लूका 8

येशुउ शिष्या

1तिया फासाडी एहलो उवे का येशु देवोओ राज्य विषयी सुवार्ता कोत्ले ताहा नगर-नगर अने गाव-गाव फिरीत ओतु तियाआ शिष्य पण तियाआ आरी रोत ओते, 2तियाआ आरी किबी बोई पण रोत कोयु तिये माद्वाड्यो अने दुष्टात्मा त्यापोरोत सोडव्ये ओते यामेहे मरिया मग्दलिनी नावाआ एक बुई ओती तीही सात दुष्टात्मा त्यापोरोत सोडव्ये ओते, 3हेरोदाआ कारभारी खोजा याहा लाडी योअन्ना तेहलूज सुस्सना अने दिहरी खूप बोई कोयु याआ बोई आपाहाज वस्तुवाही येशु अने तियाआ शिष्य याआ सेवासाकरी कोईत कोयु.

बीज उरनाराआ दृष्टांत

(मत्ती 13.1-17; मरकुस 4.1-12)

4जाहा नगर-नगर मायरोत लोकांची गोर्दी तिया जागे आवीत ओती तेहलाम तिये तियाहा एक दृष्टान्त कोयू, 5एक खेती कोअनारू आपाआ आकाश बी पेईलाकाजे गोल्यो तिये जांहा बी पेहे तेहलाम किबी बी वाटेपो पोडये अने ते सिडे विसित खात गोये. 6थोड़े खोडकावलो धरतीपो पोडये ते पिगलो नाहा होलकोइते उगविताज वोलीत गोये. 7थोड़े बी काटामेहे पोडये ते वोद्येहे परंतु काट्यांमुळे दाबल्यो गोये. 8थोड़े बी हाजा जमीनोम पोडये ते उग्येहे अने होव पट्ट पेक्षा जाखा फोल आव्ये याआ गोठी कोयु ओतलू वोडो आवाजोवाही कोयु, ज्याआ जागे ऐकावयास कान होय तिये होमले.

दृष्टांतोओ उद्देश

(मत्ती 13.18-23; मरकुस 4.13-20)

9तियाआ शिष्यांनी तियाहा फ़ुस्ल्याआ आव दृष्टान्त अर्थ नाहाकोत होय? 10तो तियाहा कोयु, परमेश्वरआ राज्याविषयी गूढ जाईत लेअले तुमामे आप्लु होय परंतु दिहराहा दृष्टान्त वेले आप्लु होय याकोअता का तियाहा देखाहे ओतलू पाल्हू कायना अने होमलित कोईत होमज्यू कायना.

बीज उरनाराआ दृष्टांतोओ अर्थ

11आव दृष्टान्त अर्थ एहेलू होय बी परमेश्वरोओ वचन होय. 12जेबी वाटेपो पोडये ओते ते ओ माहहू होय का वचन होमलित तेहलाम शैतान आविलो तियाआ मोनोमरोत वचन काढीत लेहो यकोअता का ते विश्वास कोहू कायना अने त्याआं तारण ओवुहू कायना. 13जेबी खोडकावलो जमिनोम पोडये याआ अर्थ ओ होय जे माहहू जांहा वचन होमलित अने आनंदावाही ग्रहण कोअता परंतु तियाआ विश्वास मजबुते नाहाकोईत ते किबी टायमोपोजा विश्वास कोअता अने परीक्षा आवयी का विश्वास मेकीत नाहा. 14अने जेबी काट्यामेहे पोडये होय तियाआ अर्थ ओ होय काजे माहहू वचन होम्लाडित परंतु जांहा ते आपाआ वाटी जातेहे, तेहलाम चिंता धन अने जीवनोमे हुख दुख यामेहे दाबीन जातलेत्याआ उपो पक्को फोल आवीत नाहा. 15अने हाजा धरतीपो पोडल्ये बी याआ अर्थ ओ जे माहहू जे हाजा अने खोरो मोनाकोईत वचन होमलित तियाहा ते ग्रहण पण कोअता फासी ते आपाआ धीरावाही फोल आपत्ले.

दिवाआ दृष्टांत

(मरकुस 4.21-25)

16कोडोबी दिवू बासनाआ नीसे ने मेकतलु होय अने ने खाटलाआ नीसे मेकतलु पोन तियाहा दिवठणीपो मेकतलू म्हणजे जे जागे आवत्ले तियाहा उजालो आपुहू गोयो 17प्रकट उवे नाहा एहलो किबी टापित मेकल्ये नाहा, अने किबी उघडकीस आविलो एहलो किबी गुप्त नाहा 18याकोअता लक्ष्य आपित होमला काहाके ज्यापो होय तियाहा जाखा आपलो आवे ज्यापोओ नाहा त्याआरोत जे देखाहे होय ते पण मागित लेधलो जाइअलो.

येशुउ खरु परिवार

(मत्ती 12.46-50; मरकुस 3.31-35)

19तियाआ वेले येशुउ याह्ही अने तियाआ पाही तिया जागे आव्ये परंतु गर्दीवही ते त्याजागे जाऊ सेकेले नाहा. 20याकोअता येशुहू कोयु गोये का ताआ याह्ही अने पाही बारथे उभे होय ते ताहु मिलुहु इच्छिता. 21परंतु येशु उत्तर आप्लु, माआ याह्ही अने माआ पाहीओ होय काजे परमेश्वरोओ वचन होमलित अने तेहलो सालतेहे.

वारु अने वादुऊ शांत कोअलो

(मत्ती 8.23-27; मरकुस 4.35-41)

22फाशे होमला तेदीही एहलो उवे का तो आपाआ चेलाआरी नावूमे सोढयू अने तियाहा कोयु, चाला आपु समुद्राआ तिवोल जाऊ तेहलाम तियाआ नाव सोडीत. 23जाहा ते नाव चालती ओते येशु निंदेम गोल्यो समुद्राम वादोल उठ्यो अने नावीमेहे पाई पोअहू लाग्यो अने ते संकटाम पोडये. 24ते तियाआ जागे आव्ये तियाहा उठाडीत कोईत कोयु, “गुरुजी, आपु बुडूहु बाजीत रोल्या होय.” ताहा तो उठीत कोईत तिये वाराहा अने लाटांना धमकावयू अने ते थोब्यो अने तियाअ जागापो निवांत उवे. 25अने तिये तियाहा कोयो तुमाआ विश्वास किही ओतु पोन ते बितगोये ओते अने विहरीत गोये ओते ते आपसामेहे कोयु, आखिर ओ होय तेबी कोडू जो वारू अने पाई बेनुहू आज्ञा आपी अने ते तियाआ होमलित लेदे.

दुष्टत्माहा बारथे काड्यु

(मत्ती 8.28-34; मरकुस 5.1-20)

26फासी ते गिरासेनि गालिलाआ भागुम पुग्या जे गालील समुद्राआ तिवोल ओतु. 27जेहलो एतो किनारावपो उतरीलो नगरामेहे एक माहहू तियाहा मिल्यू तीयाम दुष्ट आत्माआ वास कोअयु ओतु जाखो समय पर्यंत तिये कापडे काल्ये निमिले, अने कोआत रोला ने ओतू परंतु कब्रामेहे रोत ओतु. 28जांहा येशुहू तिये पालील्यो तो आअडित तियाआ गूडाम आवयू अने उचो आवजावाही कोयु, ओ महान देवाच्या पोऱ्या, येशु ताहु मापोरोत नाहाकोत हवे? आय विनंती कोअत्लू का माहु पिडा आपुहू नाहा. 29तिये तियाअ दुष्टात्माहा तियाअ माहुमरोत बारथे निहालाकाजे आज्ञा आप्यू काहाके तियाअ अशुद्ध आत्मावांहि तियाअ माअहुहू जाखो टायमोआ तोअल्यो ओते एहलो टायमोमें तियाहा हाकलेवाही बांधीत राखावली कोईत ओते परंतु तो हमेशा ते हाकील तोडीत टोकीत एहलो अने दुष्टात्मा तियाहा जंगलूम घेऊन जात एहलो. 30तेहलाम येशु तियाहा फ़ुस्ल्याआ, “ताआ नाव नाहाकोत होय?” तिये कोयु, सैन्य, काहाके तीयाम खूप दुष्टात्मा ओते. 31ते तियाहा विनंती कोहू लागाडीत का तियाहा अधोलोक कुण्ड मेहे जाऊ आज्ञा मा आपिही. 32ओमे पाला, तोयोज तियाअ जागापो डोगोपो डुकरांआ एक वोडू टोलु चोरतू ओते खराब आत्माआ विनंती कोअयी का आमाहा तियाआ माय जाऊ आपलो तेहलाम तिये तियाहा आज्ञा कोअयी. 33तिया टायमोमें ती दुष्टात्मा तियाअ माहुमरोत निहित तियाअ डूकरामेहे फोहयी अने ती डुकरा धडक गुगदीत जात तियाअ काडापोरोत निसे समुद्रामेहे बुडीत मोइत गोयी. 34त्या हूवरे चारनारा ओ पालीत नाहित गोये अने नगर अने गोवोमेहे जात याविषयी कोयु. 35फासाडीनंतर तीही मांहे जे घोडये ते पालीलाकोता बारथे आव्ये ते येशुहू मिल्ये, अने ज्या माय दुष्टात्मा वास कोल्यु ओते तो माहहू येशुउ गूडाम बोहीतरोल्यु पेल्लु तियाअ माहुई कापडे काल्ये ओते अने तो शुद्धीपो आवल्यु देखायू अने ओ पालीत आखे बितकोईत उवे. 36जिये पालील्यो तियाअ माहु कोयु, दुष्टात्मा लागल्यो माहुहू केहलु हाजू ओवयू. 37यापो गिरासेनि भागोमेऱ्या आखे रेहेवाशाही विनंती कोअयी का तिये तियाअ ती जागेरोत निहित जालो काहाके आखे बितगोये ओते तेहलाम येशु नावूमे आवयू अने फासी गोल्यो. 38परंतु ज्या माहुमरोत दुष्टात्मा निघाल्यू ओतु तो येशुहू आपाआरी आविलाआ विनंती कोईत ओतु त्यापो येशु तियाहा कोयु का, 39कोआ जात जे परमेश्वराने ता कोअता कोल्यु ते आखे कोअलो, तेहलाम तो फासी गोल्यो येशु जे किबी त्यांकोअता कोल्यु ते आखे नगरोत उपदेश कोइत फिर्यु.

रोगी बुई अने मोअली सुईही जीवनदान

(मत्ती 9.18-26; मरकुस 5.21-43)

40ओमे पाला, जांहा येशु फासि आवयु, तेहलाम मांहे गोर्दीवाही तियाआ स्वागत कोल्यु काहाके ते तियाआ वात पालीत ओते. 41तोयोज याईर नावाआ एक माहहू त्याजागे आवयू तो तियाअ मंदिरो धर्म सभांआ यहुदी अधिकारी ओतु तो येशुउ गूडाम आवयू तिये आपाआ कोआ आवे कोईत विनंती कोअयी. 42काहाके तियाआ बारा वर्षाची पोऱ्यी मोअनारू ओती जाहा येशु जातु ओतु ते गोर्दीम त्यापो पोडीत जाहू कोअती ओती. 43तियाआ जागापो एक बुई ओती तीही बारा वर्षापोरोत रक्तस्राव उवनारा ओतु जे किबी तीयीआरी ओते तीही खोर्चू कोईत बोडवाहा आपित टाक्ये ओते परंतु ती हाजी उवी नाहाओती, 44ती तियाआ फासाडी आवयी अने तियाआ कापड़ाआ गोंडाहा स्पर्श कोअयु ताहाज तीई रक्त आविला बंद उव्यो. 45तेहलाम येशु कोयु, ते कोडू होय, जीआ माहु स्पर्श कोअयु होय जांहा आखे नाहाकोत कोईत ओते पेत्र कोयु, आखे माहु ताहु वेडिले होय अने आखे तापो पोडीत होय. 46पोन येशु कोयु, माहु कोडूबी स्पर्श कोअयु होय, काहाके होमज्यू होय मामेरोत शक्ती बारथे निहथी होय. 47तिया स्त्रीने जांहा पालील्यो का आय निकाहू शकली नाहा तेहलाम ती कापीत येशुउ गूडाम आवयी तीही आखे माअहाआ आगाडी कोयु का आय तियाहा स्पर्श कोअयु अने केहलो लागेज हाजी उवी. 48यापो येशु कोयु बेटी, ताहु ताआ विश्वास हाजो कोल्यु होय शांतीई जा. 49तो गोगीतीज ओतु एतांम यहुदी धर्म सभाआ मुख्य याआ कोअमे रोत कोडु आव्ये अने कोयु, ताआ पोऱ्यी मरण पाव्यी होय ओमे गुरुहू मेहनत आपुहू नाहा. 50येशु ओ होमलित, भिईलो नाहा, विश्वास तो, ती वासे. 51जांहा येशु तिया कोअमे आवयू ताहा तिये आपाआरी पेत्र, योहान, याकोब अने पोरीइ याह्ही बाह्हू व्यतिरिक्त कोडाहीबी आपाआरी आवहू नाहा देदे. 52आखे मांहे तियाअ सोहीकोअता रडीत ओते दुखी उवनारा ओते येशु तियाहा बोलतुल्यो, रोडीलो बंद को काहाके ती मोयी नाहा परंतु हुवयी होय 53यापो मांहे तियापो ओहल्ये काहाके तियाहा मालुम ओते का पोऱ्यी मोयी होय 54येशु तियाअ पोरी आथे तोअयू अने तीही आवाज आपित कोयु, “बेटी, उठ” 55अने तीई आत्माआ फासी आवयू अने लागेज उठित उबी रोली येशु आज्ञा कोअयी का यीही किबी खाहुं दया. 56यापो पोऱ्यीइ याह्ही बाह्हू जाखो थक्क उवे काहाके येशु तियाहा आज्ञा कोअयी का जी घटना घोडीही होय ओ कोडाआ कोहू नाहा.

Currently Selected:

लूका 8: NOINT

Highlight

Copy