्षेमेहे पोडहू कायना आत्माआ ताहा तीयार होय पण डील दुर्बल होय. 42फासाडी तिये दिहरीवेले जात एह्ली प्रार्थना कोअयी, ओ माआ बाह्हू, जर ओ पिदो पिलाशिवाय टोलोंत जात ने ओयताहा ताआ इच्छा ओवुहू आप. 43तिये फाशी फासाडी आविलो हुवतले पाल्लये काहाके तियाआ डोआं हुवितो पाअया उवे ओते. 44तो तियाहा फासी सोडीत निहित गोल्यो अने तेज गोठी कोत तिसरीवेले प्रार्थना कोहू लाग्यू. 45फासी फासाडी तो शिष्याआरी आविलो तियाहा कोयु काहा तुमु ओमेजा आराकोईत हुवीत रोल्या होय? पाला वेल आविलो गोयी होय माअहा पोऱ्या पापी मांहाहा आथे तोईत आप्यू जात होय. 46उठा, चाला अने पाला तोईत आपणारो जागे आवयू होय.

येशुहू बंदी बोनावलोओ

(मरकुस 14.43-50; लूका 22.47-53; युहन्ना 18.3-12)

47जांहा तोओ कोयु ओतु, ताहा पाला यहुदा बारातून एक ओतु आविलो गोल्यो अने त्याआरी तलवार अने डेगाऱ्या लेद्लो एक वोडू टोळां ओतु ज्याहा मुख्य याजक अने बाह्हू इये मोक्ल्यीत ओते. 48तोईत आप्नारावाही तियाहा ए निशाणी आप्यी ओती, ज्याचा आय चुंबन कोअनारू तोज रोही तियाहा तोईत लेअलो. 49तो लागेज येशुआरी आविलो बोलतुल्यो ओ स्वामी नमस्कार अने तियाआ चुंबन लेधलो. 50येशु तियाहा कोयु दोस्ता ज्या कामा कोअता तू आवयू होय तियाहा को, तेहलाम तिये येशुउ जागे आविलो तियाहा तोईत लेधलो. 51अने फासाडी पाला येशुउ होगात्याम्रोत एकाने आथे वाढवून तलवार खेचेहे अने महायाजाकाच्या नोकरापो तिया कान वाडी टाक्यू. 52ताहरू तेहलाम येशु तियाहा कोयु आपाआ तलवार म्यानोमे मेका काहाके ते आखे जे तलवार ईविशीत ते तलवारीवाही नाश ओये. 53किंवा नाहाकोत तुमु विचार कोअता नाहाकोत का आय आपाआ बाह्हाहा विनंती कोहू शकत नाहा अने तो लागेज स्वर्गदूतो बारा सैन्याचा दलोमरोत सैन्यदल माआ अधीकारोम कोईत आपी. 54पण तेहलाम पवित्रशास्त्र केहलु पुरो उवे का ऐहलेच उविलो जरुरी होय? 55तेहलाम येशु गोर्दी कोयु नाहाकोत तुमु तलवार अने डेगाऱ्या घेऊन माहु तोहू आवीत होय जेहलो नाहाकोत आय कोडु डाकू होय? आय दाडीअ मंदिरोम बोहित हिकाडतो ओतू, अने तुमु माहु तोअल्यो नाहा? 56पण ओ आखे याकोअता उवे का संदेष्टाआ वचन पुरो उवे तेहलाम आखे शिष्य तियाहा सोडीत निहित गोये.

केय्फा सामने येशु

(मरकुस 14.53-65; लूका 22.54-55,63-71; युहन्ना 18.13-14,19-24)

57जिंये येशुहू तोअल्यो ओते ते तियाहा कैफा महायाजका आगाडी घेऊन गोये, तीही शास्त्री अने बाह्हू एकठे ओते. 58पेत्र पण थोडू सेटेरोत तियाआ फासाडी महायाजाकाच्या खोलीहीजा पुगीतगोयू, अने तीही माय नाहाकोत ओते ते पालाहू पहारे कऱ्याआरी बोहित गोल्यो. 59मुख्य याजक अने आखे न्यायसभा येशुउ विरूद्धाम झुटी साक्ष मीडवीहे प्रयत्न कोईत रोल्या याकोअता ते तियाहा माईत टाकही. 60साहा अने वारुज खोटो साक्षीदार आव्ये ओतो तेबी तो तियाहा मिल्यू नाहा तेबी आखरी बेन आविलो कोयु का, 61साहा आव महुहू कोयु होय, आय परमेश्वरोओ मंदिराहा पोडीत तियाहा तीन दिहोम फासी बोनाडीत शकतो. 62साहा तेहलाम महायाजाकावाही उभे रोत तियाहा कोयु, काहा तू उत्तर आपित कायनाहा, ओ मांहे ताआ बद्दल नाहाकोत साक्ष आपत्ले? 63साहा पण येशु ठावकू रोला योपो महायाजाकावाही तियाहा कोयु, आय जिवंत देवाची शपथ आपोहो. जर तू परमेश्वरोओ पुत्र ख्रिस्त होय ताहा आमाहा कोत आप. 64येशु तियाहा कोयु, तू स्वतः एहलो कोयु तेबी पण आय ताहु कोत्लू का या आगाडी तुमु माअहा पोऱ्याहा आखे सर्वशक्तीमानाच्या हुदिवोल बोहीतरोल्यु अने वादलामे आवातल्या पालीलो. 65यापो महायाजक आपाआ कापडे काढीत कोहू लाग्यू का, इये परमेश्वरोओ निंदा कोअयी होय, ओमे फासी आमाहा साक्षीदाराआ नाहाकोत गोरोज होय? पाला तुमु निंदा कोअयु होय. 66ओमे तुमाआ नाहाकोत विचार होय? तिये उत्तर आप्लु तो मोईतगोल्यू शिक्षाआ योग्य होय. 67तेहलाम तिये तियाआ सोबाडीपो थूप्ये, कोडु तियाहा मुठीवाही माअये, कोडु तियाहा चपडाक माईत कोयु, 68ऐ, ख्रिस्ता, भविष्यवाणी कोईत आमाहा कोअलो का ताहु कोडु माअये.

पतरसो द्वारा येशुहू नाकारलोओ

(मरकुस 14.66-72; लूका 22.56-62; युहन्ना 18.15-18,25-27)

69पेत्र खोलीम बारथे बोहयु ओतु एवडाम होमला दासीने आविलो तियाहा कोयु, तू पण गालीली येशुआरी ओतु. 70पण तीही नाकारीत तियाअ आखे आगाडी तिये कोयु, माहु समाजैल नाहा का तू नाहाकोत कोयु होय. 71तोयो तो बारथे जात आगी कोआता गोल्यो तेहलाम होमला बाईने तियाहा पालीत तीइही ओते तियाहा कोयु, ओ माहुहू पण नासरेथ येशुआरी ओतु. 72तेहलाम तिये शपथ खात नकार आपित फासी कोयु, आय आव माहुंहु उलखित्लू नाहा. 73फासाडी टाईमोम जे तीही उभे ओते ते पेत्रांआरी आविलो तियाहा कोयु, खरोज तू पण त्यामेरोत होय काहाके, ताआ बुली ताहु प्रकट कोअते. 74तेहलाम शपथ खात धिक्कार कोअला लाग्यू, आय तियाअ माहुंहु उलखित्लू नाहा अने एतांम कुकडू वाहयू, 75तेहलाम पेत्राहा जी गोठी येशु कोल्यी ओती ती ओर आवयी का, कुकडू वाहलो आगाडी तू माहु तीन कावाआ नाकारिही, अने तो बारथे जात वोडू जोरेज रोडा लाग्यू.

Currently Selected:

मत्ती 26: NOINT

Highlight

Copy