मत्ती 25

वरोओ वाट जुवत्ली दस कुवारीई दृष्टांत

1ताहा होर्गाराज ती दोह कुवारीई होस होय ज्या आपाआ दिवु लेत वरोहो भेट कोअहु कोअता निकल्या. 2तीयाम पाच मूर्ख अने पाच हुशार ओत्या. 3काहाके मूर्ख कुवारिनी दिव लेदो तेहलाम तिये आपाआरी तेल लेधलो नाहा 4पण ज्या हुशार कोयु तिये आपाआ दिव्याआरी कुड्याम तेल पण लेधलो. 5जांहा वरोओ आविलो वाअ ओवयू ओतु तेहलाम ते आखे हुवीत गोये. 6पण आर्दी राती आवाज आवयु का पाला वर आवीत होय तियाहा मिलनेकोता साला. 7तेहलाम तियाअ आखे कुवारी आविलो बोहोल्या अने आप आपाआ दिवे व्यवस्थित कोहू लाग्या. 8अने मूर्ख कोयु तियाअ हुशार कोयु तियाहा कोतल्या आमाहाबी तुमाआ तेलोमेऱ्या थोडूज दया काहाके आमाहा दिवे ओमे उलवीत जानारू होय. 9पण हुशार कोयु तिये उत्तर आप्लु नाहा ओ तुमा कोअता अने आमा कोअता उरीलो नाहाहोज उवे का तुमु दुकानदारापो जात तेल वेसातो लाविलो. 10जांहा ते वेसातो लेई निहित गोये तेहलाम वर आविलो गोल्यो अने ज्या तीयारिमे कोयु तियाअ त्याआरी वेहवालोम निहित गोयी तेहलाम दरवाजू बंद कोईत आप्यू. 11वरोहो ते मूर्ख कुवारी आविलो कोहू लाग्या मालिक, आमाआ कोअता बी दरवाजू उगाडीत आप. 12पण तिये उत्तर आप्लु आय तुमाहा खोरोज कोत्लू आय तुमाहा ओलखीतू नाहा. 13त्यापोत जागतू रो काहाके तुमामे तो दीही अने तो समय पण मालुम नाहा.

तीन दासो दृष्टांत

(लूका 19.11-27)

14फासाडी ओ तिया मांहाहोस होय जो प्रवासाम जानारू ओतु अने जीआ आपाआ नोकराहा हादीत आपाआ धनदौलत होफहोपिन आप्यी. 15तिये एकाहा पाच तोडा, दिहीराहा बेन तोडा अने तिसराहा एक तोडू म्हणजे प्रत्येकाआ सामर्थ आप्लु अने प्रवासाम निहित गोल्यो. 16ज्याहा पाच तोडा आप्लु तिये लागेज जात व्यापार कोअयु अने तीयावाही पाच तोडा फासी जुळाविते. 17ह्याप्रमाणे ज्याहा बेन तोडा आप्लु ओते तिये पण ऐहलेच बेन तोडा फासी कोमाविले. 18पण ज्याहा एक तोडू जोडयेहे ओते तिये जात जमीन खोदिली अने आपाआ मालक्योहो आपलू पोशाआ तीयाम निकाडीत मेकलू. 19जाखो दिहीआ फासाडी तिया पावरोओ मालक आवयू अने तियाआ हिशोब लेई लाग्यू. 20तेहलाम ज्याहा पाच तोडा जोडयेहे ओते तिये फासी पाच तोडा लेतआवीत आप्लु अने कोयु, मालिक, तू माहु पाच तोडा आप्लु ओते, देखू तीयावाही आय फासी पाच तोडा कामावोह्यो, 21तियाआ मालक्योहो कोयु, शाब्बास, माआ हाजा, विश्वासु पावोरआ, तू जराक गोठीपो विश्वासयोग्य रोला, आय ताहु खूप वस्तुपो अधिकारी बोनवीही आपाआ मालकाहा आनंदाम सहभागी होय. 22फासाडी ज्याहा बेन तोडा जोडयेहे ओते तो पावर आविलो कोयु, मालिक, तू माहु बेन तोडा आप्लु ओते, देखू आय तियापो फासी बेन तोडा कोमाविले. 23मालिक तियाहा कोयु, शाब्बास, हाजा अने विश्वासाजोगो पावोरआ, तू जराक गोठीपो विश्वासयोग्य रोला, आय ताहु खूप वस्तूंऊ अधिकारी बोडाविही आपाआ मालक्योओ आनंदाम सहभागी होय. 24फासाडी ज्याहा एक पोशाआ मिल्यू ओतु तो आपाआ मालकोहू आविलो कोयु, ओ मालिक, माहु मालुम ओते का, तू कडक माहुहू होय, जीही पेईलो कोईत नाहा तीही वाडीलो कोअता. अने जीही फैलीत नाहा तीइही एखटो कोअता 25आखरी आय बित गोल्यू अने ताआ रुपयाला आय जमीनोम निकाडीत आप्लु, पाला, जे ताआ होय ते घेऊन ले. 26पण तियाआ मालक्योहो उत्तर आप्लु, ऐ दुष्ट अने आळशी पावोरआ, ताहु ओ मालूमे ओते का जीही आय पेईलो कोईत नाहा तीइही आय वाडतुलू अने जीही फैलावीत मेक्ल्ये नाहा तिहीरोत एखटो कोअत्लू. 27ताहा फासाडी माआ धन माहु सावकारापो मेकुहू जोवे ओते, म्हणजे आय आवेताहा माहु व्याजासकट फासी जोडयेहे ओते. 28ताहा यापोरोत ते एक तोडू ल्या अने ज्याआपो दहा तोडा होय तियाहा आपित दया. 29काहाके ज्याआपो होय तियाहा फाशी आपलो आवे अने तियाआ जागे जास्तीज ओतगोयु जाइअलो पण ज्याआ जागे नाहा तियाआ त्यापोरोत ते पण लेधलो जाइअलो जे तिया जागे होय. 30आवा बिनकामो नोकराहा बारथे आंदाराम टाकीत दयाजिहि रोडलो अने दात साविलो होय.

येशु संसारोओ न्याय कोऐ

31पण माअहा पोऱ्या आपाआ गौरवात आविलो अने आखे स्वर्गदूत पण तियाआ आरी आविलो तेहलाम तो आपाआ महिमामय राजासनापो बोहोनारो. 32अने आखे जाती तियाआ आगाडी एकठे कोअलाआ आवे अने तो तियाहा एक दिहरा त्यापोरोत जुदो कोआ जेहलो मेंढवालो बोकडाहा मेंढरापोरोत जुदो कोअत्लू. 33तो मेंढराना आपाआ हाजावोगे अने बकऱ्यांआ डावासाईटोहो कोअही. 34तेहलाम राजा आपाआ हाजला आथो वोगऱ्याहा कोय, ओ माआ बाह्हू धन्य माहुमे, आव, तियाअ राज्याआ अधिकारी बन्यो जो जुगाआ पेलेरोत तुमा कोअता बनविल्यो होय. 35काहाके आय बुख्यो ओतू अने तुमु माहु खाहुं आप्लु आय तीह ओतू अने तुमु माहु पाई पिवाल्यो आय बिहरादेशोआ ओतू अने तुमु माहु कोअमे राख्यो. 36आय उघडा ओतू तुमु माहु कापडे पेआडे आप्लु आय मांदवाड्यू ओतू तेहलाम माआ सेवा कोअयी आय बंदिकोअमे ओतू तेहलाम तुमु माहु मिलीला आव्ये. 37तेहलाम धोर्मी तियाहा उत्तर आपी, प्रभू आमाहा ताहु कोयो बुख्यो पालल्ये अने रोटू आप्लु? किंवा तोर्ह्यु पाल्यू अने पाई पिवाल्यो अने. 38आमू ताहु कोयो बिहरादेशोआ पाल्लये अने कोअमे मेकल्ये? किंवा उघडा पाल्यू अने कापडे काटाआ. 39आमू कोयो ताहु मांदवाड्यू किंवा बंदिकोअमे पाल्लये अने मिलीला आव्ये. 40यापो राजा तियाहा उत्तर आपी, आय तुमामे खोरोज कोत्लू काजे किबी तुमु माआ आव हाणाम हानू पाहीमोरोत एकाआरी कोल्यु ते माआरी कोल्यु होय. 41तेहलाम तो बांगडू बाजूवाला कोअही ओ शापित माहुमे मापोरोत सेटे ओतगोयु तियाअ अनंत आगीम जात गुगदा जे शैतान अने तियाआ दूतांसाठी तीयार कोल्यु होय. 42आय बुख्यो ओतू तेहलाम तुमु माहु किबी खाहुं आप्लु नाहा आय तीह ओतू तेहलाम माहु पाई पिहीलेपोत आप्लु नाहा. 43दिहरादेशोआ ओतू तेहलाम तुमु माहु आपाआ कोअमे मेकल्ये नाहा उघडा ओतू तुमु माहु कापडे कालीला आप्लु नाहा मांदवाड्यू ओतू अने बंदिकोअमे ओतू तेहलाम तुमु माहु मिलीला आव्ये नाहा 44आव उपो ते तियाहा फुसनारू प्रभू आमाहा कोयो ताहु बुखो, तोर्ह्यु, उघडा किंवा मांदवाड्यू किंवा बंदिलखानो पाल्यू ओतु अने ताआ सेवासाकरी कोअयी नाहा. 45तेहलाम तो तियाहा उत्तर आपी आय तुमामे खोरोज कोत्लू का जो तुमु याआ हाणाम हानू मायरोत एकाआरी कोल्यु नाहा ते माआरी कोल्यु नाहा, 46ओ मांहे अनंत कालिक दंड भोगणार पण धोर्मी अनंत जीवनामे प्रवेश कोअनारू.

Currently Selected:

मत्ती 25: NOINT

Highlight

Copy